Сар ащи те анас слава е Йеховаске кана керас бияв?

1-2. Со мислинел о Йехова е биявенге?

Ако сиго ка пранденен давкха си бут шукар! Сигурно иси тумен бут букя те керен за е биявеске. О Йехова мангел те овен щастлива ко биявa тай палал далкхесте-да. (Пр. 5:18; Песен 3:11)

² Бут си важно тумаре биявеса те анен слава е Йеховаске. Соске тай сар те керен давкха? Въпреки кай кавка уроки си калкенге колато сиго ка керен бияв, ов ащи те помагинел е манушенге-да колато си каниме ко бияв те анен слава е Йеховаске. О букя колато ка дикхас ка помагинен аменге също ако декхой мангел годи амендар сар те керел по бияв.

СОСКЕ ТУМАРО БИЯВ ТРЕБЕ ТЕ АНЕЛ СЛАВА Е ЙЕХОВАСКЕ?

3. Со требе те овел о най-важно калкенге колато ка керен бияв тай соске?

³ Калка колато ка пранденен требе те жанен со мислинел о Йехова кана лен десаве решения пе биявеске. Соске? Соскето ов си кавка ковато кергяс о първо семейство. Ов диняс е Ева те овел е Адамиескери ромни. (Бит. 1:28; 2:24) Адалкхеске ако ка керес бияв, давкха со мислинел о Йехова требе те овел о най-важно за туке.

4. Соске калка колато ка пранденен манген те анен слава е Йеховаске пе биявесте?

⁴ Кана керес бияв си бут важно те жанес со мислинел о Йехова. Ов си то Дад тай то най-лачшо амал. (Евр. 12:9) Сигурно нисар на мангес те аравес то амалипе леса тай те дукхавес лес, нито те биявесте нито авере диесесте. (Пс. 25:14) Кана мислинес всичконаске со кергяс тай ка керел за туке о Йехова, ка мангес те сикавес кай синян леске благодарно като дикхес то бияв те анел леске слава. (Пс. 116:12)

САР АЩИ ТЕ АНЕН СЛАВА Е ЙЕХОВАСКЕ?

5. Сар и Библия ащи те помагинел калкенге колато ка керен бияв?

⁵ И Библия на дел десаве заповегя далкхеске сар требе те керел пес йекх бияв. О мануша колато ка керен бияв ащи те мислинен со ащи те керен, со харешинел ленге тай саве биява керен о мануша отхе кате бешен он. Калка колато служинен е Йеховаске също спазвинен о законя тай подпишинен. (Мат. 22:21) Со-да те решинен калка колато ка пранденен, ако ка керен давкха со мангел о Йехова, ка анен леске радост тай слава. Саве букиенге тари Библия ащи те мислинен?

6. Соске си важно кана манген те пранденен те жанен саве си о законя?

⁶ Керен со пхенен о законя. (Рим. 13:1, 2) Буте държавенде иси десаве законя колато пхенен со требе те керес за те пранденес. Адалкхеске си важно калка колато манген те пранденен те жанен саве си калка законя. Ако требел туменге помощ те ахальовен калка букя ащи те манген о старейшиня те помагинен туменге.b

7. Саво требе те овел о бияв?

⁷ Дикхен тумаро бияв те овел шукар е Девлеске андо якха. (1 Кор. 10:31, 32) Туме манген тумаро бияв те сикавел кай синьен е Девлескере мануша, а на синьен таро светос. (Гал. 5:19-26) О жамутро ка овел е семействоскоро шеро адалкхеске ов требе те дикхел о бияв те овел ма само весело, ама шукар е Девлеске андо якха-да. Со ка помагинел те ачшол давкха? Бут мануша манген ко диес кана ка пранден те овел йекх библейско проповед. Ако о пхрал ковато керел и проповед сикавел любов тай уважение, давкха ка помагинел саворенге колато шунен лес те ахальовен кай о семейство си подаръки таро Йехова. Аке соске бут таро християня решинен те киден пес анди Зала е Царствоскери. Ако туме-да манген и библейско проповед те овел ки Зала, требе те пишинен йекх лил кибор ащи по-рано, за те пучен е старейшиниен далкхеске.

8. Ако ка киден тумен те празнувинен, сар ащи те анен слава е Йеховаске? (Римляни 13:13)

⁸ Четине Римляни 13:13. Ако ка киден тумен те празнувинен, со те керен за те на овен сар о мануша таро светос? И гръцко дума преведиме сар „джумбушя, коленде секой керел песке со мангел“ сикавел кай о мануша киденас пес за те макярен пес тай за те шунен музика машкар и рат. Ако решинен те тховен ракия ко бияв, дикхен со ащи те керен за те на макярел пес декхой.c Ако ка овел музика, дикхен те на овел боркха силно кай о госкя те нащи те хоратинен песке без те пищинен. Избиринен и музика шукар тай дикхен таро гиля те на ачшол неудобно никхаске.

9. Саве букиенге требе те мислинен кана решинен со те керел пес за те овел весело тумаро бияв?

⁹ Десаве биявенде о енданя тай о амала ухкиен тай пхенен десаве букя за е боряке тай за е жамутреске. Авере биявенде мукен видео или снимкес таро жамутро тай тари бори или керен авер букя за те овел ленге весело. Саворе калка букя ащи те керен тумаро диес специално. Ама со-да те керен, дикхен те овел шукар саворенге. (Флп. 4:8) Ащи те пучен тумен дали давкха со ка керен ка сикавел уважение кариг о мануша, кариг о браки тай най-бут кариг о Йехова. Въпреки кай си шукар декхой те керел песке майтапя, ов на требе те пхенел мръсна букя. (Еф. 5:3) Ако декхой тумаре амалендар или тумаре енданиендар ка пхенел десаве букя ко бияв, дикх он те жанен саве букиенге туме на манген те хоратинел пес.

10. Соске калка колато ка пранденен требе те овен скромна кана мислинен сар те керен по бияв? (1 Йоан 2:15-17)

¹⁰ Овен скромна. (Четине 1 Йоан 2:15-17.) Калка колато дехен е Йеховас ден всичко пестар те анен леске слава, а ма те сикавен пес англал околенде. Аке соске о скромна христяня нанай те чшиен йекх камара парес пе биявеске. Сави файда ка овел тумен ако тумаро бияв си скромно? Йекх пхрал тари Норвегия пхенел: „Решингям те на тховас амен борчя тай ащине те продължинас те овас пионеря. Амаро бияв на сине бут баро, ама винаги кана дас амен годи леске мислинас кибор шукар сине.“ Йекх пхен тари Индия колакоро алав си Табита пхенел: „На халям бут холи. Амаро бияв сине скромно. Нанаяс боркха бут букя коленге те хоратинас машкар аменде или амаре енданиенца тай на сине соске те дас амен.“

11. Сар ащи те сикавен кай синьен скромна далкхеса сар ка урявен тай ка лачшарен тумен тумаре биявесте? (Дикх о снимкес-да.)

¹¹ Со ка урявен тумаре биявесте? Сигурно манген те овен бут шукар. Даже ко пуране диеса и бори тай о жамутро мангенас те овен шукар пе биявесте. (Иса. 61:10) О шехя колато урявен тумаре биявесте нанай те овен сар о шехя колато урявен секо диес, ама он-да требе те овен скромна. (1 Тим. 2:9) Ма мукен давкха со ка урявен или сар ка лачшарен тумен те ачшол о най-важно калке диесесте. (1 Пет. 3:3, 4)

12. Соске си важно те отчшиен о букя колато нанай тари Библия?

¹² Отчшиен о букя колато нанай тари Библия. (Откр. 18:4) О биява колато керен о мануша андо светос авдиес си пхерде букиенца колато авен таро хохавне кхангеря, таро демоня или таро суеверия. О Йехова пхенел аменге те бешас дур салке букиендар. (2 Кор. 6:14-17) Ако иси десаве традициес отхе кате бешен тай на синьен сигурна со мислинел о Йехова за ленге, дикхен те ахальовен катар авен он. После дикхен со пхенел и Библия-да. Давкха ка помагинел туменге те жанен со те керен тумаре биявесте.

13. Сар те овен сар о Йехова кана ден тумен подаръкя?

¹³ Дали отхе кате бешен си нормално те керен пес подаръкя ко бияв? Декхой ковато си по-барвало ащи те дел по-баро подаръки околендар. Сар християня аме дехас те дас тай давкха анел аменге бут радост. (Пр. 11:25; Деян. 20:35) Ама и бори тай о жамутро на требе те траден пе госкиен те чувствинен пес длъжна те ден лен подаръки или те овел ленге пхаро соскето на дине бут. Мангас те овас сар о Йехова тай те ценинас всичко со ден амен окола вогиестар. (2 Кор. 9:7)

СО ТЕ КЕРЕН ЗА ТЕ НА ОВЕН ПРОБЛЕМЯ

14. Саве проблемя иси десаве манушен колато ка пранденен?

¹⁴ Жикай мислинен сар те керен бияв ковато те анел слава е Йеховаске, ащи те овен тумен десаве проблемя. Например ащи те на овел лесно тумаро бияв те овел скромно. Йекх пхрал таро Соломонова островя пхенел: „Сине бут трудно те решинас кас те канинас ко бияв. Иси амен бут амала тай паш аменде саворе жарен те канинес лен.“ И Табита колаке хоратингям по-рано пхенел: „Паш аменде си нормално те керас баре биява. Амаре родителиенге требелас бут време за те приеминен кай нанай те канинас буте манушен.“ И пхен Сара тари Индия пхенел: „Десаве мануша хан бут холи далкхеске кибор парес иси лен тай со ка мислинен песке окола за ленге. Ме бръчекиен сине бут баре биява, адалкхеске мо семейство делас ман бут зори моро бияв те овел по-баро тай по-шукар ленгерендар.“ Со ка помагинел туке те справинес тут салке проблемиенца?

15. Соске си важно те молинас амен, кана мислинас со ка керас амаре биявесте?

¹⁵ Молинен тумен жикай мислинен сар те керен тумаро бияв. Ащи те пхенен е Йеховаске саворе букя коленге хан холи тай сар чувствинен тумен. (Флп. 4:6, 7) Например ащи те молинен лес те лен шукар решения, те овен спокойна тай те овен смела кана требе. (1 Пет. 5:7) Кана дикхен сар о Йехова помагинел туменге, тумаро доверие лесте ка барьол. И Табита колаке хоратингям по-рано пхенел: „Бут хасас холи те на дас амен машкар аменде или амаре семействоса. Аке соске секо дром, кана хоратинасас далкхеске со ка керас ко бияв, първо молинасас амен. Наистина дикхлям сар о Йехова помагингяс те овел амен мири.“

16-17. Сави файда ка овел тумен ако ахальовен шукар кой со мангел те овел ко бияв?

¹⁶ Хоратинен лачшипнаса йекх авереса тай тумаре семействоса. (Пр. 15:22) Англал о бияв, требе те мислинен буте букиенге. Например кибор манушен ка канинен, кибор парес ка харчинен тай коле диесесте ка овел о бияв. Англал те лен решение, дикхен заедно саве букя ащи те керен, со пхенел и Библия тай со пхенде туменге десаве пхрала тай пхеня колато си лачше амала е Йеховаса тай ахальовен по-бут. Кана пхенен йекх авереске или тумаре семействоске со манген те овел ко бияв, дикхен те керен давкха лачшипнаса тай без те дукхавен никхас. Ако требе, овен готова те променинен десаве букя. Например ако тумаре родителя манген нещо ковато нанай кханило, дикхен те керен лес соскето кавка диес си специално ленге-да. А ако нанай сар те керен давкха со он манген, дикхен те пхенен ленге лачшипнаса соске нащи те керен лес. (Кол. 4:6) Помагинен ленге те ахальовен кай за туменге о най-важно си о бияв те овел шукар тай те анел слава е Йеховаске.

¹⁷ Ащи те овел бут трудно те пхенен тумаре родителиенге со манген те овел тумаре биявесте особено ако он нанай свидетеля. Ама ащи лачшипнаса те помагинен ленге те ахальовен со мислинен туме. Йекх пхрал тари Индия колескоро алав си Сантош пхенел: „Амаре семейства мангенас те керас десаве индийска ритуаля. Требелас аменге бут време за те пхенас ленге со решингям тай соске. Променингям десаве букя колато нанаяс те на дукхавас е Йеховас за те овен доволна амаре енданя-да. Например решингям те тховас хабе ковато харешинелас ленге, те на овен гиля тай те на кхелас.“

18. Со ка помагинел тумаро бияв те накхел шукар? (1 Коринтяни 14:40) (Дикх и снимка-да.)

¹⁸ Мислинен шукар со те керен. Ако англал о бияв мислинен шукар со те керен ка овел туменге по-спокойно. (Четине 1 Коринтяни 14:40.) Йекх пхрал таро Тайван пхенел: „Десаве диеса англал о бияв кидисайлям калкенца колато ка помагиненас аменге тай хоратингям далкхеске сар мангас те овел о бияв. Кергям репетиция-да десаве букиенге, за те овас спокойна тай те жанас кай всичко ка овел шукар.“ Ако дикхен всичко те ачшол на време, ка сикавен кай уважинен тумаре госкиен.

19. Со ащи те керен за те овен сигурна кай о бияв ка накхел шукар?

¹⁹ Ако мислинен далкхеске саве проблемя ащи те ачшон ко бияв тай со те керен ако ачшон, ка овен тумен по-хари холя. (Притчи 22:3) Например ако отхе кате бешен, о мануша ащи те авен ко бияв без те овен каниме, мислинен со ащи те керен за те на ачшон салка букя. Пхенен тумаре енданиенге колато нанай свидетеля со ка керел пес ко бияв тай со манген туме. Ащи те използвинен и статия „Как протичат сватбите на Свидетелите на Йехова“ която си андо jw.org. За те овен спокойна кай о бияв ка накхел шукар, ащи те пучен десаве пхралес те дикхел ко бияв всичко те овел сарто требе. (Йоан 2:8) Ако пхенен леске со точно манген, ов ка ащи те помагинел туменге о бияв те накхел шукар.

20. Со на требе те бистерен?

²⁰ Ащи те хан бут холи като мислинен далкхеске кибор бут бути иси за те керел пес йекх бияв. Ма бистерен обаче кай о бияв си само йекх диес. Палал далкхесте започнинел тумаро шукар животос колесте ка служинен е Йеховаске заедно. Ден всичко тумендар тумаро бияв те овел скромно тай те овел шукар е Девлеске андо якха. Мукен тумен е Йеховаске андо васта. Ов ка помагинел туменге те керен шукар бияв тай кана ден тумен годи за леске те овен щастлива тай те на овен пишмани нисоске. (Пс. 37:3, 4)