Дали е Йеховаскере Свидетеля си истинска християня?

Аме, е Йеховаскере Свидетеля, верувинас, кай синям истинска християня. Соске? Дикх катар авен о букя, коленде верувинас, саво алав керел амен различна околендар тай сар сикавас, кай дехас йекх аверес.

1. Катар авен о букя, коленде верувинен е Йеховаскере Свидетеля?

О Исусес пхенгяс: „[Е Девлескоро] слово си истина.“ (Йоан 17:17) Сар о Исусес, е Йеховаскере Свидетеля-да верувинен ко букя, колато си таре Девлескоро Слово. Например дикх со керенас е Йеховаскере Свидетеля отначало, кана пхененас пес Изследователя е Библиякере. Таро 1870 бреш он започнинде те изучинен и Библия бут внимателно, за те ахальовен со наистина сикавел ой. Калка мануша верувиненас само андо букя, колато пхенелас и Библия, даже ако сине различна таро букя, колато сикавенас о кхангеря. После започнинде те пхенен околенге-да саве букя сиклиле тари Библия.a

2. Соске пхенас амен е Йеховаскере Свидетеля?

О Йехова пхенел, кай лескере служителя си лескере свидетеля, соскето он пхенен и истина за леске. (Евреи 11:4 — 12:1) Например ко пуране диеса о Дел пхенгяс пе народоске: „Туме синьен мере свидетеля.“ (Четине Исаия 43:10.) Е Исусеске-да пхенел пес „о Верно свидетели“. (Откровение 1:5) Аке соске таро 1931 бреш аме пхенас амен е Йеховаскере Свидетеля. Аменге си чест те пхиравас кавка алав.

3. Сар е Йеховаскере Свидетеля сикавен любов сар о Исусес?

О Исусес зомкха бут дехелас пе ученикиен, кай он сине леске сар семейство. (Четине Марко 3:35.) Е Йеховаскере Свидетеля-да си сар йекх семейство ко цело светос. Аке соске пхенас, кай синям пхрала тай пхеня. (Филимон 1, 2) Аме също шунас и заповед: „Сикавен любов кариг саворе пхраленде.“ (1 Петър 2:17) Е Йеховаскере Свидетеля сикавен пи любов, като керен бут различна букя, например като помагинен пе пхраленге тай пе пхениенге ко цело светос, кана си ленге пхаро.

РОДЕ ПО-ХОРЕСТЕ

4. Саворе букя, коленде верувинас, си тари Библия

О Йехова пхенгяс, кай ко последна диеса о мануша ка ахальовен ясно и истина тари Библия. Четинен Даниил 12:4 тай хоратинен калке въпросиеске:

• Со ка овел е Девлескере народос, кана продължинел те изучинел и Библия?

Дикх сар изучиненас и Библия о Чарлс Ръсел тай окола Изследователя е Библиякере. Дикхен о КЛИПИ тай хоратинен калке въпросиеске:

КЛИПИ: Отново аракхле и истина тари Библия (7:45)

• Сар изучиненас и Библия о Чарлс Ръсел тай окола Изследователя е Библиякере?

Жанес ли?

Презал о бреша дикхлям, кай требе те променинас десаве таро букя, коленде верувинас. Соске? Кана о кхам икльол, хари по хари ачшол са по-светло тай о букя турял аменде дикхьон са по-ясно. О също керел о Дел. Ов помагинел аменге те ахальовас лескоро Слово хари по хари. (Четине Притчи 4:18.) И Библия на променинел пес, ама аме ахальовас ла са по-лачшес. Аке соске, кана требе, аме променинас о букя, коленде верувинас.

5. Живинас според амаре алавесте

КЛИПИ: Алав, ковато сикавел кола синям (2:40)

• Соске о алав е Йеховаскере Свидетеля си подходящо?

Соске о Йехова мангляс те овен лес свидетеля? Соскето бут мануша ка пхененас хохавне букя за леске тай лескере свидетеля ка требелас те сикавен околенге, кай ов си о истинско Дел. Аке дуй калке хохавне букиендар.

Верно ли си, кай о Дел мангел те използвинас иконес, за те поклонинас амен леске, сарто сикавен десаве кхангеря? Четинен Левит 26:1 тай хоратинен калке въпросиенге:

• Сави си и истина? Со мислинел о Йехова е иконенге?

Верно ли си, кай о Исусес си о Дел, сарто сикавен десаве кхангеря? Четинен Йоан 20:17 тай хоратинен калке въпросиенге:

• Сави си и истина? О Исусес ли си о Дел?

• Сар чувствинес тут, като жанес, кай о Йехова бичшалгяс пе Свидетелен те проповединен тай те пхенен сави си и истина леске тай лескере Чшеске?

6. Сикавас любов йекх кариг авересте

И Библия пхенел, кай о християня требе те овен свържиме, сарто си свържиме о часкя андо манушикано телос. Четинен 1 Коринтяни 12:25, 26 тай хоратинен калке въпросиенге:

• Со ка керел йекх истинско християни, кана авере християниеске си пхаро?

• Ту сар дикхлян е Йеховаскере Свидетеля те сикавен любов?

Кана йекхе тханесте е Йеховаскере Свидетеленге си пхаро, о Свидетеля таро цело светос веднага дикхен те помагинен. Дикхен о КЛИПИ, ковато сикавел сар он помагинен песке, тай хоратинен калке въпросиеске:

КЛИПИ: Сар о пхрала таро Хаити преживинде о урагани Матю (5:29)

• Сар о букя, колато керен е Йеховаскере Свидетеля, за те помагинен, кана иси бедствие, сикавен, кай иси лен бари любов?

СО СИКЛИЛЯМ

Е Йеховаскере Свидетеля си истинска християня. Аме служинас е Девлеске сар семейство ко цело светос, саворе букя, коленде верувинас, си тари Библия тай сикавас е манушенге сави си и истина е Йеховаске.

О най-важна букя таро уроки

• Соске пхенас амен е Йеховаскере Свидетеля?

• Сар сикавас любов йекх кариг авересте?

• Мислинес ли, кай е Йеховаскере Свидетеля си истинска християня?

АХАЛЬОВ ПО-БУТ

Ахальов саве букя кергям презал о бреша.

Свидетелите на Йехова — вяра в действие, 1 част: От тъмнина към светлина (1:00:53)

Дикх сар е Йеховаскере Свидетеля помагинен е манушенге те ахальовен, кай десаве букя, колато сикавен о религиес, си хохавне.

Божият народ прославя името на Бога (7:08)

Ахальов о букя, колато мангес те жанес е Йеховаскере Свидетеленге.

Често задавани въпроси за Свидетелите на Йехова (раздел на jw.org)

О Стивън мразинелас бут е манушен, колато си авере народовиендар, тай марелас лен. Дикх соске променисайло ов.

Животът ми все повече се влошаваше („Стражева кула“ 1 юли 2015)