Γράμμας σο Μπουτσσάντιλο κο Ρωμαίοι
10 Πφραλάλεν, ανταβά σο μανγκάβα σαρέ μι γκίσαρ ντα σο μολίναβα* ι Ντεβλές ανταλέσκε ισί τι σώντιβεν ο Ισραηλίτες. 2 Μουτθαβάβα ότι βον κερένα πράγματα ι Ντεβλέσκε σαρέ πουμαρέ γκίσαρ, αλλά να τζανένα-λες ντιπ λατσσές. 3 Επειδή να τζανένα ι δικαιοσύνη ι Ντεβλέσκι, μανγκένα τι κερέν πουμαρέ κανόνες. Οτθάρ, να ντινέ καν κο δίκαιοι κανόνες κι Ντεβλέσκε. 4 Ο Χριστός τσσουντάς τέλος κο Νόμος, ντα αντικάς κον σικαβέλα πίστη λέστε τι αβέλ δίκαιος.
5 Ο Μωυσής γραφίνελα σαρ κα τθερέλ εκ τζενό δικαιοσύνη αντράλ κατά Νόμος: «Ο τζενό σο κερέλα ανταλά πράγματα κα τζουβντιόλ αντράλ ανταλένταρ». 6 Αλλά η δικαιοσύνη σο αβέλα αντράλ κατά πίστη βακερέλα: «Μα βάκερ αντρά-τούταρ: “Κον κα νικλίλ κο ουρανός;” δηλαδή για τι γουλιαρέλ ι Χριστός 7 ή “Κον κα γουλίλ κι άβυσσος;”* δηλαδή για τι ανέλ ι Χριστός κατά μουλέ». 8 Αλλά σο βακερέλα η Γραφή; «Ο λάφι ισί πασέ τούτε, τι μόστε ντα τι γκίστε». Ανταβά ισί «ο λάφι» σο μουτθαβάσα ντα μανγκέλα πίστη εκ τζενό για τι πακιάλ-λες. 9 Άμα κα μουτθαβές τι μόσαρ ανγκλάλ κο τζενέ ότι ο Ιησούς ισί Κύριος ντα κα πακιάς αντρέ τι γκίστε ότι ο Ντεβέλ ιστικιαρντάς-λες κατά μουλέ, κα σώντιβες. 10 Σόσκε πι γκίσαρ εκ τζενό σικαβέλα πίστη ντα ανταβά ανέλα δικαιοσύνη, αλλά πι μόσαρ μουτθαβέλα ανγκλάλ κο γιαβερά οντουλά σο πακιάλα ντα ανταβά ανέλα σωτηρία.
11 Η Γραφή βακερέλα: «Καέκ τζενό σο τθερέλα πι πίστη λέστε να κα λατζάντιβελ». 12 Ο Ιουδαίοι να τθερένα καέκ διαφορά κατά Μπαλαμέ. Εκ ισί ο Κύριος σαριλένγκο. Βοβ ντέλα αντράλ πι γκίσταρ σαρέ οντουλέντε σο ντένα λέσκε μπέσα. 13 Σόσκε «κον κα ντελ μπέσα κο ναβ κι Ιεχωβάσκο* κα σώντιβελ». 14 Αλλά σαρ κα ντεν λέσκε μπέσα άμα να πακιαντέ λέστε; Ντα σαρ κα πακιάν λέστε άμα να ασουντέ λέσκε; Ντα σαρ κα ασουνέν άμα καέκ να κα μουτθαβέλ λένγκε λέσκε λάφια; 15 Ντα σαρ κα μουτθαβέν λέσκε λάφια άμα να μπουτσσάντιλε ανταλέσκε; Σαρ ισί γραμμέ: «Σο σουκάρ ισί ο πιντρέ οντουλένγκε σο μουτθαβένα λατσσέ αμπέρια λατσσέ πραγματένγκε!»
16 Αλλά να ντινέ σαρέ καν κο λατσσέ αμπέρια, σόσκε ο Ησαΐας βακερέλα: «Ιεχωβά,* κον πακιαντάς οντουβά σο βακερντάμ αμέν;» 17 Άρα, η πίστη αβέλα σοράν ανταλέσταρ σο ασουνέλα εκ τζενό. Ντα ανταβά σο ασουνέλα εκ τζενό ισί αντράλ κατά λάφι σο τθερέλα τι κερέλ ι Χριστόσαρ. 18 Αλλά πουτσάβα: Να ασουντέ; Βα, ασουντέ. Η Γραφή βακερέλα: «Ανταλά λάφια ερεσλέ σαρί κι πφουβ, μέχρι κο τθαν σο ισί πο ντουρ οπράλ κι πφουβ». 19 Αλλά πουτσάβα: Να τζανέλας ο Ισραήλ; Πρώτος ο Μωυσής βακερέλα: «Κα κεράβ-τουμέν τι ζηλίνεν οντουλέν σο νανέ λαός. Κα κεράβ-τουμέν τι χολιάνεν μπουτ ιτιρί εκχέ ντινιλέ λαόσταρ». 20 Ο Ησαΐας βακερέλα μπίνταρανες: «Αρακχλέ-μαν οντουλά σο να ρόντενας μάνγκε. Σικαντόμ-μαν οντουλένγκε σο να μανγκένας τι αρακχέν-μαν». 21 Αλλά βακερέλα ακαβά σο τθερέλα τι κερέλ ι Ισραηλίσαρ: «Σαρό ο ντιβές πουτράβας μο βαστά εκχέ λαόσκε σο να ντέλα καν ντα ισί πφαρέ σορέσκο».