Ο Ευαγγέλιος σο Γραφιντάς ο Λουκάς
13 Αζομάν μερικοί οντουλένταρ σο ισινέ οτθέ βακερντέ λέσκε ι Γαλιλαιόνγκε, σο λένγκο ρατ ναμιντάας ο Πιλάτος λένγκε θυσιέντζαρ. 2 Βοβ βακερντάς: «Αμντίνενα ότι οντουλά Γαλιλαίοι σο αβιλέ-πες λένγκε ανταλά ισινέ πο μπαρέ αμαρτωλοί σαρέ κατά γιαβερά Γαλιλαίοι; 3 Νάα, βακεράβα τουμένγκε. Αλλά άμα να μετανιωσάλεν, σαρέ τουμέν κα καταστραφίντιβεν σαρ βον. 4 Ή αμντίνενα ότι, οντουλά 18 σο πελό οπρά-λέντε ο πύργος κο Σιλωάμ ντα μουνταρντάς-λεν, κερντέας πο μπαρέ αμαρτίες σαρέ κατά γιαβερά τζενέ σο μπεσένα κι Ιερουσαλήμ; 5 Νάα, βακεράβα τουμένγκε. Αλλά άμα να μετανιωσάλεν, σαρέ τουμέν κα καταστραφίντιβεν σαρ βον».
6 Σοράν βακερντάς ακαβά παράδειγμας:* «Εκ τζενό τσσουντάας εκ χχελινγκίν πι χωραφίστε, ντα αβιλό τι αρακχέλ χχελιά λάτε αλλά να αρακχλάς. 7 Αζομάν βακερντάς κο τζενό σο κερέλας μπουτί κο χωράφι: “Τριν μπρεσά ακανά αβάβα για τι αρακχάβ χχελιά ανταλέ χχελινγκινάτε, αλλά να αρακχάβα. Τσσιν-λα! Σόσκε τι ασταρέλ ο τθαν σινανέ;” 8 Βοβ βακερντάς λέσκε: “Κύριε, μουκχ-λα ατζέκ εκ μπρες μέχρι τι χαντζουβάβ ντονταλάι λάταρ ντα τι τσσουβάβ κοπριά. 9 Αντικάς, μπορεί τι νικαβέλ χχελιά. Άμα να νικαντάς, τσσιν-λα”».
10 Ο Ιησούς σικλιαρέλας εκχέ συναγωγιάτε κο Σάββατος. 11 Οτθέ ισινέ εκ τζουβέλ μπίζουρανι* 18 μπρεσά ιτιρί εκχέ δαιμονάσταρ. Ντα λάκο σώμας ισινέ γκιντιμέ κο ντούι, ντα ναστί κερέλας ιτς οπρέ. 12 Κάνα ο Ιησούς ντικχλάς-λα, ντινάς-λα βίκος ντα βακερντάς λάκε: «Τζουβλίε, τι νασέλ τούταρ το νασφαλιπέ».* 13 Ντα τσσουντάς πο βαστά οπρά-λάτε, ντα οντιά στιγμή βόι κερντάς οπρέ πο σώμας ντα δοξάνελας ι Ντεβλές. 14 Αλλά ο σορό ι συναγωγιάκο πφαριλό πι χολιάταρ σο κερντάς-λα λατσσές ο Ιησούς Σάββατος. Οτθάρ, βακερντάς κο μπουτ τζενέ σο ισινέ οτθέ: «Σιοβ ντιβεσά κεράσα μπουτί. Οντουλέσκε, ελάν οντουλά ντιβεσά για τι αβέν λατσσές, μα ελάν Σάββατος». 15 Όμως, ο Κύριος βακερντάς λέσκε: «Ντουέ μουένγκε ισινέν! Να πουτρέλα ο κάθε εκ τουμένταρ πι γκουρουβές ή πι χχερές Σάββατος για τι γκερέλ-λες τι πιλ πανί; 16 Ακαγιά τζουβέλ, σο λάκο ντατ ισί ο Αβραάμ, ντα ατσσικιαρέλας-λα πφαντί 18 μπρεσά ο Μπενγκ, μα τι πουτάρντιβελας λέσταρ Σάββατος;» 17 Κάνα βακερντάς-λεν ανταλά, σαρέ οντουλά σο τζάνας λέσαρ κόντρα λατζασάλε, αλλά σαρέ ο γιαβερά χαιρίνενας σαρέ ι μπαρέ πραγματένγκε σο κερέλας βοβ.
18 Σοράν βακερντάς: «Σαρ ισί η Βασιλεία ι Ντεβλέσκι ντα καλέ πραγμάσαρ τι μοιασκιαράβ-λα; 19 Ισί σαρ εκ μπουτ χουρντό σπόρος* σο λιντάς εκ τζενό ντα τσσουντάς πι κηπόστε, ντα ανταβά μπαριλό ντα αβιλό δέντρος, ντα ο τσιρικλέ κερντέ πουμαρέ φωλιές λέσκε κλαδίντε».
20 Ντα βακερντάς ατζέκ εκ φαρ: «Καλέ πραγμάσαρ τι μοιασκιαράβ ι Βασιλεία ι Ντεβλέσκι; 21 Ισί σαρ μαγιά σο λιντάς-λα εκ τζουβέλ, ναμιντάς-λα μπερεκέτι βαρέσαρ ντα σαρό ο χουμέρ φουσκωσάλο».
22 Καζόμ τζάλας κάρινγκ κι Ιερουσαλήμ, νακχέλας τθεμ τθεμέσταρ ντα γκαβ γκαβέσταρ ντα σικλιαρέλας. 23 Ντα εκ τζενό πουτσλάς-λες: «Κύριε, ισί χάνικ οντουλά σο σώντιβενα;» Βοβ βακερντάς λένγκε: 24 «Κερέν σο νακχέλα τουμαρέ βαστέσταρ για τι τσσουβέν-τουμέν κατά στενή πόρτα, σόσκε βακεράβα τουμένγκε ότι μπουτ τζενέ κα μανγκέν τι τσσουβέν-πες αλλά ναστί κα κερέν-λες. 25 Κάνα ο σορό ι φαμιλιάκο κα ιστίλ ντα κα πφάντελ ι πόρτα, τουμέν κα αβέν αβριάλ, κα μπασκιαρέν ι πόρτα ντα κα βακερέν: “Κύριε, πούταρ αμένγκε”. Αλλά βοβ κα βακερέλ τουμένγκε: “Να τζανάβα κατάρ ισινέν”. 26 Αζομάν κα βακερέν: “Χαλάμ ντα πιλάμ ανγκλά-τούτε, ντα τούι σικλιαρντάν αμαρέ μπαρέ ντρομέντε”. 27 Αλλά βοβ κα βακερέλ τουμένγκε: “Να τζανάβα κατάρ ισινέν. Νασέν μάνταρ, σαρέ τουμέν σο κερένα άδικα πράγματα!” 28 Οτθέ κα ροβέν ντα κα σικίνεν τουμαρέ ντανά,* κάνα κα ντικχέν ι Αβρααμίς, ι Ισαακίς, ι Ιακωβίς ντα σαρέ ι προφητέν κι Βασιλεία κι Ντεβλέσκι ντα τουμέν τι φουρτίνεν-τουμέν αβρί. 29 Ατζέ, κα αβέν τζενέ σαρό κατά ντουνιάς* ντα κα μπεσέν κο τραπέζι τι χαν* κι Βασιλεία κι Ντεβλέσκι. 30 Ντα ισί τζενέ σο ισί ντιπ παλάλ ντα κα τζαν ανγκλάλ, ντα τζενέ σο ισί ανγκλάλ ντα κα ατσσόν ντιπ παλάλ».
31 Οντουβά σαάτι αβιλέ μερικοί Φαρισαίοι ντα βακερντέ λέσκε: «Νίκιουβ ντα νας ατθάρ, σόσκε ο Ηρώδης μανγκέλα τι μουνταρέλ-τουτ». 32 Ντα βοβ βακερντάς λένγκε: «Τζαν ντα βακερέν κι αλεπού ανταγιά: “Νικαβάβα ι δαιμονέν ντα κεράβα λατσσές τζενέν αντιβές ντα γιαβίν, ντα κο τρίτος ντιβές κα μπιτισκιαράβ”. 33 Αλλά πρέπει τι συνεχίναβ μο ντρομ αντιβές, γιαβίν ντα οκουβά ντιβές, σόσκε να αβέλα-πες* τι μουνταρέν προφητής αβρί κατά Ιερουσαλήμ. 34 Ιερουσαλήμ, Ιερουσαλήμ, σο μουνταρέλα ι προφητέν ντα φουρτίνελα μπαρά οντουλένγκε σο μπουτσσάντιβενα λάτε! Καζόμ φαρ μανγκλόμ τι γκίνταβ τι τσσαβέν, σαρ γκίντελα η κχανί πι πιλιτσκέν τελάλ πι πακένταρ! Αλλά τουμέν να μανγκλέν-λες. 35 Ντικχέν! Τουμαρό κχερ* ο Ντεβέλ κα μουκχέλ-λες τσουτσό τουμέντε. Βακεράβα τουμένγκε, να κα ντικχέν-μαν μέχρι τι βακερέν: “Ευλογημέ ισί οντουβά σο αβέλα κο ναβ κι Ιεχωβάσκο!”»*