Πράξεις ι Αποστολόνγκε
19 Κάνα ο Απολλώς ισινέ κι Κόρινθος, ο Παύλος νακχλό βεσένταρ ντα γουλίστιλο κι Έφεσος. Οτθέ αρακχλάς μερικέ μαθητέν 2 ντα πουτσλάς-λεν: «Λιντέν άγιος πνεύμας κάνα πακιαντέν;» Βον βακερντέ λέσκε: «Να ασουντάμ ποτές ι άγιε πνευμάσκε». 3 Αζομάν βοβ βακερντάς λένγκε: «Ντα καλέ μπολντιμάσαρ μπολντιλέν;» Βον βακερντέ: «Ι Ιωαννίσκε μπολντιμάσαρ». 4 Ο Παύλος βακερντάς: «Ο Ιωάννης μπολντάς ι μπολντιμάσαρ σο σικαβέλας ότι ο τζενέ μετανιωσάλεας ντα βακερέλας κο λαός τι πακιάν οντουλέστε σο αβέλας παλά-λέσταρ, δηλαδή κο Ιησούς». 5 Κάνα ασουντέ-λες ανταβά, μπολντιλέ κο ναβ κι Κυριόσκο κι Ιησούσκο. 6 Ντα κάνα ο Παύλος τσσουντάς πο βαστά οπρά-λέντε, ο άγιος πνεύμας αβιλό οπρά-λέντε ντα αρχισάλε τι κερέν λάφι γιαβερέ τσσιμπέντε ντα τι βακερέν προφητείες. 7 Σαρέ γιεκ ισινέ πασέ 12 μουρσά.
8 Τριν μασεκά τζάλας κι συναγωγή ντα κερέλας λάφι μπίνταρανες, κερέλας ομιλίες ντα γκοντιαβέρ λαφίντζαρ κερέλας ι τζενέν τι πακιάν κι Βασιλεία κι Ντεβλέσκι. 9 Αλλά μερικοί ισινέ πφαρέ σορέσκε ντα να μανγκένας τι πακιάν ντα βακερένας μπέτι λάφια ι Ντεβλέσκε Ντρομέσκε ανγκλάλ κο μπουτ τζενέ. Οτθάρ, τσσιντιντάς-πες ντουρ λένταρ, λιντάς ι μαθητέν πέσαρ ντα κερέλας κάθε ντιβές ομιλίες κι σχολή σο τθερέλας ο Τύραννος. 10 Ανταβά αβέλας-πες ντούι μπρεσά, ντα αντικάς σαρέ οντουλά σο μπεσένας κι Ασία* ασουντέ ο λάφι ι Κυριόσκο, εμ Ιουδαίοι εμ Μπαλαμέ.
11 Ντα ο Ντεβέλ αντράλ κατά Παύλος κερέλας μπαρέ θαύματα. 12 Οτθάρ-ντα ανένας κο νασφαλέ* ατζέ-ντα κοτορά ντα ποδιές σο τσσουντάας οπρά-πέστε, ντα ο νασφαλίματα νασένας λένταρ, ντα ο δαίμονες νικιόνας λένταρ. 13 Αλλά μερικοί Ιουδαίοι σο τζάνας τθαν τθανέστε ντα νικαβένας ι δαιμονέν ντένας βίκος βον-ντα ο ναβ ι Κυριόσκο ι Ιησούσκο για τι νικαβέν ι δαιμονέν ντα βακερένας: «Ντάβα-τουμέν διαταγή αντράλ κατά Ιησούς, σο λέσκε κερέλα λάφι κο τζενέ ο Παύλος». 14 Εκ μπαρό ιερέας σο ισινέ Ιουδαίος ντα βακέρντιβελας Σκευάς τθερέλας εφτά τσσαβέν σο κερένας-λες ανταβά. 15 Αλλά ο δαίμονας βακερντάς λένγκε: «Τζανάβα ι Ιησούς ντα ι Παυλός, αλλά τουμέν κον ισινέν;» 16 Αζομάν ο δαιμονισμέ τζενό γκιλό ούρια οπρά-λέντε, περαντάς τελέ σαριλέν σόσκε ισινέ πο ζουρανό λένταρ, ντα βον νασλέ οντουλέ κχερέσταρ νανγκέ ντα ντινέ.* 17 Ανταβά λιντέ-λες αμπέρι σαρέ οντουλά σο μπεσένας κι Έφεσος, εμ Ιουδαίοι εμ Μπαλαμέ. Ντα πελί νταρ οπράλ σαριλέντε, ντα ο ναβ ι Κυριόσκο ι Ιησούσκο δοξάντιβελας. 18 Ντα μπουτ οντουλένταρ σο πακιαντέας αβένας ντα μουτθαβένας ανγκλάλ κο τζενέ οντουλά σο κερντέας. 19 Μπουτ τζενέ σο κερένας μαγικά πράγματα γκιντιντέ πουμαρέ βιβλία ντα πφαμπαρντέ-λεν ανγκλάλ σαριλέντε. Ντα αρακχλέ ότι κερένας 50 χιλιάδες ασημένια κέρματα. 20 Αντικάς ο λάφι ι Ιεχωβάσκο* λιντιόλας αμπέρι ατζέ πο μπουτ ντα αβέλας πο ζουρανό.
21 Σοράν ανταλένταρ, ο Παύλος λιντάς ι απόφαση τι νακχέλ κατά Μακεδονία ντα κατά Αχαΐα ντα σοράν τι τζαλ κι Ιερουσαλήμ. Ντα βακερντάς: «Σοράν κατά Ιερουσαλήμ, πρέπει τι τζαβ κι Ρώμη-ντα». 22 Οτθάρ, μπουτσσαντάς κι Μακεδονία ντουέ τζενέν σο βοηθίνενας-λες, ι Τιμοθεός ντα ι Εραστός, αλλά βοβ μπεσλό χάνικ βακίτι κι Ασία.*
23 Οντουβά βακίτι αβιλί-πες μπουτ βαβούρα ι Ντεβλέσκε Ντρομέσκε. 24 Ανταβά αβιλό-πες ιτιρί εκχέ τζενέσταρ σο βακέρντιβελας Δημήτριος, ντα κερέλας κατά ασήμι ντιπ χουρντέ ναούς σο μοιάζενας κο ναός σο τθερέλας η Άρτεμις. Λέσταρ οντουλά σο κερένας ι ίδια μπουτί νικαβένας μπουτ λοβέ. 25 Ο Δημήτριος γκιντιντάς ανταλέ τζενέν ντα οντουλέν σο κερένας ασακέ μπουτιά ντα βακερντάς: «Μουρσάλεν, τζανένα λατσσές ότι νικαβάσα μπουτ λοβέ ανταλέ μπουτιάταρ. 26 Ακανά ντικχένα ντα ασουνένα ότι, όχι σάντε κι Έφεσος, αλλά σχεδόν σαρί κι Ασία,* ανταβά Παύλος αλλαντάς ι γκοντί μπουτέ τζενένγκι, σόσκε βακερέλα ότι ο κάθε ντεβέλ σο κερντιόλα τζενένγκε βαστένταρ νανέ αληθινός ντεβέλ. 27 Άμα κα μουκχάς-λες αντικάς ανταβά, κα πρασάν αμαρί μπουτί, ντα κα ντικχίντιβελ ότι να αξίνελα ο ναός σο τθερέλα η μπαρί Άρτεμις ντα να κα ντεν λάτε ι μπαρί λατρεία σο ντένα-λα σαρί κι Ασία* ντα σαρί κι πφουβ». 28 Κάνα ασουντέ-λεν ανταλά, πφερντιλέ χολί ντα ντένας βίκος ζουρανές: «Μπαρί ισί η Άρτεμις σο τθερένα ο Εφέσιοι!»
29 Αβιλί-πες μπαρί βαβούρα σαρί κι πόλη, ντα καζόμ τζάνας σαρέ γιεκ φοράσαρ κο θέατρος, ταρτιντέ πουμέντζαρ ι Γαϊός ντα ι Αρισταρχός. Βον ισινέ Μακεδόνες σο τζάνας γιεκ ι Παυλόσαρ. 30 Ο Παύλος μανγκέλας τι τζαλ τι κερέλ λάφι κο λαός, αλλά ο μαθητές να μουκχένας-λες. 31 Ατζέ-ντα μερικοί λέσκε αμαλένταρ,* σο οργανώνενας ο μπαρέ ντιβεσά ντα ο αγώνες, μπουτσσαντέ λέσκε αμπέρι ντα μολιντέ-λες μα τι τζαλ κο θέατρος για μα τι αβέλ-πες λέσκε καέκ ζιάνι. 32 Οτθέ, ο τζενέ ντένας βίκος ζουρανές, αλλά γιαβερά βακερέλας ο εκ ντα γιαβερά ο γιαβέρ, σόσκε αβέλας-πες μπαρί βαβούρα, ντα ο πο μπουτ να τζανένας σόσκε γκιντισάλεας. 33 Οτθάρ, νικαντέ αντράλ κατά τζενέ ι Αλεξανδρός, σο ταρτιντέ-λες* ο Ιουδαίοι για τι τσσουβέν-λες ανγκλάλ, ντα ο Αλέξανδρος κερντάς νόημας πι βαστέσαρ για τι σικαβέλ ότι μανγκέλας τι κερέλ λάφι κο λαός. 34 Αλλά κάνα αγαντέ ότι ισινέ Ιουδαίος, ντένας βίκος ζουρανές σαρέ γιεκ πασέ ντούι σαάτια ντα βακερένας: «Μπαρί ισί η Άρτεμις σο τθερένα ο Εφέσιοι!»
35 Κάνα ο γραμματέας ι πολιάκο ηρεμιντάς ι τζενέν, βακερντάς: «Μουρσάλεν κατά Έφεσος, ισί καέκ τζενό σο να τζανέλα ότι αμέν σο μπεσάσα κι Έφεσος αρακχαβάσα εμ ο ναός σο τθερέλα η μπαρί Άρτεμις εμ ο άγαλμας σο πελό κατά ουρανός; 36 Αφού τζανάσα μπουτ λατσσές ότι αντικάς ισί, πρέπει τι ατσσόν ήρεμοι ντα μα τι κερέν κάτι χωρίς τι σκεφτίνεν-λες. 37 Αντέν ατθέ ανταλέ τζενέν σο να τσορένα ναούς ούτε τζάνα κόντρα πουμαρέ λαφίντζαρ αμαρέ ντεβλέστε. 38 Οτθάρ, άμα ο Δημήτριος ντα οντουλά σο κερένα ι ίδια μπουτί λέσαρ τθερένα κάτι μπαγιά εκχέ τζενέσκε, ισί ντιβεσά σο αβένα-πες ο δικαστήρια ντα τζενέ σο κερένα κουμάντος. Τι τζαν οτθέ τι κατηγορίνεν ο εκ ι γιαβερές. 39 Αλλά άμα τουμέν μανγκένα κάτι γιαβέρ, κα λιντιόλ απόφαση κάνα κα γκιντίντιβεν ο τζενέ ι πολιάκε αντικάς σαρ βακερέλα ο νόμος. 40 Ιτιρί ανταλέσταρ σο αβιλό-πες αντιβές μπορεί τι κατηγορίντιβας ότι τζάσα κόντρα κο μπαρέ σορέ, σόσκε να τθεράσα σο τι βακεράς ανταλέ βαβουράκε σο αβιλί-πες αντρέ κο λαός». 41 Ντα σοράν ανταλέ λαφίνταρ, βακερντάς ι τζενένγκε τι νασέν.