Ο Ευαγγέλιος σο Γραφιντάς ο Ματθαίος
11 Κάνα ο Ιησούς βακερντάς πι 12 μαθητένγκε σαρέ ανταλά πράγματα, νασλό οτθάρ για τι σικλιαρέλ ντα τι μουτθαβέλ ι Ντεβλέσκε λάφια κο γιαβερά πόλεις.
2 Ο Ιωάννης ασουντάας κι φυλακή οντουλά σο κερέλας ο Χριστός, ντα μπουτσσαντάς πι μαθητέν 3 τι πουτσέν-λες: «Τούι ισινάν Οντουβά σο μπεκλεντίναας ή κα αβέλ γιαβέρ;» 4 Ο Ιησούς βακερντάς λένγκε: «Τζαν ντα βακερέν κο Ιωάννης ανταλά σο ασουνένα ντα ντικχένα: 5 Ο κορορέ ακανά ντικχένα ντα ο μπανγκέ πφιρένα, ο λεπροί αβένα λατσσές* ντα ο κασουκέ ασουνένα, ο μουλέ ιστίνα ντα κο τσορορέ μουτθάντιβενα ο λατσσέ αμπέρια. 6 Ευτυχισμέ ισί οντουβά σο να χασαρέλα πι πίστη* ιτιρί μάνταρ».
7 Καζόμ βον νασένας, ο Ιησούς αρχιντάς τι βακερέλ κο μπουτ τζενέ σο γκιντισάλεας οτθέ ακαλά λάφια σο τθερένας τι κερέν ι Ιωαννίσαρ: «Σο νικίστιλεν τι ντικχέν κι έρημος; Καλάμι σο κουνιαβέλα-λες η μπαρμπάλ εκ ακατάρ εκ οκουτάρ; 8 Σο νικίστιλεν τι ντικχέν; Τζενές ιριαντό κοβλέ* σεΐντζαρ; Ο τζενέ σο ιρίνα κοβλέ σέα μπεσένα κι βασιλιαδένγκε κχερά. 9 Άρα, σόσκε νικίστιλεν; Για τι ντικχέν προφητής; Βα, ο Ιωάννης ισί προφήτης. Αλλά ισί μπουτ πο οπρέ κατά γιαβερά προφήτες. 10 Λέσαρ τθερένα τι κερέν ακαλά λάφια: “Ντικχ! Με μπουτσσαβάβα πο τζανγκλέ τούταρ εκχέ τζενές τι βακερέλ μο λάφια για τι πουτρέλ τούκε ο ντρομ!” 11 Μπαγιά βακεράβα τουμένγκε: Σαρέ κατά τζενέ σο μπιάντιλε καέκ νανέ πο μπαρό κατά Ιωάννης,* αλλά εκ κατά πο χουρντέ κι Βασιλεία κι ουρανόσκι ισί πο μπαρό λέσταρ. 12 Κατά ντιβεσά ι Ιωαννίσκε μέχρι ακανά, ο τζενέ μαρένα-πες τι νακχέν κι Βασιλεία κι ουρανόσκι, ντα οντουλά σο μαρένα-πες τι νακχέν λάτε καπτίνενα-λα. 13 Σαρέ οντουλά σο βακερένα ο Προφήτες ντα ο Νόμος ισινέ μέχρι κο Ιωάννης. 14 Μανγκένα να μανγκένα τι πακιάν-λες τουμέν, βοβ ισί “ο Ηλίας σο κα αβέλ”. 15 Κον τθερέλα κανά για τι ασουνέλ, τι ασουνέλ.
16 »Κάσαρ τι μοιασκιαράβ ι τζενέν σο τζουβντιόνα ανταλέ βακιτίστε;* Ισί σαρ χουρντέ τσσαβέ σο κχελένα πουμένγκε κο αγορές ντα βακερένα βικόσαρ ι γιαβερέ χουρντένγκε: 17 “Γκιλιαντάμ τουμένγκε ντουρουλιάσαρ, αλλά να κχελντέν. Ροντάμ ζουρανές, αλλά να τσαλαντέν τουμαρό γκέσι* κατά στεναχώρια”. 18 Αντικάς ο Ιωάννης-ντα να χάλα ντα να πίλα, ντα ο τζενέ βακερένα: “Ισί δαιμονισμέ”. 19 Ο Τσσαβό ι τζενέσκο χάλα ντα πίλα, ντα ο τζενέ βακερένα: “Άκ’! Τζενό σο μερέλα χαμπέσκε ντα μολιάκε, αμάλ* τζενέντζαρ σο γκίντενα ο φόροι ντα αμαρτωλόντζαρ”. Όμως, ο δίκαια πράγματα σο κερέλα εκ τζενό σικαβένα ότι ισί γκοντιαβέρ».*
20 Αζομάν αρχιντάς τι βακερέλ σο κα τσσίντεν ο πόλεις οτθέ σο κερντάας ο πο μπουτ θαύματα, σόσκε να μετανιωσάλε: 21 «Τιμωρία κα τσσίντες Χοραζίν! Τιμωρία κα τσσίντες Βηθσαϊδά! Σόσκε, άμα αβιλέας-πες κι Τύρος ντα κι Σιδώνα ο θαύματα σο αβιλέ-πες τουμέντε, βον κα μετανιώνενας κατάρ μπερί ραβαλόσαρ ντα πραχόσαρ. 22 Αλλά βακεράβα τουμένγκε ακαβά: Κο Ντιβές σο κα Κρίνελ ο Ντεβέλ ι τζενέν, ο πράγματα κα αβέν πο εύκολα ι τθεμένγκε Τύρος ντα Σιδώνα παρά τουμένγκε. 23 Ντα τούι, Καπερναούμ, αμντίνεσα ότι κα ερεσές κο ουρανός; Κο Μεζάρι* κα γουλίς. Σόσκε άμα ο θαύματα σο αβιλέ-πες τούτε κα αβένας-πες κο Σόδομα, ο Σόδομα κα ατσσόνας μέχρι αντιβές. 24 Αλλά βακεράβα τουμένγκε ακαβά: Κο Ντιβές σο κα Κρίνελ ο Ντεβέλ ι τζενέν, ο πράγματα κα αβέν πο εύκολα ι τθεμέσκε Σόδομα παρά τούκε».
25 Αζομάν ο Ιησούς βακερντάς: «Ισαράβα-τουτ ανγκλάλ σαριλέντε, Ντάντε, Κύριε ι ουρανόσκο ντα ι πφουβιάκο, σόσκε γκεραντάν ανταλά πράγματα κατά γκοντιαβέρ τζενέ ντα σικαντάν-λεν ι χουρντέ μαξιμίνγκε. 26 Βα, Ντάντε, σόσκε αντικάς μανγκλάν τούι τι αβέλ-πες. 27 Σαρέ ο πράγματα ντιντιλέ μάντε μι Νταντέσταρ, ντα καέκ να τζανέλα αζόμ λατσσές ι Τσσαβές σαρ ο Ντατ. Ντα ι Νταντές καέκ να τζανέλα-λες αζόμ λατσσές σαρ ο Τσσαβό. Ντα ο γιαβερά να αβέλα-πες τι τζανέν αζόμ λατσσές ι Νταντές άμα ο Τσσαβό να μανγκλάς τι σικαβέλ-λες λένγκε. 28 Ελάν μάντε, σαρέ τουμέν σο ισινέν κχινέ ντα τθερένα πφαριπέ αντρέ τουμέντε, ντα με κα λοκχιαράβ-τουμέν. 29 Τσσουβέν μο ζυγός οπρά-τουμέντε ντα σικλιόν μάνταρ, σόσκε τθεράβα κοβλό ντα ταπεινός γκι, ντα κα λοκχιόν. 30 Σόσκε μο ζυγός ισί λατσσό* ντα οντουβά σο μανγκάβα τουμένταρ τι βάντεν ισί λοκχό».