21 УРОКИ
Сар проповединас и лачши новина?
О Йехова ка използвинел по Царство, за те махнинел саворе амаре проблемя. Кайка новина си зомкха шукар, кай саворе требе те шунен ла. О Исусес мангелас лескере ученикя те шунярен ла! (Матей 28:19, 20) Сар е Йеховаскере Свидетеля керен и задача, която диняс о Исусес?
1. Сар о думес андо Матей 24:14 изпълнинен пес авдиес?
О Исусес пхенгяс: „Кайка лачши новина е Царствоске ка овел проповедиме ки цело пхув.“ (Матей 24:14) Е Йеховаскере Свидетеленге си бари радост те керен кайка важно бути. Аме проповединас и лачши новина ки цело пхув декхате 1000 чшибенде! Кайка бути си бут бари, аке соске требе те дас всичко амендар те керас ла тай всичко те ачшол редоса. Нанай сар те керас ла, ако о Йехова на помагинел аменге.
2. Со керас, за те проповединас?
Аме проповединас секоне тханесте, кате иси мануша. Жас „кхер кхерестар“, сарто керенас о първа християня, за те ащи те хоратинас буте манушенца секо бреш. (Деяния 5:42) Също проповединас авере-да тханенде, кате ащи те аракхас е манушен, колато често нанай песке кхере. Винаги дикхас те хоратинас околенца е Йеховаске тай саво животос мангел ов е манушенге.
3. Кой требе те проповединел и лачши новина?
Саворе истинска християня требе те проповединен и лачши новина. Кайка бути си бут важно аменге. Проповединас кизом ащи по-бут, соскето жанас, кай ащи те спасинас е манушенгоро животос. (Четине 1 Тимотей 4:16.) Никхой на дел амен парес, за те керас кайка бути, соскето и Библия пхенел: „Бипаренгоро лильен, бипаренгоро ден.“ (Матей 10:7, 8) На шунен амен саворе мануша. Ама аме продължинас те проповединас, соскето мангас те шунас е Йеховас тай те анас леске радост.
РОДЕ ПО-ХОРЕСТЕ
Ахальов сар е Йеховаскере Свидетеля проповединен ко цело светос тай дикх сар о Йехова помагинел ленге.
Проповединас ко цело светос: 1) Коста Рика, 2) САЩ, 3) Бенин, 4) Тайланд, 5) Яп, 6) Швеция
4. Дас всичко амендар, за те проповединас саворенге
Е Йеховаскере Свидетеля ден всичко пестар, за те проповединен и лачши новина е манушенге секоне тханесте. Дикхен о КЛИПИ тай хоратинен калке въпросиеске:
Со харешинел туке най-бут таро букя, колато керен е Йеховаскере Свидетеля, за те проповединен?
Четинен Матей 22:39 тай Римляни 10:13-15 тай хоратинен калке въпросиенге:
Сар като проповединас, сикавас амари любов кариг о мануша?
Со мислинел о Йехова е манушенге, колато проповединен? (Дикх о 15 стихи.)
5. Керас бути е Девлеса
Бут букя сикавен, кай о Йехова водинел амен, кана проповединас. Например анди Нова Зеландия о пхрал Пол проповединелас кхер кхерестар тай аракхляс йекхе жувля. Анди явин и жувли молингясас пес е Девлеске, като използвингяс лескоро алав, Йехова, тай пхенгяс леске, кай мангел декхой те помагинел лаке те пенжарел лес. Трин сахакя по-късно амаро пхрал гело англал лакере вударесте.
Четинен 1 Коринтяни 3:9 тай хоратинен калке въпросиеске:
Сар случкес сар калкате анди Нова Зеландия сикавен, кай о Йехова водинел амен, кана проповединас?
Четинен Деяния 1:8 тай хоратинен калке въпросиеске:
Соске требел аменге е Йеховаскери помощ, за те проповединас?
Жанес ли?
Секо дром, ко събрание, ковато иси амен презал о курко, сикльовас сар те проповединас. Ако декхана гелян салке събраниесте, со мислинес е букиенге, колато сикльовас, за те проповединас по-лачшес?
6. О Дел диняс амен и заповед те проповединас
О душманя дикхле те спиринен е Исусескере ученикиен те проповединен. Ама о първа християня денас всичко пестар, за те ащи те проповединен законно. (Филипяни 1:7) Е Йеховаскере Свидетеля керен о също авдиес.a
Четинен Деяния 5:27-42 тай хоратинен калке въпросиеске:
Соске нанай те спиринас те проповединас? (Дикх о 29, 38 тай 39 стихи.)
ДЕКХОЙ АЩИ ТЕ ПУЧЕЛ: „Соске е Йеховаскере Свидетеля проповединен кхер кхерестар?“
Со ка пхенес леске?
СО СИКЛИЛЯМ
О Исусес диняс пе ученикиен и задача те проповединен и лачши новина е манушенге саворе народовиендар. О Йехова помагинел пе служителенге те керен кайка задача.
О най-важна букя таро уроки
Сар проповединас и лачши новина ки цело пхув?
Сар като проповединас, сикавас амари любов кариг о мануша?
Мислинес ли, кай ащи те овел амен радост, кана проповединас? Соске?
АХАЛЬОВ ПО-БУТ
Дикх сар е Йеховаскере Свидетеля проповединен е манушенге андо баре диза.
Со керен е Йеховаскере Свидетеля, за те помагинен е манушенге, колато требелас те нашен пе държаватар?
Ахальов йекхе пхенятар, която проповединел целодневно, кизом си шукар о животос е манушенгоро, колато служинен сар лате.
Дикх саве си десаве таро решения, колато лиляс о съдос тай колато помагинен аменге те проповединас.
Проповедниците на Царството се обръщат към съда („Божието Царство управлява!“, 13 глава)
a О Дел диняс амен и задача те проповединас. Аке соске е Йеховаскере Свидетеленге на требел разрешение таро мануша, колен иси власт, за те проповединен и лачши новина.