Ο Πρώτος Γράμμας σο Μπουτσσάντιλο κο Κορίνθιοι

3 Οτθάρ, πφραλάλεν, να μπορισάλομ τι κεράβ τουμέντζαρ λάφι σαρ κα κεράβας ι τζενέντζαρ σο οδηγίντιβενα κατά πνεύμας,* αλλά σαρ κα κεράβας οντουλέντζαρ σο οδηγίντιβενα κατά πράγματα σο μανγκέλα λένγκο γκι* ντα ισί μαξίμια κο πράγματα σο τθερένα τι κερέν ι Χριστόσαρ. 2 Να ντινόμ-τουμέν χαμπέ αλλά τθουτ, σόσκε να ισινένας ατζέκ αζόμ ζουρανέ. Ακανά-ντα όμως να ισινέν αζόμ ζουρανέ, 3 σόσκε ατζέκ οδηγίντιβενα κατά πράγματα σο μανγκέλα τουμαρό γκι. Αφού ζηλίνενα ο εκ ι γιαβερές ντα χάνα-τουμέν, ανταβά σικαβέλα ότι οδηγίντιβενα κατά πράγματα σο μανγκέλα τουμαρό γκι ντα ότι πφιρένα σαρ ο τζενέ ι ντουνιάσκε. 4 Κάνα εκ τζενό βακερέλα: «Με τσσίνταβα κατά Παύλος», ντα εκ γιαβέρ βακερέλα: «Με τσσίνταβα κατά Απολλώς», να ισινέν σαρ ο τζενέ ανταλέ ντουνιάσκε;

5 Άρα, κον ισί ο Απολλώς; Ντα κον ισί ο Παύλος; Ισινάμ υπηρέτες σο βοηθιντάμ-τουμέν τι πακιάν. Κερντάμ οντουβά σο βακερντάς αμένγκε ο Κύριος τι κεράς. 6 Με τσσουντόμ ο σπόρος, ο Απολλώς ποτιντάς, αλλά ο Ντεβέλ κερντάς-λες τι μπαριόλ. 7 Οντουβά σο τσσουβέλα ο σπόρος νανέ σημαντικός ούτε οντουβά σο ποτίνελα, αλλά ο Ντεβέλ σο κερέλα-λες τι μπαριόλ. 8 Οντουβά σο τσσουβέλα ο σπόρος ντα οντουβά σο ποτίνελα κερένα μπουτί γιεκ,* αλλά ο κάθε εκ κα λελ οντουβά σο αξίνελα πιρέ μπουτιάκε. 9 Κεράσα μπουτί γιεκ ι Ντεβλέσαρ. Τουμέν ισινέν σαρ χωράφι σο καλλιεργίνελα-λες ο Ντεβέλ, σαρ κχερ σο λατσσαρντάς-λες ο Ντεβέλ.

10 Αντράλ κατά μπαρό λατσσιπέ σο σικαντάς μάνγκε ο Ντεβέλ, τσσουντόμ θεμέλιος σαρ λατσσό χτίστης.* Ακανά όμως εκ γιαβέρ τζενό χτίνελα οπράλ ανταλέστε. Αλλά ο κάθε εκ τι προσοχίνελ σο χτίνελα οπράλ κο θεμέλιος. 11 Ο Ντεβέλ τσσουντάς ι Ιησού Χριστός σαρ θεμέλιος, οτθάρ καέκ ναστί τσσουβέλα γιαβέρ θεμέλιος. 12 Εκ τζενό για τι χτίνελ οπράλ κο θεμέλιος μπορεί τι τσσουβέλ χρυσάφι, ασήμι, πααλίς μπαρά, καστά, πουσά ή καλάμια. 13 Η μπουτί ι κάθε εκχέσκι κα ντικχίντιβελ κάνα κα αβέλ ο ντιβές. Αντράλ κατά γιακ* κα σικάντιβελ άμα η μπουτί σο κερντάς ο κάθε εκ ισινέ λατσσί ή να ισινέ. 14 Άμα οντουβά σο χτιντάς εκ τζενό οπράλ κο θεμέλιος κα ατσσόλ, ο τζενό κα ευλογίντιβελ. 15 Άμα οντουβά σο χτιντάς εκ τζενό κα πφαμπόλ ντιπ σαρό, ο τζενό κα χασαρέλ-λες ανταβά, αλλά βοβ κα σώντιβελ. Όμως ατζέ-ντα αντικάς, κα αβέλ σαρ τι γλιτώνελα αντράλ κατά γιακ.

16 Να τζανένα ότι ισινέν ναός ι Ντεβλέσκο ντα ότι ο πνεύμας ι Ντεβλέσκο μπεσέλα αντρέ τουμέντε; 17 Άμα εκ τζενό καταστραφίνελα ο ναός ι Ντεβλέσκο, ο Ντεβέλ κα καταστραφίνελ-λες, σόσκε ο ναός ι Ντεβλέσκο ισί άγιος, ντα ανταβά ναός ισινέν τουμέν.

18 Καέκ μα τι χουχαβέλ πο νεαυτός. Άμα εκ τζενό τουμένταρ πακιάλα ότι ισί γκοντιαβέρ ανταλέ ντουνιάστε,* τι αβέλ ντινιλό, ντα αντικάς κα αβέλ γκοντιαβέρ. 19 Επειδή ο γκοντιαβέρ λάφια ανταλέ ντουνιάσκε ισί ντινιλιπέ κο γιακχά κι Ντεβλέσκε, σαρ ισί γραμμέ: «Ο Ντεβέλ κερέλα ι γκοντιαβέρ τζενέν τι περέν πουμαρέ παγιδάτε». 20 Ντα πάλι: «Ο Ιεχωβά* τζανέλα ότι ο σκέψεις ι γκοντιαβέρ τζενένγκε να τθερένα ιτς αξία». 21 Οτθάρ, καέκ μα τι ισαρέλ-πες τζενένγκε, σόσκε σαρέ ο πράγματα ισί τουμαρέ: 22 εμ ο Παύλος εμ ο Απολλώς εμ ο Κηφάς* εμ ο ντουνιάς εμ η ζωή εμ ο μεριπέ εμ οντουλά σο αβένα-πες ακανά εμ οντουλά σο κα αβέν-πες, σαρέ ο πράγματα ισί τουμαρέ. 23 Τουμέν ισινέν ι Χριστόσκε, ντα ο Χριστός ισί ι Ντεβλέσκο.