Жарас и диз, която ка ачшол завинаги

1. Со пхенгяс о Исусес, кай ка ачшол ко Йерусалим?

Хари англал те мерел, о Исусес пхенгяс йекх пророчество пе ученикиенге. Кавка пророчество ачшило първо кана о Йерусалим тай о храми сине унищожиме. О Исусес пхенгяс, кай йекх диес ка заачшон войникя турял о Йерусалим. (Лука 21:20) Ов пхенгяс пе ученикиенге, кай кана дикхен калке войникиен, требе веднага те нашен тари Юдея. Кавка ачшило кана о римска войникя але мамуй о Йерусалим. (Лука 21:21, 22)

2. Со пхенгяс о апостол Павел е християниенге ки Юдея тай ко Йерусалим?

² Хари англал о римска войникя те заачшон мамуй о Йерусалим, о апостол Павел пишингяс лил е християниенге ки Юдея тай ко Йерусалим. Четинас кавка лил ки Библия ко лил Евреи. Лесте о Павлес пхенгяс ленге со си шукар те керен, за те овен готова е букиенге, колато ка ачшонас. Со ка ачшолас? О Йерусалим ка овелас унищожиме. О християня ка ачшонас живде само ако сине готова те мукен пе кхера тай пи бути. Аке соске о Павлес пишингяс: „Атхе нанай амен диз, която ка ачшол завинаги“. Тай пхенгяс още: „Ама жарас кайка, която ка авел“. (Евр. 13:14)

3. Со си „и диз, която си керди шукар тай нанай те перел“ тай соске жарас ла?

³ Кана о християня решинде те нашен таро Йерусалим тай тари Юдея, бут мануша асанас ленге тай пхененас ленге, кай си залухава. Ама като керде давкха, о християня ачшиле живде. Аменге-да авдиес асан, соскето на верувинас, кай о мануша ка опринен о букя или кай о парес ка опринен амаро животос. Соске на верувинас калке букиенде? Соскето жанас, кай кавка светос нанай те ачшол завинаги. Аме жарас те авел е Девлескоро Царство, соскето ов си „и диз, която си керди шукар тай нанай те перел“ тай „която ка авел“.a (Евр. 11:10; Мат. 6:33) Калке урокиесте ка дикхас 1) сар е Павлескере съвекя помагинде е християниенге те продължинен те жарен е Девлескоро Царство, 2) сар о Павлес помагингяс ленге те овен готова далкхеске со ка ачшолас тай 3) сар лескере съвекя помагинен аменге-да авдиес.

МУК ТУТ Е ЙАХОВАСКЕ АНДО ВАСТА, СОСКЕТО ОВ НАНАЙ ТЕ МУКЕЛ ТУТ

4. Соске о Йерусалим сине важно е християниенге?

⁴ О Йерусалим сине важно е християниенге. О първо сбори сине кердо отхе презал о 33 бреш тай о пхрала таро ръководно тяло-да сине ко Йерусалим. Е християниен сине кхера тай бут авер букя калке дизате. Ама о Исусес пхенгяс ленге, кай требе те мукен всичко тай те нашен таро Йерусалим тай даже тари Юдея. (Мат. 24:16)

5. Сар о Павлес помагингяс е християниенге те овен готова е букиенге, колато ка ачшонас?

⁵ О Павлес мангелас о християня те овен готова те нашен таро Йерусалим. Аке соске помагингяс ленге те ахальовен по-шукар со мислинел о Йехова калке дизаке. О свещеникя тай о жертвес, колато керенас пес ко храми, вече на сине шукар е Йеховаске андо якха. (Евр. 8:13) Почти саворе мануша, колато бешенас ко Йерусалим, отчшивде е Месияс. О мануша вече на требелас те авен ко Йерусалим, за те поклонинен пес е Йеховаске. И диз тай о храми-да ка овенас унищожиме. (Лука 13:34, 35)

6. Соске о съвети, ковато о Павлес диняс е християниен ко Евреи 13:5, 6 сине ленгере лачшипнаске?

⁶ Кана о Павлес пишингяс о лил кариг о еврея, бут мануша бешенас ко Йерусалим. Тогава йекх римско писатели пхенгяс, кай ов си бут известно диз. Кана сине о празникя, бут юдея авере тханендар жанас ко Йерусалим тай харчиненас бут парес отхе. Аке соске сигурно десаве таро християня-да икаленас бут парес. Адалкхеске о Павлес пхенгяс ленге: „Тумаре животоса сикавен, кай на дехен о парес, ама овен доволна е букиенца, колато иси тумен.“ После ов пишингяс ленге йекх стихи-да, колесте о Йехова пхенелас ленге: „Нисар нанай те мукав тут, нито ка иринав туке думо.“ (Четине Евреи 13:5, 6; Втор. 31:6; Пс. 118:6) О християня на требелас те бистерен кавка обещание. Соске? Соскето хари палал далкхесте он ка требелас те мукен пе кхера, пи бути тай всичко со сине лен тай те жан авере тханесте.

7. Соске требе те сикльовас те мукас амен е Йеховаске андо васта?

⁷ Со сикльовас аме: Жарас те авел о баро бедствие тай о крайос калке светоскоро. (Мат. 24:21) Аме-да сар о християня ко Йерусалим, требе те ачшовас верна тай те подготвинас амен. (Лука 21:34-36) Презал о баро бедствие ащи те ачшовас аври или те нашалас всичко со иси амен. Тогава ка требе те овас сигурна, кай о Йехова нанай те мукел амен. Още акана, англал о баро бедствие те авел, ащи те сикавас, кай мукас амен е Йеховаске андо васта. Пуч тут: „Дали о букя, колато керав тай колато мангав, сикавен кай мислинав, кай о парес ка опринен мо животос или сикавен, кай верувинав, кай о Йехова ка дикхел манге?“ (1 Тим. 6:17) Ащи те сикльовас бут далкхестар со ачшило е първоне християнинеца, ама о бедствие, ковато жарас те ачшол си бут по-баро. Тогава сар ка жанас со те керас, кана ка започнинел кавка бедствие?

ШУН Е ПХРАЛЕН, КОЛАТО ВОДИНЕН АМЕН

8. Со пхенгяс о Исусес пе ученикиенге?

⁸ Накхле десаве бреша отсарто о Павлес пишингясас о лил кариг о еврея тай о християня дикхле о римска войникя турял и диз Йерусалим. Тогава он жаненас, кай ало о време те нашен, соскето о Йерусалим ка овелас унищожиме. (Мат. 24:3; Лука 21:20, 24) Ама кате требелас те жан? О Исусес пхенгясас ленге: „Калка, колато си ки Юдея, требе те нашен кариг о планини.“ (Лука 21:21) Сине бут планини турял ленде. Сар ка ахальовенас кариг коле планинате те нашен?

9. Соске о християня ащи те чудинде пес коле планинате те нашен? (Дикх и карта-да.)

⁹ О християня ащине те жан например ки планина Ермон, ко планини ки Самария, Галилея или Ливан, или ко планини, колато сине околе ригатар тари лен Йордан. (Дикх и карта.) Ащине те дикхьол, кай ако жас те бешес десаве дизенде калке планиненде, нанай те овел состар те дарас. Например и диз Гамла сине баре учипнасте тай сине трудно те ресес жи лате. Десаве юдея мислиненас, кай давкха си о най-шукар тхан, кате те гаравес тут. Ама точно калке дизате о юдея тай о римляня марде пес бут тай бут таро мануша, колато бешенас отхе, муле.b

10-11. а) Сар о Йехова сикавгяс е християниенге со те керен? (Евреи 13:7, 17) б) Соске сине е християниенгере лачшипнаске, кай шунде е пхрален, колато водиненас лен? (Дикх и снимка-да)

¹⁰ Дикхьол, кай о Йехова използвингяс е пхрален таро сбори, за те сикавел е християниенге со те керен. О учено Евсевий по-късно пишингяс, кай о Дел сикавгяс десаве пхраленге, кай о християня требе те нашен таро Йерусалим тай те жан ки диз Пела анди Перея. Кайка диз сине шукар тхан, колесте о християня те нашен. Ой сине паше жи ко Йерусалим тай жи лате ащине те ресел пес сиго. Бут таро мануша отхе на сине юдея тай на ухтиниле мамуй о римляня. (Дикх и карта.)

¹¹ О християня, колато наште ко планини, шунде е пхрален, колато водиненас лен, сарто пхенгяс ленге о Павлес. (Четине Евреи 13:7, 17.) Аке соске ачшиле живде! О Йехова на мукляс лен, соскето он жаренас „и диз, която си керди шукар тай нанай те перел“, демек е Девлескоро Царство. (Евр. 11:10)

12-13. Сар о Йехова водинел пе народос, кана си пхаро?

¹² Со сикльовас аме: О Йехова използвинел калкен, колато водинен лескере народос, за те пхенел аменге точно со те керас. Ки Библия четинас сар бут дром о Йехова използвингяс верноне мрушен, за те водинел пе народос, кана сине пхаро. (Втор. 31:23; Пс. 77:20) Аме-да авдиес дикхас, кай о Йехова използвинел десаве пхрален, за те водинел амен.

¹³ Например кана започнингяс и пандемия COVID-19 о пхрала, колато водинен амен, пхенде аменге со си шукар те керас. Он пхенде е старейшиниенге сар те керас о събрания тай те продължинас те поклонинас амен е Йеховаске. Хари палал далкхесте сине йекх конгреси, ковато ащине те шунас 500 чшибенде. Даже презал и пандемия сине амен о букя, колато требенас аменге, за те служинас е Йеховаске тай те овас сар йекх. Ащи те овас сигурна, кай со-да те ачшол, о Йехова ка продължинел те помагинел калкенге, колато водинен амен, те лен шукар решения. За те овас готова, кана ка авел о баро бедствие, тай те жанас со си шукар те керас калке пхаре диесенде, требе те мукас амен е Йеховаске андо васта тай те шунас калкен, колато водинен амен.Со авер ка помагинел аменге?

СИКАВ ЛЮБОВ КАРИГ ТЕ ПХРАЛЕНДЕ ТАЙ ПУТЕР ТО КХЕР ЗА ЛЕНГЕ

14. Со требелас те керен о християня англал те овел унищожиме о Йерусалим? (Евреи 13:1-3)

¹⁴ Кана ка започнинел о баро бедствие най-бут ка требе те сикавас любов йекх кариг авересте. Тогава ка требе те овас сар о християня, колато бешенас ко Йерусалим тай ки Юдея. Он винаги сикавенас любов машкар песте. (Евр. 10:32-34) Ама презал о бреша англал те овел унищожиме о Йерусалим требелас още по-бут те сикавен любов кариг пе пхраленде тай те путерен пе кхера за ленге. (Четине Евреи 13:1-3.) Аме-да ка требе те керас о също, кана авел о баро бедствие.

15. Соске о християня требелас те сикавен любов кариг пе пхраленде тай те путерен пе кхера за ленге?

¹⁵ О римска войникя заачшиле турял о Йерусалим тай после геле песке. Тогава о християня ащине те нашен, ама ащине те лен бут хари букя песа. (Мат. 24:17, 18) Он требелас те помагинен йекх авереске жикай пътувиненас тай кана ресле ки Пела-да, соскето требелас те аракхен кате те бешен тай кате те керен бути. Буте пхраленге тай пхениенге требелас хабе, шехя тай кхер. Тогава о християня ащине те сикавен, кай бут дехен пес тай кай си готова те путерен пе кхера околенге. (Тит 3:14)

16. Сар ащи те сикавас любов кариг амаре пхраленде тай пхениенде, коленге требел помощ? (Дикх и снимка-да.)

¹⁶ Со сикльовас аме: Аме дехас амаре пхрален тай пхениен тай адалкхеске помагинас ленге, кана требел ленге помощ. Например десаве пхрала тай пхеня требелас те мукен по кхер, соскето ачшили война или десаво бедствие. Бут амендар сине готова те ден лен о букя, колато требенас ленге, за те живинен, тай помагинде ленге те продължинен те служинен е Йеховаске. Йекх пхен тари Украйна пхенел: „Усетинавас сар о Йехова сикавел аменге со те керас тай помагинел аменге, като използвинел амаре пхрален тай пхениен. Он сине бут лачше аменца тай керде бут букя за аменге ки Украйна, ки Унгария тай атхе ки Германия-да.“ Калка, колато путерен пе кхера пе пхраленге тай пе пхениенге тай дикхен за ленге, ачшон е Йеховаскере помощникя. (Пр. 19:17; 2 Кор. 1:3, 4)

17. Соске си важно акана те сикльовас те сикавас любов тай те путерас амаре кхера околенге?

¹⁷ Кана ка авел о баро бедствие, ка требе те помагинас йекх авереске още по-бут. (Авак. 3:16-18) Тогава ка овел бут важно те сикавас любов тай те путерас амаре кхера околенге тай о Йехова още акана сикавел амен те керас давкха.

СО КА АЧШОЛ

18. Сар ащи те овас сар о християня, колато нашле таро Йерусалим?

¹⁸ О християня, колато нашле ко планини, ачшиле живде, кана о Йерусалим сине унищожиме. Он мукле всичко, ама о Йехова на мукляс лен. Со сикльовас лендар? Аме на жанас точно со ка ачшол, ама о Исусес пхенгяс аменге те овас готова. (Лука 12:40) Аме-да ащи те керас о букя, колато сикльовас таро лил, ковато о Павлес пишингяс кариг о еврея. О Йехова обещинел секоне йекхеске амендар, кай нанай те мукел лес. (Евр. 13:5, 6) Аме жарас и диз, която ка ачшол завинаги, демек е Девлескоро Царство, тай о благословиес, колато кайка диз ка анел аменге. (Мат. 25:34)