42 УРОКИ
Со пишинел анди Библия е манушенге, колато си прандеме тай калкенге, колато нанай прандеме?
Бут мануша мислинен, кай нащи те овас щастлива, ако на синям прандеме. Ама ма саворе, колато си прандеме си щастлива, нито саворе, колато нанай прандеме си нещастна. И Библия пхенел, кай нанай значение дали декхой си прандеме или на-а, соскето о дуй-да букя си подаръки таро Дел.
1. Соске си лачшес, ако на синян прандеме?
И Библия пхенел: „Мануш, ковато пранденел, шукар керел, ама кавка, ковато на пранденел керел по-шукар.“ (Четине 1 Коринтяни 7:32, 33, 38.) Соске кавка, ковато на пранденел, „керел по-шукар“? О християня, колато нанай прандеме, си по-свободна, соскето нанай лен ром или ромни, коленге те дикхен, тай ащи те керен по-бут анди служба. Например ащи те жан авере тханесте те проповединен и лачши новина. Ама о най-важно си, кай ащи те овел лен по-бут време, за те ачшон по-лачше амала е Йеховаса.
2. Соске си лачшес, ако синян законно прандеме?
Те овес прандеме също си лачшес. И Библия пхенел: „По-лачшес си те овен дуй, отколкото йекх.“ (Еклисиаст 4:9) Тай ако о дуй-да шунен о съвекя тари Библия, ленгоро семейство ка овел по-шукар. Кана йекх ром тай йекх ромни пранденен законно, он обещинен, кай ка дехен, ка уважинен тай ка ценинен йекх аверес завинаги. Аке соске салка семейства тай ленгере чшаве-да чувствинен пес по-сигурна калкендар, колато просто живинен заедно без подпис.
3. Со пхенел о Йехова калкенге, колато си прандеме?
Кана о Йехова пранденкяргяс е първоне манушен, ов пхенгяс: „О ром ка мукел пе дадес тай пе дая тай ка ачшол йекх пе ромняса.“ (Битие 2:24) О Йехова мангел о ром тай и ромни те дехен пес тай те ачшон заедно жикай си живде. Ов позволинел те развединен пес, само ако йекх лендар пхиргяс упрал околесте. Ако иси изневяра, о Йехова дел калкес, ковато си невинно, о право те решинел дали ка развединел пес или на-аa. (Матей 19:9) О Йехова позволинел о християня те пранденен само йекхе манушеске. (1 Тимотей 3:2)
РОДЕ ПО-ХОРЕСТЕ
Ахальов сар ащи те овес щастливо тай те анес радост е Йеховаске, независимо дали синян прандеме или на-а.
4. Ако на синян прандеме, използвине лачшес то време
О Исусес мислинелас, кай те на овес прандеме си подаръки. (Матей 19:11, 12) Четинен Матей 4:23 тай хоратинен калке въпросиеске:
Сар о Исусес ащине по-бут те служинел пе Дадеске тай по-бут те помагинел околенге, соскето на сине прандеме?
О християня, колато нанай прандеме, ащи те овен щастлива, ако използвинен по време сар о Исусес. Дикхен о КЛИПИ тай хоратинен калке въпросиеске:
Саве шукар букя ащи те керен о християня, колато нанай прандеме?
Жанес ли?
И Библия на пхенел кизоме брешенгоро требе те овел декхой, за те ащи те пранденел. Ама ой пхенел, кай си шукар мануш те жарел те накхел о време, кана си бут терно, соскето тогава о сексуална желания си бут силна тай ащи те пречинен леске те лел правилно решение каске те пранденел. (1 Коринтяни 7:36)
5. Ов гогявер, кана избиринес каске те пранденес
Йекх таро най-важна решения, колато ка требе те лес, си каске те пранденес. Четинен Матей 19:4-6, 9 тай хоратинен калке въпросиеске:
Соске о християня на требе те сигярен те пранденен?
И Библия ащи те помагинел туке те ахальовес саве букиенге требе те иринес внимание, кана родес манушес, ковато те овел лачшо ром или лачши ромни за туке. Ама най-важно си те аракхес туке манушес, ковато дехел е Йеховас.b Четинен 1 Коринтяни 7:39 тай 2 Коринтяни 6:14 тай хоратинен калке въпросиенге:
Соске требе те пранденас само манушеске, ковато си християни?
Сар мислинес, кай ка чувствинел пес о Йехова, ако пранденес манушеске, ковато на дехел лес?
Ако дуй животна, колато си бут различна йекх аверестар, требе те керен бути заедно, ка овел ленге бут пхаро. О също ка ачшол, ако йекх християни пранденел манушеске, ковато на служинел е Йеховаске. Ка овен лен бут проблемя
6. О браки требе те овел зомкха важно туке, кизом си е Йеховаске
Андо пуране диеса, о израилтяня мукенас пе ромниен, соскето мислиненас само песке. Четинен Малахия 2:13, 14, 16 тай хоратинен калке въпросиеске:
Соске о Йехова мразинел йекх ром тай йекх ромни те мукен пес, кана никхой лендар на пхиргяс упрал околесте?
И изневяра тай о разводи дукхавен е манушес, ковато нанай виновно, тай дукхавен е чшавен-да
Дикхен о КЛИПИ тай хоратинен калке въпросиеске:
Ако то ром или ти ромни на служинел е Йеховаске, со ащи те керес, за те овел тумен щастливо семейство?
7. Кер со требе, за те овел тут браки, саво о Йехова мангел
Ащи те на овел туке лесно те керес со требе, за те овел тут браки, саво мангел о Йехова.c Ама ако дес всичко тутар, ов ка благословинел тут. Дикхен о КЛИПИ.
Четинен Евреи 13:4 тай хоратинен калке въпросиенге:
Мислинес ли, кай мануш ащи те керел со требе, за те овел лес браки, саво мангел о Йехова? Соске?
Кана о християня пранденен или развединен пес, о Йехова мангел те керен калка букя, сарто пхенел о закони анди държава, колате живинен. Четинен Тит 3:1 тай хоратинен калке въпросиеске:
Ако иси тут ром или ромни, иси ли тумен подписи, сарто пхенел о закони?
ДЕКХОЙ АЩИ ТЕ ПУЧЕЛ: „Соске те подпишинас? Нащи ли просто те живинас заедно?“
Со ка пхенес леске?
СО СИКЛИЛЯМ
Нанай значение дали декхой си прандеме или на-а, соскето о дуй-да букя си подаръки таро Йехова тай ащи те анен туке радост, стига те живинес, сарто мангел ов.
О най-важна букя таро уроки
Саве шукар букя ащи те керен о християня, колато нанай прандеме?
Соске и Библия пхенел те пранденас само манушеске, ковато служинел е Йеховаске?
Кана о Дел позволинел йекх ром тай йекх ромни те развединен пес?
АХАЛЬОВ ПО-БУТ
Со означинел те пранденес само манушеске, ковато си „в единство е Господариеса“?
Калка дуй клиповя ка помагинен туке те лес лачше решения, кана пхирес декхаса тай кана мангес те пранденес.
Ахальов соске йекх пхрал мислинел, кай о букя, колато диняс лес о Йехова, си бут по-ценна таро букя, колато мукляс.
Саве букиенге требе те мислинел мануш, англал те мукел пе ромес или пе ромня?
Почитай „онова, което Бог е впрегнал в общ ярем“ („Стражева кула“ декември 2018)
a Дикх и 4 бележка, колате пишинел дали ащи йекх ром тай йекх ромни те мукен пес, ако нанай изневяра.
b Десаве народовиенде о дада тай о дая избиринен ромес или ромня пе чшавенге. Ако калка дада тай дая дехен пе чшавес, първо ка дикхен дали о мануш, колес избиринен, дехел е Йеховас, а ма дали си барвало.
c Ако живинес декхаса, ама нанай тумен подписи, требе коркоро те решинес дали ка подпишинес калке манушеса или ка мукес лес.