Со требе те керес кана туса или околенца икерен пес грозно?

1-2. Со керен бут мануша кана ленца или околенца икерен пес грозно тай со ка дикхас калке урокиесте?

Буте манушенца авдиес икерен пес грозно соскето си чороре, соскето си авере народостар, соскето си различна тай ашал авере букиенге. Ашал десаве манушенге колен иси власт тай мислинен само паренге бут авер мануша циден. О несправедлива букя колато керен окола мануша ащи те анен кханилипе аменге или декхаске колес пенжарас.

² Бут мануша авдиес нерверинен пес соскето декхой икергяс пес грозно ленца или околенца. Саворе мануша манген те живинен светосте кате те на даран тай окола те икерен пес лачшес ленца. Десаве мануша дикхен те решинен о проблемя колато дикхен ко светос или пе държавате. Он керен протескя мамуй о правителство тай о законя или гласувинен декхаске ковато обещинел те решинел о проблемя. Сар християня аме дикхас те на овел амен „нищо общо е светоса“ тай верувинас кай е Девлескоро Царство ка махнинел и несправедливост. (Йоан 17:16) Ама си аменге пхаро тай подекхана нерверинас амен кана дикхас сар десаве мануша икерен пес грозно околенца. Ащи те чудинас амен: „Со ащи те керав кана ачшон салка букя? Иси ли со те керав още акана за те опринав о букя?“ За те ахальовас калка букя ка дикхас първо сар о Йехова тай о Исусес чувствинен пес кана дикхен сар десаве манушенца икерен пес грозно.

О ЙЕХОВА ТАЙ О ИСУСЕС МРАЗИНЕН И НЕСПРАВЕДЛИВОСТ

3. Соске си нормално кай нерверинас амен кана икерен пес грозно аменца или околенца? (Исаия 5:7)

³ И Библия пхенел аменге соске нанай аменге шукар кана икерен пес грозно аменца или околенца. Ой пхенел кай о Йехова кергяс амен те овас сар лесте а ов дехел о лачшипе тай и справедливост. (Пс. 33:5; Бит. 1:26) Ов нисар на икерел пес грозно околенца тай на мангел никхой те керел давкха. (Втор. 32:3, 4; Мих. 6:8; Зах. 7:9) Например кана о Исаия сине пророки о Йехова шунгяс сар ровен бут израилтяня коленца окола израилтяня икеренас пес грозно. (Четине Исаия 5:7.) О Йехова накажингяс калкен колато на шуненас о закони тай икеренас пес грозно околенца. (Иса. 5:5, 13)

4. Сар чувствинел пес о Исусес кана декхаса икерен пес грозно? (Дикх и картинка-да.)

⁴ Сар о Йехова о Исусес-да дехел и справедливост тай мразинел и несправедливост. Йекхвар ов дикхляс мрушес колескоро вас шукилосас. О Исусес мангелас те помагинел леске, ама кана дикхле давкха о шудре пориенгере пасторя нерверинде пес. Он на мислиненас е манушеске, а пхенде кай о Исусес на спазвинел и събота. Тогава е Исусес бут задукханило далкхестар кай он си боркха шудре мануша. (Мар. 3:1-6)

5. Соске на требе те продължинас те нерверинас амен кана аменца или околенца икерен пес грозно?

⁵ О Йехова тай о Исусес бут нерверинен пес кана десаве манушенца икерен пес грозно тай нанай безех аме-да те нерверинас амен далкхестар. (Еф. 4:26) Ама на требе те измукас амаре нервес тай на требе те бистерас кай аме нащи те опринас е манушенгере проблемя. Ако бут време хас холи ащи те насвальовас или те ачшол аменге бут пхаро те живинас. (Пс. 37:1, 8; Як. 1:20) Тогава со требе те керас кана аменца или околенца икерен пес грозно? Ащи те сикльовас бут таро Исусес.

СО КЕРГЯС О ИСУСЕС

6. Сар кана о Исусес сине ки пхув десаве манушенца икеренас пес грозно? (Дикх и картинка-да.)

⁶ О Исусес дикхляс сар буте манушенца икерен пес грозно. Ов жанелас кай о пасторя керен е манушенгоро животос бут пхаро. (Мат. 23:2-4) Ов жанелас кай о римляня-да икерен пес грозно е манушенца тай кай бут юдея на манген вече те шунен лен. Десаве даже кердесас групес за те ухкьон мамуй ленде тай те тховен декхас аверес те управлинел. Ама о Исусес на сине нито йекхате калке групендар. Кана ахалило кай о мануша манген те керен лес цари ов нашло лендар. (Йоан 6:15)

7-8. Соске о Исусес на дикхляс те опринел е манушенгере проблемя кана сине ки пхув? (Йоан 18:36)

⁷ Кана сине ки пхув о Исусес на мангелас те занимавинел пес политикаса за те опринел е манушенгере проблемя. Соске? Соскето жанелас кай е манушен хем нанай право, хем нащи те управлинен пес коркоре. (Пс. 146:3; Йер. 10:23) Он нанай сар те махнинен о букя колато керен ленгоро животос пхаро. О светос си е Бенгеске андо васта, а ов си бут кханило тай бут мануша си сар лесте. (Йоан 8:44; Еф. 2:2) Даже о лачше мануша нащи те опринен о проблемя андо светос соскето си безехале тай нащи винаги те керен со си лачшо. (Екл. 7:20)

⁸ О Исусес жанелас кай само е Девлескоро Царство ка махнинел саворе проблемя тай о букя колендар он авен. Аке соске ов делас всичко пестар „те проповединел тай те шунярел и лачши новина е Девлескере Царствоске“. (Лука 8:1) Като керелас давкха ов анелас утеха е манушенге колато бут мангенас те на овел вече кханилипе. (Мат. 5:6; Лука 18:7, 8) Нито йекх манушикано правителство нанай те опринел о букя, а само е Девлескоро Царство ковато „нанай калке светостар“. (Четине Йоан 18:36.)

ОВ САР О ИСУСЕС КАНА ИСИ НЕСПРАВЕДЛИВОСТ

9. Соске верувинес кай само е Девлескоро Царство ка махнинел о кханилипе?

⁹ Аме живинас „ко последна диеса“. Кана о Исусес сине ки пхув на сине боркха бут проблемя кибор иси акана, ама сарто сине тогава авдиес-да он авен таро Бенг тай таро кханиле мануша. (2 Тим. 3:1-5, 13; Откр. 12:12) Сар о Исусес аме жанас кай само е Девлескоро Царство ка унищожинел е Бенгес тай ка махнинел о кханилипе. Аме проповединас е Девлескере Царствоске, а на верувинас кай о манушикане правителства ка опринен о букя тай на жас ко протескя. Дикх со ачшило йекхе пхеняса колакоро алав си Стейси.a Англал те ахальовел е Йеховаске ой жалас ко протескя колато о мануша керенас ашал и несправедливост. Ама ой започнингяс те чудинел пес дали давкха со керел си шукар. Ой пхенел: „Кана жавас ко протескя чудинавас ман дали и риг която лильом си и правилно. Акана като подкрепинав е Девлескоро Царство жанав кай синьом ки правилно риг. Жанав кай о Йехова ка керел давкха со ме нащи те керав — ка махнинел о кханилипе.“ (Пс. 72:1, 4)

10. Според Матей 5:43-48 соске на дикхас те сменинас о законя или о правителства? (Дикх и снимка-да.)

¹⁰ Бут мануша авдиес ачшон част десаве групендар колато манген те сменине о правителства. Ама бут лендар боркха бут нерверинен пес кай керен букя мамуй о законя тай керен кханилипе околенге. О Исусес на сикавгяс амен те керас салка букя. (Еф. 4:31) Йекх пхрал колескоро алав со Джефри пхенел: „Жанав кай кана о мануша керен протескя, сиго ащи боркха бут те нерверинен пес кай те започнинен те пхаген, те чорен тай даже те марен пес йекх авереса.“ Ама о Исусес сикавгяс амен те дехас саворен тай даже калкен колато на мислинен сар аменде или гонинен амен. (Четине Матей 5:43-48.) Аме дас всичко амендар те овас сар о Исусес.

11. Соске подекхана ащи те овел аменге пхаро те овас сар о Исусес?

¹¹ Жанас кай е Девлескоро Царство ка махнинел о проблемя завинаги, ама ащи те овел аменге пхаро те овас сар о Исусес кана икерен пес грозно аменца. Дикх сар чувствинелас пес йекх пхен колакоро алав си Джания кана заханас пес ласа ашал далкхеске кай си кали. Ой пхенел: „О мануша бут дукхавенас ман пе думенца. Бут нерверинавас ман тай мангавас он те овен накажиме. Мислингьом кай ако жав ко протескя мамуй далкхесте те керел пес разлика машкар о мануша, ка локьол манге.“ Ама кана накхло хари време и Джания ахалили кай требе те променинел пес. Ой пхенел: „Ахалильом кай вместо те мукав ман е Йеховаске андо васта, започнингьом те верувинав ко букя колато пхенен о мануша тай те овел ман доверие ленде. Аке соске решингьом те мукав калка групес тай те на керав вече салка букя.“ Даже те нерверинас амен кана аменца или околенца икерен пес грозно требе те дикхас те на измукас амаре нервес тай винаги те сикавас кай на синям част таро светос. (Йоан 15:19)

12. Соске требе те внимавинас со четинас, со дикхас тай со шунас?

¹² Со ка помагинел аменге те на нерверинас амен кана аменца или околенца икерен пес грозно? Ащи например те внимавинас со четинас, со дикхас тай со шунас. Десаве мануша пхенен букя ко интернети само за те керен о кханиле букя те дикхьон още по-баре тай те траден околен те ровен пес таро правителство. Подекхана ко новини о мануша пхенен со мислинен он, а ма со ачшило наистина. Даже давкха со шунас те овел верно, аме нанай те опринас о букя ако дикхас те ахальовас по-бут далкхеске. Ако бут време дикхас тай четинас салка новини, ка ачшол аменге по-пхаро, ка хас холи тай ка нерверинас амен. (Пр. 24:10) Ащи даже те бистерас кай само е Девлескоро Царство ка опринел всичко.

13. Сар давкха те четинас и Библия секо диес ка помагинел аменге?

¹³ Ако четинас и Библия секо диес тай мислинас далкхеске со четинас, ка жанас со те керас кана икерен пес грозно аменца или околенца. Йекхе пхеняке колакоро алав си Алия сине бут пхаро кана дикхелас кай икерен пес грозно десаве манушенца. Ой бут нерверинелас пес кай на накажинен е кханилен. И Алия пхенел: „Требелас те бешав тай те пучав ман: „Верувинав ли кай о Йехова ка опринел о букя?“ Тогава четингьом Йов 34:22-29. Калка стиховя помагинде манге те дав ман годи кай о Йехова дикхел всичко. Само ов жанел сар те съдинел е манушен тай само ов ащи те махнинел саворенгере проблемя.“ Ама со ащи те керас жикай жарас давкха те ачшол?

СО АЩИ ТЕ КЕРАС

14. Со ащи те керас акана? (Колосяни 3:10, 11)

¹⁴ Нащи те променинас давкха сар о мануша икерен пес околенца, ама ащи те дикхас аме те икерас амен шукар. Сарто дикхлям ащи те овас сар о Исусес като сикавас любов. Аке соске дикхас те овас лачше саворенца даже калкенца колато икерен пес грозно аменца. (Мат. 7:12; Рим. 12:17) О Йехова си щастливо кана икерас амен околенца шукар. (Четине Колосяни 3:10, 11.)

15. Сар помагинас е манушенге като пхенас ленге со сикавел и Библия?

¹⁵ Най-шукар ащи те помагинас е манушенге като сикавас лен е Йеховаске. Соске? Соскето кана ахальовен е Йеховаске тай манген те служинен леске, он ка променинен пес тай ка сикльон те икерен пес лачшес околенца тай те сикавен любов. (Иса. 11:6, 7, 9) Англал те сикльол е Йеховаске о Джемал сине йекхе групате която боринелас пес те сменинел о правителство ковато ов мислинелас кай си бут кханило. Ов пхенел: „Нащи те променинес е манушен зорле. Ме на променисайльом зорле, а и Библия помагингяс манге далкхеске.“ Давкха со сиклило о Джемал помагингяс леске те спиринел те боринел пес е кханилипнаса. Кана сикавас е манушен тари Библия ащи те помагинас ленге те спиринен те керен букя коленца дукхавен околен.

16. Соске мангес те пхенес околенге е Девлескере Царствоске?

¹⁶ Сар о Исусес аме-да бут мангас те пхенас е манушенге кай е Девлескоро Царство ка опринел ленгере саворе проблемя. Давкха ка дел силес калкен коленца икерен пес грозно. (Йер. 29:11) И Стейси колаке вече хоратингям пхенел: „Ашал далкхеске кай жанав кай о Дел ка махнинел о проблемя ащи те ачшовав спокойно кана икерен пес грозно манца или околенца. О Йехова използвинел и Библия за те утешинел ман.“ За те ащи те утешинас околен като сикавас ленге е Йеховаскере обещания тари Библия требе те подготвинас амен. Кибор по-бут верувинас ко букя колато дикхлям калке урокиесте, боркха по-лачшес ка ащи те сикавас калке букиенде е манушен коленца синям ки училища или коленца керас бути.b

17. Сар о Йехова помагинел аменге кана икерен пес грозно аменца?

¹⁷ Аме жанас кай ка овел кханилипе жикай о Бенг управлинел о светос. Ама жарас те авен по-шукар диеса соскето о Йехова обещингяс те помагинел аменге акана тай ко бъдеще те унищожинел е Бенгес тай о кханилипе. (Йоан 12:31) Ки Библия о Йехова на пхенел аменге само соске иси кханилипе. Ов пхенел аменге също кай бут хал холи калкенге коленца икерен пес грозно. (Пс. 34:17-19) Таро Исусес сикльовас со те керас кана икерен пес грозно аменца. Ов сикавгяс аменге също кай сиго о Царство ка махнинел о кханилипе завинаги. (2 Пет. 3:13) Мангас те продължинас те дас всичко амендар те проповединас е Девлескере Царствоске тай те жарас о време кана ки пхув ка овен само лачше мануша колато керен давкха со си лачшо е Девлеске андо якха. (Иса. 9:7)