Терне пхралален, дикхен те овен сар о Марко тай о Тимотей

1-2. Саве букиенге ащине те хан холи о Маркос тай о Тимотей?

Терне пхралален, манген ли те керен по-бут анди служба е Йеховаске тай те помагинен по-бут андо сбори? Сигурна синям, кай манген. Бут си шукар те дикхас, кай боркха бут терне пхрала манген те служинен околенге! (Пс. 110:3) Ама ащи те на овел туменге локо те керен по-бут е Йеховаске. Чудинес ли тут дали те керес по-бут е Йеховаске, соскето на жанес со ка ачшол те животоса или кате ка мангел о Йехова те служинес? Дали декхана откажингян десави задача, соскето мислингян, кай нащи те керес ла шукар? Ма само ту хас холи калке букиенге.

² О Маркос тай о Тимотей-да хале холи салке букиенге. Ама он решинде те керен по-бут е Йеховаске, въпреки кай на жаненас сар ка променинел пес ленгоро животос или дали ка ащи те справинен пес. Кана о апостол Павел тай о Варнава пучле е Маркос дали мангел те жал ленца те проповединел авере тханенде, ов сигурно бешелас пе даяса шукаре кхересте. (Деян. 12:12, 13, 25) Ама о Маркос мукляс по кхер, за те керел по-бут е Йеховаске. Ов гело първо ки Антиохия, а после о Павлес тай о Варнава лиле лес песа по-дуре тханенде. (Деян. 13:1-5) О Тимотей-да сигурно живинелас пе даяса тай пе дадеса, кана о Павлес пучляс лес дали мангел те жал те проповединел леса. О Тимотей сине терно тай ащине те мислинел песке, кай нанай готово далкхеске. (Дикх също 1 Коринтяни 16:10, 11 тай 1 Тимотей 4:12.) Ама ов гело е Павлеса тай сине лес бут благословиес. (Деян. 16:3-5)

3. a) Катар жанас, кай о Павлес бут ценинелас е Маркос тай е Тимотейес? (2 Тимотей 4:6, 9, 11) (Дикх о картинкес-да.) б) Саве въпрося ка дикхас калке урокиесте?

³ О Маркос тай о Тимотей сиклиле те керен бут букя андо сбори още кана сине терне. О Павлес бут ценинелас лен тай мангляс он те овен жи лесте, кана ахалило, кай сиго ка мерел. (Четине 2 Тимотей 4:6, 9, 11.) Соске о Павлес дехелас калке до терне мрушен боркха бут? Сар ащи о терне пхрала авдиес те овен сар ленде тай сар ащи те помагинен ленге е Павлескере съвекя?

ОВ ГОТОВО ТЕ СЛУЖИНЕС ОКОЛЕНГЕ САР О МАРКОС

4-5. Сар о Маркос сикавгяс, кай вогиестар служинел околенге?

⁴ Те служинес околенге означинел те дес всичко тутар те помагинес ленге даже кана си туке пхаро те керес лес. Точно давкха керелас о Маркос. Лес сигурно бут задукханило, кана о Павлес на мангляс те лен лес песа о второ дром, кана цидинде те проповединен авере тханенде. (Деян. 15:37, 38) Ама ов на мукляс кавка те спиринел лес те служинел пе пхраленге тай пе пхениенге.

⁵ О Маркос гело е Варнаваса те служинел авере тханесте. Кана накхле декхате 11 бреша, о Павлес сине пханло ко Рим тай о Маркос сине жи лесте. (Флм. 23, 24) О Павлес сине боркха благодарно леске, кай пхенгяс, кай о Маркос си „бари помощ“ за леске. (Кол. 4:10, 11)

6. Саве шукар букя ачшиле е Маркоса, ашал далкхеске кай сине амал пхраленца, колато бут бреша служиненас е Йеховаске? (Дикх и бележка-да.)

⁶ О Маркос сине лачшо амал пхраленца, колато сине верна е Йеховаске, тай давкха сине лескере лачшипнаске. След като сине е Павлеса ко Рим, ов гело ко Вавилон паш о апостол Петър. Он ачшиле боркха баре амала, кай о Петрес пхенгяс за леске „мо чшо, о Маркос“. (1 Пет. 5:13) Жикай сине заедно, о Петрес сигурно пхенгяс леске бут интересна букя е Исусескере животоске тай лескере службаке тай по-късно о Маркос пишингяс калка букя анди Библия ко лил Марко.a

7. Сар йекх терно пхрал дикхелас те овел сар о Маркос? (Дикх и снимка-да.)

⁷ О Маркос керелас бут букя ки служба тай сине лачшо амал верноне пхраленца. Сар ащи те овес сар лесте? Сигурно мангес те керес по-бут е Йеховаске тай мангес те служинес сар помощник-служители или сар старейшина, ама още на синян готово. Вместо те хас холи, мислине со ащи те керес е Йеховаске тай околенге. Аке со ачшило е пхралеса Саймън, ковато акана си старейшина. Сар по-терно ов дикхелас со керенас окола терне пхрала. Десаве лендар получинде по-бут задачес андо сбори англал лесте. О Саймън мислингяс, кай никхой на иринел леске внимание тай пхенгяс давкха е пхраленге. Йекх старейшина пхенгяс леске, кай ка овел шукар те керел со ащи, за те помагинел околенге даже ако никхой на дикхел со керел ов. Тогава о Саймън започнингяс те помагинел е по-пхуренге тай калкенге, колато нанаяс соса те жан ко събрания. Като мислинел калке диесенге ов пхенел: „Ахалильом со означинел те служинес околенге. Сине ман бари радост, соскето помагинавас околенге.“

ДЕХЕ ОКОЛЕН САР О ТИМОТЕЙ

8. Соске о Павлес мангляс о Тимотей те пътувинел леса? (Филипяни 2:19-22)

⁸ Е Павлеске требенас смела пхрала, колато те жан леса ко диза, коленде преди гонинде лес. Ов първо пучляс е Силас, ковато служинелас е Йеховаске бут бреша, те жал леса. (Деян. 15:22, 40) После о Павлес мангляс о Тимотей-да те жал леса. Соске? Йекх таро букя, колато харешинде е Павлеске сине, кай за е Тимотейеске хоратиненас пес шукар букя. (Деян. 16:1, 2) О Тимотей също вогиестар дикхелас е манушенге. (Четине Филипяни 2:19-22.)

9. Сар о Тимотей сикавгяс, кай наистина дикхел пе пхраленге тай пе пхениенге?

⁹ Кана започнингяс те служинел е Павлеса, о Тимотей сикавгяс, кай дикхел по-бут околенге, а ма песке. Аке соске кана о Павлес мукляс лес ки Берия, сине сигурно, кай ов шукар ка дикхел е неве пхраленге тай пхениенге. (Деян. 17:13, 14) Тогава о Тимотей сигурно сиклило бут таро Сила, ковато също сине ки Берия. По-късно о Павлес бичшалгяс е Тимотейес те жал коркоро ко Солун, за те дел куражи е пхрален отхе. (1 Сол. 3:2) Презал о следваща 15 бреша о Тимотей сиклило „те ровел калкенца, колато ровен“ тай те тховел пес околенгере тханесте, кана си ленге пхаро. (Рим. 12:15; 2 Тим. 1:4) Сар о терне пхрала ащи те овен сар о Тимотей?

10. Сар о пхрал Джейк сиклило те дикхел околенге по-бут?

¹⁰ Йекх пхрал, колескоро алав си Джейк, сиклило вогиестар те дикхел околенге. Кана сине терно, леске сине трудно те хоратинел е по-пхуре пхраленца тай пхениенца. Кана жалас на събрание, о Джейк само поздравинелас лен тай нашелас. Йекх старейшина пхенгяс леске, кай ащи те започнинел те хоратинел пе пхраленца тай пе пхениенца, като пхенел ленге со харешинел ленде. Ов пхенгяс леске също те мислинел саве букя си интересна околенге. О Джейк кергяс со пхенгяс леске о пхрал. Ов вече си старейшина тай пхенел: „Акана си манге по-лесно те хоратинав е манушенца, саве-да брешенде те овен. Шукар си манге, кай жанав состар накхен окола. Давкха помагинел манге те жанав со требел ме пхраленге тай ме пхениенге тай со ащи те керав за ленге.“

11. Сар ащи о терне пхрала те сикльон те дикхен околенге таро сбори? (Дикх и снимка-да.)

¹¹ Терне пхралален, туме ащи те сикльовен те дикхен околенге. Кана жан на събрание, хоратинен саворенца — е терненца-да, е по-пхуренца-да. Пучен лен сар си тай палал далкхесте шунен лен. Давкха ка помагинел туменге те ахальовен сар те помагинен ленге. Например ащи те дикхес, кай йекх пхуро пхрал тай лескери ромни на жанен сар те използвинен о приложение JW Library^® тай требе декхой те помагинел ленге. Или ащи те ахальовес, кай нанай каса те жан на служба. Ащи ли те сикавес ленге сар те използвинен пе телефоня или те жас ленца на служба? Като помагинес, ка сикавес околенге-да таро сбори со си шукар те керен.

Е ПАВЛЕСКЕРЕ СЪВЕКЯ АЩИ ТЕ ПОМАГИНЕН ТУКЕ

12. Сар о съвекя, колато о Павлес диняс е Тимотейес, ащи те помагинен е терне пхраленге?

¹² О Павлес диняс е Тимотейес съвекя, колато те помагинен леске андо животос тай анди служба. (1 Тим. 1:18; 2 Тим. 4:5) Ако синян терно пхрал, калка съвекя ащи те помагинен туке-да. Сар? Четине о дуй лила, колато о Павлес пишингяс е Тимотейеске, все едно си пишиме туке, тай дикх сар ащи те керес о букя, колато четинес. Акана ка дикхас десаве таро съвекя, колато о Павлес диняс е Тимотейес.

13. Со ка помагинел аменге те овас верна е Йеховаске?

¹³ „Сикльов те овес верно е Девлеске.“ (1 Тим. 4:7б) О Павлес пхенгяс е Тимотейеске те овел верно е Йеховаске тай те керел букя, колато анен леске радост. Аме на биянгьовас верна е Девлеске, адалкхеске требе те дас всичко амендар, за те овас леске верна тай те дехас лес. Ахальовас давкха таре Павлескере думес. Кана пхенгяс „сикльов“, ов използвингяс дума, която пхенел пес кана йекх спортисти трениринел бут, за те овел готово те жал ко състезание. Ов на требе те мукел авер букя те лен лескери годи. Аме-да требе те дас всичко амендар те сикльовас те керас букя, колато ка помагинен аменге те овас лачше амала е Йеховаса.

14. За соске требе те четинас и Библия? Пхен йекх примери.

¹⁴ Кана сикльовес те четинес секо диес и Библия, ма бистер, кай керес давкха, за те овес лачшо амал е Йеховаса. Например со ахальовес е Йеховаске, кана четинес сар о Исусес хоратингяс е барвале терне управникиеса? (Мар. 10:17-22) О терно мануш верувинелас, кай о Исусес сине о Месия, ама на сине лес боркха бари вяра, кай те ачшол лескоро ученики. Ама о Исусес вогиестар хоратингяс леса. Ов мангелас о терно мануш те служинел е Девлеске тай те овел лес шукар животос. О Исусес сикавгяс е Йеховаскери любов кариг о терно мануш. (Йоан 14:9) Кана мислинес калке случкаке, мислине: „Со требе те керав ме, за те ачшовав по-лачшо амал е Йеховаса тай те служинав по-бут околенге?“

15. Соске о терне пхрала требе те овен шукар примери околенге? (1 Тимотей 4:12, 13)

¹⁵ „Ов шукар примери е верноненге.“ (Четине 1 Тимотей 4:12, 13.) О Павлес пхенгяс е Тимотейеске, кай ка овел шукар те сикльовел те четинел тай те сикавел околен, ама също мангелас о Тимотей те сикавел любов тай вяра тай те овел шужо е Девлеске андо якха. Соске? Давкха со керас си по-важно далкхестар со пхенас. Представине туке, кай требе те пхенес йекх проповед далкхеске сар те керас по-бут анди служба. Ка овел туке бут по-лесно те хоратинес далкхеске, ако ту вече дес всичко тутар анди служба. О мануша, колато шунен тут, ка манген по-бут те керен давкха со пхенес, ако дикхен, кай ту керес лес. (1 Тим. 3:13)

16. a) Саве букиенде ащи о терне пхрала те овен шукар примери? б) Сар йекх терно пхрал ащи те овел шукар примери далкхеса „со хоратинел“?

¹⁶ Ко 1 Тимотей 4:12 о Павлес пхенгяс панч букя, коленде о терне пхрала ащи те овен лачше примеря. Ка овел шукар те изучинес секо йекх лендар. Например представине туке, кай мангес те овес по-лачшо примери далкхеса „со хоратинес“. Мислине далкхеске со ащи те пхенес, за те дес околен куражи. Ако още бешес те дадеса тай те даяса, ащи ли по-често те пхенес ленге, кай синян ленге благодарно е букиенге, колато керен за туке? Палал о събрание, ащи ли те пхенес йекхе пхралеске или йекхе пхеняке со харешингян ки проповед или ки задача, която сине лен? Ащи също те дикхес те дес отговоря тере думенца ко събрания. Кана дес всичко тутар те овес лачшо примери далкхеса со хоратинес, окола ка дикхен, кай ту ачшос по-лачшо служители е Йеховаскоро. (1 Тим. 4:15)

17. Со ка помагинел е терне пхраленге те керен по-бут е Йеховаске? (2 Тимотей 2:22)

¹⁷ „Наш таро букя, колато манген пес е терненге, ама дикх те керес о букя, колато си лачше.“ (Четине 2 Тимотей 2:22.) О Павлес пхенгяс е Тимотейеске те нашел таро букя, колато ащи те пречинен леске те керел по-бут е Йеховаске тай те аравен лескоро амалипе леса. Ащи те ахальовес, кай керес десаве букя, колато нанай кханиле, ама чорен то време, тай ашал далкхеске нащи те керес по-бут е Йеховаске. Например мислине кибор време кхелес мачи, дикхес букя ко интернети или кхелес игрес. Ащи ли те използвинес хари калке времестар, за те керес по-бут е Йеховаске тай околенге? Например ащи те помагинес кана керел пес ремонти ки Зала е Царствоскери или те проповединес ки количка. Ако керес салка букя, ащи те аракхес туке неве амален, колато ка помагинен туке те мангес те керес по-бут е Йеховаске тай те керес лес.

КАНА СЛУЖИНЕС ОКОЛЕНГЕ, КА ОВЕН ТУТ БАРЕ БЛАГОСЛОВИЕС

18. Соске ащи те пхенас, кай е Маркос тай е Тимотейес сине бут шукар животос?

¹⁸ О Маркос тай о Тимотей керде бут променес пе животосте, за те служинен околенге, тай давкха ангяс ленге баре благословиес. (Деян. 20:35) О Маркос гело буте тханенде, за те помагинел пе пхраленге тай пе пхениенге. Ов пишингяс лил-да е Исусескере животоске тай лескере службаке. О Тимотей помагингяс е Павлеске те керел неве сборя тай те дел куражи е пхрален тай е пхениен. О Йехова сине бут щастливо като дикхелас о букя, колато керен о Тимотей тай о Маркос.

19. Соске о терне пхрала требе те керен со пхенгяс о Павлес е Тимотейеске тай саво животос ка овел лен тогава?

¹⁹ Таро лила, колато о Павлес пишингяс е Тимотейеске дикхьол кибор бут дехелас лес. Калке лилендар ахальовас още, кай о Йехова бут дехел е терне пхрален. Он си леске бут ценна тай ов мангел он те служинен леске тай те овел лен шукар животос. Де всичко тутар те керес о букя, колато пхенгяс о Павлес тай те служинес околенге по-бут. Ако керес калка букя, ка овел тут шукар животос авдиес тай нанай те измукес о истинско животос, ковато авел. (1 Тим. 6:18, 19)