Γράμμας σο Μπουτσσάντιλο κο Ρωμαίοι
4 Αφού αντικάς ισί ο πράγματα, σο κα βακεράς ότι κερδιντάς αμαρό πάππους ο Αβραάμ; 2 Για παράδειγμας, άμα ο Αβραάμ κα βακέρντιβελας δίκαιος αντράλ οντουλένταρ σο κερέλας, κα τθερέλας λόγος τι ισαρέλ-πες, αλλά όχι ανγκλάλ κο Ντεβέλ. 3 Σο βακερέλα η Γραφή; «Ο Αβραάμ σικαντάς πίστη κο Ιεχωβά,* ντα βακέρντιλο δίκαιος». 4 Οντουβά σο κερέλα μπουτί να ποκίντιβελα επειδή σικάντιβελα λέσκε μπαρό λατσσιπέ, αλλά επειδή αξίνελα τι ποκίντιβελ. 5 Οκιά μπάνταρ, βακερέν ότι εκ τζενό να ντέλα πι μπέσα οντουλέντε σο κερέλα, αλλά τθερέλα πίστη κο Ντεβέλ. Ο Ντεβέλ, σο βακερέλα ότι ο πφιρνό* ισί δίκαιος, ντικχέλα ι πίστη ανταλέ τζενέσκι σαρ δικαιοσύνη. 6 Ατζέ-ντα άμα εκ τζενό να κερέλα ντιπ λατσσές ο νόμος, βακέρντιβελα δίκαιος κατά Ντεβέλ, οτθάρ ισί ευτυχισμέ. Εμ ο Δαβίδ κερντάς λάφι ανταλέ πραγμάσκε κάνα βακερντάς: 7 «Ευτυχισμέ ισί οντουλά σο συγχωρίντιλε ι γκεραλέ* πραγματένγκε σο κερντέ ντα λένγκε αμαρτίες ιτσσάρντιλε.* 8 Ευτυχισμέ ισί ο τζενό σο λέσκι αμαρτία να κα ατσσικιαρέλ-λα ο Ιεχωβά* πι γκοντιάτε».
9 Αβέλα ανταγιά ευτυχία σάντε οντουλέντε σο κερντέ περιτομή ή οντουλέντε-ντα σο να κερντέ; Επειδή βακεράσα: «Κατά πίστη σο σικαντάς ο Αβραάμ βακέρντιλο δίκαιος». 10 Κάνα βακέρντιλο δίκαιος; Κάνα κερντάας περιτομή ή κάνα να κερντάας; Να κερντάας ατζέ περιτομή αζομάν σο βακέρντιλο δίκαιος κατά Ντεβέλ. 11 Βοβ βακερντάς λέσκε τι κερέλ περιτομή. Ανταβά ισινέ εκ σημάδι σο σικαβέλας ότι ισινέ δίκαιος αντράλ κατά πίστη σο τθερέλας κάνα να κερντάας ατζέ περιτομή. Αντικάς, αβιλό ντατ σαρέ οντουλένγκο σο τθερένα πίστη παρόλο σο να κερντέ περιτομή, ντα βον βακέρντιβενα δίκαιοι κατά Ντεβέλ. 12 Αβιλό ντατ οντουλένγκο-ντα σο κερντέ περιτομή. Όμως, να αβιλό ντατ σάντε λένγκο, αλλά εμ οντουλένγκο σο πφιρένα σωστά κι ίδια πίστη σο πφιρντάς αμαρό ντατ ο Αβραάμ κάνα να κερντάας ατζέ περιτομή.
13 Ο Ντεβέλ ντινάς πο λάφι κο Αβραάμ ντα λέσκε προσαγγονίντε ότι κα ντέλας-λες σαρ κληρονομιά ι νεβέ ντουνιάς, όχι επειδή κερέλας ο νόμος αλλά επειδή βακέρντιλο δίκαιος αντράλ κατά πίστη σο σικαντάς. 14 Άμα ο τζενέ κα λένας ι κληρονομιά αντράλ κατά Νόμος, η πίστη κα χασαρέλας πι αξία ντα ο λάφι σο ντινάς ο Ντεβέλ να κα τθερέλας καέκ νόημας. 15 Ο Νόμος ανέλα ι μπαρί χολί ι Ντεβλέσκι, αλλά οτθέ σο νανέ νόμος νανέ ούτε αμαρτία.
16 Άκ’ σόσκε αντράλ κατά πίστη λάσα οντουλά σο ντινάς πο λάφι ο Ντεβέλ τι κερέλ, επειδή σικαβέλα αμένγκε μπαρό λατσσιπέ. Σαρέ ο προσάγγονα ι Αβρααμίσκε κα ντικχέν τι νικιόλ μπαγιά ο λάφι σο ντινάς, εμ οντουλά σο ντένα καν κο Νόμος, αλλά εμ οντουλά σο τθερένα πίστη σαρ ο Αβραάμ, σο ισί ντατ σαρέ αμένγκε. 17 (Σαρ ισί γραμμέ: «Τσσουντόμ-τουτ τι αβές ντατ μπουτέ τθεμένγκο».) Ο Αβραάμ σικαντάς ανταγιά πίστη ανγκλάλ κο Ντεβέλ σο τζουβντιαρέλα ι μουλέν ντα κερέλα λάφι ι πραγματένγκε σο ατζέ να αβιλέ-πες σαρ τι αβιλέ-πες. 18 Ο Αβραάμ μπεκλεντίνελας ντα πακιάλας ότι κα αβέλας ντατ μπουτέ τθεμένγκο, παρόλο σο ντικχίντιβελας ότι ανταβά ναστί αβέλας-πες. Πακιαντάς οντουβά σο βακερντάας λέσκε ο Ντεβέλ: «Αντικάς κα αβέν το προσάγγονα». 19 Να τθερέλας μπίζουρανι πίστη, αλλά αγαβέλας ότι λέσκο σώμας ισινέ σαρ μουλό (σόσκε ισινέ πασέ 100 μπρεσένγκο). Ντα τζανέλας ότι η Σάρρα ναστί κερέλας τσσαβέν. 20 Όμως, επειδή ο Ντεβέλ ντινάας-λες πο λάφι, τθερέλας πίστη, οτθάρ ισινέ ντιπ σίγουρος. Αβιλό ζουρανό αντράλ κατά πίστη ντα ντινάς δόξα ι Ντεβλές. 21 Ντέλας μπέσα σαρέ πι γκίσαρ ότι ο Ντεβέλ μπορίνελας τι κερέλ σαρέ οντουλά σο βακερντάας. 22 Οτθάρ, «βακέρντιλο δίκαιος».
23 Όμως, ο λάφια «βακέρντιλο δίκαιος» να γραφίντιλε σάντε λέσκε, 24 αλλά αμένγκε-ντα σο κα βακέρντιβας δίκαιοι, σόσκε πακιάσα Οντουλέστε σο τζουβντιαρντάς ι Ιησούς, αμαρέ Κυριός, κατά μουλέ. 25 Βοβ μουλό αμαρέ αμαρτιένγκε ντα ιστίντιλο κατά μουλέ για τι βακέρντιβας δίκαιοι κατά Ντεβέλ.