22 УРОКИ
Сар ащи те пхенес околенге и лачши новина?
Щом вече ахалилян зомкха шукар букя тари Библия, ащи те мислинес, кай саворе требе те жанен лен. Ва, наистина саворе требе те жанен лен! Ама може би притеснинес тут те хоратинес околенца е букиенге, колато сиклилян. Нека те дикхас сар ащи вогиестар те пхенес околенге и лачши новина тари Библия без те притеснинес тут или те лажас.
1. Сар ащи те пхенес е манушенге, колен пенжарес, со сиклилян?
Е Исусескере ученикя пхенде: „Нащи те спиринас те хоратинас е букиенге, колато дикхлям тай шунгям.“ (Деяния 4:20) Он зомкха бут дехенас и истина, кай мангенас те пхенен ла саворенге. Ако туке-да и истина си зомкха ценно, дикх те пхенес те семействоске тай те амаленге со сиклилян. (Четине Колосяни 4:6.)
Сар те започнинес
Кана хоратинес те семействоса, ащи те започнинес те хоратинес тари Библия, като пхенес: „Кавка курко ахалильом десаве шукар букя.“
Сикав йекх шукар стихи йекхе амалеске, ковато си насвало или хал холи десаве букиенге.
Кана те колегя пучен тут со кергян събота тай неделя, ту ащи те пхенес ленге со сиклилян таро библейско изучаване или таро събрание.
Сикав те амаленге о сайти jw.org.
Канине авере манушен те овен туса, кана иси тут библейско изучаване или сикав ленге сар те манген библейско изучаване ко jw.org.
2. Соске си шукар те мангес те проповединес околенца таро сбори?
Е Исусескере ученикя на проповединенас и лачши новина само е манушенге, колен пенжаренас. О Исусес бичшалгяс лен „по дуй жене ... секоне дизате“, за те проповединен. (Лука 10:1) Бут мануша ащине те шунен и лачши новина, соскето о ученикя проповединенас редоса. Също кана проповединенас заедно, е ученикиен сине бари радост. (Лука 10:17) Ащи ли ту-да сиго те започнинес те проповединес околенца таро сбори?
РОДЕ ПО-ХОРЕСТЕ
Ахальов со ащи те керес, за те на притеснинес тут те проповединес тай дикх сави радост ка анел туке те пхенес околенге и лачши новина.
3. О Йехова ка овел туса
Десаве мануша манген те проповединен, ама бут притеснинен пес со ка мислинен о народос ленге тай дали ка шунен лен.
Ту притеснинес ли тут те пхенес околенге о букя, колато сиклилян? Соске?
Дикхен о КЛИПИ тай хоратинен калке въпросиеске:
Со помагингяс калке терне Свидетеленге те на даран (да не се страхуват)?
Четинен Исаия 41:10 тай хоратинен калке въпросиеске:
Сар ка помагинел туке и молитва, кана дарас те проповединес?
Жанес ли?
Бут таре Йеховаскере Свидетеля мислиненас, кай нисар нанай те ащи те проповединен. Например о Сергей сине бут лажавно мануш тай сине леске трудно те хоратинел околенца. Ама после започнингяс те изучинел и Библия. Ов пхенел: „Въпреки кай даравас, започнингьом те хоратинав околенца е букиенге, колато сикльовавас. Нисар на мислинавас, кай те хоратинав околенца тари Библия, ка помагинел манге те на лажав тай те овел ман по-бари вяра.“
4. Сикав уважение, кана хоратинес
Кана пхенес околенге и лачши новина, ма мислине само со ка пхенес, ама мислине също сар ка пхенес лес. Четинен 2 Тимотей 2:24 тай 1 Петър 3:15 тай хоратинен калке въпросиенге:
Според о стиховя, сар требе те хоратинес околенца, кана проповединес ленге?
То семейство или те амала ащи те на овен съгласна туса. Со ащи те керес? Со нанай те овел шукар те керес?
Соске си по-шукар те пучес е манушен со мислинен вместо те пхенес ленге состе требе те верувинен?
5. Те проповединас и лачши новина анел аменге радост
О Йехова диняс е Исусес и задача те пхенел и лачши новина е манушенге. Со мислинелас о Исусес калке задачаке? Четинен Йоан 4:34 тай хоратинен калке въпросиенге:
Аме хас, за те ачшовас живде тай о шукар хабе анел аменге радост. Соске о Исусес пхенгяс, кай те керел е Девлескери воля, например те проповединел, си сар хабе леске?
Саве благословиес ка овен тут, ако проповединес и лачши новина?
Со ка помагинел туке
Ко събрание презал о курко дикх те сикльовес сар те започнинес разговори е манушенца.
Пуч е манушес, ковато помагинел туке те изучинес и Библия, со требе те керес, за те започнинес ту-да те керес задачес ко събрание презал о курко. Калка задачес ка помагинен туке те жанес сар те пхенес околенге о букя, колато сикльовес.
Използвине о блокчета „Десаве мануша пхенен“ тай „Декхой ащи те пучел“, колато си калке лилесте, за те сикльовес сар те отговоринес десаве букиенге, колато често пучен о мануша или букиенге, колато често пхенен, за те сикавен, кай нанай съгласна аменца.
ДЕКХОЙ АЩИ ТЕ ПУЧЕЛ: „Со керес? Со ачшол туса?“
Кана мануш пучел тут калка букя, сар ащи те започнинес те хоратинес леса е букиенге, колато сиклилян таро библейско изучаване?
СО СИКЛИЛЯМ
Те проповединас и лачши новина околенге анел аменге радост тай нанай зомкха трудно кизом мислинес.
О най-важна букя таро уроки
Соске пхенас околенге и лачши новина?
Сар ащи те сикавес уважение, кана проповединес?
Со ащи те керес, за те на притеснинес тут, кана проповединес?
АХАЛЬОВ ПО-БУТ
Дикх сар тай кана ащи те пхенес околенге и лачши новина, като използвинес и визитка е сайтиеске jw.org.
Ахальов саве щар букя ка помагинен туке те пхенес околенге и лачши новина.
Готов ли си да станеш рибар на хора? („Стражева кула“ септември 2020)
Дикх кастар ащи те сикльовас те проповединас смело даже ако синям цикне.
Ахальов сар ащи те хоратинес тари Библия калкенге те семействостар, колато на жанен нищо е Йеховаске.
Да достигнем сърцата на невярващите роднини („Стражева кула“ 15 март 2014)