Ο Γράμμας σο Μπουτσσάντιλο κο Εφέσιοι
6 Χουρντάλεν, τι ντεν καν τουμαρέ νταντές ντα τουμαρέ νταγιά σαρ μανγκέλα ο Κύριος, σόσκε ανταβά ισί σωστός κι Ντεβλέσκε γιακχά. 2 Η εντολή «σέβανε τι νταντές ντα τι νταγιά» ισί η πρώτη σο ανέλα ακαγιά ευλογία: 3 «Για τι τζαν λατσσές ο πράγματα τούκε ντα για τι ατσσός μπουτ βακίτι οπράλ κι πφουβ». 4 Νταντάλεν, μα χολιασκιαρέν τουμαρέ τσσαβέν, αλλά καζόμ μπαριαρένα-λεν τι ντεν-λεν ι διόρθωση ντα ο συμβουλές* ι Ιεχωβάσκε.*
5 Τουμέν σο ισινέν δούλοι, τι ντεν καν τουμαρέ κυριόντε, με σεβασμός ντα νταρ, σαρέ τουμαρέ γκίσαρ, σαρ ντένα καν κο Χριστός. 6 Μα ντεν καν σάντε κάνα ντικχένα-τουμέν ο γιαβερά, για τι κερέν ι τζενένγκο γκι, αλλά σαρ δούλοι ι Χριστόσκε σο κερένα σαρέ πουμαρέ γκίσαρ* οντουβά σο μανγκέλα ο Ντεβέλ. 7 Υπηρετίνεν σαρ δούλοι αντράλ τουμαρέ γκίσταρ, σαρ τι υπηρετίνενα ι Ιεχωβάς* ντα όχι ι τζενέν, 8 σόσκε τζανένα ότι σο-ντα λατσσιπέ κερέλα ο κάθε εκ, ο Ιεχωβά* κα ντελ-λες λέστε παλάλ, είτε ισί δούλος είτε νανέ. 9 Ντα τουμέν, σο τθερένα δουλόν, τι κερέν-λες ανταβά τουμαρέ δουλόνγκε, χωρίς τι νταραβέν-λεν, σόσκε τζανένα ότι λένγκο Κύριος σο ισί τουμαρό-ντα Κύριος ισί κο ουρανός, ντα βοβ να ξεχωρίνελα ι τζενέν.
10 Συνεχίνεν τι λεν ζορ κατά Κύριος, σόσκε λέσκι ζορ ισί μπαρί. 11 Ιρίν σαρί ι πανοπλία ι Ντεβλέσκι για μα τι περέν κο παγίδες κι Μπενγκέσκε,* 12 σόσκε να πολεμίνασα* τζενέντζαρ, αλλά δαιμονέντζαρ σο ισί κο ουρανός ντα σο κυβερνίνενα, τθερένα ζορ ντα κερένα κουμάντος ανταλέ ντουνιάς σο ισί κο καρανίκι. 13 Οτθάρ, λεν σαρί ι πανοπλία ι Ντεβλέσκι για τι τζαν κόντρα κο ντουσμάνι* κάνα κα αβέν πφιρνικανέ ντιβεσά. Ντα αντικάς, αφού κα κερέν σαρέ ο πράγματα λατσσές, τι ατσσόν σταθεροί.
14 Οτθάρ, για τι ατσσόν σταθεροί, ιρίν ι αλήθεια σαρ εκ ζώνη πφαντί ντονταλάι τουμαρέ ντουμέσταρ, ι δικαιοσύνη σαρ εκ θώρακας σο αρακχαβέλα ο γκέσι* 15 ντα ο τεραχά τουμαρέ πιντρέντε για τι αβέν έτοιμοι τι μουτθαβέν ο λατσσέ αμπέρια ότι κα αβέλ ειρήνη. 16 Εκτός σαρέ ανταλένταρ, λεν ι μπαρί ασπίδα σο ισί η πίστη κο Ντεβέλ, σο λάσαρ κα μπορίνεν τι σβήνεν σαρέ ο βέλη ι Μπενγκέσκε* σο τθερένα γιακ.* 17 Δεχτίνεν ι σωτηρία σαρ εκ περικεφαλαία ντα λεν τουμαρέ βαστέστε ο σπαθίς ι πνευμάσκο, δηλαδή ο λάφι ι Ντεβλέσκο. 18 Ντα χρησιμοποιήνεν διαφορετικούς τρόπους για τι προσευχίντιβεν ντα για τι μολίνεν* ι Ντεβλές καζόμ συνεχίνενα τι κερέν προσευχή σε κάθε περίπτωση αντράλ κατά άγιος πνεύμας. Για τι κερέν-λες ανταβά, μα τσσιναβέν τι ατσσόν τζανγκαντέ ντα τι μολίνεν ι Ντεβλές σαρέ ι αγιόνγκε. 19 Κερέν προσευχή μάνγκε-ντα, για τι ντιντιόν-μαν ο σωστά λάφια κάνα κεράβα λάφι μπίνταρανες, ντα αντικάς τι μουτθαβάβ ο γκεραντό πράγμας* ι λατσσέ αμπερίνγκο. 20 Επειδή ο Ντεβέλ μπουτσσαντάς-μαν τι μουτθαβάβ ανταλά λατσσέ αμπέρια, ισινόμ πφαντό τζαντζιρίντζαρ.* Οντουλέσκε, κερέν προσευχή κο Ντεβέλ μάνγκε για τι κεράβ λάφι ι λατσσέ αμπερίνγκε μπίνταρανες, αντικάς σαρ πρέπει τι κεράβ.
21 Ο Τυχικός, σο ισί αμαρό αγαπημέ πφραλ ντα πιστός υπηρέτης ι Χριστόσκο, κα βακερέλ τουμένγκε σο κεράβα ντα σαρ ισινόμ. 22 Άκ’ ανταλέσκε μπουτσσαβάβα-λες τουμένγκε, για τι σικλιόν σαρ ισινάμ ντα τι λοκχιαρέλ τουμαρό γκι.*
23 Προσευχίντιβαβα τι τθερέν ο πφραλά ειρήνη ντα αγάπη με πίστη κατά Ντεβέλ αμαρέ Νταντέσταρ ντα κατά Κύριος Ιησούς Χριστός. 24 Ο μπαρό λατσσιπέ ι Ντεβλέσκο τι αβέλ σαρέ οντουλέντζαρ σο τθερένα αληθινή αγάπη αμαρέ Κυριόσκε, ι Ιησού Χριστόσκε.