Πράξεις ι Αποστολόνγκε
8 Ο Σαύλος τσσίντελας οντουλένταρ σο μουνταρντέ-λες.
Οντουβά ντιβές γκιλέ μπαρί κόντρα ι κχανγκιριάσαρ σο ισινέ κι Ιερουσαλήμ. Σαρέ, εκτός κατά απόστολοι, τρουγισάλε κι Ιουδαία ντα κι Σαμάρεια. 2 Αλλά μουρσά σο νταρένας κατά Ντεβέλ γκερντέ ι Στεφανός τι πραχούνεν-λες ντα ροντέ μπουτ λέσκε. 3 Ο Σαύλος κερέλας σο νακχέλας λέσκε βαστένταρ για τι καταστραφίνελ ι κχανγκιρί. Τσσουβέλας-πες κο εκ κχερ παλάλ κατά γιαβέρ, τσσίντελας αβρί μουρσέν ντα τζουβλίν ντα τσσουβέλας-λεν κι φυλακή.
4 Όμως, οντουλά σο τρουγισάλεας τζάνας τθαν τθανέστε ντα μουτθαβένας ο λατσσέ αμπέρια ι Ντεβλέσκερε. 5 Ο Φίλιππος γουλίστιλο κι πόλη* Σαμάρεια ντα βακερέλας λένγκε ι Χριστόσκε. 6 Μπουτ τζενέ ντένας καν σαρέ γιεκ οντουλέντε σο βακερέλας ο Φίλιππος, καζόμ ασουνένας ντα ντικχένας ο θαύματα σο κερέλας. 7 Σόσκε μπουτ τζενέ τθερένας δαιμονέν, ντα ο δαίμονες ντένας βίκος ζουρανές ντα νικιόνας λένταρ. Ατζέ, μπουτ μπανγκέ ντα τζενέ σο ναστί πφιρένας αβένας λατσσές. 8 Οτθάρ, οντιά πόλη λιντάς μπαρί χαρά.
9 Οτθέ ισινέ εκ τζενό σο βακέρντιβελας Σίμωνας σο πο τζανγκλέ κερέλας μαγικά πράγματα ντα μουκχέλας ι Σαμαρειτέν πουταρντέ μόσαρ. Ατζέ, κερέλας-πες μπουτ σημαντικός. 10 Σαρέ, χουρντέ μπαρέ, τθερένας-λες μπουτ οπρέ ντα βακερένας: «Ανταβά τζενό ισί ι Ντεβλέσκι Ζορ, σο βακέρντιβελα Μπαρί». 11 Βοβ για μπουτ βακίτι κερέλας μαγικά πράγματα, ντα βον ατσσόνας πουταρντέ μόσαρ. Οτθάρ-ντα τθερένας-λες μπουτ οπρέ. 12 Αλλά κάνα πακιαντέ ι Φιλιππός, σο μουτθαβέλας ο λατσσέ αμπέρια σο τθερένας τι κερέν ι Ντεβλέσκε Βασιλειάσαρ ντα ι Ιησού Χριστόσκε ναβέσαρ, μπολντιόνας μουρσά ντα τζουβλιά. 13 Πακιαντάς εμ ο Σίμωνας ντα σοράν πι μπολντιμάσταρ ισινέ πασέ κο Φίλιππος. Ντα ατσσόλας πουταρντέ μόσαρ κάνα ντικχέλας ο σημάδια ντα ο μπαρέ θαύματα σο αβένας-πες.
14 Κάνα ο απόστολοι κι Ιερουσαλήμ ασουντέ ότι κι Σαμάρεια δεχτιντέας ο λάφι ι Ντεβλέσκο, μπουτσσαντέ λένγκε ι Πετρός ντα ι Ιωαννής. 15 Ντα βον γουλίστιλε ντα προσευχισάλε λένγκε για τι λεν άγιος πνεύμας. 16 Σόσκε καέκ λένταρ να λιντάας-λες ατζέκ, αλλά σάντε μπολντιλέας κο ναβ κι Κυριόσκο κι Ιησούσκο. 17 Αζομάν τσσουβένας πουμαρέ βαστά οπρά-λέντε, ντα βον αρχισάλε τι λεν άγιος πνεύμας.
18 Ο Σίμωνας ντικχλάς ότι βον λένας ο πνεύμας κάνα ο απόστολοι τσσουβένας πουμαρέ βαστά οπρά-λέντε, οτθάρ μανγκλάς τι ντελ κο απόστολοι λοβέ 19 ντα βακερντάς: «Ντεν μάντε-ντα ανταγιά ζορ, ντα αντικάς κάστε τσσουβάβα μο βαστά τι λελ άγιος πνεύμας». 20 Ο Πέτρος όμως βακερντάς λέσκε: «Το ασήμι τι χασάρντιβελ γιεκ τούσαρ, σόσκε αμντισάλαν ότι μπορίνεσα τι λες ο δώρος ι Ντεβλέσκο λοβέντζαρ. 21 Να τθερέσα καέκ μπουτί ανταλέσαρ, σόσκε το γκι νανέ πάκι κο γιακχά κι Ντεβλέσκε. 22 Οτθάρ, μετάνιωνε τι αμαρτιάκε ντα μόλινε* ι Ιεχωβάς* για τι συγχωρίντιβελ ο πφιρνιπέ* σο τθερέσα τι γκίστε, άμα αβέλα-πες. 23 Σόσκε ντικχάβα ότι ισινάν κερκό δηλητήριος ντα δούλος ι αμαρτιάκο». 24 Ο Σίμωνας βακερντάς λένγκε: «Τουμέν μολίνεν* ι Ιεχωβάς* μάνγκε για μα τι αρακχέλ-μαν τίποτα οντουλένταρ σο βακερντέν».
25 Κάνα βακερντέ ι Ιεχωβάσκο* λάφι ντα μουτθαντέ-λες ντιπ λατσσές, λιντέ ο ντρομ σο βουρτίνελας κι Ιερουσαλήμ ντα μουτθαβένας ο λατσσέ αμπέρια μπουτέ γκαβέντε κι Σαμάρεια.
26 Ντα εκ άγγελος ι Ιεχωβάσκο* βακερντάς κο Φίλιππος: «Ίστι ντα τζα τελέ κο ντρομ σο γουλίλα κατά Ιερουσαλήμ κι Γάζα». (Ανταβά ντρομ ισί κι ερημιά.) 27 Αζομάν βοβ ιστίντιλο ντα γκιλό. Ντα αρακχλάς εκχέ Αιθιοπάς σο τθερέλας εμ μπαρί θέση εμ ζορ ντα ντέλας καν κι Κανδάκη, κι βασίλισσα κι Αιθιοπόνγκι, ντα αρακχαβέλας σαρέ λάκε λοβέ. Βοβ γκιλόας κι Ιερουσαλήμ για τι ντελ λατρεία 28 ντα καζόμ βουρτίνελας πι αμαξάσαρ, διαβάνελας ζουρανές κατά προφήτης Ησαΐας. 29 Οτθάρ, ο πνεύμας βακερντάς κο Φίλιππος: «Τζα πασέ ακαλέ αμαξάτε». 30 Ο Φίλιππος τθαβντισάλο πασέ κι άμαξα ντα ασουντάς-λες τι διαβάνελ ζουρανές κατά προφήτης Ησαΐας ντα πουτσλάς: «Αγαβέσα μπαγιά οντουλά σο διαβάνεσα;» 31 Βοβ βακερντάς: «Σαρ κα αγαβάβ-λεν άμα να κα σικαβέλ μάνγκε εκ τζενό;» Οτθάρ, βακερντάς ι Φιλιππόσκε τι νικλίλ ντα τι μπεσέλ λέσαρ. 32 Ο λάφια σο διαβάνελας κατά Γραφή ισινέ ακαλά: «Σαρ μπρακό γκερντέ-λες τι τσσινέν-λες, ντα σαρ μπρακό σο να μπασέλα ανγκλάλ κο τζενό σο τσσινέλα λέσκε μπαλά, αντικάς βοβ-ντα να πουτρέλα πο μούι. 33 Κάνα ανένας λέσκε λατζ, να μανγκλέ τι κρίνεν-λες δίκαια. Κον κα βακερέλ ντιπ λατσσές κατάρ αστάρντιβελα; Επειδή λέσκι ζωή χασάρντιβελα κατά πφουβ».
34 Αζομάν ο τζενό σο τθερέλας μπαρί θέση βακερντάς κο Φίλιππος: «Μολίναβα-τουτ, βάκερ μάνγκε, κάσκε βακερέλα-λες ανταβά ο προφήτης; Πέσκε ή γιαβερέσκε;» 35 Ο Φίλιππος αρχισάλο τι κερέλ λάφι ανταλέ προφητειάκε ντα μουτθαντάς λέσκε ο λατσσέ αμπέρια σο τθερένας τι κερέν ι Ιησούσαρ. 36 Καζόμ τζάνας, ερεσλέ εκχέ τθανέστε σο τθερέλας πανί, ντα ο τζενό βακερντάς: «Ντικχ! Πανί! Σο τσσιναβέλα-μαν τι μπολντιάβ;» 37 —— 38 Αζομάν βακερντάς τι ατσσόλ χάνικ η άμαξα, ντα ο Φίλιππος ι τζενέσαρ γουλίστιλε ο ντούι-ντα κο πανί, ντα ο Φίλιππος μπολντάς-λες. 39 Κάνα νικλιντέ κατά πανί, ο πνεύμας ι Ιεχωβάσκο* λιντάς σουγκό ι Φιλιππός ντουρ, ντα ο τζενό να ντικχέλας-λες, αλλά συνεχιντάς πο ντρομ χαρούμενος. 40 Όμως, ο Φίλιππος γκιλό κι Άζωτος, ντα καζόμ νακχέλας οντουλέ τθεμέσταρ, μουτθαβέλας ο λατσσέ αμπέρια σαρέ κο πόλεις, μέχρι σο ερεσλό κι Καισάρεια.