Ο Γράμμας σο Γραφιντάς ο Ιάκωβος
3 Πφραλάλεν, μα τι αβέν μπουτ τουμένταρ δάσκαλοι, σόσκε τζανάσα ότι κα τθεράς πο μπαρί ευθύνη ανγκλάλ κο Ντεβέλ.* 2 Σαρέ κεράσα λάθη* μπουτ φαρ. Άμα εκ τζενό κερέλα πάντα σωστός λάφι, ισί τέλειος ντα μπορίνελα τι κερέλ κουμάντος σαρό πο σώμας. 3 Άμα τσσουβάσα χαλινάρι κο μούι κι γκραστένγκο για τι ντεν-αμέν καν, μπορίνασα τι γκεράς-λεν κάι-ντα μανγκάσα. 4 Ντικχέν ο καράβια-ντα: Παρόλο σο ισί αζόμ μπαρέ ντα τσσίντενα-λεν ζουρανέ μπαρμπαλιά, γκερέλα-λεν κάι μανγκέλα ο τζενό εκχέ χουρντέ τιμονίσαρ.*
5 Αντικάς η τσσιπ-ντα ισί ντιπ χουρντί, αλλά λάσαρ ισαράσα-αμέν μπουτ. Ντικχέν καζόμ χουρντί γιακ* χρειαζίντιβελα για τι πφαμπόλ εκ μπαρό δάσος! 6 Η τσσιπ-ντα ισί σαρ γιακ. Ισί εκ μέρος ι σωμάσκο σο κερέλα ζιάνι ντα μαγαρίνελα σαρό ο σώμας. Τσσουβέλα γιακ σαρί κι ζωή εκχέ τζενέσκι ντα ισί σαρ η Γέεννα* σόσκε ανέλα καταστροφή. 7 Ο τζενέ κερένα κουμάντος ντα κερντέ κουμάντος σαβέ τι μανγκές τσιρικλέν, σαπέν, σαπουρνίν, άγρια ζώα ντα ζώα ι ντεριαβάκε. 8 Αλλά καέκ τζενό ναστί κερέλα κουμάντος ι τσσιπ. Καέκ ναστί τσσουβέλα λάκε όρια, κερέλα ζιάνι ντα ισί πφερντί δηλητήριος σο ανέλα μεριπέ. 9 Λάσαρ εμ δοξάνασα ι Ιεχωβάς,* αμαρέ Νταντές, εμ ντάσα αρμανιά τζενέν σο λατσσάρντιλε «για τι μοιάζεν κο Ντεβέλ». 10 Κατά ίδιος μούι νικιόλα εμ ζαμ εμ αρμάν.
Πφραλάλεν, νανέ σωστός τι αβέν-πες ασακέ πράγματα. 11 Αβέλα-πες τι νικαβέλ εκ πηγή εμ πανί σο πιλιόλα* εμ πανί σο νανέ λατσσό; 12 Πφραλάλεν, νικαβέλα ζιτίνια η χχελινγκίν ή χχελιά η ρεζ; Ο λοντό πανί-ντα να νικαβέλα πανί σο πιλιόλα.
13 Κον τουμένταρ ισί γκοντιαβέρ ντα αγαβέλα; Τι σικαβέλ-λες ανταβά ι λατσσέ πραγματέντζαρ σο κερέλα ντα τι κερέλ-λεν σαρέ κοβλέ γκίσαρ. Κοβλό γκι τθερένα ο τζενέ σο ισί γκοντιαβέρ. 14 Αλλά άμα αντρέ τουμαρέ γκίστε τθερένα μπαρί ζήλια ντα μπεϊντίνενα* τι χαν-τουμέν,* μα ισαρέν-τουμέν ντα μα βακερέν λάφια σο τζάνα κόντρα κι αλήθεια. 15 Ανταγιά νανέ η σοφία σο αβέλα οπράλ. Αλλά ισί ανταλέ ντουνιάσκι, οντουλένγκι σο κερένα ο πράγματα σο μανγκέλα ο γκι ντα ι δαιμονένγκι. 16 Κάνα εκ τζενό τθερέλα ζήλια ντα μπεϊντίνελα τι χαλ-πες,* να αβένα-πες ο πράγματα σειράσαρ, αλλά αβένα-πες σαβέ τι μανγκές μπέτι πράγματα.
17 Αλλά η σοφία σο αβέλα οπράλ κερέλα εκχέ τζενές τι αβέλ πρώτα πάκι, σοράν τι τθερέλ ειρήνη, τι αβέλ λογικός ντα έτοιμος τι ντελ καν, τι τζιτζίνελ* μπουτ ι γιαβερένγκε, τι κερέλ μπερεκέτι λατσσέ πράγματα,* μα τι ξεχωρίνελ ι τζενέν ντα μα τι αβέλ ντουέ μουένγκο. 18 Οντουλά σο κερένα ειρήνη σπειρίνενα οτθέ σο ισί ειρήνη ντα γκίντενα ο καρπός σο νικαβέλα η δικαιοσύνη.