Ο Ευαγγέλιος σο Γραφιντάς ο Λουκάς

12 Αζομάν γκιντισάλεας αζόμ χιλιάδες τζενέ σο ισταβένας ο εκ ι γιαβερές, ντα αρχισάλο τι βακερέλ πρώτα πι μαθητένγκε: «Τι αρακχαβέν-τουμέν κατά μαγιά ι Φαρισαιόνγκι, δηλαδή λένγκε ντουέ μουένταρ. 2 Αλλά σο-ντα ισί λατσσές γκεραντό κα λιντιόλ αμπέρι, ντα σο-ντα ισί μυστικός κα μουτθάντιβελ. 3 Οτθάρ, σο-ντα κα βακερέν κο καρανίκι κα ασούντιβελ κο φως, ντα σο-ντα κα βακερέν κο καν κι γιαβερέσκο αντρέ τουμαρέ δωματιόντε κα μουτθάντιβελ κατά νταράτσες. 4 Ντα βακεράβα τουμένγκε, σο ισινέν μο αμαλά:* Μα νταρέν οντουλένταρ σο μουνταρένα ο σώμας ντα σοράν ναστί κερένα πο μπουτ ανταλέσταρ. 5 Αλλά κα βακεράβ τουμένγκε κάσταρ τι νταρέν: Νταρέν Οντουλέσταρ σο τθερέλα ι ζορ τι μουνταρέλ ντα σοράν τι φουρτίνελ κι Γέεννα.* Βα, Λέσταρ τι νταρέν. 6 Να ντένα ο τζενέ χάνικ λοβέ* για τι κινέν παντζέ χουρντέ τσιρικλέν; Αλλά ο Ντεβέλ να μπιστρέλα ούτε εκ τανό ανταλένταρ.* 7 Βα, βοβ γκιντάς ατζέ-ντα τουμαρέ σορέσκε μπαλά. Μα νταρέν. Τουμέν τθερένα πο μπαρί αξία μπουτέ τσιρικλένταρ.

8 »Βακεράβα τουμένγκε: Κον κα βακερέλ ανγκλάλ κο τζενέ ότι ισί μο μαθητής, ο Τσσαβό ι τζενέσκο-ντα κα βακερέλ ανγκλάλ κι Ντεβλέσκε άγγελοι ότι ισί λέσκο μαθητής. 9 Αλλά κον κα βακερέλ ανγκλάλ κο τζενέ ότι νανέ μο μαθητής, κα βακεράβ ανγκλάλ κι Ντεβλέσκε άγγελοι ότι νανέ μο μαθητής. 10 Κον κα βακερέλ λάφι σο τζάλα κόντρα κο Τσσαβό κι τζενέσκο, κα συγχωρίντιβελ. Αλλά κον κα βακερέλ γκεραλέ λάφια* σο τζάνα κόντρα κο άγιος πνεύμας να κα συγχωρίντιβελ. 11 Κάνα κα ανέν-τουμέν ανγκλάλ μπουτέ τζενέντε,* ανγκλάλ οντουλέντε σο κερένα κουμάντος ντα ανγκλάλ οντουλέντε σο τθερένα ζορ, μα τι αγχώνεν σαρ κα κερέν λάφι ή σο κα βακερέν για τι αρακχαβέν τουμαρό νεαυτός, 12 σόσκε ο άγιος πνεύμας κα σικλιαρέλ-τουμέν οντουβά σαάτι ανταλά σο ισί τι βακερέν».

13 Σοράν εκ οντουλέ τζενένταρ σο ισινέ οτθέ βακερντάς λέσκε: «Δάσκαλε, βάκερ μι πφραλέσκε τι ιλιαβέλ ι κληρονομιά μάντζαρ». 14 Βοβ βακερντάς λέσκε: «Κον τσσουντάς-μαν τι βακεράβ κον τθερέλα δίκιος ντα σαρ κα ιλιάντιβελ τουμαρί κληρονομιά;» 15 Σοράν βακερντάς λένγκε: «Τι τθερέν πουταρντέ τουμαρέ γιακχά ντα τι αρακχαβέν-τουμέν για μα τι τθερέν μπίτσαλι γιακχ, σόσκε ατζέ-ντα κάνα εκ τζενό τθερέλα μπερεκέτι πράγματα, να ντένα-λες ζωή ανταλά». 16 Αζομάν βακερντάς λένγκε εκ παράδειγμας:* «Ο χωράφια εκχέ χουλανέσκε νικαντέ μπουτ καρποί. 17 Οτθάρ, οντουβά τζενό βακερέλας αντρά-πέσταρ: “Σο τι κεράβ ακανά σο να τθεράβα τθαν τι γκίνταβ-λεν σαρέ ανταλά;” 18 Αζομάν βακερντάς: “Άκ’ σο κα κεράβ: Κα περαβάβ μο αποθήκες ντα κα λατσσαράβ πο μπαρέ, ντα κα γκίνταβ οτθέ σαρέ μο γκιβά ντα σαρέ μο πράγματα 19 ντα κα βακεράβ μι νεαυτόσκε:* «Γκιντιντάν* τούκε μπερεκέτι πράγματα σο κα ατσσόν μπουτ μπρεσά. Μπες τούκε, χα, πι, νακχ λατσσές»”. 20 Αλλά ο Ντεβέλ βακερντάς λέσκε: “Να τσσινέλα τι γκοντί, ακαγιά ιράτ κα μερές.* Κάσκε κα ατσσόν ανταλά σο γκιντιντάν;” 21 Ανταβά αβέλα-πες οντουλέσαρ σο γκίντελα πέσκε θησαυρούς αλλά νανέ χουλανό κο γιακχά κι Ντεβλέσκε».

22 Σοράν βακερντάς πι μαθητένγκε: «Οτθάρ, βακεράβα τουμένγκε: Μα αγχώνεν πραγματένγκε σο τθερένα τι κερέν τουμαρέ ζωγιάσαρ* ντα τουμαρέ σωμάσαρ, σαρ ισί ο χαμπέ ντα ο ιριαϊπέ. 23 Σόσκε η ζωή* ισί πο σημαντική κατά χαμπέ ντα ο σώμας πο σημαντικός κατά σέα. 24 Σκεφτίνεν ι τσιρικλέν:* Να σπειρίνενα ούτε γκίντενα ντα να τθερένα αποθήκη, όμως ο Ντεβέλ ντέλα-λεν τι χαν. Να ισινέν τουμέν μπουτ πο σημαντικοί κατά τσιρικλέ; 25 Κον τουμένταρ, άμα αγχώνελα, μπορίνελα τι κερέλ-πες τι τζουβντιόλ εκ στάλα ατζέκ; 26 Οτθάρ, άμα ναστί κερένα ανταβά μπουτ χουρντό πράγμας, σόσκε τι αγχώνεν ι γιαβερέ πραγματένγκε; 27 Σκεφτίνεν σαρ μπαριόνα ο λουλούδια: Να μαρένα-πες ούτε κχουβένα σέα. Αλλά βακεράβα τουμένγκε ότι ατζέ-ντα ο Σολομώντας σαρέ πι χουλανιμάσαρ να ισινέ ζουζιμέ σαρ εκ τανό ανταλένταρ. 28 Άμα αντικάς ιριαβέλα ο Ντεβέλ ανταλά φυτά, σο αντιβές ισί ατθέ ντα γιαβίν φουρτίνενα-λεν κι γιακ,* καζόμ πο μπουτ κα ιριαβέλ τουμέν! Σο χουρντί ισί τουμαρί πίστη! 29 Οτθάρ, μα αγχώνεν ι χαμπέσκε ντα ι πανίσκε ντα μα τσσουβέν τουμαρέ γκίστε, 30 σόσκε σαρέ ανταλά πράγματα μανγκένα μπουτ τι τθερέν-λεν ο τζενέ σο ισί γιαβερέ τθεμένταρ, αλλά τουμαρό Ντατ τζανέλα ότι τθερένα-λεν ανάγκη ανταλά. 31 Οκιά μπάνταρ, συνεχίνεν τι τσσουβέν πο ανγκλάλ σαριλένταρ ι Βασιλεία ι Ντεβλέσκι, ντα ανταλά πράγματα κα ντιντιόν-τουμέν.

32 »Μα ντάρα, χουρντό κοπάδι, σόσκε τουμαρό Ντατ μανγκλάς σαρέ πι γκίσαρ τι ντελ-τουμέν ι Βασιλεία. 33 Μπικινέν οντουλά σο τθερένα ντα κερέν λατσσιπέ ι τσορορένγκε. Κερέν κισιά σο να πουράνιβενα, θησαυρός κο ουρανός σο ποτές να χασάρντιβελα. Οτθέ, να τζάλα καέκ τσορ* ντα νανέ σκόρος για τι καταστραφίνελ. 34 Σόσκε κάι ισί τουμαρό θησαυρός, οτθέ κα αβέλ τουμαρό γκι-ντα.

35 »Τι αβέν ιριαντέ ντα έτοιμοι, ντα τουμαρέ λυχνάρια τι πφαμπόν.* 36 Ατζέ, τι αβέν σαρ ο τζενέ σο μπεσένα τι βουρτίνελ λένγκο κύριος κατά μπιαβ, ντα αντικάς κάνα κα αβέλ ντα κα μπασκιαρέλ, τι πουτρέν λέσκε σουγκό. 37 Ευτυχισμέ ισί ο δούλοι σο κα αρακχέλ-λεν λένγκο κύριος τζανγκαντέ κάνα κα αβέλ! Μπαγιά βακεράβα τουμένγκε: Κα ιρίλ σέα μπουτιάκε ντα κα τσσουβέλ πι δουλόν τι μπεσέν* κο τραπέζι ντα κα αβέλ πασέ λέντε ντα κα υπηρετίνελ-λεν. 38 Ντα άμα κα αβέλ αντρέ κι ιράτ,* ή ατζέ-ντα κάνα μπασέλα ο μπασνό,* ντα κα αρακχέλ-λεν έτοιμοι, κα αβέν ευτυχισμέ. 39 Αλλά τι τζανέν ότι, άμα ο τζενό κα τζανέλας σο σαάτι κα αβέλας ο τσορ, να κα μουκχέλας τι πουτρέλ λέσκο κχερ. 40 Τουμέν-ντα μα τσσιναβέν τι αβέν έτοιμοι, σόσκε ο Τσσαβό ι τζενέσκο αβέλα εκ σαάτι σο να μπεσένα τι αβέλ».

41 Αζομάν ο Πέτρος πουτσλάς: «Κύριε, σάντε αμένγκε βακερέσα ανταβά παράδειγμας ή σαριλένγκε;» 42 Ντα ο Κύριος βακερντάς: «Κον ισί μπαγιά ο πιστός υπηρέτης,* ο γκοντιαβέρ, σο λέσκο κύριος κα τσσουβέλ-λες υπεύθυνος πι υπηρετόντε για τι ντελ-λεν ο χαμπέ σο χρειαζίντιβενα κο σωστός βακίτι; 43 Ευτυχισμέ ισί οντουβά δούλος άμα λέσκο κύριος, κάνα κα αβέλ, κα ντικχέλ-λες τι κερέλ πι μπουτί! 44 Μπαγιά βακεράβα τουμένγκε: Κα τσσουβέλ-λες υπεύθυνος σαρέ πι πραγματέντε. 45 Αλλά άμα οντουβά δούλος κα βακερέλ αντρά-πέσταρ: “Μο κύριος αργίνελα τι αβέλ”, ντα κα αρχίνελ τι νταπέλ ι υπηρετόν ντα ι υπηρετριέν, ντα τι χαλ ντα τι πιλ ντα τι ματιόλ, 46 ο κύριος οντουλέ δουλόσκο κα αβέλ εκ ντιβές σο βοβ να μπεσέλα λέσκε ντα εκ σαάτι σο βοβ να τζανέλα ντα κα ντελ-λες ι πο μπαρί τιμωρία ντα κα τσσουβέλ-λες οντουλέντζαρ σο νανέ πιστοί. 47 Αζομάν, οντουλέ δουλός σο αγαντάς οντουβά σο μανγκλάς λέσταρ ο κύριος λέσκο αλλά να ετοιμαντάς-πες ντα να κερντάς-λες, κα νταπέν-λες μπουτ. 48 Αλλά οντουλές σο να αγαντάς ντα κερντάς πράγματα σο αξίνενα νταπ, κα νταπέν-λες χάνικ. Μπαγιά, κατά κάθε εκ σο ντιντιλό-λες μπουτ, κα μανγκέν λέσταρ μπουτ, ντα οντουλέσταρ σο τσσουντέ-λες υπεύθυνος μπουτέ πραγματένγκε, κα μανγκέν λέσταρ ατζέ πο μπουτ.

49 »Αβιλόμ τι τσσουβάβ γιακ κι πφουβ, ντα σο γιαβέρ τι μανγκάβ άμα λιντάς-πες μπίλιμα; 50 Αλλά ισί τι μπολντιάβ εκχέ μπολντιμάσαρ, ντα καζόμ πφανγκό ισί μο γκι μέχρι τι αβέλ-πες! 51 Αμντίνενα ότι αβιλόμ τι ανάβ ειρήνη κι πφουβ; Νάα, βακεράβα τουμένγκε. Αβιλόμ τι ανάβ διχόνοια. 52 Σόσκε από ακανά κα αβέν παντς εκχέ κχερέστε διχομέ, τριν κα τζαν κόντρα ντουέντζαρ ντα ντούι κα τζαν κόντρα τρινέντζαρ. 53 Κα αβέν διχομέ ντα αντικάς κα τζαλ κόντρα ο ντατ πι τσσαβέσαρ ντα ο τσσαβό πι νταντέσαρ, η ντάι πι τσσαγιάσαρ ντα η τσσάι πι νταγιάσαρ, η σασούι πι μποριάσαρ ντα η μπορί πι σασάσαρ».

54 Σοράν βακερντάς ακαβά-ντα κο τζενέ: «Κάνα ντικχένα εκ σύννεφος ντουράλ,* οντιά στιγμή βακερένα: “Αβέλα μπαρό μπρισίμ”, ντα αντικάς αβέλα-πες. 55 Ντα κάνα ντικχένα ότι πφούντελα τατί μπαρμπάλ,* βακερένα: “Κα τθεράς μπουτ κάψα”, ντα αντικάς αβέλα-πες. 56 Ντουέ μουένγκε ισινέν! Τζανένα τι βακερέν σο ντιβές κα τθερέλ κάνα ντικχένα ο ουρανός ντα ι πφουβ, αλλά σόσκε να τζανένα τι βακερέν σο αβέλα-πες ανταλέ βακιτίστε; 57 Σόσκε να αγαβένα κορκορέ σο ισί δίκαιος; 58 Φιρειπείν, κάνα τζάσα εκχέ αρχοντάστε οντουλέ τζενέσαρ σο κατηγοριντάς-τουτ, καζόμ ισινάν κο ντρομ, κερ ο πο λατσσό για τι αρακχές-λεν λέσαρ. Αντικάς, να κα τσσίντελ-τουτ για τι ανέλ-τουτ ανγκλάλ κο δικαστής, ντα ο δικαστής να κα ντελ-τουτ κο βαστά κι τζενέσκε σο κα τσσουβέλ-τουτ κι φυλακή. 59 Βακεράβα τούκε, να κα νικιός οτθάρ άμα να ποκιντάν ντιπ σαρέ ο λοβέ* σο μανγκέσα λέσκε».