„Решинен ... каске ка служинен“

1. Со требе те керас, за те овас щастлива, тай соске? (Исаия 48:17, 18)

Амаро Дад бут дехел амен тай мангел те овел амен шукар животос акана тай завинаги. (Екл. 3:12, 13) Ов кергяс амен те ащи те керас бут шукар букя. Ама на кергяс амен те ащи коркоре те управлинас амен тай те решинас со си лачшо тай со си кханило. (Екл. 8:9; Йер. 10:23) Ов жанел, кай за те овас щастлива, требе те служинас леске тай те шунас лес. (Четине Исаия 48:17, 18.)

2. Состе мангел о Бенг те верувинас, ама со кергяс о Йехова?

² О Бенг бут мангел те верувинас, кай ащи те овас щастлива би е Йеховаскоро тай кай о мануша ащи те управлинен пес коркоре. (Бит. 3:4, 5) Ама за те сикавел, кай о Бенг си хохавно, о Йехова мукляс е манушен те управлинен пес хари коркоре. Бут ясно дикхас, кай о мануша нащи те управлинен пес коркоре. Авере ригатар ки Библия пишинел буте мрушенге тай жувлиенге, колато сине щастлива, соскето служиненас е Йеховаске. О най-щастливо лендар сине о Исусес. Калке урокиесте ка дикхас соске ов избирингяс те служинел е Йеховаске. После ка дикхас соске требе те служинас амаре Дадеске, е Йеховаске. Тай ко крайос ка дикхас соске аме избиринас те служинас леске.

СОСКЕ О ИСУСЕС ИЗБИРИНГЯС ТЕ СЛУЖИНЕЛ Е ЙЕХОВАСКЕ

3. Со пхенгяс о Бенг, кай ка дел е Исусес, ама со избирингяс те керел о Исусес?

³ Жикай сине ки пхув, о Исусес требелас те избиринел каске ка служинел. О Исусес покръстисайло тай хари палал далкхесте о Бенг пхенгяс леске, кай ка дел лес саворе правителства ки пхув, ако перел кочиенде тай поклонинел пес леске. Тогава о Исусес пхенгяс леске: „Наш мандар, Сатана! Соскето си пишиме: „Тере Девлеске, е Йеховаске, требе те поклонинес тут тай само леске требе те служинес.“ (Мат. 4:8-10) Акана ка дикхас соске о Исусес избирингяс те служинел е Йеховаске.

4-5. Соске о Исусес избирингяс те служинел е Йеховаске?

⁴ О Исусес мангел те служинел е Йеховаске най-бут соскето бут дехел пе Дадес тай си бут лачшо амал леса. (Йоан 14:31) Ов също служинел е Йеховаске, соскето жанел, кай давкха требе те керел. (Йоан 8:28, 29; Откр. 4:11) Ов жанел, кай о животос авел таро Йехова, кай ащи те мукас амен лескере вастенде тай кай ов си путерде вастенгоро. (Пс. 33:4; 36:9; Як. 1:17) О Йехова нисар на хохавгяс е Исусес тай всичко со иси лес си лескере Дадестар. (Йоан 1:14) Авере ригатар о Бенг кергяс о мануша те мерен. Ов си хохавно, соскето си бокхале якхенгоро тай дикхел само песке. (Йоан 8:44) О Исусес пенжарелас лачшес е Йеховас-да, е Бенгес-да. Ов нисар на мангелас те овел сар о Бенг тай те ухкьел мамуй о Йехова. (Флп. 2:5-8)

⁵ О Исусес избирингяс те служинел е Йеховаске, соскето жанелас-да, кай давкха ка анелас бут шукар букя. (Евр. 12:2) Ов жанелас, кай ако ачшол леске верно, ка керел пе Дадескоро алав свято тай ка ащи те опринел о кханилипе, ковато ало таро Бенг.

СОСКЕ ТРЕБЕ ТЕ СЛУЖИНАС Е ЙЕХОВАСКЕ

6-7. Соске бут мануша авдиес на служинен е Йеховаске, ама соске требе те служинас само леске?

⁶ Бут мануша авдиес на служинен е Йеховаске, соскето на жанен кибор лачшо си ов тай кибор бут букя кергяс за ленге. Он си сар о мануша ки Атина, коленге проповедингяс о Павлес тай колато на пенжаренас е Девлес. (Деян. 17:19, 20, 30, 34)

⁷ О Павлес пхенгяс е манушенге тари Атина, кай о истинско Дел „дел саворе манушен животос, въздухи тай всичко“. Тай пхенгяс още, кай „ашал леске живинас, пхирас тай синям живде“ тай кай о Дел си кавка, ковато „кергяс саворе народовиен йекхе манушестар“. Аке соске аме требе те служинас само леске. (Деян. 17:25, 26, 28)

8. Со нанай нисар те керел о Йехова тай сар сикавгяс кибор бут дехел амен?

⁸ Щом о Йехова кергяс всичко тай си о Най-баро ки цело Вселена, ов ащи те керел песке со мангел. Ако мангелас, ов ащине те традел е манушен зорле те служинен леске. Ама о Йехова нисар нанай те керел давкха. Ов буте букиенца сикавел аменге, кай си истинско тай кай дехел бут секоне йекхес амендар. Ов мангел кибор ащи по-бут мануша те овен амала леса завинаги. (1 Тим. 2:3, 4) Аке соске ов сикавгяс амен сар те сикавас околен саве шукар букя ка керел е манушенге тай сар ка керел лен. (Мат. 10:11-13; 28:19, 20) Ов диняс амен о сбори-да, за те ащи те служинас леске, тай лачше старейшиниен, колато те дикхен аменге. (Деян. 20:28)

9. Сар о Йехова сикавел, кай дехел саворе манушен?

⁹ О Йехова сикавел пи любов, като дел шукар букя даже калкен, колато на манген те верувинен, кай иси Дел. Мислине далкхеске: Брешендар бут мануша коркоре решинен со си лачшо тай со си кханило, вместо те шунен е Йеховас. Ама о Йехова лачшипнаса дел лен со требел ленге, за те живинен тай те овел лен шукар животос. (Мат. 5:44, 45; Деян. 14:16, 17) Ашал леске лен ащи те овен амала тай семейство, колато дехен лен, ащи те овен лен чшаве, те керен бути тай те овел лен радост таро животос. (Пс. 127:3; Екл. 2:24) Саворе калка букя сикавен, кай амаро небесно Дад дехел саворе манушен. (Из. 34:6) Акана ка дас амен годи соске аме избирингям те служинас е Йеховаске тай сар ов благословинел калкен, колато манген те служинен леске.

СОСКЕ ИЗБИРИНАС ТЕ СЛУЖИНАС Е ЙЕХОВАСКЕ

10. а) Соске служинас е Йеховаске? (Матей 22:37) б) Сар о Йехова сикавгяс търпение кариг туте? (Псалм 103:13, 14)

¹⁰ Сар о Исусес, аме-да служинас е Йеховаске, соскето бут дехас лес. (Четине Матей 22:37.) Аме мангас те овас лачше амала е Йеховаса, соскето жанас кибор лачшо си ов. Например ов си търпеливо аменца. Кана о израилтяня на шуненас лес, ов пхенгяс ленге: „Молинав тумен, секо йекх тумендар те мукел по кханило дром.“ (Йер. 18:11) О Йехова на бистерел, кай синям безехале, кай синям керде чикатар. (Четине Псалм 103:13, 14.) Кана мислинас далкхеске кибор търпеливо си о Йехова тай саве авер шукар качества иси лес, аме мангас те служинас леске завинаги.

11. Ашал саве авере букиенге служинас амаре небесноне Дадеске?

¹¹ Аме мангас те служинас е Йеховаске, соскето ахальовас, кай давкха требе те керас. (Мат. 4:10) Жанас-да, кай ако синям верна е Йеховаске, ка ачшон бут шукар букя — ка помагинас е Йеховаскоро алав те ачшол свято, ка сикавас, кай о Бенг си хохавно тай ка анас радост амаре Дадеске. Тай ако избиринас те служинас е Йеховаске авдиес, ка ащи те служинас леске завинаги! (Йоан 17:3)

12-13. Со ахальовас далкхестар со ачшило е пхениенца Джейн тай Пам?

¹² Жикай синям терне, ащи те сикльовас те дехас е Йеховас бут тай амари любов кариг лесте ка ачшол са по-зорали, жикай барьовас. Дикх со ачшило до пхениенца — и Джейн тай и Пам.a И Джейн сине на 11 тай и Пам сине на 10, кана започнинде те изучинен и Библия. Ленгоро дад тай ленгери дай на мангенас те изучинен, ама мукле пе чшайен те изучинен и Библия е Йеховаскере Свидетеленца само ако жан ленца ленгере-да кхангеряте. И Джейн пхенел: „О букя, колато о Свидетеля сикавде ман тари Библия, помагинде манге те на дрогиринав ман тай те на керав мръсна букя, сар окола чшаве тари училища.“

¹³ Кана накхле десаве бреша, о дуй-да чшая ачшиле вестителкес. По-късно ачшиле пионеркес, въпреки кай дикхенас пе пхуре дадес тай пе пхуре дая. Кана и Джейн мислинел саворе букиенге, колато о Йехова кергяс за ленге, пхенел: „Дикхльом ме якхенца сар о Йехова дикхел пе амаленге тай кай „о Йехова пенжарел калкен, колато си лескере“, сарто пишинел ко 2 Тимотей 2:19.“ Верно си, кай о Йехова дикхел калкенге, колато избиринен те дехен лес тай те служинен леске!

14. Сар ащи те защитинас е Йеховас? (Дикх и снимка-да.)

¹⁴ Аме мангас о мануша те жанен, кай о кханиле букя, колато шунен е Девлеске, нанай истина. Представине туке, кай иси тут йекх амал, ковато си бут лачшо, путерде вастенгоро си тай си винаги готово те простинел. Йекх диес шунес сар декхой пхенел, кай то амал си кханило мануш тай хохавел. Со ка керес? Ка защитинес лес. Кана шунас хохавне букя е Йеховаске, също мангас те защитинас лес, като пхенас и истина за леске. (Пс. 34:1; Иса. 43:10) Аме сикавас, кай мангас те служинас е Йеховаске целоне вогиеса е букиенца, колато пхенас тай керас.

15. Саве шукар букя ачшиле е Павлеса, кана решингяс те променинел по животос? (Филипяни 3:7, 8)

¹⁵ Аме синям готова те променинас десаве букя амаре животосте, за те анас радост е Йеховаске или за те керас по-бут анди служба. Например о апостол Павел сине баро мануш ки юдейско религия, ама мукляс кайка религия, за те ачшол е Исусескоро ученики тай те служинел е Йеховаске. (Гал. 1:14) Аке соске лес сине шукар животоса тай ов ка овел цари ко небес е Исусеса. Ов нисар на ачшило пишмани, кай избирингяс те служинел е Йеховаске тай аме-да нанай те ачшовас пишмани, ако служинас е Йеховаске. (Четине Филипяни 3:7, 8.)

16. Со сикльовас тари Джулия? (Дикх о снимкес-да.)

¹⁶ Ако ко първо тхан амаре животосте си давкха те служинас е Йеховаске, ка овел амен шукар животос акана тай завинаги. Дикх со ачшило йекхе пхеняса, колакоро алав си Джулия. Кана сине цикни, ой гилябелас йекхе кхангеряте. Йекх оперно певеци дикхляс, кай ой гилябел шукар, тай мангляс те сикавел ла. Сиго и Джулия ачшили известно тай гилябелас тханенде, коленде бут мануша жанас. Жикай ой жалас йекхе известноне училищате, йекх лакере съученикиендар започнингяс те хоратинел лаке таро Дел тай пхенгяс лаке, кай е Девлескоро алав си Йехова. На накхло бут време тай и Джулия започнингяс те изучинел и Библия дуй дром андо курко. Ой избирингяс те дел всичко пестар те служинел е Йеховаске, а ма те ачшовел оперно певица. Кавка решение на сине локо. Ой пхенел: „Бут мануша пхенде манге, кай на кергьом шукар, кай спирингьом те гилябав, ама ме мангавас е дав мо цело животос е Йеховаске.“ Сар чувствинел пес ой авдиес, ашал далкхеске, кай решигяс те керел давкха преди 30 години? „Щастливо синьом, кай избирингьом те служинав е Йеховаске тай жанав, кай ко бъдеще ов ка дел ман всичко со мангел мо воги.“ (Пс. 145:16)

МА СПИРИНЕ ТЕ СЛУЖИНЕС Е ЙЕХОВАСКЕ

17. Со означинел е манушенге давкха, кай о крайос си паше?

¹⁷ Калке светоскоро крайос си бут паше. О апостол Павел пишингяс: „Още „бут хари“ тай „кавка, ковато требе те авел, ка авел тай нанай те бавинел пес.“ (Евр. 10:37) Со означинел давкха? Йекхе ригатар, е манушен на ачшило още бут време те избиринен те служинен е Йеховаске. (1 Кор. 7:29) Ама авере ригатар, ако вече служинас е Девлеске, жанас, кай амаре проблемя сиго ка свършинен.

18. Со манген те керас о Исусес тай о Йехова?

¹⁸ О Исусес пхенгяс, кай си шукар о мануша ма само те ачшон лескере ученикя, ама после те продължинен-да те пхирен палал лесте. (Мат. 16:24) Аке соске ако бут бреша служинас е Йеховаске, на требе те откажинас амен. Требе те дас всичко амендар те продължинас те служинас леске. Ащи те на овел лесно, ама ка овас щастлива тай ка овен амен бут благословиес още авдиес! (Пс. 35:27)

19. Со сикльовас далкхестар со ачшило е пхралеса Джийн?

¹⁹ Десаве мануша мислинен, кай ако служинен е Йеховаске, ка требе те мукен бут букя. Ако синян терно, мислинес ли, кай ка измукес бут букя, ако служинес е Йеховаске? Йекх терно пхрал, колескоро алав си Джийн, пхенел: „Мислинавас, кай ако синян е Йеховаскоро Свидетели, нащи те керес бут таро букя, колато манген пес туке. Дикхавас, кай бут чшаве, коленца барильом, жан ко партита, пхирен декхаса тай кхелен игрес, коленде о мануша марен пес, а ме требелас те жав ко събрания тай на служба.“ Со ачшило, ашал далкхеске, кай ов мислинелас калка букя? О Джийн пхенел: „Започнингьом те керав десаве таро кханиле букя, колато окола терне керенас тай хариеске сине манге шукар, ама давкха на продължингяс бут време. Тогава почнингьом те мислинав кибор си шукар те керес со пхенел и Библия тай решингьом те служинав е Йеховаске целоне вогиеса. Дикхав, кай жи авдиес о Йехова отговорингяс ме саворе молитвенге.“

20. Со требе те мангас те керас?

²⁰ О псалмисти гилябингяс е Йеховаске: „Щастливо си кавка, колес ту избиринес тай колес мукес те бешел ко дворос тере кхересте.“ (Пс. 65:4) Аме-да мангас те пхенас сар о Исус Навиев: „Ме тай мо семейство ка служинас е Йеховаске“. (Ис. Н. 24:15)