Ов смирено, кана иси букя, колато на ахальовес

1. Сар кергяс амен о Йехова тай соске?

О Йехова кергяс аме бут шукар. Аме ащи те мислинас, те сикльовас неве букя тай те жанас сар те керас давкха со сикльовас. О Дел кергяс амен боркха шукар, соскето мангляс те пенжарас лес тай те служинас леске, като ахальовас шукар о букя тай лас шукар решения. (Пр. 2:1-5; Рим. 12:1)

2. а) Со требе те ахальовас за аменге? (Йов 37:23, 24) (Дикх и картинка-да.) б) Соске си важно те ахальовас, кай на требе те жанас всичко?

² Аме ащи те сикльовас бут букя, ама иси салка-да, колато на жанас. (Четине Йов 37:23, 24.) Дикх со ачшило е Йовеса. О Йехова пучляс лес бут букя, колато помагинде леске те ахальовел, кай иси бут букя, колато на жанел. Давкха сикавгяс е Йовеске, кай требе те овел смирено тай те променинел давкха сар мислинел. (Йов 42:3-6) Амаре-да лачшипнаске си те ахальовас, кай иси бут букя, колато на жанас. Кана на бистерас давкха, ка овас смирена тай ка верувинас, кай о Йехова винаги ка пхенел аменге давкха со требе те жанас, за те лас шукаре решения. (Пр. 2:6)

3. Со ка дикхас калке урокиесте?

³ Калке урокиесте ка дикхас десаве букя, колато на жанас, тай соске ащи те овел аменге пхаро ашал далкхеске, кай на жанас лен. Ка ахальовас също соске си амаре лачшипнаске, кай на жанас десаве букя. Кавка уроки ка помагинел аменге те барярас амари вяра далкхеске, кай о Йехова, „кавка, ковато жанел всичко“, пхенел аменге всичко со требе те жанес. (Йов 37:16)

НА ЖАНАС КАНА КА АВЕЛ О КРАЙОС

4. Со пишинел, кай на жанас ко Матей 24:36?

⁴ Четине Матей 24:36 Аме на жанас кана ка авел о крайос. Даже жикай сине ки пхув о Исусес-да на жанелас о „диес тай о сахати“.a По-късно ов пхенгяс пе апостоленге, кай само о Йехова решинел кана те ачшон десаве букя. (Де 1:6, 7) О Йехова решингяс кана ка авел о крайос, ама аме нащи те ахальовас, кана ка ачшол давкха.

5. Соске ащи те овел аменге пхаро, ашал далкхеске кай на жанас кана ка авел о крайос?

⁵ О Исусес пхенгяс, кай на жанас кибор ка требе те жарас о крайос те авел. Аке соске ащи те овел аменге пхаро особено ако вече бут време жарас е Йеховаскоро диес. Или ако декхой амаре семействостар или авер мануша асан аменге ашал далкхеске. (2 Пет. 3:3, 4) Ащи те мислинас аменге, кай ако жанасас точно кана ка авел о крайос, ка овелас аменге по-лесно те жарас лес тай нанаяс те хас холи ако окола асан аменге.

6. Соске си шукар, кай на жанас кана на авел о крайос?

⁶ Ашал далкхеске кай о Йехова на пхенгяс аменге точно кана ка авел о крайос, аме ащи те сикавас, кай служинас леске, соскето дехас лес тай верувинас леске. Аме мангас те служинас леске завинаги, а ма само жикай авел о крайос. Аке соске ка овел шукар вместо те мислинас кана ка авел „е Йеховаскоро диес“, те мислинас далкхеске саве шукар букя ка ачшон палал далкхесте. Давкха ка помагинел аменге те овас по-лачше амала е Йеховаса, те верувинас леске тай те керас всичко со ащи, за те анас леске радост. (2 Пет. 3:11, 12)

7. Саве букя жанас?

⁷ Важно си те мислинас е букиенге, колато жанас. Например ки Библия о Йехова пхенгяс аменге букя, колато сикавен, кай о последна диеса започнинде презал о 1914 бреш. Ов пхенгяс аменге бут далкхеске-да саво ка овел о светос палал калке брешесте. Аке соске ащи те овас сигурна, кай „е Йеховаскоро баро диес си паше“. (Соф. 1:14) Жанас също, кай о Йехова мангел те „шунярас и лачши новина е Царствоске“ кибор ащи по-бут. (Мат. 24:14) Кайка новина шунярел пес декхате 240 държавенде тай по-бут 1000 чшибендар. На требе те жанас „о диес тай о сахати“, за те дас о най-лачшо амендар анди служба.

НА ЖАНАС СО КА КЕРЕЛ О ЙЕХОВА

8. Со нащи винаги те жанас? (Еклисиаст 11:5)

⁸ И Библия пхенел, кай аме на жанас винаги „со керел о истинско Дел“, демек со керел те ачшол или со домукел те ачшол, за те керел пи воля. (Четине Еклисиаст 11:5.) Аме на жанас соске о Йехова домукел десаве букя те ачшон или точно со ка керел ов, за те помагинел аменге. (Пс. 37:5) И Библия пхенел, кай нащи те жанас „со керел о истинско Дел“, сарто на жанас тай даже о учена нащи напълно те ахальовен сар барьол йекх бебес пе даякере вогиесте.

9. Со ащи те мислинас аменге, ашал далкхеске,кай на жанас точно со ка керел о Йехова?

⁹ Като на жанас точно со ка керел о Йехова, за те помагинел аменге, ащи те дарас те лас десаве решения. Например те мукас десаве букя, за те ащи те керас по-бут анди служба, или те жас те проповединас отхе, кате требен по-бут проповедникя. Ащи те чудинас амен дали о Йехова си доволно амендар, ако дикхас те керас по-бут анди служба, ама нащи те керас давкха со мангел пес аменге. Ащи те жас бут на служба ама пак те на аракхас манушес, колеса те изучинас и Библия. Или дас всичко амендар те помагинас авере букиенде, колато керел амари организация, ама иси бут проблемя, колато пречинен аменге. Тогава ащи те мислинас, кай о Йехова на помагинел аменге.

10. Со ачшол аменца, ашал далкхеске кай на жанас со ка керел о Йехова?

¹⁰ Ашал далкхеске кай на жанас со ка керел о Йехова, ащи например те сикльовас те овас по-смирена. Давкха помагинел аменге те ахальовас, кай о Йехова винаги жанел со си о най-лачшо. (Иса. 55:8, 9) Аме сикльовас те мукас амен е Йеховаске андо васта, като верувинас, кай ов ка керел всичко, сарто требе. Кана иси амен благословиес анди служба или авере букиенде, колато керас е Йеховаске, аме дас и слава леске. (Пс. 127:1; 1 Кор. 3:7) Ако о букя на ачшон, сарто мислингям, кай ка ачшон, на требе те бистерас, кай всичко си е Йеховаске андо васта. (Иса. 26:12) Аме керас со ащи тай верувинас, кай о Йехова винаги ка помагинел аменге. Сигурна синям, кай ов ка продължинел те сикавел аменге о дром даже ако на керел чудеса, савето керелас ко пуране диеса. (Деян. 16:6-10)

11. Саве важна букя жанас?

¹¹ Аме жанас, кай о Йехова винаги сикавел любов, справедливо си тай си бут гогявер. Жанас, кай ов бут ценинел всичко со керас за леске тай за амаре пхраленге тай пхениенге. Жанас също, кай ов ка благословинел калкен, колато си леске верна. (Евр. 11:6)

НА ЖАНАС СО КА АЧШОЛ ТАСЯ

12. Со ахальовас таро Яков 4:13, 14?

¹² Четине Яков 4:13, 14. Аме на жанас со ка ачшол аменца тася. Ащи те ачшон бут букя, коленге на мислингям, тай те нащи те керас нищо. (Екл. 9:11) Аке соске аме нащи те овас сигурна кай ка ащи те керас давкха со мангас или даже дали ка овас живде, за те керас лес.

13. Сар ащи те чувствинас амен, ашал далкхеске кай на жанас со ка ачшол тася?

¹³ Ащи те овел аменге пхаро те издържинас тай те овас щастлива, ако хас бут холи далкхеске, кай на жанас со ка ачшол тася. Амаро животос ащи те променинел пес бут сиго, ащи те ачшол десаво кханилипе или о букя те на ачшон, сарто манглям. Тогава ащи те овел аменге бут пхаро тай даже подекхана те мислинас, кай нанай соске те живинас. (Пр. 13:12)

14. Со требе те керас, за те овас щастлива? (Дикх о снимкес-да.)

¹⁴ Со-да те ачшол амаре животосте, ащи те сикавас, кай служинас е Йеховаске, соскето дехас лес. Далкхестар со пишинел ки Библия десаве манушенге ахальовас, кай на требе те мислинас, кай о Йехова ка пазинел амен кханилипнастар тай кай ов решинел со ка ачшол амаре животосте. Ов жанел, кай ащи те овас щастлива даже ако на жанас со ка ачшол аменца. Аме синям щастлива, кана мангас о Йехова те сикавел аменге о дром тай шунас лес. (Йер. 10:23) Като мангас помощ лестар, кана требе те лас решения, все едно пхенас: „Ако о Йехова мангел, ка живинас тай ка керас давкха или окова.“ (Як. 4:15)

15. Со жанас, кай ка ачшол?

¹⁵ Аме на жанас со ка ачшол тася, ама жанас, кай о Йехова обещингяс аменге вечно животос ки пхув или ко небес. Жанас, кай ов нащи те хохавел тай кай нищо нащи те спиринел лес те керел со обещингяс. (Тит 1:2) Само ов ащи те „пхенел со ка ачшол“ тай „саве букя ка ачшон андо бъдеще“. Всичко со пхенгяс, кай ка ачшол ко пуране диеса, ачшило, тай всичко со пхенгяс, кай ка ачшол ко бъдеще-да, ка ачшол. (Иса. 46:10) Жанас, кай нищо нащи те спиринел е Йеховас те дехел амен. (Рим. 8:35-39) Ов ка дел амен и мъдрост, и утеха тай и сила, която требел аменге, за те издържинас всичко. Ащи те овас сигурна, кай о Йехова ка помагинел аменге тай ка благословинел амен. (Йер. 17:7, 8)

НАЩИ АХАЛЬОВАС КИБОР ЛАЧШЕС ПЕНЖАРЕЛ АМЕН О ЙЕХОВА

16. Со жанел о Йехова за аменге тай сар чувствинес тут далкхестар? (Псалм 139:1-6)

¹⁶ Четине Псалм 139:1-6. Кавка, ковато кергяс амен, жанел всичко за аменге. Ов жанел со мислинас, сар чувствинас амен тай соске. Жанел со пхенас тай со си амаре вогиесте, со керас тай соске керас лес. О цар Давид пхенгяс, кай о Йехова винаги си готово тай ащи те помагинел аменге. Сар чувствинес тут, като жанес, кай о най-зорало Дел, ковато си о Най-баро тай кергяс всичко, дикхел туке? О Давид пхенгяс: „Ту пенжарес ман бут лачшес тай давкха си боркха шукар, кай нащи те ахальовав лес, боркха си учесте, кай нащи те ресав лес.“ (Пс. 139:6)

17. Соске ащи те овел аменге трудно те верувинас, кай о Йехова пенжарел амен лачшес?

¹⁷ Ашал далкхеске сар тай кате барилям или состе верувинасас преди, ащи те овел аменге трудно те мислинас, кай о Йехова си амаро Дад, ковато бут дехел амен тай дикхел аменге. Или ащи те мислинас, кай о грешкес, колато кергям преди, си боркха баре, кай ов нанай те мангел те овел аменге амал. О Давид-да подекхана мислинелас салка букя. (Пс. 38:18, 21) Мануш, ковато дел всичко пестар те променинел по животос тай те керел о букя, колато о Дел мангел, ащи те мислинел: „Ако о Дел наистина пенжарел ман, соске мангел мандар те на керав букя, колато авел манге андрал те керав?“

18. Соске си амаре лачшипнаске те приеминас, кай о Йехова пенжарел амен по-лачшес амендар? (Дикх о снимкес-да.)

¹⁸ Хари по хари аме ащи те приеминас давкха, кай о Йехова пенжарел амен по-лачшес амендар тай кай дикхел о лачшипе аменде, ковато аме нащи те дикхас. Ов дикхел амаре грешкес, ама жанел саве мануша мангас те овас тай дехел амен. (Рим. 7:15) Кана ахальовас, кай о Йехова винаги дикхел саве мануша ащи те ачшовас, давкха ка дел амен силес те ачшовас леске верна тай ка анел аменге радост.

19. Со жанас е Йеховаске?

¹⁹ Жанас, кай о Йехова си любов. (1 Йоан 4:8) Жанас, кай всичко со пхенел аменге те керас или те на керас, си соскето дехел амен тай мангел те овел амен кибор ащи по-шукар животос. Жанас, кай о Йехова мангел те дел амен вечно животос-да. Аке соске ов диняс пе Чшес, за те мерел аменге тай ашал далкхеске аме ащи те овас сигурна кай даже те керас грешкес, ащи те служинас е Йеховаске, сарто ов мангел. (Рим. 7:24, 25) Аме жанас също, кай „о Дел си по-баро амаре сърцендар тай жанел всичко“. (1 Йоан 3:19, 20) О Йехова жанел всичко аменге тай си сигурно, кай ащи те керас со мангел ов.

20. Со ка помагинел аменге те на хас холи е букиенге, колато на жанас?

²⁰ О Йехова пхенел аменге всичко со требе те жанас. Аке соске вместо те хас холи далкхеске со на жанас, требе те мислинас е важноне букиенге. Тогава ка сикавас, кай синям смирена тай мукас амен е Йеховаске андо васта, соскето ов си „кавка, ковато жанел всичко“. (Йов 36:4) Въпреки кай авдиес иси бут букя, колато на ахальовас, аме жанас, кай о Йехова ка продължинел те сикавел амен неве букя завинаги тай кай нанай те спиринас те сикльовас амаре баре Девлеске. (Екл. 3:11)