Ов честно всичконасте

Саворе мангас те овен амен амала, колато на хохавен. О Йехова-да мангел лескере амала те на хохавен. Ама нанай лесно те овес честно калке светосте, колесте бут мануша хохавен. Соске си шукар те овес честно всичконасте?

1. Со най-бут традел амен те мангас те овас честна?

Кана синям честна околенца, сикавас амари любов тай амаро уважение кариг о Йехова. Ма бистер, кай о Йехова жанел всичко со мислинас тай со керас. (Евреи 4:13) Ов си бут щастливо, кана дикхел, кай синям честна. Лескоро Слово пхенел: „О Йехова бут мразинел е хохавне манушес, ама си лачшо амал е манушенца, колато си честна.“ (Притчи 3:32)

2. Сар ащи те сикавас секо диес, кай синям честна?

О Йехова мангел те пхенас и истина, кана хоратинас. (Захария 8:16, 17) Кана хоратинас амаре семействоса, амаре колегиенца, амаре пхраленца тай пхениенца таро сбори или е манушенца, колен иси власт, аме на хохавас тай на пхенас о букя околенге, сарто аме мангас те ахальовен лен. О честна мануша на чорен тай на дикхен те хохавен околен. (Четине Притчи 24:28 тай Ефесяни 4:28.) Он платинен пе саворе данъкя. (Римляни 13:5-7) Като керас калка тай авер букя, аме сикавас, кай „мангас те овас честна всичконасте“. (Евреи 13:18)

3. Соске си шукар те овас честна?

Ако окола жанен, кай синям честна, ка овел лен доверие кариг аменде. Също ка помагинас о сбори те овел сар йекх семейство тай секо йекх амендар те чувствинел пес защитиме. Нанай те овел за соске те овас пишмани. Като синям честна, аме „керас те дикхьон още по-шукар саворе букя, колато сикавел о Дел“ тай помагинас околенге те манген те служинен е Йеховаске. (Тит 2:10)

РОДЕ ПО-ХОРЕСТЕ

4. Кана синям честна, анас радост е Йеховаске

Четинен Псалм 44:21 тай Малахия 3:16 тай хоратинен калке въпросиенге:

• Соске нанай мъдро те мислинас, кай ащи те гаравас и истина?

• Според туте сар чувствинел пес о Йехова, кана решинас те пхенас и истина, даже кана си аменге пхаро?

5. Ов честно винаги

КЛИПИ: Кана ка овас щастлива? Кана дикхас те на керас букя, ашал коленге ащи те ачшовас пишмани (2:32)

Четинен Евреи 13:18 тай хоратинен калке въпросиенге: Сар ащи те овас честна...

• амаре семействоса?

• ки бути или ки училища?

• авере букиенде?

6. Те овас честна си амаре лачшипнаске

Подекхана ащи те овен амен проблемя, соскето синям честна. Ама ко крайос ахальовас, кай о най-лачшо решение винаги си те овас честна. Четинен Псалм 34:12-16 тай хоратинен калке въпросиеске:

• Сар то животос ка ачшол по-шукар, ако синян честно?

1. 1. Кана синям честна амаре ромеса или амаре ромняса, ка овас по-близка йекх авереса

2. 2. Кана синям честна ки бути, амаре шефиес ка овел доверие аменде

3. 3. Кана синям честна е манушенца, колен иси власт, нанай те овел соске те дарас лендар

СО СИКЛИЛЯМ

О Йехова мангел лескере амала те овен честна саворе букиенде, колато пхенен тай керен.

О най-важна букя таро уроки

• Саве букиенде ащи те сикавас, кай синям честна?

• Соске нанай мъдро те мислинас, кай ащи те гаравас и истина?

• Соске мангес винаги те овес честно?

АХАЛЬОВ ПО-БУТ

Сар о дада тай о дая ащи те сикавен пе чшавен те овен честна?

Говори истината (1:44)

Соске си шукар те керас о букя, колато обещингям те керас?

Йехова благославя тези, които държат на думата си (9:09)

Дикх дали требе те платинас о данъкя, даже ако жанас, кай калка парес нанай те използвинен пес сарто требе.

Трябва ли да плащаме данъци? („Стражева кула“ 1 септември 2011)

Со помагингяс йекхе манушеске те променинел пес тай те икалел по маро честно?

Разбрах, че Йехова е милостив и готов да прощава („Стражева кула“ 1 май 2015)