Ο Πρώτος Γράμμας σο Μπουτσσάντιλο κο Κορίνθιοι

4 Κάθε τζενό πρέπει τι ντικχέλ-αμέν σαρ υπηρέτες ι Χριστόσκε σο ντιντιλί-αμέν η ευθύνη τι μουτθαβάς ο γκεραντέ πράγματα* ι Ντεβλέσκερε. 2 Οντουβά σο πρέπει τι κερέν ο υπηρέτες ισί τι αβέν πιστοί. 3 Μάνγκε νανέ σημαντικός άμα κα κρίντιβαβ τουμένταρ ή κο δικαστήριος γιαβερέ τζενένταρ. Ούτε με ο ίδιος να κρίναβα μο νεαυτός. 4 Επειδή να αγαβάβα ότι κεράβα κάτι λάθος. Αλλά ανταβά να σικαβέλα ότι ισινόμ δίκαιος. Οντουβά σο κρίνελα-μαν ισί ο Ιεχωβά.* 5 Οτθάρ, μα κρίνεν καεκχές μέχρι τι αβέλ ο βακίτι. Κάνα κα αβέλ ο Κύριος, κα κερέλ τι ντικχίντιβεν ο γκεραντέ πράγματα σο ισί κο καρανίκι ντα κα σικαβέλ σο τθερέλα ο κάθε τζενό αντρέ πι γκίστε. Ντα αζομάν ο Ντεβέλ κα ισαρέλ ι κάθε εκχές.

6 Πφραλάλεν, ανταλέντε σο βακερντόμ, ο Απολλώς ντα με ισινάμ παραδείγματα τουμαρέ λατσσιμάσκε, για τι σικλιόν ακαβά κανόνας: «Πρέπει τι ακολουθίνεν σάντε ο πράγματα σο ισί γραμμέ». Άμα κα κερέν-λες ανταβά, να κα πφερντιόν μπαρικανιπέ ντα να κα τζαν κόντρα εκχέ τζενέσαρ για τι κερέν ο γκι εκχέ γιαβερέσκο. 7 Σο κερέλα-τουτ τι πακιάς ότι ισινάν πο οπρέ κατά γιαβερά; Να ντινάς-τουτ ο Ντεβέλ σο-ντα τθερέσα; Άμα βοβ ντινάς-λες τούτε, σόσκε ισαρέσα-τουτ σαρ τι λιντάν-λες τιρέ ζοριάσαρ;

8 Τσαλιλέν μπίλιμα; Αβιλέν χουλανέ μπίλιμα; Αβιλέν βασιλιάδες χωρίς τι αβάς αμέν; Κα μανγκάβας τι αβένας βασιλιάδες από ακανά για τι αβάας αμέν-ντα βασιλιάδες γιεκ τουμέντζαρ. 9 Ντικχίντιβελα μάνγκε ότι αβιλάμ σαρ θέατρος σο ντικχέλα ο ντουνιάς, εμ ο τζενέ εμ ο άγγελοι. Ο Ντεβέλ μουκχλάς μαν ντα ι γιαβερέ αποστολόν τι αβάς ο τελευταίοι σο κα νικιόν κι σκηνή σαρ τζενέ σο ισί καταδικασμέ τι μερέν. 10 Αμέν ντικχίντιβασα ντινιλέ ιτιρί κατά Χριστός, αλλά τουμέν πακιάνα ότι ισινέν γκοντιαβέρ κο πράγματα σο τθερένα τι κερέν ι Χριστόσαρ. Αμέν ντικχίντιβασα μπίζουρανε, αλλά τουμέν ζουρανέ. Τουμένγκε σικαβένα σεβασμός ο γιαβερά, αλλά αμένγκε να σικαβένα. 11 Μέχρι ανταβά σαάτι, μποκχάλιβασα, μεράσα πανίσκε, ισινάμ λοκχές ιριαντέ,* τσσίντασα μπουτ,* να τθεράσα κάι τι μπεσάς 12 ντα κεράσα πφαρί μπουτί αμαρέ βαστέντζαρ. Κάνα ο τζενέ προσβαλίνενα-αμέν, ντάσα-λεν ζαμ. Κάνα τζάνα αμέντζαρ κόντρα, νταϊντίνασα με υπομονή. 13 Κάνα βακερένα λάφια για τι χαλαβέν αμαρό ναβ, απαντίνασα λατσσιμάσαρ.* Αβιλάμ σαρ ο σκουπίδια ι ντουνιάσκε, ο άχρηστοι ι πφουβιάκε, μέχρι ακανά.

14 Να γραφίναβα-λεν ανταλά για τι κεράβ-τουμέν τι λατζάν, αλλά για τι σικλιαράβ-τουμέν σαρ τι αβένας τσσαβέ μιρέ σο μανγκάβα-λεν μπουτ. 15 Ατζέ-ντα άμα τθερένα 10 χιλιάδες τζενέν σο σικλιαρένα-τουμέν ι Χριστόσκε, σίγουρα να τθερένα μπουτέ νταντέν. Αντράλ κατά Χριστός Ιησούς, με αβιλόμ τουμαρό ντατ σόσκε μουτθαντόμ τουμένγκε ο λατσσέ αμπέρια. 16 Οτθάρ, βακεράβα τουμένγκε τι μοιάζεν μάντε. 17 Άκ’ σόσκε μπουτσσαβάβα τουμένγκε ι Τιμοθεός. Βοβ ισί μο τσσαβό σο μανγκάβα-λες μπουτ ντα υπηρετίνελα ι Κυριός σαρέ πι γκίσαρ. Βοβ κα ανέλ τουμαρέ γκοντιάτε ο τρόπος σο κεράβα ο πράγματα σο τθερένα τι κερέν ι Χριστόσαρ, ι Ιησούσαρ, ντα σαρ σικλιαράβα παντού κι κάθε κχανγκιρί.

18 Μερικοί πφερντιλέ μπαρικανιπέ, τι βακερές ότι να κα αβάβας τουμέντε. 19 Αλλά κα αβάβ τουμέντε ατζεχάνικ, άμα μανγκέλα ο Ιεχωβά,* ντα να κα σικλιάβ ο λάφια οντουλένγκε σο πφερντιλέ μπαρικανιπέ, αλλά λένγκι ζορ. 20 Επειδή η Βασιλεία ι Ντεβλέσκι να τθερέλα τι κερέλ λαφίντζαρ αλλά ζοριάσαρ. 21 Σο μανγκένα; Τι αβάβ τουμέντε για τι τιμωρίναβ-τουμέν ή για τι σικαβάβ τουμένγκε αγάπη ντα λατσσιπέ;*