Ki amari organizacija nane amen učiteljija kola dobinena plata. Isto sar ko skupštine ando prvo veko hem avdije tane čhivde nadglednikija te brininen pe andi Devljesi skupština (Čeriba e apostolengo 20:28). Akala starešine tane duhovno zrela murša kola vodinena i skupština hem brininena pe olače „na zorjea, nego odoljese so mangena; na pohlepno te šaj te dobinen diso, nego celone viljeja“ (1. Petareso 5:1-3). So čerena on amendže?

Brininena pe amendže hem arakhena amen. O starešine dena savetija andi Biblija hem pomožinena e skupštinače te ačhol paše e Jehovaja. Odoljese so džanena so o Jehova dindža ljen akava važno zadatko, on na mangena te čeren pe glavna maškaro e Devljeso narodo, nego pomožinena sarinendže te osetinen pe šukar hem te oven bahtalje (2. Korintskonendže 1:24). Isto sar so jekh pastiri šukar brinini pe ando svako bakro, adžahar hem o starešine trudinena pe te brininen pe svakone manušese ki skupština (Godžalje lafija 27:23).

Sikavena amen sar te čera e Devljesi volja. Svako kurko, o starešine vodinena e skupštinake sastankija te šaj te zorjačeren amari vera (Čeriba e apostolengo 15:32). Akala verna murša tane primer ko propovedibe, adžahar so džana amencar ki služba hem sikavena amen sar pošukar te čera sa o vrste andi služba.

On zorjačerena svakone amendar. Te šaj te pomožinen svakonese amendar te ovel popaše e Jehovaja, o starešine kotar amari skupština šaj te aven koro amende čhere ja ki dvorana te vačeren amencar. On pomožinena amen hem utešinena amen e lafencar andi Biblija (Jakoveso 5:14, 15).

O starešine brininena pe na samo e skupštinače, nego isto adžahar pobuter oljendar čerena buti hem brininena pe andi piklji porodica. Odoljese, amen valjani te poštujina ljen (1. Solunskonendže 5:12, 13).

• So čerena o starešine ki skupština?

• Sar o starešine mothovena so brininena pe svakonestar amendar?

Andi Biblija dikhaja so „o nadglednikija hem o sluge pomoćnikija“ brininena pe e skupštinače (Filipskonendže 1:1). Obično ki svako skupština isi nekobor starešine hem sluge pomoćnikija. Savi buti isi ljen o sluge pomoćnikija?

On pomožinena e starešinendže. O sluge pomoćnikija, terne ja phure, tane duhovno zrela phralja kola tane odgovorna hem šukar čerena pi buti. On čerena važna zadatkija so čerena pe ki svako skupština. Odoljese, e starešinendže tano polokho hem isi ljen pobuter vreme te čeren po zadatko te sikaven hem te brininen pe e phraljendže.

On tane korisna ki skupština. Nesave sluge pomoćnikija isi ljen zadatko te adžičeren okoljen so avena ko sastanko. Avera služinena ko ozvučenje, delinena i literatura, brininena pe andi skupštinaki blagajna ja dena područje e službače e phraljendže hem e phenjendže ki skupština. Isto adžahar, on pomožinena te održini pe i dvorana. O starešine šaj te pučen oljen te pomožinen e phurendže. O sluge pomoćnikija tane spremna te čeren svako zadatko kova oljendže dindo, a i skupština poštujini ljen odoljese so spremno služinena (1. Timotejese 3:13).

On tane šukar primer ki skupština. O sluge pomoćnikija tane birime odoljese so isi ljen šukar hrišćanska osobine. On zorjačerena amari vera ked isi ljen učešće ko sastankija. On tane primer ki služba hem adžahar čerena amen te ova porevna. Odoljese so on šukar sarađujinena e starešinencar, čerena te ovel radost hem jedinstvo (Efeskonendže 4:16). Sar so nakhela o vreme, hem on šaj te pheren o uslovija te služinen sar starešine.

• Save manuša tane o sluge pomoćnikija?

• Sar on pomožinena ki skupština?

Ko hrišćanska grčka spisija but putija pisini ando Varnava hem ando apostol Pavle. On služindže sar pokrajinska nadglednikija hem posetindže o prva skupštine. Sose? Odoljese so čače brinindže pe ando peklje duhovna phralja hem phenja. O Pavle vačerdža so mangela te ’irini pe hem te posetini e phraljen‘ te dikhel sar tane. Ov hine spremno te nakhel but baro drumo te šaj te ohrabrini ljen (Čeriba e apostolengo 15:36). Avdije isto odova čerena o pokrajinska nadglednikija.

On avena te ohrabrinen amen. Svako pokrajinsko nadgledniko duj putija ko berš posetini koro 20 skupštine hem ki svako skupština ačhola jekh kurko. Šaj but te sikljova oljendar hem oljenge romnjendar, ako tane ženime. On trudinena pe te upoznajinen sarinen, e ternen hem e phuren, hem but mangena te oven amencar ko područje hem ko amare biblijake kursija. Akala nadglednikija, zajedno e starešinencar andi skupština, džana ko phralja te pomožinen ljen te oven duhovno zoralje hem ohrabrinena amen peklje govorencar ko sastankija hem ko kongresija (Čeriba e apostolengo 15:35).

On brininena pe sarinendže. O pokrajinska nadglednikija čače brininena pe andi sarinengi duhovnost ki skupština. Čedena pe e starešinencar hem e sluge pomoćnikoncar te dikhen sar duhovno napredujini i skupština hem dena ljen savetija sar šaj pana pošukar te čeren pe zadatkija. On pomožinena e pioniren te oven pošukar ki služba hem isto adžahar but mangena te upoznajinen e neven ki skupština hem te šunen sar duhovno napredujinena. Sa akala phralja dena pestar sa sar ’saradnikija kola služinena amare šukaripase‘ (2. Korintskonendže 8:23). Hem amen valjani te ovel amen sar oljengi vera hem te šuna e Devlje ko sa (Jevrejendže 13:7).

• Sose o pokrajinska nadglednikija posetinena o skupštine?

• So šaj te sikljova kotar oljenge posete?

Ked ovena prirodna katastrofe, e Jehovase svedokija sigate organizujinena pe te pomožinen peklje phraljendže ko odova than. Odova mothovi so čače mangaja jekh jekhe (Jovan 13:34, 35; 1. Jovaneso 3:17, 18). Sar pomožinaja amare phraljendže?

Pomožinaja parencar. Ked hine baro bokhaljipe ki Judeja, o prva hrišćanja andi Antiohija bičhaldže pare peklje duhovno phraljendže (Čeriba e apostolengo 11:27-30). Isto sar oljende, ked šunaja so amare phralja ko disave thana tane ko pharipa, amen prekalji amari skupština bičhalaja dobrovoljna prilogija te šaj te ovel ljen odova so valjani oljendže (2. Korintskonendže 8:13-15).

Džaja uduri te pomožina. O starešine ko thana kuri ulji i katastrofa trudinena pe te arakhen svakone andi skupština te dikhen da li tane sare šukar. Šaj te čerel pe jekh Odbor kova ka organizujini te ovel hajbe, čisto pani pijbase, šeja, than sojbase hem medicinsko pomoć. But Svedokija džana ko po troško te pomožinen ja te popravinen e phraljenge čhera hem o dvorane. Sebepi o jekhipe kova isi amen ki organizacija hem so isi amen iskustvo te čera zajedno buti, šaj sigate te pomožina ked valjani. Iako pomožinaja „amare phraljendže ki vera“, ked šaj, amen pomožinaja hem e manušendže ando avera religije (Galatskonendže 6:10).

Utešinaja ljen andi Biblija hem ohrabrinaja ljen. Posebno valjani uteha okoljendže so nakhlje disavi katastrofa. Ko asavko pharo vreme o Jehova, „o Devel andi svako uteha“, šaj te del amen snaga (2. Korintskonendže 1:3, 4). Sa okoljendže so nane ljen nada, amen ando vilo vačeraja odoljestar so o Devel obećini hem uverinaja ljen so e Devljeso Kraljevstvo ka cidel sa o prirodna katastrofe kola anena dukh hem pharipa (Pučaribe 21:4).

• Sose e Jehovase svedokija šaj sigate te pomožinen ked isi prirodna katastrofe?

• Savi uteha andi Biblija šaj te da okoljendže so nakhlje disavi katastrofa?

Nekobor dive angljeder te merel, o Isus hine kokri ko jekh than peklje štare učenikoncar – e Petareja, e Jakoveja, e Jovaneja hem e Andrija. Dži vačerdža kova ka ovel o znak andi oljesi prisutnost ko poslednja dive, ov pučlja jekh but važno pučibe: „Koj tano o verno hem o razborito robo kas oljeso gospodari čhivdža upro peklje sluge, te del ljen o habe ko pravo vreme?“ (Matej 24:3, 45; Marko 13:3, 4). O Isus uverindža peklje učenikon so ov, sar oljengo „gospodari“, ka birini okoljen kola redovno ka den duhovno habe oljese učenikondže ko poslednja dive. Koj tano „o verno hem o razborito robo“?

Ov tano jekh tikni grupa čerdi ando e Isusese pomazime učenikija. O Vodeće telo ando e Jehovase svedokija tano odova „robo“. Ov dela duhovno habe ko pravo vreme okoljendže so služinena e Jehovase. Sebepi so o verno robo čerela po zadatko, amen dobinaja „habe ko pravo vreme“ (Luka 12:42).

Ov brinini pe e Devljese čherese (1. Timotejese 3:15). O verno hem o razborito robo dobindža ando Isus baro zadatko te brinini pe sa e bučendže kola tane povezime e Jehovase organizacijaja ki Phuv. Odova uključini o materijalna buča so isi la, te organizujini o propovedibe hem te sikavi amen prekalo amare skupštine. Te šaj te del amen baš odova so valjani amendže ko pravo vreme, „o verno hem o razborito robo“ delini duhovno habe prekalo o publikacije kola koristinena amendže ki amari služba hem prekalo o govorija so ičerena pe ko amare sastankija hem kongresija.

O robo tano verno ko odova so sikavi i Biblija hem ičeri pe ki zapovest te svedočini o šukar haberi. Ov tano razborito odoljese so mudro brinini pe ando sa o buča ki Phuv so o Isus mukhlja oljese (Čeriba e apostolengo 10:42). Odova so sa pobuter manuša prihvatinena o čačipe hem so dobinaja but duhovno habe, mothovi so o Jehova blagoslovini odova so o robo čerela (Isaija 60:22; 65:13).

• Kas čhivdža o Isus te del duhovno habe oljese učenikondže?

• Sar o robo mothovi soj tano verno hem razborito?

Ko prvo veko jekh tikni grupa – ’o apostolija hem o starešine ko Jerusalim‘ – služindže sar vodeće telo hem andže važna odluke e celona skupštinače kotar pomazana hrišćanja (Čeriba e apostolengo 15:2). Angljeder te anen nesavi odluka on dikhlje so vačeri i Biblija andi odija buti hem mukhlje te vodini ljen e Jehovaso duho (Čeriba e apostolengo 15:25). Hem avdije čerela pe isto adžahar.

O Devel čerela piklji volja prekalo o Vodeće telo. O pomazime phralja kola služinena ko Vodeće telo hor proučinena i Biblija hem isi ljen baro iskustvo sar šaj te čera amari služba e Jehovase hem sar te rešinen pe disave pučiba ando duhovna buča. O Vodeće telo čedela pe svako kurko te dikhel so valjani e phraljendže ko celo sveto. Isto sar ko prvo veko, on dena e biblijake savetija prekalo ljila, prekalo o putujuća nadglednikija hem prekalo avera phralja. Akava pomožini sa e Devljese slugendže te oven jekh ko odova so mislinena hem so čerena (Čeriba e apostolengo 16:4, 5). O Vodeće telo brinini pe te ovel spremimo o duhovno habe, ohrabrini amen te čhiva ko prvo than o propovedibe hem brinini pe te oven dinde o odgovornostija e phraljendže.

O Vodeće telo mukhela te vodini lje e Devljeso duho. O Vodeće telo rodela vođstvo ando Najbaro Vladari, o Jehova, hem ando skupštinako Poglavari, o Isus Hrist (1. Korintskonendže 11:3; Efeskonendže 5:23). Na mislinena soj tane on glavna maškaro e Devljeso narodo. Isto adžahar, sar avera pomazanikija ki Phuv, hem on „džana palo Bakro [o Isus] bilo kuri te džal“ (Pučaribe 14:4). O Vodeće telo cenini ked molinaja amen e Jehovase te blagoslovini oljen hem oljengo trud.

• Ko hine ko vodeće telo ko prvo veko?

• Sar o Vodeće telo avdije rodela o Devel te vodini lje?

Ki hebrejsko čhib, o lafi Betel značini „e Devljeso čher“ (1. Mojsieso 28:17, 19). Akava nav akharena sa o zgrade kola isi ljen e Jehovase svedokija ko celo sveto, kotar kola organizujini pe hem podupirini pe o propovedibe. O Vodeće telo tano ko glavno sedište ando e Jehovase svedokija ko Njujork (SAD) hem odothar vodinena i buti koja čerela pe ko podružnice ko but Phuvja. Sar grupa, okola so služinena ko Betel tane pendžarde sar betelsko porodica. Sar ki jekh porodica, on živinena hem čerena buti zajedno, hana maro zajedno hem proučinena i Biblija zajedno (Psalam 133:1).

Posebno than kuri i betelsko porodica služini celone viljeja. Ko svako Betel isi murša hem džuvlja kola spremno čerena e Devljesi volja hem podupirinena o delo ando propovedibe hem sikavibe (Matej 6:33). Nijekh oljendar nane lje plata, ama sarinendže tane obezbedime nekobor buča – soba, habe hem hari pare te činen pese disave neophodna buča. Sarine ko Betel isi ljen disavo zadatko. Disave čerena ki kancelarija, ki kuhinja ja ki trpezarija. A avera čerena buti ko than kuri štampinena pe o knjige, thovena pe o šeja, čistinena pe hem održinena pe o betelska zgrade ja čerena diso aver.

Than kuri čerela pe but buti te šaj te podupirini pe o propovedibe. O glavno cilj ko svako Betel tano so pobuter manuša te džanen o čačipe andi Biblija. Akija brošura tani jekh primer ando odova. O Vodeće telo nadgledindža o pisibe akalje brošurako. Palo odova, hine elektronski bičhaldi ko but prevodilačka timija ko celo sveto, štampimi ko nekobor betelska štamparije hem ko krajo bičhaldi ko pobuter ando 110 000 skupštine. Odoljeja so čerena sa akava, o betelska porodice but pomožinena te čerel pe o najvažno zadatko – te propovedini pe o šukar haberi (Marko 13:10).

• Ko služini ko Betel hem kola buča tane oljendže obezbedime?

• Ko kova važno zadatko pomožini svako buti koja čerela pe ko Betel?

Sare ki betelsko porodica isi ljen averčhane zadatkija hem pomožinena te šaj te propovedini pe ki jekh ja ko nekobor Phuvja. On služinena ko prevodilačka timija, štampinena o časopisija hem o knjige, pakujinena i literatura ko betelsko magacin, čerena audio hem video snimkija ja brininena pe ando avera buča kola valjanena.

O Odbor e podružnicako nadgledini i buti koja čerela pe. Ki svako podružnica, o Vodeće telo birini jekh Odbor e podružnicako ko kova služinena trin ja pobuter sposobna starešine. O Odbor redovno bičhalji izveštaj ko Vodeće telo andi svako Phuv kotar koja brinini pe – sar napredujini o delo ando propovedibe hem kola problemija šaj isi ljen. Odola izveštaja pomožinena te šaj o Vodeće telo te odlučini kotar kola teme ka vačeri pe ko neve publikacije, ko sastankija hem ko kongresija. O Vodeće telo redovno bičhalji e phraljen te posetinen o podružnice hem te den savetija kola ka pomožinen e phraljendže ko Odbor te čeren peklje zadatkija (Godžalje lafija 11:14). Ki akija poseta odova phral ičeri jekh govor kova ohrabrini e phraljen kola tane ko odova područje.

I podružnica pomožini e skupštinendže. O odgovorna phralja andi podružnica dena odobrenje te čeren pe neve skupštine. Isto adžahar, dena uputstvija e pionirendže, e misionarendže hem e pokrajinsko nadglednikondže kola služinena ko odova područje. On organizujinena o kongresija hem o pokrajnska sastankija, brininena pe te čeren pe neve dvorane hem bičhaljena literatura kobor valjani svakona skupštinače. Sa so čerela pe ki podružnica pomožini te ova organizujime ko propovedibe (1. Korintskonendže 14:33, 40).

• Sar o Odbor e podružnicako pomožini e Vodećo telose?

• Ando kola buča brinini pe i podružnica?

Te šaj o „šukar haberi“ te propovedina „svakone narodose, plemese, čhibjače hem manušese“, amen čeraja amare publikacije ko pobuter ando 900 čhibja (Pučaribe 14:6). Sar resaja sa odova te čera? Odija bari buti čeraja la adžahar so pomožini amen o međunarodno tim kova pisini amari literatura hem adžahar so pomožinena amen o bučarne prevodiocija. Sare on tane e Jehovase svedokija.

Amari literatura prvo pisini pe ki englesko čhib. O Vodeće telo nadgledini i buti koja čerela o Odeljenje ando pisibe ko glavno sedište ando e Jehovase svedokija. Akava Odeljenje dela zadatkija okoljendže kola pisinena i literatura, a kola služinena ko glavno sedište ja ko avera podružnice. Odoljese so o phralja kola pisinena i literatura avena ando različita kulture, ki amari literatura isi teme kola interesinena različita manušen.

O tekst bičhalji pe te prevodini pe. Ked o engleski tekst tano gotovo hem proverimo, ov elektronski bičhalji pe ko prevodilačka timija, ko sa o Phuvja, kola prevodinena, proverinena hem popravinena o prevodimo tekst. On trudinena pe o smisao kotar englesko tekst te ovel tačno prevodimo ki oljengi čhib (Vačerutno 12:10).

O kompjuterija pomožinena posig te prevodini pe. O kompjuterija našti te zameninen e manušen kola pisinena hem prevodinena. Ama, oljengi buti šaj posig te čerel pe ako koristinena o kompjuterska rečnikija hem razna programija kola pomožinena polokhe te arakhen odova so rodena. E Jehovase svedokija čerdže jekh kompjutersko program kova vičini pe MEPS (Multilanguage Electronic Publishing System), kova šaj te koristini pe ko but čhibja. Odothe čhivela pe o prevodimo tekst, spojini pe e slikencar hem pripremini pe te šaj te štampini pe.

Sose odobor trudinaja amen te prevodina amari literatura ko but čhibja, čak iako nesave čhibja vačerena samo nekobor hiljada manuša? I Biblija phenela so e Jehovasi volja tani „sa o manuša te spasinen pe hem šukar te pendžaren o čačipe“ (1. Timotejese 2:3, 4).

• Sar pisini pe amari literatura?

• Sose prevodinaja amari literatura ko but čhibja?

Amari organizacija svako berš biparengo štampini hem delini but milionja Biblije hem avera publikacije. Gradinaja hem održinaja o dvorane hem o podružnice. Isto adžahar, pomožinaja hiljada phraljendže kola služinena ko Betel ja sar misionarija hem pomožinaja ked isi prirodna katastrofe. Šaj pučeja tut kotar laja pare sa akaljese?

Na ljela pe desetak, na platini pe članarina hem niko nane dužno te del pare. Iako trošini pe but sebepi amaro propovedničko delo, amen na rodaja pare e manušendar. Angljeder jekh veko, ko dujto izdanje kotar i Stražarsko kula pisindža so verujinaja so o Jehova pomožini amen ki amari buti hem odoljese niked na ka roda ando manuša te den amen pare. Hem niked na čerdžam odova (Matej 10:8).

Sa so čeraja tano finansirimo kotar dobrovoljna prilogija. But džene ceninena so sikavaja e manušen andi Biblija hem odoljese dena prilogija. Kokri amen radosno daja amaro vreme, amari snaga hem amare pare hem avera buča te šaj te čerel pe e Devljesi volja ko celo sveto (1. Letopisa 29:9). Ko amare dvorane hem ko amare kongresija, isi kutije kuri okola so mangena čhivena dobrovoljno prilog. O prilogija šaj te den pe hem prekalji amari internet stranica jw.org. Pobaro deo ando pare avena okoljendar kola nane barvalje. On tane isto sar i udovica kas o Isus pohvalindža, sose iako hine čorori, oj spremno viljestar dindža sa so hine la (Luka 21:1-4). Odoljese svako šaj redovno te „čhivel diso ki strana“ hem te del odobor kobor „rešindža ko po vilo“ (1. Korintskonendže 16:2; 2. Korintskonendže 9:7).

Sigurna hijam so o Jehova hem ponodri ka podstaknini o vilje okoljenge kola mangena te mothoven ljese čast odoljeja so isi ljen, hem te podupirinen o delo ando propovedibe te šaj te čerel pe oljesi volja (Godžalje lafija 3:9).

• Sar amari organizacija razlikujini pe kotar avera religije?

• Sose sa koristinena pe o dobrovoljna prilogija?

I glavno tema andi Biblija kolatar vačeri pe ko e Jehovase svedokonge dvorane tani e Devljeso Kraljevstvo – i glavno tema andi koja o Isus propovedindža (Luka 8:1).

Koro ljende sikljovaja o čačipe ando Devel. O dvorane tane thana koljendar e Jehovase svedokija organizujinena o propovedibe ko po područje (Matej 24:14). O dvorane razlikujinena pe, ama svako oljendar tani skromno hem šaj te koristinen la pobuter skupštine. Odoljese so isi sa pobaro broj objaviteljija hem skupštine, ko poslednja berša čerdžam nekobor hiljada neve dvorane, ko prosek po pandž ko dive. Sar čeraja akava? (Matej 19:26).

Gradinena pe ando dobrovoljna prilogija čedime odoljese. Odola prilogija bičhaljena pe ki podružnica te šaj te koristinen ljen o skupštine so valjani ljendže te gradinen ja te renovirinen piklji dvorana.

Gradinena ljen e Jehovase svedokija hem na ljena pare odoljese. Ko but Phuvja, čerena pe Grupe so gradinena dvorane. O phralja hem o phenja so služinena ko akala grupe, džana ko različita skupštine ki odija Phuv – čak ko podur thana – te pomožinen e skupštinendže te čeren peklje dvorane. Ko avera Phuvja, isi nesave phralja kola tane odgovorna te čeren pe hem te renovirinen pe o dvorane ko nesavo područje. Iako but phralja soj tane majstorija andi celo oblast pomožinena ko than kuri čerela pe i dvorana, najviše pomožinena o phralja hem o phenja andi odija skupština. E Jehovaso duho hem odova so oljeso narodo celone viljeja pomožini, čerela te završini pe odija buti (Psalam 127:1; Koloskonendže 3:23).

• Sose gradinaja o dvorane hem sar on izgledinena?

• Sar gradinaja amare dvorane ko celo sveto?

Svako dvorana, ki koja e Jehovase svedokija ičerena peklje sastankija, tani povezimi e Devljese sveto naveja. Odoljese, amendže tani čast hem deo andi amari služba e Devljese te pomožina i dvorana te održini pe hem te ovel čisto. Sarine šaj te pomožinen ko akava.

Pomožin ko čistibe palo sastanko. Palo svako sastanko, o phralja hem o phenja radosno pomožinena te čistini pe i dvorana. Jekh puti ko masek temeljno čistini pe. Akija buti vodini jekh starešina ja sluga pomoćniko kova obično isi lje spisko ando buča so valjani te čeren pe. Šaj neko ka valjani te kosel ja te šulavi o pod, te usisivini, te kosel i prašina, te redini o stolice, šukar te čistini o toaletija, te kosel o džamija hem o ogledala, te fordel o đubre ja te čistini o boro. Ako hem o čhave pomožinena ko čistibe, odova ka sikavi ljen te ceninen o than kuri sikljovaja ando Devel (Vačerutno 5:1).

Pomožin ked čerena pe popravke ki dvorana. Svako berš, čerela pe temeljno provera ki dvorana, andral hem avrijal. Palo odija provera, ako valjani čerena pe popravke, a odova pomožini i dvorana te ovel šukar održimi hem te na trošinen pe but pare (2. Letopisa 24:13; 34:10). Jekh čisto hem šukar održimi dvorana tani dostojno than kuri slavinaja amare Devlje. Ked amen pomožinaja, tegani mothovaja so mangaja e Jehova hem ceninaja o than kuri slavinaja lje (Psalam 122:1). Akava dela šukar svedočanstvo avere manušendže (2. Korintskonendže 6:3).

• Sose valjani te brinina amen e thanese kuri slavinaja e Devlje?

• So čeraja te šaj i dvorana te ovel čisto?

Da li mangeja te istražine hem te džane pobuter andi Biblija? Mangeja li te džane pobuter ando nesavo stiho, ličnost, than ja nesavi buti kolatar vačeri pe ki Biblija? Ja pučeja tut da li šaj i Biblija te pomožini tut ked mučini tut nesavo problemi? Tegani, koristin i biblioteka ki dvorana.

Koro late šaj te arakhe but korisna publikacije. Šaj čhere nane tut sa e biblijake publikacije kola isi ljen e Jehovase svedokija ki čhib so haljoveja. Ama, ki biblioteka ki dvorana isi but publikacije. Isto adžahar, odothe šaj te arakhe razna prevodija andi Biblija, šukar rečniko hem avera knjige. Šaj te koristine i biblioteka, angljeder hem palo sastankija. Ako odothe isi kompjuter, šaj te koristine i biblioteka ando publikacije ko CD (Watchtower Library). Oj tani kompjutersko program ki koja isi but publikacije, hem lokho šaj te arakhe disavi tema, lafi ja stiho so rodeja.

Oj tani korisno okoljendže so učestvujinena ko sastanko Amaro hrišćansko dživdipe hem služba. Ako isi tut zadatko ko akava sastanko, šaj te koristine i biblioteka ki dvorana te spremine tut. O nadgledniko ando akava sastanko brinini pe kotar biblioteka. Ov tano odgovorno te dikhel da li o neve publikacije tane odothe hem da li tane šukar sredime. Ov ja okova so proučini tuva i Biblija šaj te sikaven tut sar te arakhe odova so valjani tuče. Ama, nijekh knjiga andi biblioteka na valjani te ljel pe čhere. Isto adžahar, valjani šukar te arakha odola knjige hem te na pisina ništa ano ljende.

I Biblija vačeri so ako mangaja te arakha „o džandipe ando Devel“, mora te roda lje „sar garavdo barvaljipe“ (Godžalje lafija 2:1-5). I biblioteka ki dvorana šaj te pomožini tuče ko akava.

• So isi ki biblioteka ki dvorana?

• Ko šaj te sikavi tut sar te koristine i biblioteka?

O Isus vačerdža pe učenikondže: „Nek tumari svetlost svetlini anglo manuša, te šaj on te dikhen tumare šukar delija hem te slavinen tumare Dade kova tano ko nebo“ (Matej 5:16). Odoljese, koristinaja i savremeno tehnologija sar soj tano o internet. Prekalji amari internet stranica, jw.org, šaj te dobinen pe informacije odoljestar ko so verujinena hem so čerena e Jehovase svedokija. So ka arakhe odothe?

E biblijake odgovorija ando but pučiba. Šaj te arakhe odgovorija ando but važna pučiba so pobuter manuša pučena pe. Na primer, o traktatija Da lji o muke ka ovenljen krajo? hem Šaj lji o mulje čače palje te živinen? tane dostupna ko pobuter ando 600 čhibja. Uduri šaj te arakhe o prevod Novi svet ko pobuter ando 130 čhibja hem but publikacije koljencar so proučini pe i Biblija, sar soj tani i knjiga So sikavi amen i Biblija? hem o najneve časopisija Stražarsko kula hem Probudite se! But ando akala publikacije šaj te čitine, te šune ja te huljave ko MP3, PDF ja EPUB formatija. E manušendže kola mangena te džanen pobuter, šaj čak te štampine nekobor strane ki oljengi čhib! Isi video-izdanja ko but znakovno čhibja. Šaj te huljave o dramsko čitibe andi Biblija, e biblijake drame hem šuži muzika te šaj te uživine ko to slobodno vreme.

Čačutne informacije ando e Jehovase svedokija. Isto adžahar, odothe tane čhivde o najneve vestija hem o video-zapisija kotar amari buti ko celo sveto hem odoljestar sar pomožinaja ked ovena o prirodna katastrofe. Odothe šaj te dikhe ked ka oven amare kongresija hem o adrese kotar amare podružnice.

Prekalo sa akava, amen širinaja o čačipe dži ko najdur thana ki Phuv. O manuša ando svako kontinenti, čak kotar Antarktik, isi ljen korist akaljestar. Amen molinaja amen „e Jehovaso lafi sigate te širini pe“ ki celo Phuv, te ovel slavimo o Devel (2. Solunskonendže 3:1).

• Sar amari internet stranica jw.org pomožini e manušendže te sikljon o čačipe andi Biblija?

• So bi mangeja te rode ki amari internet stranica?