Ο Ευαγγέλιος σο Γραφιντάς ο Ματθαίος
19 Κάνα ο Ιησούς βακερντάς σαρέ ανταλά λάφια, νασλό κατά Γαλιλαία ντα αβιλό πασέ κι Ιουδαία κι γιαβέρ μπάντα κατά Ιορδάνης. 2 Ντα γκιλέ παλά-λέστε μπουτ τζενέ ντα κερντάς-λεν λατσσές οτθέ.
3 Ντα αβιλέ πασέ λέστε Φαρισαίοι σο μανγκένας τι δοκιμάνεν-λες ντα πουτσλέ-λες: «Ισί σωστός ο μουρς τι μουκχέλ πι ρομνιά σινανέ;» 4 Βοβ βακερντάς: «Να διαβαντέν ότι οντουβά σο λατσσαρντάς-λεν κι αρχή κερντάς-λεν μουρς ντα τζουβέλ 5 ντα βακερντάς: “Οντουλέσκε, ο τζενό κα μουκχέλ πι νταντές ντα πι νταγιά ντα κα ατσσόλ πασέ πι ρομνιάτε, ντα ο ντούι κα αβέν εκ σώμας”; 6 Αντικάς ακανά, νανέ ντούι, αλλά εκ σώμας. Οτθάρ, ανταβά σο κερντάς ο Ντεβέλ εκ, καέκ τζενό μα τι χωρίνελ-λες». 7 Βον πουτσλέ-λες: «Ντα σόσκε ο Μωυσής βακερντάς ότι κον μουκχέλα πι ρομνιά πρέπει τι ντελ-λα νόμιμος διαζύγιος;» 8 Βοβ βακερντάς λένγκε: «Ιτιρί τουμαρέ σουκέ γκίσταρ ο Μωυσής μουκχλάς-τουμέν τι ντεν διαζύγιος τουμαρέ ρομνίντε, αλλά κι αρχή να ισινέ αντικάς ο πράγματα. 9 Βακεράβα τουμένγκε ότι, κον μουκχέλα πι ρομνιά σο να κερντάς λουμνιπέ* ντα παντρίνελα γιαβεράσαρ, κερέλα λουμνιπέ οπράλ πι μπιαβέστε».*
10 Ο μαθητές βακερντέ λέσκε: «Άμα ισί αντικάς ο πράγματα αντρέ κο μπιαβ, πο λατσσές μα τι παντρίνελ εκ τζενό». 11 Βοβ βακερντάς λένγκε: «Να μουκχένα σαρέ τθαν πουμαρέ ζωγιάτε ανταλέ λαφίνγκε, αλλά σάντε οντουλά σο τθερένα ο χάρισμας. 12 Ισί τζενέ σο ναστί παντρίνενα σόσκε αντικάς μπιάντιλε. Γιαβερέν, ο τζενέ κερντέ-λεν μα τι μπορίνεν τι παντρίνεν. Ντα ισί τζενέ σο να παντρίνενα μάξους ι ουρανόσκε Βασιλειάκε. Κον μπορίνελα τι μουκχέλ τθαν πι ζωγιάτε ανταλέσκε, τι μουκχέλ».
13 Αζομάν αντέ χουρντέν λέστε για τι τσσουβέλ πο βαστά οπρά-λέντε ντα τι προσευχίντιβελ. Αλλά ο μαθητές ντινέ βίκος οπράλ κο τζενέ σο αντέ-λεν. 14 Ο Ιησούς όμως βακερντάς: «Μουκχέν ι χουρντέν τι αβέν μάντε ντα μα τσσιναβέν-λεν, σόσκε ασακέ τζενένγκε ισί η Βασιλεία ι ουρανόσκι». 15 Ντα τσσουντάς πο βαστά οπρά-λέντε ντα σοράν νασλό οτθάρ.
16 Αζομάν γκιλό πασέ λέστε εκ τζενό ντα βακερντάς: «Δάσκαλε, καλά λατσσέ πράγματα πρέπει τι κεράβ για τι τζουβντιάβ για πάντα;» 17 Βοβ βακερντάς λέσκε: «Σόσκε πουτσέσα-μαν σο ισί λατσσό; Σάντε ο Ντεβέλ ισί λατσσό. Άμα όμως μανγκέσα τι λες ι ζωή, τι ντες καν κο εντολές». 18 Βοβ πουτσλάς-λες: «Καλά εντολές;» Ο Ιησούς βακερντάς: «Μα μούνταρ, μα κερ λουμνιπέ οπράλ τι μπιαβέστε, μα τσορ, μα χούχαβ,* 19 σέβανε τι νταντές ντα τι νταγιά ντα μανγκ ι γιαβερέν* σαρ μανγκέσα τουτ». 20 Ο τερνό βακερντάς λέσκε: «Σαρέ ανταλά κεράβα-λεν. Σο γιαβέρ τι κεράβ;» 21 Ο Ιησούς βακερντάς λέσκε: «Άμα μανγκέσα τι αβές τέλειος,* τζα τι μπικινές οντουλά σο τθερέσα ντα ντε ο λοβέ κο τσορορέ, ντα κα τθερές θησαυρός κο ουρανός. Σοράν, έλα παλά-μάντε». 22 Κάνα ο τερνό ασουντάς-λες ανταβά, πφανγκιλό λέσκο γκι ντα νασλό, σόσκε ισινέ μπουτ χουλανό. 23 Αζομάν ο Ιησούς βακερντάς πι μαθητένγκε: «Μπαγιά βακεράβα τουμένγκε ότι κα αβέλ δύσκολος τι νακχέλ εκ χουλανό κι Βασιλεία κι ουρανόσκι. 24 Ντα βακεράβα τουμένγκε πάλι: Ισί πο εύκολος τι νακχέλ εκ γκαμήλα αντράλ κατά σουβ παρά εκ χουλανό κι Βασιλεία κι Ντεβλέσκι».
25 Κάνα ο μαθητές ασουντέ-λες ανταβά, σαστισάλε μπουτ ντα βακερντέ: «Άμα ισί αντικάς, κον κα σώντιβελ;» 26 Ο Ιησούς ντικχλάς-λεν κο γιακχά ντα βακερντάς λένγκε: «Ι τζενένγκε ανταβά να αβέλα-πες, αλλά ι Ντεβλέσκε σαρέ αβένα-πες».
27 Αζομάν ο Πέτρος βακερντάς: «Ντικχ! Αμέν μουκχλάμ-λεν σαρέ ντα αβιλάμ παλά-τούτε. Σο κα αβέλ-πες αμέντζαρ;» 28 Ο Ιησούς βακερντάς λένγκε: «Μπαγιά βακεράβα τουμένγκε: Ο Ντεβέλ κα κερέλ-λεν σαρέ νεβέ κάνα ο Τσσαβό ι τζενέσκο κα μπεσέλ πι μπαρέ θρονόστε. Αζομάν, τουμέν σο αβιλέν παλά-μάντε κα μπεσέν 12 θρονόντε ντα κα κρίνεν ο 12 φάρες ι Ισραηλίσκε. 29 Ντα κον μουκχλάς κχερά ή πφραλέν ή πφενίν ή νταντές ή νταγιά ή τσσαβέν ή χωράφια μάξους μι ναβέσκε κα λελ 100 φαρ πο μπουτ ντα κα ντιντιόλ-λες ζωή για πάντα.
30 »Αλλά μπουτ τζενέ σο ισί ανγκλάλ κα ατσσόν ντιπ παλάλ, ντα οντουλά σο ισί ντιπ παλάλ κα τζαν ανγκλάλ.