Ма бистер те молинес тут околенге

1. Катар жанас кай амаре молитвес си важна е Йеховаске?

И молитва си баро подаръки. Соске? О Йехова диняс е ангелен различна букя те керен. (Пс. 91:11) Ов диняс пе Чшавес-да бут важна задачес. (Мат. 28:18) Ама дали диняс декхас и задача те шунел амаре молитвес? На-а. Ов решингяс само ов те керел давкха. О Йехова си кавка „ковато шунел о молитвес“. (Пс. 65:2)

2. Саво примери мукляс аменге о Павлес като молинелас пес околенге?

² Ащи те пхенас е Йеховаске амаре саворе холя ама требе те молинас амен околенге-да. О апостол Павел керелас давкха. Ов например пишингяс е пхраленге таро Ефес: „Продължинав те молинав ман туменге.“ (Еф. 1:16) О Павлес молинелас пес отделноне манушенге-да. Например ов пхенгяс е Тимотейеске: „Благодарно синьом е Девлеске, ... на бистерав кана молинав ман презал о диес тай презал и рат те молинав ман за туке-да.“ (2 Тим. 1:3) Е Павлес сине проблемя коленге те молинел пес. (2 Кор. 11:23; 12:7, 8) Ама ов дикхелас те молинел пес околенге-да.

3. Соске ащи те бистерас те молинас амен околенге?

³ Подекхана ащи те бистерас те молинас амен околенге. Соске? Йекх пхен пхенел: „Иси амен бут букя те керас. Ащи те мислинас боркха бут амаре проблемиенге кай те молинас амен само аменге.“ Ачшол ли туса-да давкха подекхана? Кавка уроки ка помагинел туке. Ка дикхас 1) соске си важно те молинас амен околенге тай 2) сар те керас лес.

СОСКЕ МОЛИНЕС ТУТ ОКОЛЕНГЕ?

4-5. Сар амаре молитвес околенге ащи те помагинен ленге? (Яков 5:16)

⁴ Амаре молитвес околенге ащи те помагинен ленге. (Четине Яков 5:16.) Ащи ли давкха те молинас амен околенге те решинел ленгере проблемя? Ва, ащи. О Исусес жанелас кай о апостол Петър сиго ка пхенелас кай на пенжарел лес ама пхенгяс леске: „Бут молингьом ман за туке те на отперес тари вяра.“ (Лука 22:32) О Павлес-да жанелас кай кана молинес тут йекхе манушеске давкха ащи те променинел о букя колато ачшон лескере животосте. Кана без те овел за соске сине ко пханлибе андо Рим ов пишингяс е Филимониеске: „Соскето верувинав кай ашал тумаре молитвенде ка иринав ман паш туменде.“ (Флм. 22) Тай давкха ачшило. Сиго мукле е Павлес таро пханлибе тай пак ащине те хоратинел е манушенца е Девлеске.

⁵ Ама давкха на означинел кай о Йехова винаги требе те керел давкха со молинас лес. Ов дикхел кибор бут лескере служителя хан холи е букиенге коленге молинен пес тай подекхана решинел те керел давкха со манген лестар. Кана жанас давкха ащи те молинас амен вогиестар со-да те ачшол тай без те дарас те мукас всичко лескере вастенде. (Пс. 37:5; дикх 2 Коринтяни 1:11.)

6. Сар давкха те молинас амен околенге традел амен те дехас лен? (1 Петър 3:8)

⁶ Кана молинас амен околенге сикльовас „те дукхал“ амен ленге. (Четине 1 Петър 3:8.) Мануш колес дукхал околенге мангел те помагинел кана дикхел кай декхой мъчинел пес. (Мар. 1:40, 41) О Майкъл ковато си старейшина пхенел: „Кана молинав ман околенге, по-шукар ахальовав ленгере проблемя тай давкха традел ман те дехав лен още по-бут. Даже он те на жанен кай молинав ман за ленге давкха керел ман са по-близко ленца.“ Авер старейшина пхенел: „Кана молинас амен декхаске по-бут ка мангас те помагинас леске.“ Ов пхенел също: „Като помагинас е манушеске колеске молинас амен, все едно помагинас давкха со мангас таро Йехова те ачшол.“

7. Сар давкха те молинас амен околенге помагинел аменге те на мислинас само амаре проблемиенге? (Филипяни 2:3, 4) (Дикх о снимкес-да)

⁷ Кана молинас амен околенге на мислинас само амаре проблемиенге. (Четине Филипяни 2:3, 4.) Кавка светос си е Кханилеске андо васта тай ашал далкхеске секоне йекхес амендар иси проблемя. (1 Йоан 5:19; Откр. 12:12) Кана често молинас амен околенге нанай те бистерас кай о съща кханиле букя ачшон амаре пхраленца ко цело светос. (1 Пет. 5:9) Йекх пионерка пхенел: „Кана молинав ман околенге, дав ман годи кай лен-да иси проблемя. Кана помнинав давкха, спиринав те мислинав само мере проблемиенге.“

ЛЕНГЕ ТРЕБЕН АМАРЕ МОЛИТВЕС

8. Пхен например каске ащи те молинас амен.

⁸ За каске ащи те молинас амен? Ащи те молинас саворенге колен иси йекх конкретно проблеми. Например калкенге колато си насвале, е терненге колен ки училища траден те керен кханиле букя или е пхуренге. Буте амаре пхраленге тай пхениенге нанай локо соскето декхой ленгере семействостар или о правителство дикхел те спиринел лен те служинен е Йеховаске. (Мат. 10:18, 36; Деян. 12:5) Десаве требелас те мукен пе кхера соскето отхе кате бешенас маренас пес. Авер мъчинен пес ашал о природна бедствия. Ащи те на пенжарас калке пхрален тай пхениен. Ама кана молинас амен ленге, сикавас кай шунас е Исусес ковато пхенгяс: „Дехен тумен йекх аверес.“ (Йоан 13:34)

9. Соске требе те молинас амен е пхраленге колато водинен е Йеховаскере организация тай ленгере ромниенге-да?

⁹ Ащи те молинас амен е пхраленге-да колато водинен амен, е пхраленге таро Ръководно тяло тай е пхраленге колато помагинен ленге. Също е пхраленге таро Бетел колато си ко комитети, е надзорникиенге ко Бетел, е окръжноне надзорникиенге, е старейшиниенге тай е пхраленге колато си помощник-служителя. Бут калке пхралендар хан холи соскето иси лен песке проблемя ама ден всичко пестар те помагинен аменге-да. (2 Кор. 12:15) Например йекх окръжно надзорники пхенел: „Бут си манге пхаро те бешав дур ме пхуре даятар тай дадестар. О дуй-да си насвале. Ми пхен тай лакоро ром дикхен лен шукар ама си манге пхаро кай нащи те помагинав ленге по-бут.“ Ащи те на жанас саве холя иси калке пхрален ама на требе те бистерас те молинас амен ленге. (1 Сол. 5:12, 13) Ащи също те молинас амен калке пхраленгере ромниенге, соскето он си жи ленде тай помагинен ленге за те ащи калка пхрала те продължинен те ден всичко пестар андо сбори.

10-11. Пхен дали о молитвес колато пхенас саворенге колен иси йекх конкретно проблеми анен радост е Йеховаске.

¹⁰ Сарто дикхлям, често молинас амен саворе пхраленге тай пхениенге колен иси йекх конкретно проблеми. Например даже кана на мислинас конкретно йекхе манушеске ащи те молинас е Йеховас те помагинел калкенге колато си ко пханлибе или те утешинел калкен коленге муле мануша колен дехен. Йекх старейшина пхенел: „Боркха буте пхрален тай пхениен иси проблемя кай подекхана пхенас йекх молитва саворенге колато мъчинен пес.“

¹¹ Дали салка молитвес анен радост е Йеховаске? Ва, бут! Аме на жанас со требел секоне йекхе пхралеске тай пхеняке. Адалкхеске си шукар те молинас амен саворенге колен иси йекх конкретно проблеми. (Йоан 17:20; Еф. 6:18) Калка молитвес сикавен амари любов кариг саворе пхраленде тай пхениенде. (1 Пет. 2:17)

КАНА МОЛИНАС АМЕН ЙЕКХЕ МАНУШЕСКЕ

12. Сар давкха те овас путерде якхенгере ка помагинел аменге те молинас амен конкретно йекхе манушеске?

¹² Ов путерде якхенгоро. Шукар си ма само те молинас амен саворенге колен иси йекх конкретно проблеми, а също те молинас амен йекхе пхралеске или пхеняке, като пхенас ленгере алава-да. Иси ли декхой те сбориестар ковато си бут насвало? Андо сбори иси ли декхой терно колеске си пхаро ки училища соскето лескере съученикя траден лес те керел кханиле букя? Иси ли дад или дай колато коркоре дикхен пе чшавен тай си ленге пхаро те „сикавен лен те керен со мангел о Йехова“? (Еф. 6:4) Като синян путерде якхенгоро ка дукхал тут още по-бут околенге тай ка сикавес ленге още по-бари любов. Давкха ка традел тут те молинес тут за ленге.a (Рим. 12:15)

13. Сар ащи те молинас амен декхаске колес на пенжарас?

¹³ Молине тут околенге като използвинес ленгере алава. Ащи те керас давкха даже ако на пенжарас йекхе манушес. Например мислине е пхраленге тай е пхениенге колато си ко пханлибе ко Крим, ки Еритрея, ки Русия тай ко Сингапур. Ко сайти jw.org ащи те аракхес ленгере алава. Йекх окръжно надзорники пхенел: „Кана пишинав манге о алав йекхе пхралескоро или йекхе пхенякоро колато си ко пханлибе тай после пхенав лес на глас, си манге по-лесно те дав ман годи те молинав ман калке манушеске.“

14-15. Сар ащи те молинас амен конкретноне букиенге?

¹⁴ Молине тут конкретноне букиенге. О Майкъл колеске вече хоратингям пхенел: „Кана четинав ко jw.org е пхраленге ко пханлибе мислинав сар ка овелас манге ако синьомас ленгере тханесте. Жанав кай ка хавас бут холи ме ромняке тай кай ка мангавас те овел ла всичко со требел лаке. Тогава жанав точно со те пхенав кана молинав ман е пхраленге ко пханлибе колато си прандеме.“ (Евр. 13:3)

¹⁵ Като мислинас состар накхен секо диес амаре пхрала ко пханлибе също ка жанас точно за соске те молинас амен. Например ащи те молинас амен о пазачя те овен лачше ленца тай о баре ко пханлибе те мукен лен те поклонинен пес е Йеховаске. (1 Тим. 2:1, 2) Ащи те молинас амен ленгоро примери те дел куражи е сбориес или десаве мануша таро светос те дикхен сар икерен пес он тай те манген те шунен и лачши новина. (1 Пет. 2:12) Ащи те керас о съща букя кана молинас амен пхраленге тай пхениенге колен иси авер проблемя. Като синям путерде якхенгере, като използвинас околенгере алава кана молинас амен тай като молинас амен конкретноне букиенге сикавас амари бари любов кариг околенде. (1 Сол. 3:12)

МА БИСТЕР СОСКЕ МОЛИНАС АМЕН

16. Со те на бистерас кана молинас амен? (Матей 6:8)

¹⁶ Сарто дикхлям амаре молитвес ащи те помагинен околенге. Ама кана молинас амен аме на пхенас е Йеховаске букя колато ов на жанел. На требе те бистерас кай о Йехова на жарел те дас лес годи со те керел. Ов жанел со требел лескере служителиенге още англал он те жанен. (Четине Матей 6:8.) Тогава соске те молинас амен околенге? Соскето амаре молитвенца сикавас кай дехас околен тай е Йеховас иси бари радост като дикхел сар лескере служителя сикавен любов сар лесте.

17-18. Саво примери помагинел аменге те ахальовас соске те молинас амен околенге?

¹⁷ Даже те дикхьол кай амаре молитвес на променинен о букя, он сикавен кай дехас амаре пхрален тай пхениен тай о Йехова дикхел давкха. Представине туке йекх семейство до цикне чшавенца — йекх чшо тай йекх чшай. О чшо си насвало тай си анде тханесте. И чшай молинел пе дадес: „Молинав тут помагине ме пхралеске. Ов си бут насвало!“ О дад вече керел со требе. Ов дехел пе чшавес тай дикхел лес шукар. Ама е дадеске анел бари радост те дикхел сар лескери цикни чшай хал бут холи пе пхралеске тай молинел пе дадес те помагинел леске.

¹⁸ О Йехова-да мангел те дикхас околенге тай те молинас амен йекх авереске. Тогава ка сикавас кай на дикхас само аменге тай кай вогиестар дехас амаре пхрален тай пхениен. О Йехова ка дикхел давкха. (2 Сол. 1:3; Евр. 6:10) Сарто дикхлям амаре молитвес ащи подекхана даже те променинен о букя колато ачшон декхаскере животосте. Аке соске мангас те дас о най-лачшо амендар те молинас амен околенге.