Ο Γράμμας σο Γραφιντάς ο Ιάκωβος
2 Πφραλάλεν, σαρ αβέλα-πες εμ τι τθερέν πίστη αμαρέ δοξασμέ Κυριόστε, κο Ιησούς Χριστός, εμ τι ξεχωρίνεν ι τζενέν; 2 Βακερέν ότι αβέλα τουμαρέ συναθροισιάτε εκ μουρς σο ιρίλα χρυσά ανγκρουσνιά ντα σουκάρ σέα ντα εκ τσορορό σο ιρίλα μελαλέ σέα. 3 Ντα τουμέν σικαβένα σεβασμός οντουλέσκε σο ιρίλα ο σουκάρ σέα ντα βακερένα λέσκε: «Τούι μπες ακατέ, κι λατσσί θέση», αλλά κο τσορορό βακερένα: «Τούι άτσσουβ οπράλ κο πιντρέ» ή «Μπες τελέ, οτθέ σο τσσουβάβα μο πιντρέ». 4 Άμα κερένα-λες ανταβά, να τσσουβένα εκχέ τζενές πο οπρέ εκχέ γιαβερέσταρ ντα να κρίνενα ι τζενέν μπέτι τροπόσαρ;
5 Ασουνέν, πφραλάλεν σο μανγκάβα-τουμέν μπουτ. Ο Ντεβέλ τραμπιντάς οντουλέν σο ισί τσορορέ ανταλέ ντουνιάστε για τι αβέν χουλανέ κι πίστη. Ντα τραμπιντάς-λεν για τι λεν* ι Βασιλεία σο ντινάς πο λάφι τι ντελ-λα οντουλέντε σο μανγκένα-λες. 6 Τουμέν όμως να σεβάνενα ι τσορορές. Ο χουλανέ νανέ οντουλά σο ζορισκιαρένα-τουμέν ντα τσσίντενα-τουμέν για τι γκερέν-τουμέν κο δικαστήρια; 7 Βον να τζάνα κόντρα πουμαρέ λαφίντζαρ κο λατσσό ναβ σο ντιντιλό-τουμέν; 8 Η Γραφή βακερέλα: «Μανγκ ι γιαβερέν* σαρ μανγκέσα τουτ». Άμα κερένα ανταβά νόμος ι Βασιλιάσκο, κερένα μπουτ λατσσές. 9 Αλλά άμα ξεχωρίνενα ι τζενέν, αμαρτίνενα, ντα ο νόμος σικαβέλα ότι να ντένα καν.
10 Άμα εκ τζενό ντέλα καν σαρό κο Νόμος κι Μωυσίσκο αλλά να κερντάς εκ κατά εντολές, αμαρτίνελα κόντρα σαρό κο Νόμος κι Μωυσίσκο. 11 Οντουβά σο βακερντάς: «Μα κερ λουμνιπέ οπράλ τι μπιαβέστε»* βακερντάς ακαβά-ντα: «Μα μούνταρ». Οτθάρ, άμα να κερντάν λουμνιπέ οπράλ τι μπιαβέστε αλλά μουνταρντάν, να ντινάν καν κο νόμος. 12 Τι κερέν λάφι ντα τι συμπεριφερίντιβεν σαρ οντουλά σο κα κρίντιβεν κατά νόμος σο ανέλα ελευθερία κο τζενέ. 13 Οντουβά σο να συγχωρίνελα κα κρίντιβελ χωρίς τι συγχωρίντιβελ. Η συγχώρηση* ισί πο μπαρί κατά κρίση.
14 Πφραλάλεν, σο αξία τθερέλα άμα εκ τζενό βακερέλα ότι τθερέλα πίστη αλλά να σικαβέλα-λες ι λατσσέ πραγματέντζαρ σο κερέλα; Μήπως κα σώνελ-λες ανταγιά πίστη; 15 Βακερέν ότι εκ πφραλ ή εκ πφεν να τθερένα σέα* ντα ο χαμπέ σο τθερένα ισί μπουτ χάνικ. 16 Άμα εκ τζενό τουμένταρ κα βακερέλ λένγκε: «Τζαν τουμένγκε λατσσιμάσαρ, μακάρι τι τατιόν ντα τι τσαλιόν», αλλά να κα ντεν-λεν σέα ντα χαμπέ, σο αξία τθερέλα ανταβά; 17 Αντικάς η πίστη-ντα, άμα να σικάντιβελα ι λατσσέ πραγματέντζαρ σο κεράσα, ισί μουλί.
18 Εκ τζενό όμως κα βακερέλ: «Τούι τθερέσα πίστη ντα με κεράβα λατσσέ πράγματα. Σίκαβ μάνγκε τι πίστη χωρίς τι κερές λατσσέ πράγματα, ντα με κα σικαβάβ τούκε μι πίστη ι λατσσέ πραγματέντζαρ σο κεράβα». 19 Τούι πακιάσα ότι ο Ντεβέλ ισί εκ τανό, αντικάς νανέ; Μπουτ λατσσές κερέσα. Ο δαίμονες-ντα όμως πακιάνα αλλά νταρένα. 20 Μανγκέσα τι τζανές, τούι σο να αγαβέσα, ότι η πίστη σο να σικάντιβελα λατσσέ πραγματέντζαρ να τθερέλα αξία; 21 Ο Αβραάμ αμαρό ντατ βακέρντιλο δίκαιος χάρη κο λατσσέ πράγματα σο κερντάς. Ανταβά αβιλό-πες επειδή θυσιαντάς πι τσσαβές ι Ισαακίς κο θυσιαστήριος. 22 Ντικχέσα ότι εμ τθερέλας πίστη εμ κερέλας λατσσέ πράγματα, ντα χάρη ανταλέ λατσσέ πραγματένταρ σικάντιλο ντιπ λατσσές ότι τθερέλας αληθινή πίστη.* 23 Οτθάρ-ντα νικίστιλε μπαγιά ακαλά λάφια ι Γραφιάκε: «Ο Αβραάμ σικαντάς πίστη κο Ιεχωβά,* ντα βακέρντιλο δίκαιος», ντα ο Ιεχωβά* βακερντάς ότι ισινέ λέσκο αμάλ.*
24 Άρα, αγαβένα ότι ο τζενό να κα βακέρντιβελ δίκαιος σάντε κατά πίστη σο τθερέλα αλλά κατά λατσσέ πράγματα-ντα σο κερέλα. 25 Αντικάς η Ραάβ-ντα σο ισινέ λουμνί βακέρντιλι δίκαια χάρη κο λατσσέ πράγματα σο κερντάς. Ανταβά αβιλό-πες επειδή δεχτιντάς λατσσιμάσαρ οντουλέν σο μπουτσσάντιλεας τι ντικχέν ο τθεμ αποτσοράλ ντα βοηθιντάς-λεν τι νασέν γιαβερέ ντρομέσταρ. 26 Ισί μπαγιά ότι ο σώμας, άμα να λέλα ανάσα,* ισί μουλό. Αντικάς η πίστη-ντα, άμα να σικάντιβελα ι λατσσέ πραγματέντζαρ σο κεράσα, ισί μουλί.