Сар ащи те простинас сар о Йехова?

1-2. а) Кана ащи те овел аменге бут пхаро те простинас декхаске? б) Со кергяс и Дениз?

Пхаро ли си туке те простинес околенге? Бутенге амендар си пхаро особено ако декхой пхенел или керел нещо, колеса бут дукхавел амен. Ама иси со те керас, за те накхел амари холи тай те простинас околенге. Дикх со ачшило е пхеняса Денизa. Ой простингяс вогиестар, въпреки кай сине лаке бут пхаро. Презал о 2017 бреш ой, лакоро ром тай лакере чшаве геле те дикхен о нево най-баро Бетели е Йеховаскере свидетеленгоро. Жикай ириненас пес кхере, авер шофьори, без те мангел, чалавгяс ленгери лека кола. Е пхеняке ачшило кханилес тай кана али песте, ахалили, кай лакоро ром, о Браян, муло, а лакере чшаве сине ки болница тай хич на сине лачшес. Кана дел пес годи со ачшило, и Дениз пхенел: „Бут сине манге пхаро, на жанавас кате аракхльовав.“ После ой ахалили, кай о шофьори на сине мато, на сине дрогириме тай дикхелас по дром. Тогава ой молингяс пес е Йеховаске те помагинел лаке те овел спокойно.

² Долде е шофьориес, ковато чалавгяс лен, тай обвининде лес, кай мударгяс манушес без те мангел. Ако аракхенас лес виновно ка чшиенас лес андо пханлибе. Таро съдос пхенде е пхеняке, кай далкхестар со ка пхенел ой ко съдос, ка решинен дали те чшиен е манушес андо пханлибе или нанай. И Дениз пхенел: „Требелас пак те хоратинав е букиенге, колато най-бут дукхавде ман. Сине манге все едно декхой путерел ме ранес тай чшорел йекх тони лон анде ленде.“ Накхло хари време тай и Дениз требелас те жал ко съдос тай те хоратинел англал о мануш, ковато боркха дукхавгяс лакере семействос. Со кергяс ой? Ой молингяс е съдияс те сикавел милост кариг о манушb. Кана пхенгяс со мангел, о съдияс почнингяс те ровел тай пхенгяс лаке: „25 години синьом съдияс, ама нисар жи акана на дикхльом декхой те мангел те сикавел пес милост кариг о мануш, ковато боркха бут дукхавгяс лес. Ко съдос никхой на простинел тай нисар на сикавел пес любов.“

3. Со помагингяс е пхеняке Дениз те простинел?

³ Со помагингяс е пхеняке те простинел? Ой мислингяс сар простинел о Йехова. (Мих. 7:18) Кана синям благодарна далкхеске, кай о Йехова простинел аменге, ка мангас аме-да те простинас околенге.

4. Со мангел о Йехова амендар? (Ефесяни 4:32)

⁴ О Йехова мангел амендар те простинас околенге са вогиестар, сарто керел ов. (Четине Ефесяни 4:32.) Ов мангел амендар те овас готова те простинас калкенге, колато дукхавде амен. (Пс. 86:5; Лука 17:4) Калке урокиесте ка дикхас трин букя, колато ка помагинен аменге те простинас по-бут.

МА ХОХАВ ТУТ, КАЙ НИЩО НА АЧШИЛО, КАНА ДУКХАВЕН ТУТ

5. Сарто пишинел андо Притчи 12:18, сар ащи те чувствинас амен, ако декхой дукхавгяс амен?

⁵ Ащи те овел аменге бут пхаро, ако декхой дукхавел амен е букиенца, колато пхенел или керел, особено ако кавка мануш си амаро амал или си декхой амаре семействостар. (Пс. 55:12-14) Подекхана ащи боркха бут те хас холи тай те дукхал амен, все едно хевлярде амен чшуряса. (Четине Притчи 12:18.) Ащи дикхас те на иринас внимание сар чувствинас амен или те керас амен все едно нищо на ачшило. Ама давкха си все едно те хевлярен амен чшуряса тай аме те мукас и чшури анди рана. Нанай сар те чувствинас амен по-лачшес, ако кана окола дукхавен амен, керас амен все едно нищо на ачшило.

6. Со ащи те керел мануш, кана декхой дукхавел лес?

⁶ Кана декхой дукхавел амен, първо ащи те нерверинас амен. И Библия пхенел, кай давкха си нормално. Ама ой пхенел също, кай на требе те икерас холи бут време. (Пс. 4:4; Еф. 4:26) Соске? Соскето далкхестар сар чувствинас амен, зависинел со ка керас. Ако синям нервериме, нанай сар те керас лачшипе. (Як. 1:20) Ма бистер, кай си нормално те нерверинес тут, ама тутар зависинел дали ка икерес холи.

7. Сар ащи те чувствинас амен, кана декхой дукхавел амен?

⁷ Кана икерен пес кханилес аменца, ащи те чувствинас авер-да букя. Например и пхен Ан пхенел: „Кана синьомас цикни, мо дад мукляс ме дая тай прандесайло е ромняке, колаке платиненас, за те дикхел ман. Чувствинавас, кай саворе мукле ман. Кана бияндиле ленге чшаве, все едно он лиле моро тхан. Жикай барьовавас мислинавас, кай никхой на мангел ман.“ И пхен Джорджет пхенел сар чувствингяс пес, кана лакоро ром пхиргяс упрал лате: „Барилям заедно. О дуй-да синямас пионеря тай жасас на служба заедно. Ов чшингяс мо воги.“ А и пхен Наоми пхенел: „Нисар на накхло ме гогятар, кай мо ром ка дукхавел ман. Кана пхенгяс манге, кай гаравдунес дикхел мръсна букя, ачшило манге бут грозно, соскето ов на сине честно манца тай гаравгяс мандар.“

8. а) Соске требе те простинас околенге? б) Соске си амаре лачшипнаске те простинас? (Дикх о блокчес „Со те керес, ако декхой дукхавгяс тут?“)

⁸ На зависинел амендар со ка пхенен или со ка керен аменге окола, ама амендар зависинел со ка керас аме. О най-шукар, ковато ащи те керас, си те простинас. Соске? Соскето дехас е Йеховас тай ов мангел те простинас околенге. Ако икерас холи тай на простинас, ащи те керас букя без те мислинас тай даже ащи те насвалярас амен. (Пр. 14:17, 29, 30) Дикх со ачшило е пхеняса Кристин. Ой пхенел: „Кана синьом боркха нервериме тай холяме, кай нащи мислинав нисоске авевреске, нащи асав, хав со аракхав, на совав кибор требе тай си манге бут пхаро те икерав ме нервес. Тогава на икерав ман лачшес ме ромеса тай околенца-да.“

9. Соске на требе те икерас гарези?

⁹ Даже ако о мануш на мангел те извининел пес аменге, аме ащи те керас нещо, за те на дукхал амен боркха бут далкхестар со кергяс. Со ащи те керас? И Джорджет пхенел: „Ме ромеса муклям амен. Требелас манге време, ама спирингьом те икерав гарези. Тогава направо локило манге.“ Кана спиринас те икерас гарези, на мукас и холи те традел амен те икерас амен грозно околенца. Тогава керас лачшипе аменге-да — спиринас те мислинас постоянно е кханиле букиенге, колато ачшиле тай пак иси амен радост таро животос. (Пр. 11:17) Ама со те керес ако на синян готово те простинес?

СО ТЕ КЕРЕС, ЗА ТЕ НАКХЕЛ ТИ ХОЛИ ТАЙ ТИ ДУКХ

10. Соске требе те мукас те накхел време, за те накхел амари дукх? (Дикх и картинка-да.)

¹⁰ Со ащи те керес, за те накхел ти холи тай ти дукх? Мук те накхел хари време. Ако декхой чалавел пес бут, даже те жал ки болница, пак ка требел леске време, за те накхел леске напълно. Аменге-да требел време, за те накхел амари дукх тай те овас готова те простинас вогиестар. (Екл. 3:3; 1 Пет. 1:22)

11. Сар и молитва ка помагинел туке те овес готово те простинес?

¹¹ Молине е Йеховас те помагинел туке те простинес.c И Ан пхенгяс сар и молитва помагингяс лаке. Ой пхенел: Молингьом е Йеховаске те простинел саворенге амаре семействостар е грозноне букиенге, колато пхенгям или кергям. После пишингьом ме дадеске тай лескере ромняке лил тай пхенгьом, кай простингьом ленге.“ Е пхеняке на сине лесно, ама ой пхенел: „Надина ман, кай давкха, кай дикхльом те овав сар о Йехова, ка традел ме дадес тай лескере ромня те манген те сикльон по-бут леске.“

12. Соске требе те мукас те водинел амен о Йехова, а ма амаре чувства? (Притчи 3:5, 6)

¹² Мук те водинел тут о Йехова, а ма тере чувства. (Четине Притчи 3:5, 6.) О Йехова винаги жанел со си о най-лачшо аменге. (Иса. 55:8, 9) Ов нисар нанай те пхенел аменге те керас нещо, ковато ка дукхавел амен. Аке соске, щом пхенел аменге, кай требе те простинас, значи ащи те овас сигурна, кай давкха си амаре лачшипнаске. (Пс. 40:4; Иса. 48:17, 18) Ама ако шунас амаро сърцес, ащи нисар те на овас готова те простинас. (Пр. 14:12; Йер. 17:9) И Наоми пхенел: „Първо мислингьом, кай на синьом длъжно те простинав ме ромеске, кай дикхляс мръсна букя. Даравас, кай ов пак ка дукхавел ман или кай ка бистерел кибор бут дукхавгяс ман. Тай мислинавас, кай о Йехова ахальовел ман. Ама после дикхльом, кай давкха, кай о Йехова ахальовел ман, на означинел кай мере чувства си шукар лескере якхенде. Ов жанел, кай си манге пхаро тай кай требел манге време, за те накхел ми холи, ама мангел те простинав-да.“d

ДИКХ О ЛАЧШИПЕ АНДО МАНУШ

13. Сарто пишинел андо Римляни 12:18-21, со требе те керас?

¹³ Те простинас декхаске, на означинел само те спиринас те хоратинас далкхеске со ачшило. Ако калке манушеса служинас заедно е Йеховаске, мангас те овел мири машкар аменде. (Мат. 5:23, 24) Адалкхеске вместо те икерас холи, мангас те сикавас милост тай те простинас. (Четине Римляни 12:18-21; 1 Пет. 3:9) Со ка помагинел аменге?

14. Со требе те дикхас те керас тай соске?

¹⁴ О Йехова мангел те дикхел о лачшипе андо мануша. Аме-да требе те овас сар лесте тай те родас о шукар букя околенде. (2 Лет. 16:9; Пс. 130:3) Мануш аракхел давкха со родел. Ако родас о лачшипе околенде ка овел аменге по-лесно те простинас ленге. Йекх пхрал, о Джаред, пхенел: „Дикхльом, кай си манге по-лесно те простинав декхаске, ако мислинав е букиенге, колато харешинав лесте, а ма лескере грешкаке.“

15. Соске си шукар те пхенес е манушеске, кай простингян леске?

¹⁵ Важно си също те пхенас е манушеске, кай простингям леске. Соске? Дикх со пхенел и Наоми: „Мо ром пучляс ман: ‘Простингян ли манге?’ Тогава ахалильом, кай на простингьомас леске ме сърцесте. Кана накхло хари време, ащине те пхенав леске калка дуй баре думес: ‘Простинав туке.’ Кана пхенгьом ме ромеске давкха, лескере якха пхердиле асвенца. Леске бут локило тай манге-да също. Отсарто ачшило давкха иси ман пак доверие лесте тай пак синям най-лачше амала.“

16. Со сиклилян далкхеске сар те простинес?

¹⁶ О Йехова мангел те простинас. (Кол. 3:13) Аменге ащи те овел пхаро те простинас околенге. Ама ащи те керас давкха, ако на керас амен все едно нищо на ачшило, кана дукхавен амен, тай дас всичко амендар те накхел амари холи. После ка ащи те почнинас те мислинас е шукаре букиенге калке манушесте. (Дикх о блокчес „Трин букя, колато ка помагинен аменге те простинас“.)

МИСЛИНЕ САВО ЛАЧШИПЕ КА АНЕЛ ТУКЕ ДАВКХА ТЕ ПРОСТИНЕС

17. Соске си шукар те простинас околенге?

¹⁷ Иси бут букя, ашал коленге те мангас те простинас. Аке десаве лендар. Първо, кана простинас, аме анас радост амаре Дадеске, е Йеховаске, тай сикавас, кай мангас те овас сар лесте. (Лука 6:36) Второ, сикавас, кай синям леске благодарна, кай ов простинел аменге. (Мат. 6:12) Тай трето, кана простинас, пазинас амаро састипе тай амаро амалипе околенца.

18-19. Со ащи те ачшол, кана синям готова те простинас?

¹⁸ Кана простинас околенге, ащи те овен амен благословиес, коленге даже на мислингям. Дикх со ачшило е пхеняса Дениз, колаке хоратингям по-рано. Ой на жанелас, кай о мануш, ковато кергяс и катастрофа, мангелас те мударел пес, кана накхел о делос. Ама ашал далкхеске, кай и Дениз простингяс леске, ов мангляс те изучиел и Библия е Йеховаскере свидетеленца.

¹⁹ Ащи те мислинас, кай давкха те простинас декхаске си о най-пхаро, ковато декхана ка требе те керас, ама давкха ащи те анел аменге о най-баре благословиес-да. (Мат. 5:7) Аке соске мангас те дас о най-лачшо амендар те простинас сар о Йехова.