Ο Γράμμας σο Μπουτσσάντιλο κο Εβραίοι
1 Κο μπρεσά σο νακχλέ, ο Ντεβέλ κερντάς λάφι αμαρέ παππουδέντε αντράλ κατά προφήτες μπουτέ περιπτωσιέντε ντα μπουτέ τροπόντζαρ. 2 Ακανά, κο τέλος ανταλέ ντιβεσένγκο, κερντάς αμένγκε λάφι αντράλ πι Τσσαβέσταρ. Λέστε ντινάς σαρέ ο πράγματα σαρ κληρονομιά ντα αντράλ λέσταρ κερντάς ι ντουνιάς.* 3 Λέσταρ σικάντιβελα ντιπ λατσσές η δόξα ι Ντεβλέσκι ντα μοιάζελα ντιπ κο Ντεβέλ. Ατσσικιαρέλα σαρέ ο πράγματα πι ζουρανέ λαφίσαρ, ντα αφού πρώτα καθαριντάς-αμέν αμαρέ αμαρτιένταρ, μπεσλό δεξιά κατά μπαρό Ντεβέλ, κο ουρανός. 4 Βοβ κληρονομιντάς εκ ναβ σο ισί πο οπρέ οντουλέσταρ σο τθερένα ο άγγελοι, οτθάρ ισί μπουτ πο μπαρό λένταρ.
5 Για παράδειγμας, καλέ αγγελόσκε βακερντάς ποτές ο Ντεβέλ: «Τούι ισινάν μο τσσαβό, αντιβές με αβιλόμ το ντατ»; Ντα πάλι: «Με κα αβάβ λέσκο ντατ, ντα βοβ κα αβέλ μο τσσαβό»; 6 Αλλά ι βακιτίσκε σο κα ανέλ πάλι πι πρώτε Τσσαβές κι πφουβ, βακερέλα: «Ντα σαρέ ο άγγελοι ι Ντεβλέσκε τι περέν κοτσίντζαρ ανγκλά-λέστε».
7 Ντα ι αγγελόνγκε βακερέλα: «Κερέλα πι αγγελόν τι αβέν μπουτ ζουρανέ* ντα πι υπηρετόν σαρ μπαρί γιακ».* 8 Αλλά ι Τσσαβέσκε βακερέλα: «Ο Ντεβέλ ισί το θρόνος για πάντα, ντα τι Βασιλεία κα κερέλ κουμάντος δίκαιε τροπόσαρ. 9 Μανγκλάν ι δικαιοσύνη ντα μισιντάν ο γκεραλέ* πράγματα. Οτθάρ-ντα ο Ντεβέλ, τιρό Ντεβέλ, τσσουντάς οπρά-τούτε λάδι για τι αβές Βασιλιάς ντα ντινάς-τουτ πο μπαρί χαρά κατά γιαβερά βασιλιάδες». 10 Ντα: «Κι αρχή, Κύριε, τσσουντάν ο θεμέλια ι πφουβιάκε, ντα τι ζοριάσαρ λατσσαρντάν ο ουρανός. 11 Ανταλά κα χασάρντιβεν, αλλά τούι κα ατσσός. Κα χαλάντιβεν σαρέ σαρ ο σέα, 12 ντα τούι κα πακιαρές-λεν ντα κα αλλάνες-λεν σαρ τι αβένας σέα. Αλλά τούι ισινάν ο ίδιος, ντα το μπρεσά να κα τελειώνεν ποτές».
13 Αλλά καλέ αγγελόσκε βακερντάς ποτές ο Ντεβέλ: «Μπες δεξιά μάνταρ μέχρι τι κεράβ-τουτ τι ισταβές τι ντουσμανίν* τι πιντρέντζαρ»; 14 Νανέ σαρέ άγγελοι* σο κερένα άγια υπηρεσία, σο μπουτσσαβέλα-λεν ο Ντεβέλ για τι υπηρετίνεν οντουλέν σο κα σώντιβεν;*