Покръстине тут без те бавинес тут

1. Соске ка овел шукар те покръстинес тут?

Дехес ли калкес, колестар але саворе шукар букя, колато иси тут, тай даже то животос? Мангес ли те сикавес ти любов кариг лесте? Най-шукар ка керес давкха, като дес то животос леске тай покръстинес тут. Като керес калка букя, ка ачшос част таре Йеховаскоро семейство. Тогава о Йехова ка овел то Дад тай то Амал. Ов ка водинел тут тай ка дикхел туке, соскето ка овес лескоро. (Пс. 73:24; Иса. 43:1, 2) Като дес то животос леске тай покръстинес тут, ка ащи те живинес вечно. (1 Пет. 3:21)

2. Со ка дикхас калке урокиесте?

² Иси ли нещо, ковато пречинел туке те покръстинес тут? Ако иси, те жанес, кай иси авер-да мануша сар туте. Бут мануша требелас те променинен о букя, колато керенас тай давкха сар мислиненас, за те овен готова те покръстинен пес. Акана он си бут щастлива тай ден всичко пестар те служинен е Йеховаске. Со ащи те сикльовес десаве манушендар таро пуране диеса, колато покръстисайле? Ка дикхас саве букя пречиненас ленге тай со сикльовас лендар.

О САМАРЯНЯ ПОКРЪСТИСАЙЛЕ

3. Со требелас те керен о самаряня, за те ащи те покръстинен пес?

³ Кана о Исусес сине ки пхув, о самаряня сине мануша, колен сине отделно религия. Бут лендар бешенас на север тари Юдея. За те ащи те покръстинен пес, требелас те приеминен всичко со пишинелас ке Девлескоро Слово тай те сикльон по-бут лестар. О самаряня верувиненас, кай само о първа панч лила таро Битие жи ко Второзаконие тай може би о лил Исус Навиев си таро Дел. Ама он жаренас о Месия те авел, соскето о Дел обещингясас давкха ко Второзаконие 18:18, 19. (Йоан 4:25) За те овен покръстиме он требелас те приеминен, кай о Исусес си о Месия. „Бут таро самаряня“ приеминде давкха. (Йоан 4:39) Он требелас също те спиринен мислинен кханиле букя е юдейенге, соскето бут таро първа християня сине юдея. (Лука 9:52-54)

4. Според Деяния 8:5, 6, 14, со керде десаве таро самаряня, кана о Филип проповедингяс ленге?

⁴ Со помагингяс е самаряниенге те покръстинен пес? Кана о проповедники Филип хоратингяс ленге е Исусеске, десаве самаряня „приеминде е Девлескоро слово“. (Четине Деяния 8:5, 6, 14.) Он шунде е Филипиес, въпреки кай ов сине юдей. Може би он дине пес годи стиховиенге, колато пхенен, кай о Дел на керел разлика машкар о мануша. (Втор. 10:17-19) Он шунде шукар со пхенгяс ленге о Филип е Исусеске тай приеминде о букя, колато сикавенас, кай о Филип сине бичшалдо таро Дел. О керелас бут чудеса-да, например саскярелас насвале манушен тай гонинелас демониен. (Деян. 8:7)

5. Со ащи те сикльовес таро самаряня?

⁵ О самаряня ащине те на манген те шунен е Филипиес, ашал далкхеске кай ов си юдей или ашал далкхеске кай жи акана на шундесас о букя, колато пхенгяс ленге ов. Ама он на мукле калка букя те пречинен ленге тай кана дикхле, кай о Филип сикавел лен и истина, он веднага покръстисайле. И Библия пхенел: „Ама кана верувинде е Филипиеске, ковато шунярелас и лачши новина е Девлескере Царствоске тай е Исусеске, колес избирингяс о Дел, покръстисайле мруша-да, жувля-да.“ (Деян. 8:12) Сигурно ли синян, кай и истина си анде Девлескоро Слово тай кай е Йеховаскере свидетеля сикавен и любов, която о Исусес пхенгяс, кай ка сикавен лескере истинска ученикя? (Йоан 13:35) Тогава ма дара те покръстинес тут. Ов сигурно, кай о Йехова ка благословинел тут.

6. Сар ащи давкха со кергяс о Рубен те помагинел туке?

⁶ О Рубен тари Германия отцикнярла жанелас е Йеховаске, соскето лескоро семейство си Свидетеля. Ама кана побарило чудинелас пес дали наистина иси Дел. Дикх со помагингяс леске. Ов ахалило, кай на жанел бут букя далкхеске тай решингяс те сикльол по-бут. Ов пхенгяс: „Бешавас тай изучинавас коркоро, за те ахальовав сави си и истина. Требелас бут дром те изучинав далкхеске сар сине керде саворе букя.“ Ов четингяс о лил „Дали съществува Създател, който е загрижен за теб?“. Кавка лил бут помагингяс леске те барярел пи вяра, кай иси Дел. Ов мислингяс песке: „Леле, о Йехова си истинско.“ О Рубен гело те дикхел о баро Бетел ки Америка тай тогава започнингяс те дехел още по-бут е пхрален тай е пхениен ко цело светос. После ирисайло ки Германия тай покръстисайло, кана сине на 17. Ако ту-да чудинес тут дали иси Дел, дали и Библия си таро Дел или десаве авере букиенге, роде амаре лиленде. Кана жанес по-бут тай ахальовес шукар о букя, вече нанай те чудинес тут. (Еф. 4:13, 14) Като шунес сар е Йеховаскоро народос авере тханенде сикавен любов тай си сар йекх семейство тай като дикхес давкха тере-да сбориесте, ти любов кариг о пхрала тай о пхеня ко цело светос ка барьол.

О САВЕЛ ТАРО ТАРС ПОКРЪСТИСАЙЛО

7. Сар о Савел требелас те променинел по мислене?

⁷ Дикх со ачшило е Свалеса таро Тарс. Ов бут шукар жанелас о юдейско Закони тай ачшолас са по-важно мануш. (Гал. 1:13, 14; Флп. 3:5) Калке диесенде о юдея мислиненас, кай о християня си мамуй о Дел. О Савел бут гонинелас е християниен тай мислинелас, кай далкхеса керел е Девлескери воля. (Деян. 8:3; 9:1, 2; 26:9-11) Ако приеминелас е Исусес, покръстинелас пес тай ачшолас християни, о Савел требелас те овел готово те гонинен лес-да.

8. а) Со помагингяс е Савлеске те покръстинел пес? б) Според Деяния 22:12-16, сар о Анания помагингяс е Савлеске? (Дикх и картинка-да.)

⁸ Со помагингяс е Савлеске те покръстинел пес? Кана о Исусес хоратингяс леса таро небес, о Савел королило тари бари светлина. (Деян. 9:3-9) Трин диеса ов на халяс тай мислингяс бут е букиенге, колато ачшиле леса. О Савел вече сине сигурно, кай о Исусес си о Месия тай кай лескере ученикя жанен и истина. Ов сигурно сине пишмани, кай сине съгласно те мударен е Стефанес. (Деян. 22:20) Кана накхле трин диеса, йекх ученики, колескоро алав сине Анания, гело паш лесте, путергяс лескере якха тай пхенгяс леске те покръстинел пес без те бавинел пес. (Четине Деяния 22:12-16.) О Савел сине смирено тай покръстисайло. (Деян. 9:17, 18)

9. Си сикльовас таро Савел?

⁹ Иси со те сикльовас таро Савел. Ов ащине те овел барикано или те дарал таро мануша тай ашал далкхеске те на покръстинел пес. Ама ов на мукляс калка букя те пречинен леске. О Савел сине смирено тай сине готово те променинел по животос, за те ачшол е Исусескоро ученики. (Деян. 26:14, 19) Ов сине готово те ачшол християни, въпреки кай жанелас, кай ка гонинен лес. (Деян. 9:15, 16; 20:22, 23) Палал далкхесте ов продължингяс те мукел пес е Йеховаске андо васта, кана сине лес баре проблемя. (2 Кор. 4:7-10) Кана покръстинес тут тай ачшовес йекх таре Йеховаскере свидетеля, ащи ти вяра те овел изпитиме, ама нанай те овес коркоро. Ащи те овес сигурно, кай о Дел тай о Исусес винаги ка помагинен туке. (Флп. 4:13)

10. Сар ащи давкха со ачшило е Аннаса те помагинел туке?

¹⁰ И Анна барили ки Източно Европа. Кана лакери дай покръстисайли, и Анна сине на 9 тай лакоро дад мукляс ла те изучинел и Библия. Ама тогава лакере енданя, колато бешенас ленца, дикхле те спиринен ла. Ленге ка овелас баро лажаво декхой таро семейство те мукел и кхангери, колате жанас брешендар ленгере енданя. Кана и Анна сине на 12 , ой пучляс пе дадес дали ащи те покръстинел пес. Ов мангляс те жанел дали ой коркори решингяс давкха или декхой традингяс ла. Ой пхенгяс леске: „Ме дехав е Йеховас.“ Тогава лакоро дад мукляс ла те покръстинел пес. Лакере енданя продължиненас те икерен пес кханилес ласа. Йекх лендар пхенгяс лаке: „Ка овел по-шукар те керес мръсна букя тай те пушинес, вместо те ачшовес йекх таре Йеховаскере свидетеля.“ Со помагингяс е Аннаке? Ой пхенел: „О Йехова делас ман силес тай ми дай тай мо дад сине жи манде.“ И Анна запишинелас песке сар дикхел е Йеховаскоро вас пе животосте тай подекхана четинелас о букя, колато запишингясас песке, за те на бистерел сар о Йехова помагингяс лаке. Ако дарас, кай ка манген те спиринен тут те служинес е Йеховаске, ма бистер, кай ов ка помагинел туке-да. (Евр. 13:6)

О КОРНИЛИЙ ПОКРЪСТИНЕЛ ПЕС

11. Соске ащине о Корнилий те бавинел пес те покръстинел пес?

¹¹ Ащи те сикльовас бут таро Корнилий-да. Ов сине важно мануш, соскето сине„стотники“, демек требелас те водинел 100 войникиен тари римско армия. (Деян. 10:1) О Корнилий „керелас лачшипе е народоске“. (Деян. 10:2) О Йехова бичшалгяс е Петрес те пхенел леске и лачши новина. Дали о Корнилий бавингяс пес те покръстинел пес, ашал далкхеске кай сине баро мануш?

12. Со помагингяс на Корнилий те покръстинел пес?

¹² Со помагингяс на Корнилий те покръстинел пес? Четинас, кай ов „заедно пе целоне семействоса даралас таро Дел“. Ов „постоянно молинелас пес е Девлеске са вогиеса“. (Деян. 10:2) Кана о Петрес пхенгяс леске и лачши новина, ов тай лескоро цело семейство приеминде е Исусес тай сиго покръстисайле. (Деян. 10:47, 48) Сигурна синям, кай о Корнилий сине готово те керел всичко со требелас, за те служинел е Йеховаске пе семействоса. (Ис. Н. 24:15; Деян. 10:24, 33)

13. Со ащи те сикльовас таро Корнилий?

¹³ Сар о Савел, о Корнилий-да на мукляс давкха, кай сине важно мануш, те спиринел лес те ачшол християни. Ако требе те променинес бут букя те животосте, за те покръстинес тут, о Йехова ка помагинел туке. Ов ка благословинел тут, ашал далкхеске кай мангес те живинес, сарто ов мангел, за те служинес леске.

14. Сар ащи те помагинел туке давкха со кергяс о Цуйоши?

¹⁴ О Цуйоши тари Япония требелас те променинел пи бути, за те ащи те покръстинел пес. Ов керелас бути йекхе училищате, колате сикавенас е манушен сар те подрединен шукар о лулугя, тай сине е барескоро помощники. Кана мануш, ковато си будисти, мерелас, о баро требелас те подрединел о лулугя за ко погребение тай кана керен десаве букя е мулеске, те участвинел. Кана о баро нащине те жал, о Цуйоши требелас те жал лескере тханесте. Ама ов ахалило, кай ако продължинел те участвинел калке букиенде, колато керенас пес е муленге, нанай те ащи те покръстинел пес, тай решингяс те спиринел. (2 Кор. 6:15, 16) О Цуйоши хоратингяс далкхеске е бареса тай ащине те продължинел те керел бути отхе без те участвинел ко букя, колато керен пес е муленге. Накхло декхате йекх бреш отсарто започнингяс те изучинел и Библия тай ов покръстисайло.a Ако требе те сменинес ти бути, за те овес лачшо е Девлеске андо якха, ов сигурно, кай ов ка дел тут всичко со требел туке тай те семействоске. (Пс. 127:2; Мат. 6:33)

О КОРИНТЯНЯ ПОКРЪСТИСАЙЛЕ

15. Со ащине те спиринел е коринтяниен те покръстинен пес?

¹⁵ Ко пуране диеса о мануша, колато бешенас ки диз Коринт, дехенас о парес тай керенас мръсна букя. Бут лендар керенас букя, колато на харешинен е Девлеске. Аке соске сине бут трудно е манушенге, колато бешенас отхе, те започнинен те служинен е Йеховаске. Кана о апостол Павел гело отхе тай проповедингяс и лачши новина е Исусеске, „бут таро коринтяня, колато шунде и лачши новина, започнинде те верувинен тай покръстисайле.“ (Деян. 18:7-11) После о Господари, о Исус Христос, сикавгяс пес е Павлеске тай пхенгяс: „Иси ман бут мануша калке дизате.“ Аке соске о Павле продължингяс те проповединел отхе още йекх бреш тай екваш.

16. Со помагингяс е коринтяниенге те покръстинен пес? (2 Коринтяни 10:4, 5.)

¹⁶ Со помагингяс е коринтяниенге те покръстинен пес? (Четине 2 Коринтяни 10:4, 5.) Е Девлескоро Слово тай лескоро свято духос помагингяс ленге те променинен по цело животос. (Евр. 4:12) О мануша таро Коринт, колато приеминде и лачши новина е Исусеске, спиринде те керен десаве кханиле букя — те макярен пес, те чорен тай те совен мруш мрушеса. (1 Кор. 6:9-11)b

17. Со ащи те сикльовес таро коринтяня?

¹⁷ Въпреки кай десаве таро коринтяня требелас те спиринен те керен букя, колато керенас брешенца, он на мислинде песке, кай си бут трудно те ачшон християня. Он дине всичко пестар те пхирен ко танг дром, ковато ингалел кариг о вечно животос. (Мат. 7:13, 14) Пхаро ли си туке те спиринес те керес десаве кханиле букя, за те ащи те покръстинес тут? Нисар ма откажине тут! Молине е Йеховас те дел тут по свято духос, ковато ка помагинел туке вече те на мангес те керес кханиле букя.

18. Сар ащи те помагинел туке давкха со кергяс и Моника?

¹⁸ И Моника тари Грузия диняс всичко пестар те спиринел те хоратинел мръсна букя тай те спиринел те шунел тай те дикхел кханиле букя, за те ащи те покръстинел пес. Ой пхенгяс: „Кана синьомас цикни, и молитва делас ман сила те променинав ман. О Йехова жанелас, кай мангав те керав со си лачшо леске андо якха тай винаги помагинелас манге тай сикавелас манге о дром.“ И Моника покръстисайли, кана сине на 16. Иси ли букя, колато требе те спиринес те керес, за те служинес е Йеховаске, сарто ов мангел? Ма спирине те молинес лес те дел тут сила те променинес тут. О Йехова путерде вастенца дел пе святоне духостар. (Йоан 3:34)

ТИ ВЯРА АЩИ ТЕ МЕСТИНЕЛ ПЛАНИНИ

19. Со ащи те помагинел туке те справинес тут е баре проблемиенца? (Дикх и снимка-да.)

¹⁹ Ов сигурно, кай о Йехова дехел тут тай мангел те овес лескере семействосте. Давкха нанай те променинел пес саве-да букя те пречинен туке те покръстинес тут. О Исусес пхенгяс пе ученикиенге: „Ако тумари вяра си сар йекх цикно синапено зрънцес, ка пхенен калке планинаке „Жа отхе“ тай ой ка жал. Тай нищо нанай те овел невъзможно за туменге.“ (Мат. 17:20) Калка, колато шунде давкха, сине е Исусеса само десаве бреша тай ленгери вяра требелас още те барьол. Ама о Исусес пхенгяс ленге, кай ако иси лен достатъчно вяра, о Йехова ка помагинел ленге те справинен пес даже е проблемиенца, колато си баре сар планини. О Йехова ка помагинел туке-да те керес о също!

20. Сар помагинде туке о букя, колато четингям калке урокиесте различноне манушенге таро пуране диеса тай амаре диесендар?

²⁰ Ако иси букя, колато пречинен туке те покръстинес тут, без те бавинес тут кер со требе, за те отчшиес лен. Като дикхес со керде десаве пхрала тай пхеня таро пуране диеса тай амаре диесендар, давкха ка дел тут силес тай спокойствие. Ленгоро примери ка традел тут те дес то животос е Йеховаске тай те покръстинес тут. Давкха си о най-шукар решение, ковато ащи те лес!