Ο Ευαγγέλιος σο Γραφιντάς ο Ματθαίος
17 Σιοβ ντιβεσά σοράν, ο Ιησούς λιντάς πέσαρ σάντε ι Πετρός, ι Ιακωβός ντα λέσκε πφραλές ι Ιωαννής ντα γκερντάς-λεν εκχέ βουτσσέ βεσέστε. 2 Αλλαντάς μορφή ανγκλά-λέντε. Λέσκο μούι αβιλό σάφκι σαρ ο κχαμ ντα λέσκε σέα λένας-πες* σαρ ο φως. 3 Ντα άκ’! Σικαντάς-πες λένγκε ο Μωυσής ντα ο Ηλίας σο κερένας λάφι ι Ιησούσαρ. 4 Αζομάν ο Πέτρος βακερντάς ι Ιησούσκε: «Κύριε, λατσσές ισινάμ ατθέ. Άμα μανγκέσα, κα τσσίνταβ ατθέ τριν τσαντίρια, εκ τούκε, εκ ι Μωυσίσκε ντα εκ ι Ηλιάσκε». 5 Καζόμ κερέλας λάφι ατζέκ, αβιλό οπρά-λέντε εκ σύννεφος σο λέλας-πες ντα ασούντιλε ακαλά λάφια αντράλ κατά σύννεφος: «Ακαβά ισί μο Τσσαβό σο μανγκάβα-λες μπουτ ντα κερέλα μο γκι. Τι ασουνέν-λες». 6 Σο ασουντέ-λες ανταβά ο μαθητές, πελέ τελέ μόσαρ ντα πφερντιλέ νταρ. 7 Αζομάν ο Ιησούς αβιλό πασέ, ασταρντάς-λεν ντα βακερντάς λένγκε: «Ιστίν. Μα νταρέν». 8 Κάνα βαντιντέ πουμαρέ γιακχά, ντικχλέ σάντε ι Ιησούς, καεκχέ γιαβερές. 9 Καζόμ γουλίνας κατά βες, ο Ιησούς ντινάς-λεν ακαγιά εντολή: «Μα βακερέν καεκχέσκε ι φαντασία σο ντικχλέν μέχρι τι ιστίλ ο Τσσαβό ι τζενέσκο κατά μουλέ».
10 Ο μαθητές πουτσλέ-λες: «Ντα σόσκε βακερένα ο γραμματείς ότι πρέπει πρώτα τι αβέλ ο Ηλίας;» 11 Βοβ βακερντάς: «Ο Ηλίας μπαγιά αβέλα ντα κα κερέλ-λεν σαρέ σαρ ισινέ ανγκλέ. 12 Όμως, με βακεράβα τουμένγκε ότι ο Ηλίας αβιλό ντα να αγαντέ-λες, αλλά κερντέ λέσκε σο-ντα ντέλας λένγκο γκι. Αντικάς ο Τσσαβό ι τζενέσκο-ντα κα τσσίντελ μπουτ λένγκε βαστέντε». 13 Αζομάν ο μαθητές αγαντέ ότι κερέλας λένγκε λάφι ι Ιωαννίσκε.*
14 Καζόμ τζάνας κο μπουτ τζενέ σο γκιντισάλεας οτθέ, εκ τζενό γκιλό πασέ κο Ιησούς, πελό κοτσίντζαρ ανγκλά-λέστε ντα βακερντάς: 15 «Κύριε, τζίτζινε* μι τσσαβέσκε, σόσκε τθερέλα επιληψία ντα ισί νασφαλό.* Μπουτ φαρ περέλα κι γιακ* ντα μπουτ φαρ κο πανί. 16 Αντόμ-λες τι μαθητέντε, αλλά ναστί κερένας-λες λατσσές». 17 Ο Ιησούς βακερντάς: «Ο τζενέ σο τζουβντιόνα ανταλέ βακιτίστε* να τθερένα πίστη ντα ισί γκεραλέ.* Καζόμ κα αβάβ τουμέντζαρ; Καζόμ κα νταϊντίναβ-τουμέν; Ανέν-λες ατθέ μάντε». 18 Αζομάν ο Ιησούς ντινάς βίκος οπράλ κο δαίμονας ντα ο δαίμονας νικίστιλο κατά τσσαβό. Οντουλέ σαατίσταρ ο τσσαβό αβιλό λατσσές. 19 Σοράν, ο μαθητές γκιλέ πασέ κο Ιησούς ντα βακερντέ χωρίς τι ασουνέν ο γιαβερά: «Σόσκε αμέν ναστί νικαβάας-λες;» 20 Βοβ βακερντάς λένγκε: «Σόσκε τουμαρί πίστη ισί χουρντί. Μπαγιά βακεράβα τουμένγκε: Άμα τθερένα αζόμ πίστη καζόμ ισί εκ μπουτ χουρντό σπόρος,* κα βακερέν ακαλέ βεσέσκε: “Νας ακατάρ ντα τζα οκουτέ” ντα κα τζαλ, ντα κα τθερέν ι ζορ τι κερέν-λεν σαρέ». 21 ——
22 Αζομάν σο ισινέ γκιντιμέ ο Ιησούς πι μαθητέντζαρ κι Γαλιλαία βακερντάς λένγκε: «Ο Τσσαβό ι τζενέσκο κα προδόντιβελ ντα κα ντιντιόλ κο βαστά κι τζενένγκε. 23 Βον κα μουνταρέν-λες ντα κο τρίτος ντιβές κα ιστίλ». Κάνα ασουντέ-λες ανταβά, πφανγκιλό μπουτ λένγκο γκι.
24 Κάνα ερεσλέ κι Καπερναούμ, γκιλέ πασέ κο Πέτρος ο μουρσά σο γκίντενας ο φόρος, σο ισινέ ντούι ντραμάς,* ντα βακερντέ: «Να ποκινέλα τουμαρό δάσκαλος ο φόρος σο ισί ντούι ντραμάς;» 25 Βοβ βακερντάς: «Βα, ποκινέλα». Αλλά κάνα ντινάς αντρέ κο κχερ, ερεσαντάς-λες ο Ιησούς ντα βακερντάς λέσκε: «Σο αμντίνεσα, Σίμωνα; Κάσταρ λένα ο βασιλιάδες ι πφουβιάκε σαβέ τι μανγκές φόροι; Πουμαρέ τσσαβένταρ ή γιαβερένταρ;» 26 Κάνα βοβ βακερντάς: «Γιαβερένταρ», ο Ιησούς βακερντάς λέσκε: «Οτθάρ, ο τσσαβέ νανέ υποχρεωμέ τι ποκινέν φόρος. 27 Αλλά για μα τι χολιασκιαράς-λεν,* τζα κι ντεριάβ, τσσουβ αγκίστρι ντα λε ο πρώτος ματσσό σο κα νικιόλ. Κάνα κα πουτρές λέσκο μούι, κα αρακχές εκ ασημένιος κέρμας.* Λε-λες ντα ντε-λες λέντε μάνγκε ντα τούκε».