Γράμμας σο Μπουτσσάντιλο κο Ρωμαίοι
11 Οτθάρ πουτσάβα: Κερντάς ο Ντεβέλ πέρα πι λαός; Σίγουρα όχι! Με-ντα Ισραηλίτης ισινόμ, προσάγγονος ι Αβρααμίσκο, κατά φάρα Βενιαμίν. 2 Ο Ντεβέλ να κερντάς πέρα πι λαός σο τραμπιντάς κι αρχή. Να τζανένα σο βακερέλα η Γραφή ι Ηλιάσκε; Ο Ηλίας προσευχίντιβελα κο Ντεβέλ ντα τθερέλα τι βακερέλ λέσκε μπουτ ι Ισραηλίσκε. Βακερέλα: 3 «Ιεχωβά,* βον μουνταρντέ τι προφητέν ντα πφανγκλέ το θυσιαστήρια. Σάντε με ατσσιλόμ, ντα ακανά μανγκένα τι μουνταρέν-μαν». 4 Αλλά σο βακερέλα λέσκε ο Ντεβέλ; «Μουκχλόμ μάνγκε εφτά χιλιάδες μουρσέν σο να πελέ τελέ κοτσίντζαρ για τι ντεν λατρεία κο Βάαλ». 5 Αντικάς ακανά-ντα, ισί εκ χουρντί ομάδα τζενένγκι σο τραμπίντιλε αντράλ κατά μπαρό λατσσιπέ ι Ντεβλέσκο. 6 Άρα, ανταβά μανγκέλα τι βακερέλ ότι τραμπιντάς-λεν πι μπαρέ λατσσιμάσταρ, ντα όχι οντουλένταρ σο κερντέ. Άμα κα τραμπίντιβενας οντουλένταρ σο κερντέ, ανταβά να κα αβέλας μπαρό λατσσιπέ κατά Ντεβέλ.
7 Οτθάρ, σο μπορίνασα τι βακεράς; Ο λαός Ισραήλ να λιντάς οντουβά σο μανγκέλας μπουτ τι λελ. Οντουλά χάνικ σο τραμπίντιλε λιντέ-λες. Ο γιαβερά να μανγκλέ τι ασουνέν. 8 Σαρ ισί γραμμέ: «Ο Ντεβέλ τσσουντάς-λεν τι σοβέν πφαρές ντα ντινάς-λεν γιακχά για μα τι ντικχέν ντα κανά για μα τι ασουνέν μέχρι ανταβά ντιβές». 9 Ντα ο Δαβίδ βακερέλα: «Τι αβέλ λένγκο τραπέζι παγίδα, ντα αντικάς τι περέν ντα τι τιμωρίντιβεν. 10 Τι κορόλιβεν λένγκε γιακχά για μα τι ντικχέν, ντα τι βάντεν πάντα οπρά-πουμέντε μπαρό πφαριπέ».
11 Οτθάρ πουτσάβα: Πελέ τελέ ντα να κα ιστίν πάλι οπρέ; Σίγουρα όχι! Αλλά λένγκε αμαρτιάταρ, ο τζενέ σο ισί γιαβερέ τθεμένταρ σώντιβενα, ντα ανταβά κερέλα ι Ιουδαιόν τι ζηλίνεν. 12 Επειδή αμαρτιντέ, ο ντουνιάς χουλάνιλο ντα επειδή ατσσιλέ χάνικ, ο τζενέ σο ισί γιαβερέ τθεμένταρ χουλάνιλε ατζέ πο μπουτ. Άρα, η ευλογία κα αβέλ ατζέ πο μπαρί κάνα κα γκιντίντιβεν σαρέ γιεκ!
13 Ακανά με κεράβα λάφι τουμέντζαρ σο ισινέν γιαβερέ τθεμένταρ. Ντικχάβα ότι ισινόμ απόστολος ι τθεμένγκο, οτθάρ εκτιμίναβα μπουτ ι υπηρεσία σο ντάβα κο Ντεβέλ. 14 Ντα πακιάβα ότι εκχέ τροπόσαρ μπέκιμ τι κεράβ μι λαός τι ζηλίνελ ντα τι σώναβ μερικέν λένταρ. 15 Ο Ντεβέλ κερντάς-λεν πέρα, ντα ανταβά πουταρντάς ο ντρομ σαρέ ι ντουνιάσκε για τι αβέν αμαλά* ι Ντεβλέσαρ. Άμα ισί αντικάς, κάνα ο Ντεβέλ κα δεχτίνελ-λεν παλάλ, κα αβέλ σαρ τι βουρτισάλε κατά μεριπέ ντα τι λιντέ ζωή. 16 Ντα άμα ισί άγιος ο κομμάτι κατά χουμέρ σο λιντιλό κατά πρώτα πράγματα* σο γκιντίντιλε κατά χωράφι, σαρό ο χουμέρ-ντα ισί άγιος. Ντα άμα ισί άγια η ρίζα ι δεντρόσκι, ο κλαδιά-ντα ισί άγια.
17 Όμως, ο Ντεβέλ τσσιντάς μερικά κλαδιά κατά δέντρος. Ντα αζομάν τσσουβντιλάν* κο δέντρος για τι αβές γιεκ ι γιαβερέ κλαδίντζαρ παρόλο σο ισινάν άγρια ζιτιλίν. Ακανά λέσα τούι-ντα ο χουλανιπέ κατά ρίζα ι ζιτιλινάκι. 18 Αλλά μα τι αμντίνες ότι ισινάν πο λατσσό ανταλέ κλαδίνταρ. Άμα αμντίνεσα ότι ισινάν πο λατσσό, τι ντες-τουτ γκοντί ότι να ασταρέσα τούι ι ρίζα, η ρίζα ασταρέλα τουτ. 19 Μερικοί τουμένταρ κα βακερέν: «Γιαβερά κλαδιά τσσιντιλέ για τι τσσουβντιάβ* με». 20 Μπαγιά ισί ανταβά! Ανταλά τσσιντιλέ επειδή να τθερένας πίστη, αλλά τούι ατσσόσα οτθέ σο ισινάν επειδή τθερέσα πίστη. Οτθάρ μα τι αβές μπαρικανό, αλλά τι νταρές. 21 Άμα ο Ντεβέλ να ατσσικιαρντάς ο κανονικά κλαδιά, αμντίνεσα ότι κα τζιτζίνελ τούκε; 22 Μπορίνεσα τι ντικχές ότι ο Ντεβέλ ισί εμ λατσσό εμ αυστηρός. Ισί αυστηρός οντουλέντζαρ σο πελέ επειδή να τθερένας πίστη. Αλλά ο Ντεβέλ ισί λατσσό τούσαρ καζόμ τούι ατσσόσα λέσκε λατσσιμάστε. Άμα να κα κερές-λες ανταβά, κα τσσιντιός τούι-ντα κατά δέντρος. 23 Ντα άμα ο Ιουδαίοι κα σικαβέν πίστη, κα τσσουβντιόν κο δέντρος, σόσκε ο Ντεβέλ μπορίνελα τι τσσουβέλ-λεν* πάλι. 24 Άμα τούι τσσιντιλάν κατά άγρια ζιτιλίν ντα τσσουβντιλάν κι λατσσί ζιτιλίν τροπόσαρ σο νανέ κανονικός, καζόμ πο εύκολος κα αβέλ τι τσσουβντιόν* ο κανονικά κλαδιά πουμαρέ ζιτιλινάτε!
25 Πφραλάλεν, μανγκάβα τι τζανέν ανταβά γκεραντό πράγμας* για μα τι αμντίνεν ότι ισινέν γκοντιαβέρ: Μερικοί κατά Ισραήλ αβιλέ πφαρέ σορέσκε μέχρι τι γκιντίντιβεν σαρέ οντουλά σο τραμπίντιλε κατά γιαβερά τθεμά, 26 ντα αντικάς σαρό ο Ισραήλ κα σώντιβελ. Σαρ ισί γραμμέ: «Οντουβά σο σώνελα* κα αβέλ κατά Σιών ντα κα νασκιαρέλ ντουρ σαρό ο πφιρνιπέ* οντουλένταρ σο αστάρντιβενα κατά Ιακώβ. 27 Ντα ανταγιά κα αβέλ μι συμφωνία λέντζαρ, κάνα κα λαβ ντουρ λένγκε αμαρτίες». 28 Ισί μπαγιά ότι βον ισί ντουσμάνια* ι λατσσέ αμπερίνγκε, ντα ανταβά αντάς τουμένγκε λατσσιπέ. Αλλά ο Ντεβέλ τραμπιντάας-λεν ντα μανγκέλα-λεν μάξους λένγκε παππουδένγκε. 29 Ο Ντεβέλ να κα μετανιώνελ ι πραγματένγκε σο ντινάς δώρος ντα οντουλένγκε σο ντινάς-λεν βίκος. 30 Τουμέν να ντένας καν ι Ντεβλές, αλλά ακανά βοβ τζιτζίνελα* τουμένγκε επειδή ο Ιουδαίοι να ντένα καν. 31 Ακανά βον ισί οντουλά σο να ντένα καν, ντα ο Ντεβέλ τζιτζίνελα τουμένγκε. Αλλά λένγκε-ντα κα τζιτζίνελ σαρ τζιτζισάλο* τουμένγκε. 32 Επειδή να ντένα καν βον, ο Ντεβέλ μουκχλάς-λεν τι αβέν σαρ φυλακισμέ για τι τζιτζίνελ* σαριλένγκε.
33 Καζόμ μπαρό ισί ι Ντεβλέσκο χουλανιπέ! Βοβ ισί μπουτ γκοντιαβέρ ντα οντουλά σο τζανέλα να τθερένα όρια! Καέκ ναστί αγαβέλα ντιπ σαρ κρίνελα ντα καέκ ναστί τζανέλα λέσκε ντρομά! 34 Σόσκε «κον τζανέλα ι γκοντί ι Ιεχωβάσκι;* Ή κον κα βακερέλ λέσκε σο τι κερέλ;» 35 Ή «κον ντινάς πρώτα κάτι κο Ντεβέλ, ντα αντικάς τι ντελ-λες λέστε παλάλ ο Ντεβέλ;» 36 Επειδή λέσταρ ντα αντράλ λέσταρ ντα λέσκε ισί σαρέ ο πράγματα. Βοβ αξίνελα ι δόξα για πάντα. Αμήν.