Ο Δεύτερος Γράμμας σο Μπουτσσάντιλο κο Κορίνθιοι

7 Πφραλάλεν, ο Ντεβέλ ντινάς-αμέν πο λάφι ότι κα κερέλ-λεν ανταλά. Οτθάρ, τι καθαρίνας αμαρό νεαυτός κάθε πραγμάσταρ σο μαγαρίνελα αμαρό σώμας ντα αμαρί γκοντί* ντα τι συνεχίνας τι αβάς ατζέ πο άγιοι επειδή νταράσα κατά Ντεβέλ.

2 Κερέν αμένγκε τθαν αντρέ τουμαρέ γκίστε. Να αδικιντάμ καεκχές, να κερντάμ ζιάνι καεκχέσκε, να χουχαντάμ καεκχές αμαρέ λατσσιμάσκε. 3 Να βακεράβα-λες ανταβά για τι κρίναβ-τουμέν. Σαρ βακερντόμ πο τζανγκλέ, τθεράσα-τουμέν αντρέ αμαρέ γκίστε είτε τζουβντιάσα είτε μεράσα. 4 Κεράβα τουμέντζαρ λάφι χωρίς τι νταράβ. Ισινόμ μπουτ περήφανος τουμένγκε. Κοβλιλί μπουτ μι ντουκχ* ντα σαρέ κο ταλαιπωρίες σο τσσίντασα ισινόμ πφερντό χαρά.

5 Κάνα ερεσλάμ κι Μακεδονία, να ηρεμισάλαμ ιτς, αλλά τσσίνταας μπουτ ταλαιπωρίες, σόσκε ο τζενέ τζάνας αμέντζαρ κόντρα, ντα τθεράας μπαρό άγχος ι κχανγκιρίνγκε. 6 Αλλά ο Ντεβέλ, σο κοβλιαρέλα ι ντουκχ οντουλένγκι σο τθερένα πφανγκό γκι, κοβλιαρντάς αμαρί ντουκχ* κάνα αβιλό ο Τίτος. 7 Να κοβλιλί αμαρί ντουκχ* σάντε επειδή αβιλό, αλλά επειδή λιντάς μπουτ ζορ-ντα τουμένταρ. Βακερντάς αμένγκε ότι μανγκένα μπουτ τι ντικχέν-μαν, ότι τθερένα μπαρί στεναχώρια ντα ότι ισινέν μπουτ αγχωμέ μάνγκε. Οτθάρ, λιντόμ ατζέ πο μπαρί χαρά.

8 Ατζέ-ντα άμα στεναχωριντόμ-τουμέν ι γραμμάσαρ σο μπουτσσαντόμ τουμένγκε, να μετανιώναβα. Παρόλο σο μετανιωσάλομας κι αρχή επειδή στεναχωριντόμ-τουμέν, τζανάβα ότι ισινέ σάντε για χάνικ. 9 Οτθάρ ακανά χαιρίναβα, σόσκε να στεναχωρισάλεν σάντε, αλλά τουμαρί στεναχώρια κερντάς-τουμέν τι μετανιώνεν-ντα. Στεναχωρισάλεν τροπόσαρ σο κερέλα ο γκι ι Ντεβλέσκο. Οτθάρ-ντα, ανταβά σο βακερντάμ τουμένγκε να κερντάς τουμένγκε ζιάνι. 10 Ανέλα αμένγκε πάντα λατσσιπέ κάνα στεναχωρίντιβασα τροπόσαρ σο κερέλα ο γκι ι Ντεβλέσκο. Ανταγιά στεναχώρια κερέλα-αμέν τι μετανιώνας, ντα αντικάς τι σώντιβας. Όμως, η στεναχώρια ι ντουνιάσκι γκερέλα κο μεριπέ. 11 Ντικχίντιβελα μπουτ λατσσές ότι στεναχωρισάλεν τροπόσαρ σο κερέλα ο γκι ι Ντεβλέσκο. Ντα οτθάρ κερντέν σο νακχέλα τουμαρέ βαστέσταρ για τι κερέν ο σωστός. Καθαρισάλεν, μισιντέν οντουβά γκεραλό* πράγμας σο αβιλό-πες, σικαντέν ότι νταρένα κατά Ντεβέλ, μανγκλέν μπουτ τι μετανιώνεν, υπηρετιντέν ι Ντεβλές αντράλ τουμαρέ γκίσταρ, διορθωντέν οντουβά μπέτι πράγμας! Σαρέ οντουλέντζαρ σο κερντέν, σικαντέν ότι ισινέν πάκι* ανταλέ πραγμάστε. 12 Να γραφιντόμ τουμένγκε για τι βακεράβ οντουλέσκε σο αμαρτιντάς ούτε οντουλέσκε σο αδικισάλο, αλλά για τι ντικχάβ άμα κα σικαβέν μπαγιά ανγκλάλ κο Ντεβέλ ότι μανγκένα τι ασουνέν-αμέν. 13 Οντουλέσκε-ντα κοβλιλί αμαρί ντουκχ.

Να νιωσάλαμ σάντε τι κοβλιόλ αμαρί ντουκχ,* αλλά πο μπουτ χαιρισάλαμ κατά χαρά σο λιντάς ο Τίτος, σόσκε σαρέ ντινέν-λες ζορ. 14 Ισαρντόμ-τουμέν λέστε ντα να κερντέν-μαν τι λατζάβ οντουλένγκε σο βακερντόμ. Αλλά οντουλά σο βακερντάμ κο Τίτος κάνα ισαρντάμ-τουμέν ισινέ μπαγιά, σαρ ισινέ σαρέ οντουλά σο βακερντάμ τουμένγκε. 15 Κάνα ντέλα-πες γκοντί ότι σαρέ τουμέν ντινέν καν ντα ότι δεχτιντέν-λες με μπαρό σεβασμός, μανγκέλα-τουμέν ατζέ πο μπουτ αντράλ πι γκίσταρ. 16 Χαιρίναβα σο μπορίναβα τι νταβ τουμένγκε μπέσα σαρέ κο πράγματα.