Ο Ευαγγέλιος σο Γραφιντάς ο Λουκάς
9 Σοράν ντινάς βίκος ι 12 αποστολόν ντα ντινάς-λεν ι ζορ τι νικαβέν σαρέ ι δαιμονέν ντα τι κερέν λατσσές ι νασφαλέν.* 2 Ντα μπουτσσαντάς-λεν τι μουτθαβέν ο λατσσέ αμπέρια ι Ντεβλέσκε Βασιλειάκερε ντα τι σαστιαρέν,* 3 ντα βακερντάς λένγκε: «Μα λεν τίποτα ι ντρομέσκε, ούτε μαγκούρα ούτε τσάντα χαμπιματέντζαρ ούτε μαντρό ούτε λοβέ, ντα μα τθερέν ντούι σέα.* 4 Αλλά καλέ κχερέστε κα τζαν, οτθέ τι μπεσέν ντα οτθάρ τι νασέν. 5 Άμα κι πόλη σο κα τζαν να κα δεχτίνεν-τουμέν, τινιάνεν ο πράχος τουμαρέ πιντρένταρ κάνα κα νικιόν οτθάρ, για τι σικάντιβελ λένγκε ότι πρέπει τι τθερέν πουμαρί γκοντί».* 6 Αζομάν τζάνας γκαβ γκαβέστε, ντα κάι-ντα ισινέ, μουτθαβένας ο λατσσέ αμπέρια ντα κερένας λατσσές ι τζενέν.
7 Ο βασιλιάς Ηρώδης* λιντάς αμπέρι σαρέ ανταλά σο αβένας-πες ντα να τζανέλας ιτς σο τι κερέλ, σόσκε ισινέ τζενέ σο βακερένας ότι ο Ιωάννης ιστίντιλοας κατά μουλέ, 8 γιαβερά ότι σικαντάας-πες ο Ηλίας ντα γιαβερά ότι ιστίντιλοας κατά μουλέ εκ προφήτης κατά πουρανέ μπρεσά. 9 Ο Ηρώδης βακερντάς: «Ι Ιωαννίσκο σορό τσσιντόμ-λες. Κον ισί ανταβά σο ασουνάβα λέσκε ασακέ πράγματα;» Οτθάρ, μανγκέλας μπουτ τι ντικχέλ-λες.
10 Κάνα βουρτισάλε ο απόστολοι, βακερντέ κο Ιησούς σαρέ οντουλά σο κερντέας. Αζομάν λιντάς-λεν ντα νασλό εκχέ πολιάτε σο βακέρντιβελας Βηθσαϊδά για τι αβέν κορκορέ. 11 Αλλά μπουτ τζενέ λιντέ-λες αμπέρι ντα γκιλέ παλά-λέστε. Βοβ δεχτιντάς-λεν λατσσιμάσαρ ντα βακερέλας λένγκε ι Ντεβλέσκε Βασιλειάκε ντα κερντάς λατσσές οντουλέν σο ισινέ νασφαλέ. 12 Σοράν ο κχαμ αρχισάλο τι περέλ. Οτθάρ, γκιλέ πασέ λέστε ο Δώδεκα ντα βακερντέ: «Βάκερ ι τζενένγκε τι τζαν κο γκαβά ντονταλάι ντα κο αγορές για τι αρακχέν τθαν τι σοβέν ντα χαμπίματα, σόσκε ατθέ αβρί σο ισινάμ ισί ερημιά». 13 Αλλά βοβ βακερντάς λένγκε: «Ντεν-λεν τουμέν τι χαν». Βον βακερντέ: «Οντουβά σο τθεράσα ισί σάντε παντς μαντρέ ντα ντούι ματσσέ, εκτός άμα κα τζας αμέν τι κινάς χαμπίματα σαρέ ανταλέ τζενένγκε». 14 Σόσκε ισινέ πασέ παντς χιλιάδες μουρσά. Αλλά βοβ βακερντάς πι μαθητένγκε: «Τσσουβέν-λεν τι μπεσέν ομαδέντε σο κα τθερέν πασέ 50 τζενέν». 15 Ντα κερντέ-λες ανταβά, ντα τσσουντέ-λεν σαριλέν τι μπεσέν. 16 Σοράν λιντάς ο παντς μαντρέ ντα ο ντούι ματσσέ, βαντιντάς πο γιακχά κο ουρανός ντα κερντάς εκ προσευχή. Σοράν πφανγκλάς ο μαντρέ ντα ντέλας-λεν κο μαθητές για τι ντεν-λεν κο τζενέ. 17 Χαλέ σαρέ ντα τσαλιλέ, ντα γκιντιντέ οντουλά σο ατσσιλέ, 12 σεβλιά.*
18 Πο σοράν, καζόμ προσευχίντιβελας κορκορό, γκιλέ πασέ λέστε ο μαθητές, ντα βοβ πουτσλάς-λεν: «Κάνα ο τζενέ κερένα λάφι μάνγκε, κον βακερένα ότι ισινόμ;» 19 Βον βακερντέ: «Ο Ιωάννης,* γιαβερά όμως βακερένα ο Ηλίας ντα γιαβερά ότι ιστίντιλο κατά μουλέ εκ προφήτης κατά πουρανέ μπρεσά». 20 Ντα βοβ βακερντάς λένγκε: «Τουμέν όμως κον βακερένα ότι ισινόμ;» Ο Πέτρος βακερντάς: «Ο Χριστός ι Ντεβλέσκο». 21 Αζομάν ντινάς-λεν εντολή μα τι βακερέν-λες ανταβά καεκχέσκε, 22 αλλά βακερντάς: «Ο Τσσαβό ι τζενέσκο πρέπει τι τσσίντελ μπουτ ντα τι κερντιόλ πέρα κατά πρεσβύτεροι, κατά μπαρέ ιερείς ντα κατά γραμματείς, τι μερέλ ντα κο τρίτος ντιβές τι ιστίλ».
23 Σοράν βακερέλας σαριλένγκε: «Άμα εκ τζενό μανγκέλα τι αβέλ παλά-μάντε, τι τσσιναβέλ τι τζουβντιόλ πέσκε, τι βάντελ πι ντουκχένγκο κας* κάθε ντιβές ντα μα τι τσσιναβέλ τι πφιρέλ παλά-μάντε. 24 Σόσκε κον μανγκέλα τι σώνελ πι ζωή* κα χασαρέλ-λα, αλλά κον κα χασαρέλ μάνγκε πι ζωή,* βοβ κα σώνελ-λα. 25 Μπαγιά, σο λατσσιπέ κα ντικχέλ ο τζενό άμα κα αβέλ λέσκο σαρό ο ντουνιάς αλλά κα χασαρέλ πο νεαυτός ή κα κερέλ ζιάνι πι ζωγιάκε; 26 Κον κα λατζάλ μάνγκε ντα μι λαφίνγκε, ο Τσσαβό ι τζενέσκο κα λατζάλ λέσκε κάνα κα αβέλ πιρέ ζοριάσαρ* ντα οντουλάσαρ σο τθερέλα ο Ντατ ντα ο άγιοι άγγελοι. 27 Αλλά μπαγιά βακεράβα τουμένγκε ότι ισί τζενέ ατθέ σο να κα μερέν, μέχρι τι ντικχέν ι Βασιλεία ι Ντεβλέσκι».
28 Ντα αντικάς αβιλό-πες, πασέ οχτώ ντιβεσά σοράν ανταλέ λαφίνταρ, λιντάς πέσαρ ι Πετρός, ι Ιωαννής ντα ι Ιακωβός ντα νικλιντάς κο βες τι προσευχίντιβελ. 29 Ντα σαρ προσευχίντιβελας, λέσκο μούι αλλαξάλο ντα λέσκε σέα αβιλέ παρνέ ντα λένας-πες. 30 Ντα ντούι μουρσά κερένας λάφι λέσαρ, ο Μωυσής ντα ο Ηλίας. 31 Βον λένας-πες* ντα βακερένας σαρ κα νασέλας ο Ιησούς ντα ότι ανταβά κα νικιόλας μπαγιά κι Ιερουσαλήμ. 32 Ι Πετρός ντα οντουλέν σο ισινέ λέσαρ λιντάς-λεν η λίντρα, αλλά κάνα τζανγκάντιλε ντιπ, ντικχλέ ι Ιησούς σο λέλας-πες* ντα ι ντουέ μουρσέν σο ισινέ λέσαρ. 33 Ντα σαρ νασένας βον λέσταρ, ο Πέτρος βακερντάς ι Ιησούσκε: «Δάσκαλε, λατσσές ισινάμ ατθέ. Οτθάρ, τι τσσίντας τριν τσαντίρια, εκ τούκε, εκ ι Μωυσίσκε ντα εκ ι Ηλιάσκε». Όμως, να αγαβέλας σο βακερέλας. 34 Αλλά καζόμ κερέλας λάφι ατζέκ, αβιλό οπρά-λέντε εκ σύννεφος. Σο ντινέ αντρέ κο σύννεφος, νταρασάλε. 35 Αζομάν ασούντιλε ακαλά λάφια αντράλ κατά σύννεφος: «Ακαβά ισί μο Τσσαβό σο τραμπιντόμ-λες. Τι ασουνέν-λες». 36 Ντα κάνα ασούντιλε ανταλά λάφια, ο Ιησούς ισινέ κορκορό. Ντα βον να κερντέ λάφι ντα να βακερντέ καεκχέσκε οντουλά ντιβεσά τίποτα οντουλένταρ σο ντικχλέ.
37 Ο γιαβέρ ντιβές, κάνα γουλίστιλε κατά βες, ντικχλέ-λες μπουτ τζενέ. 38 Ντα εκ μουρς ντινάς βίκος αντράλ κατά τζενέ: «Δάσκαλε, μολίναβα-τουτ τι ντικχές μι τσσαβές, σόσκε σάντε λες τθεράβα. 39 Ασταρέλα-λες εκ δαίμονας, ντα αζομάν βοβ ντέλα βίκος ζουρανές. Ατζέ, κερέλα-λες τι ιζράλ μπουτ ντα τι νικαβέλ κεπίκια* κατά μούι, ντα ζορίσαρ μουκχέλα-λες αφού καλιαρέλα σαρό λέσκο σώμας. 40 Μολιντόμ τι μαθητέν τι νικαβέν-λες, αλλά ναστί κερντέ-λες». 41 Ο Ιησούς βακερντάς: «Ο τζενέ σο τζουβντιόνα ανταλέ βακιτίστε* να τθερένα πίστη ντα ισί γκεραλέ.* Καζόμ κα αβάβ τουμέντζαρ ντα κα νταϊντίναβ-τουμέν; Αν τι τσσαβές ατθέ». 42 Αλλά καζόμ ο τσσαβό αβέλας πασέ, ο δαίμονας περαντάς-λες τελέ ντα κερντάς-λες τι ιζράλ ζουρανές. Όμως, ο Ιησούς ντινάς βίκος οπράλ κο δαίμονας ντα κερντάς λατσσές ι τσσαβές ντα ντινάς-λες λέσκε νταντέστε. 43 Ντα σαρέ ατσσιλέ πουταρντέ μόσαρ κατά μπαρί ζορ ι Ντεβλέσκι.
Καζόμ σαρέ σαστίνενας σαρέ οντουλένταρ σο κερέλας, βακερντάς πι μαθητένγκε: 44 «Ασουνέν λατσσές ανταλά λάφια ντα μα μπιστρέν-λεν, σόσκε ο Τσσαβό ι τζενέσκο κα προδόντιβελ ντα κα ντιντιόλ κο βαστά κι τζενένγκε». 45 Βον όμως να αγαβένας σο βακερέλας. Μπαγιά, ανταλά λάφια ισινέ γκεραντέ λένταρ για μα τι αγαβέν-λεν, ντα νταρένας τι πουτσέν-λες ανταλένγκε.
46 Σοράν χάνας-πες λαφίντζαρ κον λένταρ ισινέ ο πο μπαρό. 47 Ο Ιησούς τζανέλας σο τθερένας πουμαρέ γκίστε, οτθάρ λιντάς εκχέ χουρντές, τσσουντάς-λες πασέ πέστε 48 ντα βακερντάς λένγκε: «Κον κα δεχτίνελ ακαλέ χουρντές μάξους μι ναβέσκε, δεχτίνελα μαν-ντα. Ντα κον κα δεχτίνελ μαν δεχτίνελα εμ Οντουλές σο μπουτσσαντάς-μαν. Κον σικαβέλα οντουλέντζαρ σο κερέλα ότι ισί ο πο χουρντό σαρέ τουμένταρ, βοβ ισί μπαρό».
49 Ο Ιωάννης βακερντάς: «Δάσκαλε, ντικχλάμ εκχέ τζενές τι νικαβέλ δαιμονέν τι ναβέστε ντα βακερντάμ λέσκε τι τσσιναβέλ, σόσκε να αβέλα παλ’ αμέντε». 50 Αλλά ο Ιησούς βακερντάς λέσκε: «Μα τσσιναβέν-λες. Κον να τζάλα τουμέντζαρ κόντρα τσσίντελα τουμένταρ».
51 Καζόμ ερεσένας ο ντιβεσά για τι λιντιόλ κο ουρανός, λιντάς ι απόφαση τι τζαλ κι Ιερουσαλήμ. 52 Ντα μπουτσσαντάς μερικέ μαθητέν πο τζανγκλέ πέσταρ. Ντα βον γκιλέ ντα ντινέ αντρέ εκχέ γκαβέστε κι Σαμάρεια για τι λατσσαρέν λέσκε ο τθαν σο κα μπεσέλας. 53 Αλλά ο Σαμαρείτες να δεχτιντέ-λες, σόσκε λιντάας ι απόφαση τι τζαλ κι Ιερουσαλήμ. 54 Κάνα ο μαθητές Ιάκωβος ντα Ιωάννης ντικχλέ-λες ανταβά, βακερντέ: «Κύριε, μανγκέσα τι βακεράς τι περέλ γιακ* κατά ουρανός ντα τι καταστραφίνελ-λεν;» 55 Αλλά βοβ μπολντιντάς-πες ντα διορθωντάς-λεν. 56 Οτθάρ, γκιλέ γιαβερέ γκαβέστε.
57 Κο ντρομ, εκ τζενό βακερντάς λέσκε: «Κα αβάβ παλά-τούτε κάι-ντα τι τζας». 58 Αλλά ο Ιησούς βακερντάς λέσκε: «Ο αλεπούδες τθερένα τθανά τι τσσουβέν-πες ντα ο τσιρικλέ τθερένα κάι τι μπεσέν, αλλά ο Τσσαβό ι τζενέσκο να τθερέλα κάι τι τσσουβέλ πο σορό». 59 Σοράν βακερντάς εκχέ γιαβερέσκε: «Έλα παλά-μάντε». Βοβ βακερντάς: «Κύριε, μουκχ-μαν πρώτα τι τζαβ τι πραχούναβ μι νταντές». 60 Αλλά βοβ βακερντάς λέσκε: «Μουκχ ι μουλέν τι πραχούνεν πουμαρέ μουλέν, αλλά τούι τζα ντα μούτθαβ ο λατσσέ αμπέρια ι Ντεβλέσκε Βασιλειάκερε». 61 Ντα εκ γιαβέρ βακερντάς: «Κα αβάβ παλά-τούτε, Κύριε, αλλά πρώτα μουκχ-μαν τι χαιρετίναβ μι τζενέν». 62 Ο Ιησούς βακερντάς λέσκε: «Κον οργώνελα εκ χωράφι ντα ντικχέλα ο πράγματα σο ισί παλάλ να κερέλα ι Ντεβλέσκε Βασιλειάκε».