55 УРОКИ
Сар те помагинес андо сбори
Ко цело светос е Йеховаскере служителя си щастлива те служинен леске пере сбориенде. Он си благодарна, кай отхе ахальовен букя, колато си ленгере лачшипнаске тай ден всичко пестар, за те помагинен андо сбори. Дали ту-да синян щастливо тай благодарно, кай синян андо сбори? Мангес ли те помагинес тере сбориесте?
1. Сар ащи те помагинес андо сбори?
Секо йекх амендар ащи те помагинел андо сбори. Например иси ли тере сбориесте по-пхуре или насвале пхрала тай пхеня? Ащи ли те помагинес ленге те авен ко събрания? Или ащи ли те керес десаве авер букя за ленге, те пазарувинес ленге или те чистинес ленгоро кхер? (Четине Яков 1:27.) Ащи също те помагинас, кана чистинел пес и Зала е Царствоскери или кана керел пес ремонти лате. Никхой на традел амен зорле те керас калка букя. Аме вогиестар мангас те керас лен, соскето дехас е Девлес тай амаре пхрален тай пхениен. (Псалм 110:3)
О пхрала тай о пхеня, колато си покръстиме, ащи те помагинен андо сбори буте букиенца. О пхрала ащи те служинен сар помощник-служителя или сар старейшиня, ако керен о букя, колато пхенел и Библия, кай требе те керен калка, колато манген те служинен андо сбори. О пхрала тай о пхеня ащи те керен по-бут анди служба, като служинен сар пионеря. Десаве амендар ащи те помагинен, кана строинел пес десави зала, или като преместинен пес сбориесте, кате требел помощ различноне букиенге.
2. Сар ащи те използвинас амаре парес тай авер букя, колато иси амен, за те помагинас андо сбори?
И Библия пхенел: „Сикав, кай уважинес е Йеховас, е букиенца, колато иси тут.“ (Притчи 3:9) Бут синям щастлива, кай ащи те керас дарения тай те дас авер-да букя, за те помагинас амаре сбориеске тай за те помагинас те проповединел пес ки цело пхув. (Четине 2 Коринтяни 9:7.) Амаре дарения използвинен пес също, за те помагинел пес отхе, кате ачшол бедствие. Бут амендар решинде „те тховен по хари парес ригате“, за те ащи те керен дарения. (Четине 1 Коринтяни 16:2.) Ащи те мукас дарения ко кутиес андо залес, коленде керас о събрания или о конгреся, или те керас дарения ко сайти donate.jw.org. Аме ащи те сикавас амари любов кариг о Йехова, като керас дарения тай дас авер-да букя, за те помагинас андо сбори.
РОДЕ ПО-ХОРЕСТЕ
Дикх со ащи те керес, за те помагинес андо сбори.
3. Ащи те помагинас паренца тай авере букиенца
О Йехова тай о Исусес дехен е манушен, колато ден вогиестар. Например о Исусес похвалингяс йекхе ромня, колакоро ром мулосас, кай мангелас те керел дарение е Йеховаске, въпреки кай сине чорори. Четинен Лука 21:1-4 тай хоратинен калке въпросиенге:
Требе ли те дас бут парес, за те анас радост е Йеховаске?
Сар чувствинен пес о Йехова тай о Исусес, кана дас вогиестар?
Дикхен о КЛИПИ, ковато сикавел сар използвинен пес амаре дарения. После хоратинен калке въпросиеске:
Сар използвинен пес амаре дарения, за те помагинел пес е сбориенге ки цело пхув?
4. Ащи те сикавас, кай синям готова те помагинас
Андо пуране диеса е Йеховаскере служителя ма само денас парес, а керенас бут авер-да букя, за те овен шуже тай шукар о тхана, коленде поклониненас пес е Йеховаске. Четинен 2 Летописи 34:9-11 тай хоратинен калке въпросиеске:
Сар секо йекх таро израилтяня помагинелас о храми те овел шукар тай шужо?
Дикхен о КЛИПИ, ковато сикавел сар е Йеховаскере Свидетеля дикхен те овен сар о израилтяня андо пуране диеса. После хоратинен калке въпросиенге:
Соске си важно амари Зала е Царствоскери те овел шужи тай ако требе, те керас ремонти лате?
Саве букиенца ащи ту те помагинес?
5. О пхрала ащи те керен по-бут андо сбори
И Библия пхенел е пхраленге те керен всичко со ащи, за те помагинен андо сбори. Дикхен о КЛИПИ, ковато сикавел со ащи те керен о пхрала. После хоратинен калке въпросиеске:
Со кергяс о Райън, за те помагинел по-бут андо сбори?
Анди Библия пишинел саве требе те овен тай со требе те керен о пхрала, колато манген те служинен сар помощник-служителя или старейшиня. Четинен 1 Тимотей 3:1-13 тай хоратинен калке въпросиенге:
Саве требе те овен тай со требе те керен о пхрала, ако манген те служинен сар помощник-служителя или сар старейшиня?
Саве требе те овен тай со требе те керен ленгере ромня тай ленгере чшаве? (Дикх о 4 тай о 11 стихи.)
Соске ка овел шукар саворенге андо сбори, кана о пхрала манген те керен со требе, за те служинен сар помощник-служителя или сар старейшиня?
ДЕКХОЙ АЩИ ТЕ ПУЧЕЛ: „Катар иси е Йеховаскере Свидетелен парес всичконаске со керен?“
Со ка пхенес леске?
СО СИКЛИЛЯМ
О Йехова бут ценинел, кай вогиестар дас амаро време, силес, парес тай авер букя, за те помагинас андо сбори.
О най-важна букя таро уроки
Сар ащи те помагинас андо сбори?
Сар ащи те използвинас амаре парес тай авер букя, колато иси амен, за те помагинас андо сбори?
Саве букя мангес те керес ту, за те помагинес андо сбори?
АХАЛЬОВ ПО-БУТ
Дикх соске о Дел вече на мангел амендар те дас десятъки.
Какво казва Библията за даването на десятъци? (статия на jw.org)
И Библия пхенел, кай десаве букя требе те керен само о покръстиме пхрала. Ама со те керас, ако йекх покръстиме пхен требе те керел лен?
Да разбираме главенството в сбора („Стражева кула“ февруари 2021)
Дикх сар десаве смела пхрала ден всичко пестар, за те ингален лила пере пхраленге тай пхениенге.
Ахальов катар иси амен парес е букиенге, колато керас тай сави си и разлика машкар аменде тай околе религиенде.