Анен радост е Йеховаске е букиенца, колато харешинел туменге те керен, кана иси тумен време

О Йехова си „о щастливо Дел“. (1 Тимотей 1:11) Ов мангел те овас щастлива тай те овел амен радост таро животос. Леске си приятно, кана дикхел, кай на мислинас само букяке, а почивинас аменге тай керас букя, колато анен аменге радост. Калке урокиесте ка дикхас сар ащи, кана керас букя, колато харешинен аменге, хем те овел аменге шукар, хем те анас радост е Йеховаске.

1. За соске требе те мислинас, кана мангас те керас букя, колато харешинен аменге?

Со харешинел туке те керес, кана иси тут време? Иси мануша, коленге си най-шукар те бешен песке кхере, те четинен десаво лил, те шунен музика или те дикхен филми или десаве букя ко интернети. Аверенге харешинел те киден пес пе амаленца, те пхиравен пес, те жан ки планина или ко морес или те кхелен десаве игрес. Со-да те мангел пес аменге те керас, требе те дикхас първо дали „си шукар е Господариеске андо якха“. (Ефесяни 5:10) Бут си важно те ахальовас дали о букя, колато избиринас, харешинен е Йеховаске. Ов мразинел бут таро букя, колато о мануша дехен те керен, те дикхен или те шунен, соскето ленде о мануша марен пес или хоратинен тай керен мръсна или магярска букя. (Четине Псалм 11:5.) Со ка помагинел аменге, те избиринас те керас шукар букя, кана иси амен време?

Ако тховас амен манушенца, колато дехен е Йеховас, он ка помагинен аменге те избиринас те керас шукар букя, кана иси амен време. Сарто вече дикхлям ко 48 уроки, „мануш, ковато тховел пес гогявере манушенца, ка ачшол гогявер“. Авере ригатар, ако тховас амен манушенца, колато на дехен е Девлес тай на живинен сарто ов мангел, „бут ка патинас“. (Притчи 13:20)

2. Соске требе те внимавинас кизом време керас о букя, колато харешинен аменге?

Даже ако избиринас те керас шукар букя, кана иси амен време, требе те внимавинас те на прекалинас, иначе нанай те ачшол амен време, за те керас по-важна букя. И Библия пхенел: „Използвинен лачшес тумаро време.“ (Четине Ефесяни 5:15, 16.)

РОДЕ ПО-ХОРЕСТЕ

Ахальов сар те избиринес лачшес саве букя те керес, кана иси тут време.

3. Кана керес букя, колато харешинен туке, пазине тут таро кханилипе

Соске требе те внимавинас саве букя керас, кана иси амен време? Дикхен о КЛИПИ тай хоратинен калке въпросиенге:

КЛИПИ: Сар те решинав саве букя те керав, кана иси ман време? (4:39)

• Со си о общо машкар о кханиле игрес, колато кхеленас о мануша андо пуране диеса, тай о букя, колато кхелен о мануша авдиес?

• Со сиклило о Данис?

Четинен Римляни 12:9 тай хоратинен калке въпросиеске:

• Сар кавка стихи ка помагинел туке те избиринес саве букя те керес, кана иси тут време?

Саве си десаве таро букя, колато о Йехова мразинел? Четинен Притчи 6:16, 17 тай Галатяни 5:19-21. Палал секоне стихиесте хоратинен калке въпросиеске:

• Саве букя таро стиховя иси андо филмя, андо гиля, андо игрес тай андо лила авдиес?

Сар те избиринес со те керес, кана иси тут време

Пуч тут:

• Со? Дали ка керав, ка дикхав или ка шунав букя, колато о Йехова мразинел?

• Кана? Ка ачшол ли манге време те керав авер по-важна букя?

• Каса? Ка овав ли манушенца, колато на дехен е Йеховас?

Ако ко дром иси десави опасност, си по-лачшес те традас кизом ащи по-дур латар. Кана керас букя, колато харешинен аменге, също требе те нашас таро букя, колато дикхас, кай нанай амаре лачшипнаске

4. Използвине лачшес то време

КЛИПИ: Саве букя чорен то време? (2:45)

• О пхрал таро клипи на дикхелас кханиле букя, ама саво сине о проблеми?

Четинен Филипяни 1:10 тай хоратинен калке въпросиеске:

• Сар кавка стихи ка помагинел аменге те решинас кизом време те керас о букя, колато харешинен аменге?

5. Избирине те керес букя, колато си тере лачшипнаске

Въпреки кай е Йеховаске на харешинен саворе филмя, гиля, игрес тай лила, иси бут букя, колато ов приеминел. Четинен Еклисиаст 8:15 тай Филипяни 4:8 тай хоратинен калке въпросиеске:

• Саве букя харешинел туке те керес?

СО СИКЛИЛЯМ

О Йехова мангел о букя, колато харешинел аменге те керас, кана иси амен време, те овен амаре лачшипнаске.

О най-важна букя таро уроки

• Саве букиендар пазинен пес о християня, кана керен букя, колато харешинен ленге?

• Соске требе те внимавинас кизом време керас о букя, колато харешинен аменге?

• Соске мангес е букиенца, колато харешинел туке те керес, те анес радост е Йеховаске?

АХАЛЬОВ ПО-БУТ

Дикх кой требе те решинел саве букя те керас, кана иси амен време.

Забраняват ли Свидетелите на Йехова определени филми, книги или песни? (статия на jw.org)

Ахальов со ка помагинел туке те избиринес шукар со те керес, кана иси тут време.

Ползотворни ли са развлеченията ти? („Стражева кула“ 15 октомври 2011)

Андо разкази „Дори превъзмогнах предразсъдъците си“ четине соске йекх мануш мангляс те спиринел те керел десаве кханиле букя, колато преди харешиненас леске.

Библията променя живота на хората („Стражева кула“ 1 февруари 2010)

Дикх сар йекх дай решинел те на дикхел филмя, коленде иси магярска букя.

Избягвай развлечения със спиритизъм (2:02)