Ο Ευαγγέλιος σο Γραφιντάς ο Μάρκος
15 Κάνα ντισιλό, ο μπαρέ ιερείς ι πρεσβυτερόντζαρ ντα ι γραμματεόντζαρ, βα, σαρό ο Σάνχεδριν,* γκιντισάλε ντα κερντέ λάφι, πφαντέ ι Ιησούς, λιντέ-λες οτθάρ ντα ντινέ-λες κο Πιλάτος. 2 Ο Πιλάτος πουτσλάς-λες: «Τούι ισινάν ο βασιλιάς ι Ιουδαιόνγκο;» Βοβ βακερντάς: «Τούι κορκορό βακερέσα-λες». 3 Ντα ο μπαρέ ιερείς κατηγορίνενας-λες μπουτέ πραγματένγκε. 4 Ο Πιλάτος πουτσλάς-λες πάλι: «Να τθερέσα σο τι βακερές; Ντικχ καζόμ λάφια τσσουβένα τούκε». 5 Αλλά ο Ιησούς να κερέλας ιτς λάφι, ντα ο Πιλάτος ατσσιλό πουταρντέ μόσαρ.
6 Κάθε μπαρό ντιβές νικαβέλας λένγκε κατά φυλακή εκχέ τζενές, κας μανγκένας βον. 7 Αζομάν ισινέ εκ μουρς σο βακέρντιβελας Βαραββάς. Βοβ ντα ο γιαβερά σο ισινέ κι φυλακή λέσαρ γκιλέας κόντρα κο μπαρέ σορέ κι τθεμέσκε ντα μουνταρντέας. 8 Οτθάρ, ο λαός νικλιντάς ντα αρχισάλο τι μανγκέλ κατά Πιλάτος τι κερέλ οντουβά σο ισινέ σικλό τι κερέλ λένγκε. 9 Βοβ βακερντάς λένγκε: «Μανγκένα τι νικαβάβ τουμένγκε ι βασιλιάς ι Ιουδαιόνγκο;» 10 Ο Πιλάτος τζανέλας ότι ο μπαρέ ιερείς ντινέας-λες λέσκε βαστέντε σόσκε ζηλίνενας-λες. 11 Ο μπαρέ ιερείς, όμως, βακερένας κο λαός τι μανγκέν κατά Πιλάτος τι νικαβέλ λένγκε ι Βαραββάς ντα όχι ι Ιησούς. 12 Ο Πιλάτος βακερντάς λένγκε πάλι: «Ντα σο τι κεράβ ακαλές σο τουμέν ντένα-λες βίκος “βασιλιά ι Ιουδαιόνγκο”;» 13 Βον βακερντέ πάλι μπαρέ βικόσαρ: «Ιμπλάβ-λες κο κας!» 14 Αλλά ο Πιλάτος βακερντάς λένγκε: «Σόσκε; Σο γκεραλιπέ* κερντάς;» Ντα βον ντινέ βίκος ατζέ πο μπουτ: «Ιμπλάβ-λες κο κας!» 15 Αζομάν ο Πιλάτος, σο μανγκέλας τι κερέλ ο γκι ι λαόσκο, νικαντάς λένγκε ι Βαραββάς. Ντα αφού τσσουντάς τζενέν τι νταπέν βουρδαλόσαρ* ι Ιησούς, ντινάς-λες λέντε για τι ιμπλαβέν-λες κο κας.
16 Σοράν ο στρατιώτες γκερντέ-λες κι αυλή, αντρέ κο κχερ κι Πιλατόσκο, ντα γκιντιντέ σαρέ ι στρατιωτέν. 17 Ντα ιριαντέ-λες εκ μοβ σέι, ντα κχουντέ καντρέντζαρ εκ στέμμας ντα τσσουντέ-λες οπρά-λέστε. 18 Ντα αρχισάλε τι ντεν βίκος: «Γεια, βασιλιά ι Ιουδαιόνγκο!» 19 Ατζέ, τσαλαβένας λέσκο σορό εκχέ καλαμίσαρ ντα τσσουνγκιαρένας-λες ντα περένας κο κοτσά ντα προσκυνίνενας-λες. 20 Ντα αφού κχελντέ πουμένγκε λέσαρ, νικαντέ λέσταρ ο μοβ σέι ντα ιριαντέ-λες λέσκε αβραϊνέ σέα. Ντα γκερντέ-λες αβρί για τι ιμπλαβέν-λες κο κας. 21 Νακχέλας οτθάρ εκ τζενό, ο Σίμωνας κατά Κυρήνη, ο ντατ ι Αλεξανδρόσκο ντα ι Ρουφόσκο σο αβέλας αβριάλ κατά πόλη. Ανταλέ τζενές τσσουντέ-λες ζορίσαρ τι ακχαρέλ ο κας ι ντουκχένγκο.*
22 Ντα αντέ ι Ιησούς κο τθαν σο βακέρντιβελας Γολγοθάς, σο μανγκέλα τι βακερέλ «μουλικανό σορό». 23 Ντα ντένας-λες μολ σο τθερέλας αντρέ ναρκωτική σμύρνα, αλλά βοβ να πιλάς-λα. 24 Ντα ιμπλαντέ-λες κο κας ντα τσσουντέ κλήρος για τι ιλιαβέν λέσκε αβραϊνέ σέα, ντα αντικάς τι ντικχέν κον κα λελ σο. 25 Ισινέ πασέ 9:00 κο πρωί,* ντα ιμπλαντέ-λες κο κας. 26 Ντα η ταμπέλα σο βακερέλας σόσκε μουνταρντέ-λες γραφίνελας: «Ο βασιλιάς ι Ιουδαιόνγκο». 27 Ντα πασέ λέστε ιμπλαντέ κο καστά ντουέ τσορέν,* εκχές δεξιά ντα εκχές αριστερά. 28 —— 29 Ο τζενέ σο νακχένας οτθάρ κουσένας-λες, κουνιαβένας πουμαρό σορό ντα βακερένας: «Ε! Τούι σο κα περαβέας ο ναός ντα κα λατσσαρέας-λες αντρέ τρινέ ντιβεσέντε, 30 σώνε-τουτ ντα γούλι κατά ντουκχένγκο κας».* 31 Κχελένας πουμένγκε λέσαρ ο μπαρέ ιερείς-ντα γιεκ ι γραμματεόντζαρ ντα βακερένας ο εκ κο γιαβέρ: «Γιαβερέν σωντάς-λεν. Πες ναστί σώνελα-πες! 32 Τι γουλίλ ακανά ο Χριστός, ο βασιλιάς ι Ισραηλίσκο, κατά ντουκχένγκο κας,* για τι ντικχάς ντα τι πακιάς». Ατζέ-ντα οντουλά σο ισινέ ιμπλαντέ κο καστά πασέ λέστε πρασάνας-λες.
33 Πασέ 12:00 κο μεσημέρι* πελό καρανίκι οπράλ σαρό κο τθεμ μέχρι πασέ 3:00 κο μεσημέρι.* 34 Ντα πασέ 3:00 κο μεσημέρι, ο Ιησούς ντινάς βίκος ζουρανές: «Ηλί, Ηλί, λαμά σαβαχθανί;» σο μανγκέλα τι βακερέλ: «Ντέβλα μου, Ντέβλα μου, σόσκε μουκχλάν-μαν;» 35 Ντα μερικοί σο ισινέ πασέ, κάνα ασουντέ-λες ανταβά, αρχισάλε τι βακερέν: «Ντικχέν! Ντέλα βίκος ι Ηλιάς». 36 Αζομάν εκ τζενό τθαβντισάλο, σουσλιαρντάς εκ σφουγγάρι σουταλέ μολιάσαρ, τσσουντάς ο σφουγγάρι οπράλ εκχέ καλαμίστε, ντινάς-λες τι πιλ ντα βακερντάς: «Μουκχέν τι ντικχάς άμα κα αβέλ ο Ηλίας τι γουλιαρέλ-λες». 37 Ο Ιησούς ντινάς βίκος ζουρανές ντα μουλό.* 38 Ντα η κουρτίνα ι ναόσκι πφαράντιλι κο ντούι, οπράλ μέχρι τελέ. 39 Κάνα ο αρχηγός ι στρατόσκο σο ισινέ απέναντι λέσταρ ντικχλάς σο αβιλό-πες κάνα μουλό, βακερντάς: «Ανταβά τζενό ισινέ μπαγιά Τσσαβό ι Ντεβλέσκο».
40 Ισινέ οτθέ τζουβλιά-ντα σο ντικχένας ντουράλ. Λέντζαρ ισινέ εμ η Μαρία η Μαγδαληνή εμ η Μαρία, σο λάκε τσσαβέ ισινέ ο Ιάκωβος ο Χουρντό ντα ο Ιωσής, εμ η Σαλώμη. 41 Ανταλά τζουβλιά γκιλέας παλά-λέστε ντα υπηρετίνενας-λες κάνα βοβ ισινέ κι Γαλιλαία. Ντα ισινέ μπουτ γιαβερά-ντα τζουβλιά σο αβιλέας λέσαρ κι Ιερουσαλήμ.
42 Επειδή ισινέ απόγευμας ντα Προετοιμασία,* δηλαδή εκ ντιβές πο ανγκλάλ κατά Σάββατος, 43 αβιλό ο Ιωσήφ, σο ισινέ κατά Αριμαθαία ντα τθερέλας μπαρί θέση αντρέ κο Σάνχεδριν,* σο βοβ-ντα μπεσέλας ι Ντεβλέσκε Βασιλειάκε. Ανταβά τζενό να νταρασάλο τι τζαλ ανγκλάλ κο Πιλάτος ντα τι μανγκέλ ο σώμας ι Ιησούσκο. 44 Αλλά ο Πιλάτος μανγκέλας τι τζανέλ άμα ο Ιησούς ισινέ μουλό μπίλιμα, οτθάρ ντινάς βίκος ι αρχηγός ι στρατόσκο ντα πουτσλάς-λες άμα μουλόας. 45 Κάνα ο αρχηγός ι στρατόσκο βακερντάς λέσκε ότι μπαγιά αντικάς ισινέ, ντινάς ο σώμας ι Ιησούσκο κο Ιωσήφ. 46 Βοβ κιντάς εκ μπουτ λατσσό λινός κοτόρ, γουλιαρντάς ι Ιησούς, πακιαρντάς-λες οντουλέσαρ ντα τσσουντάς-λες εκχέ μεζαρίστε* σο ισινέ χαντζουντό κο βες. Σοράν ταρτιντάς εκ μπαρ ανγκλάλ κο μεζάρι. 47 Αλλά η Μαρία η Μαγδαληνή ντα η Μαρία, σο λάκο τσσαβό ισινέ ο Ιωσής, ντικχένας κάι τσσουντέας-λες.