Ов готово те помагинес калкенге колато манген те жанен е Йеховаске

1. Со ащи те керен о различна мануша кана шунен и лачши новина? (Деяния 13:47, 48; 16:14, 15)

О първа християня хоратиненас е Исусеске тай бут таро мануша колато шунде лен сине бут щастлива тай мангле веднага те ачшон християня. (Четине Деяния 13:47, 48; 16:14, 15.) Авдиес-да иси мануша колато си бут щастлива кана шунен и лачши новина. Аверенге ой на харешинел веднага, ама кана накхел хари време манген те ахальовен по-бут тай те служинен е Девлеске. Со требе те керас кана аракхас манушен „колато вогиестар манген те жанен и истина“?

2. Соске ащи те пхенас кай давкха те проповединас си сар далкхесте те дикхас амари градина?

² Давкха те проповединас си сар далкхесте те дикхас амари градина. Ако йекхе каштесте о плодове си ресте, ка кидас лен веднага. Ама ако иси авер букя колато барьон амаре градинате нанай те спиринас те чшорас ленге пани. Кана аракхас йекхе манушес-да ковато мангел те шунел амен, аме мангас те помагинас леске те ачшол е Исусескоро ученики кибор ащи по-сиго. Ама ако иси мануша колато още нанай готова далкхеске, ка продължинас те сикавас ленге соске си ленгере лачшипнаске те сикльон е Девлеске тай е Библияке. (Йоан 4:35, 36) Ако ахальовас дали о мануша си готова или нанай, ка жанас сар най-лачшес те помагинас ленге. Калке урокиесте ка дикхас со ащи те керас за те помагинас е манушенге колато манген те шунен амен кана хоратинас ленца за първи път. Ка дикхас също сар ащи те помагинас салке манушенге те ачшовен са по-лачше амала е Йеховаса тай те започнинен те служинен леске.

САР ТЕ ПОМАГИНАС Е МАНУШЕНГЕ КОЛАТО МАНГЕН ТЕ СИКЛЬОН ПО-БУТ

3. Со требе те керас кана аракхас манушен колато манген те жанен по-бут? (1 Коринтяни 9:26)

³ Кана аракхас манушен колато манген те жанен по-бут аме мангас те помагинас ленге те сикльон е Йеховаске тай те ачшон амала леса. Тогава на требе те дарас те пучас лен дали манген те изучинен и Библия тай те канинас лен на събрание още кана хоратинас ленца за първи път. (Четине 1 Коринтяни 9:26.)

4. Пхен йекх примери манушеске ковато мангелас те започнинел те изучинел и Библия веднага.

⁴ Пуч дали манген те изучинен. Десаве мануша коленца хоратинас си готова те започнинен те изучинен и Библия веднага. Например йекх терни жувли ки Канада гели паш амаре пхраленде колато проповединенас ки количка тай лиляс песке йекх брошура „Шукар животос завинаги!“. Тогава сине четвъртък. И пхен която сине отхе пхенгяс лаке кай ма само ащи те лел и брошура, ама ащи те изучинел и Библия-да. Давкха харешингяс е терне жувляке тай ой диняс е пхеня по номери. Хари по-късно и терни жувли пишингяс е пхеняке тай пучляс ла кана ащи те изучинен. И пхен пучляс ла дали мангел те дикхен пес събота. Тогава и жувли пучляс ла: „Ащи ли тася? Нанай ман авер бути.“ Он изучинде петък, а неделя и жувли гели на събрание. Ой бут сиго ачшовелас са по-лачши амалин е Йеховаса.

5. Со ка помагинел аменге те жанас сар най-лачшес те пучас е манушен дали манген те изучинен? (Дикх о снимкес-да.)

⁵ Нанай секо йекх мануш те овел сар калке терне жувляте тай веднага те мангел те изучинел и Библия. Десавенге ащи те требел по-бут време. Може би ка требе първо те хоратинас букиенге колато си ленге интересна. Ама ако на мислинас кай калке манушестар нанай те ачшол нищо тай продължинас те сикавас кай интересувинас амен лестар, ащи кана накхел хари време ов те мангел те изучинел. Сар ащи те пучас е манушес дали мангел те изучинел? Ка дикхас сар керен давкха десаве пхрала тай пхеня колато бут шукар започнинен изучавания.

6. Со ащи те пхенас за те сикавас е манушеске кай те изучинел и Библия си лескере лачшипнаске?

⁶ О пхрала тай о пхеня колен пучле сар започнинен изучавания пхенде кай десаве тханенде си най-шукар те на пхенес думес сар „изучаване“ или „библейска урокя“ кана пучес е манушес дали мангел те изучинел. Он ахалиле кай си по-шукар те пхенен „те хоратинас таро Дел“ или „те дикхас со пхенел и Библия“. За те мангел о мануш те хоратинен пак, ащи те пхенес: „Тари Библия ащи те ахальовес о букя е животоске колато бут мануша на жанен“ или „Ки Библия нанай само набожна букя, ой ащи те помагинел аменге андо животос-да“. Ащи те пхенес също: „Требен туке само 10-15 минукя за те сикльовес бут шукар букя.“ На требе те пхенес е манушеске кай ка керен туменге уговорка или кай ка авес секо курко, за те на даравес лес.

7. Кана десаве мануша ахалили кай аракхле и истина? (1 Коринтяни 14:23-25)

⁷ Канине лен на събрание. Ке Павлескере диеса десаве мануша ахалиле кай аракхле и истина кана геле на събрание за първи път. (Четине 1 Коринтяни 14:23-25.) Авдиес-да бут таро мануша по-сиго ачшон амала е Йеховаса кана започнинен те авен ко събрания. Кана те канинес лен? Андо лил „Шукар животос завинаги!“ о 10 уроки си амаре събраниенге, ама на требе те жарес те ресен жи отхе за те канинес лен ко събрания. Още кана хоратинес за първи път е манушеса ащи те канинес лес като пхенес леске сави проповед ка овел или со ка изучинел пес анди „Стражево кула“.

8. Со ащи те пхенас е манушеске кана канинас лес ко събрания? (Исаия 54:13)

⁸ Кана канинес е манушес пхен леске саве букя амаре събраниенде си различна таро служения колато керен окола кхангеря. Кана йекх жувли която изучинелас и Библия али на събрание за първи път, пучляс дали о пхрал ковато водинел и „Стражево кула“ жанел саворенгере алава. И пхен която изучинелас лас пхенгяс лаке кай саворе дикхен те жанен околенгере алава сарто жанен пе енданиенгере алава. И жувли пхенгяс кай лакере кхангеряте о мануша на пенжарен пес. Е манушенге ащи те овел интересно давкха-да соске кидас амен. (Четине Исаия 54:13.) Ко събрания о Йехова сикавел амен, а аме поклонинас амен леске тай дас куражи йекх аверес. (Евр. 2:12; 10:24, 25) Аке соске амаре събраниенде сикльовас, а на керас десаве ритуаля. (1 Кор. 14:40) О тхана кате кидас амен си керде за те овел аменге удобно те сикльовас. Аме на лас риг анди политика тай на хоратинас нито споринас салке букиенге. Ка овел шукар англал о мануш те авел на събрание те сикавас леске о клипи „Со керел пес ко събрания анди Зала е Царствоскери?“ за те жанел сар ка овел.

9-10. Кана канинас декхас на събрание, со ащи те пхенас леске за те на дарал те авел? (Дикх и снимка-да.)

⁹ Десаве даран те авен ко събрания соскето мислинен кай ка традас лен те ачшон е Йеховаскере свидетеля. Аке соске си шукар те пхенес е манушеске кай аме синям бут щастлива кана декхой авел тай кай нанай те традас лес те керел или те пхенел десаве букя. Пхен леске кай ащи те авел пе целоне семействоса тай пе цикне чшавенца-да тай кай аме на сикавас е чшавен отделно. Напротив, о дада тай о дая бешен пе чшавенца тай сикльон заедно. Тогава о родителя жанен саве манушенца си ленгере чшаве тай со сикльовен. (Втор. 31:12) Амаре събраниенде на киден пес парес. Аме керас давкха со пхенгяс о Исусес: „Бипаренгоро лильен, бипаренгоро ден.“ (Мат. 10:8) Ащи те пхенес е манушеске кай на требен леске бут шукар шехя за те авел ко събрания. О Дел дикхел лескоро сърцес, а ма сар си урявдо. (1 Царе 16:7)

¹⁰ Ако о мануш авел на събрание, де всичко тутар те овел леске приятно. Запенжар лес десаве старейшиниенца тай авере пхраленца тай пхениенца. Ако дикхел кай о мануша си лачше тай иринен леске внимание, ов ка мангел те авел пак.

САР ТЕ ПОМАГИНЕС Е МАНУШЕСКЕ КАНА ЗАПОЧНИНЕС ТЕ ИЗУЧИНЕС ЛЕСА

11. Сар те сикавес кай ахальовес кай е манушес иси авер-да букя те керел?

¹¹ Со на требе те бистерас кана изучинас декхаса? Сикав кай ахальовес кай е манушес иси бут букя те керел тай кай нанай те бешес бут. Например, ако разберингьен тумен кана ка изучинен, дикх те овес на време даже е манушенге тере районестар давкха те на овел боркха важно. Ка овел шукар също о първо изучаване те на овел бут дълго. Десаве пхрала тай пхеня колато изучинен буте манушенца пхенен кай си шукар те свършинен по-сиго даже ако о мануш мангел те шунел панда. Ма хоратине бут, а мук е манушес те пхенел со мислинел. (Пр. 10:19)

12. Со требе те керас кана започнинас те изучинас декхаса?

¹² Още таро първо уроки мангас те помагинас е манушеске те пенжарел е Йеховас тай е Исусес тай те задехел лен. За те керас давкха требе винаги те сикавас ленге со пхенел и Библия, а ма само те пхенас ленге со мислинас аме. (Деян. 10:25, 26) О апостол Павел най-бут хоратинелас е Исусеске — калкес колес о Йехова бичшалгяс за те помагинел аменге те пенжарас лес тай те дехас лес. (1 Кор. 2:1, 2) О Павлес също сикавгяс кай си важно те помагинас е неве ученикиенге те ачшон лачше мануша, те овел лен вяра, те овен гогявер тай те даран таро Йехова. (1 Кор. 3:11-15) И Библия пхенел кай калка букя си сар златос. (Пс. 19:9, 10; Пр. 3:13-15; 1 Пет. 1:7) Ов сар о Павлес тай помагине е манушенге те барярен пи вяра тай по амалипе амаре лачше небесноне Дадеса. (2 Кор. 1:24)

13. Сар ащи те сикавас кай ахальовас е манушен тай те сикавас търпение кариг ленде? (2 Коринтяни 10:4, 5) (Дикх и снимка-да.)

¹³ Ов сар о Исусес кана изучинес е манушенца, ов търпеливо тай сикав кай ахальовес лен. Ма пуч е манушес букя колендар ка ачшол леске неудобно. Ако требе измукен десаве букя колато си леске трудна те ахальовел тай изучинен лен по-наотхе. Вместо те традес е манушес зорле те приеминел десаве букя англал те овел готово, мук лес те мислинел за ленге тай он те ден лескере вогиесте. (Йоан 16:12; Кол. 2:6, 7) И Библия пхенел кай о хохавне букя коленде о мануша верувинен „си баре тай зорале сар стенес“ колато аме требе те перавас. (Четине 2 Коринтяни 10:4, 5.) И гръцко дума ки Библия помагинел аменге те представинас аменге бари кула която требе те овел перавди. Ама на мангас те перавас кайка кула упрал о мануш. Аке соске требе първо те помагинас леске те керел е Йеховас по гаравдуно тхан. (Пс. 91:9)

САР ТЕ ПОМАГИНЕС Е НЕВЕ МАНУШЕНГЕ КОЛАТО АВЕН НА СЪБРАНИЕ

14. Сар требе те икерас амен е неве манушенца колато авен на събрание?

¹⁴ О Йехова мангел те икерас амен лачшес саворенца, катар-да те овен он, саве-да те овен тай кибор-да парес те овен лен. (Як. 2:1-4, 9) Тогава сар те сикавас любов кариг о мануша колато авен на събрание?

15-16. Со ащи те керас за те овел е неве манушенге приятно ко събрания?

¹⁵ Десаве мануша ащи те авен амаре събраниенде само соскето манген те дикхен со ачшол ленде или соскето декхой авере тханестар пхенгяс ленге кай ка овел шукар те авен. Кана дикхес неве манушес ко събрание хоратине леса. Дикх те овел леске приятно, ама ма сикав боркха бари радост кай те ачшол леске неудобно. Пуч лес дали мангел те бешел жи туте. Сикав леске тере Библиятар тай тере лилендар или направо де лес йекх Библия тай о лила колато изучинен пес ко събрание. Мислине също со те керес за те ащи те отмукел пес. Йекх мруш ковато ало ки Зала е Царствоскери пхенгяс е пхралеске ковато ало те хоратинел леса кай лажал кай нанай урявдо шукар сар околенде. О пхрал пхенгяс леске кай въпреки кай урявас амен салке шехиенца кана авас на събрание, аме синям аменге обикновена мануша. Кавка мануш вече покръстисайло ама нисар на бистерел сар о пхрал икергяс пес леса. Кана иринас внимание е манушенге обаче требе те дикхас те на пучас лен букя колендар те ачшол ленге неудобно или колато нанай амари бути. (1 Пет. 4:15)

¹⁶ Ка овел шукар също те на пхенас кханиле букя е манушенге колато нанай Свидетеля кана хоратинас аменге тай кана дас отговоря ко събрание. На мангас е букиенца колато хоратинас те дукхавас е неве манушен колато авен амаре събраниенде тай он те на манген те авен по-бут. (Тит 2:8; 3:2) Например ка внимавинас сар хоратинас е букиенге коленде он верувинен. (2 Кор. 6:3) Най-бут о пхрала колато керен проповегя требе те внимавинен далкхеске. Он ка сикавен кай мислинен е неве манушенге също като пхенен со означинен десаве букя колато само о Свидетеля пхенен.

17. Со мангас те керас кана аракхас манушен колато манген те жанен по-бут е Йеховаске?

¹⁷ Давкха те керас ученикиен ачшол са по-важно секо диес. Иси още мануша колато манген те жанен по-бут е Йеховаске. (Деян. 13:48) Кана аракхас салке манушес без те чудинас амен требе те пучас лес дали мангел те изучинел и Библия тай те канинас лес ко събрание. Тогава ка помагинас леске те започнинел те пхирел ко дром кариг о животос. (Мат. 7:14)