Γράμμας σο Μπουτσσάντιλο κο Ρωμαίοι
1 Ανταβά γράμμας μπουτσσαβάβα-λες με ο Παύλος σο ισινόμ δούλος ι Χριστόσκο, ι Ιησούσκο. Βοβ ντινάς-μαν βίκος για τι αβάβ απόστολος ντα τσσουντάς-μαν τι μουτθαβάβ ο λατσσέ αμπέρια ι Ντεβλέσκερε. 2 Ο Ντεβέλ κο πουρανέ μπρεσά κερντάς λάφι αντράλ πι προφητένταρ κι άγια Γραφή ανταλέ λατσσέ αμπερίνγκε 3 σο τθερένα τι κερέν λέσκε Τσσαβέσαρ. Βοβ ισινέ προσάγγονος ι Δαβιδίσκο, 4 αλλά αντράλ κατά ζορ ι άγιε πνευμάσκι ιστίντιλο κατά μουλέ, ντα αντικάς σικάντιλο ότι ισί Τσσαβό ι Ντεβλέσκο. Βοβ ισί ο Ιησούς Χριστός, αμαρό Κύριος. 5 Αντράλ λέσταρ, ο Ντεβέλ σικαντάς αμένγκε μπαρό λατσσιπέ. Ο Ιησούς τραμπιντάς-μαν τι αβάβ απόστολος για τι βοηθίναβ τζενέν σαρέ κατά τθεμά τι πακιάν, τι ντεν καν ντα τι δοξάνεν λέσκο ναβ. 6 Τουμέν-ντα ισινέν οντουλένταρ σο ισί γιαβερέ τθεμένταρ, ντα ο Ντεβέλ ντινάς-τουμέν βίκος τι τζαν παλάλ κο Ιησούς Χριστός. 7 Ανταβά γράμμας ισί σαρέ οντουλένγκε κι Ρώμη σο μανγκέλα-λεν ο Ντεβέλ ντα ντινάς-λεν βίκος για τι αβέν άγιοι:
Προσευχίντιβαβα τι τθερέν μπαρό λατσσιπέ ντα ειρήνη κατά Ντεβέλ αμαρέ Νταντέσταρ ντα κατά Κύριος Ιησούς Χριστός.
8 Πρώτα τι τζανέν ότι βακεράβα ευχαριστώ μι Ντεβλέσκε αντράλ κατά Ιησούς Χριστός σαρέ τουμένγκε, σόσκε σαρό κο ντουνιάς βακέρντιβελα ότι τθερένα πίστη. 9 Ο Ντεβέλ, σο ντάβα-λες άγια υπηρεσία σαρέ μι γκίσαρ κάνα μουτθαβάβα ο λατσσέ αμπέρια σο τθερένα τι κερέν λέσκε Τσσαβέσαρ, τζανέλα ότι ποτές να τσσιναβάβα τι τσσουβάβ-τουμέν μι προσευχιέντε. 10 Ντα μολίναβα, άμα αβέλα-πες ντα άμα μανγκέλα ο Ντεβέλ, τι αβάβ τουμέντε, 11 σόσκε μανγκάβα μπουτ τι ντικχάβ-τουμέν για τι νταβ-τουμέν εκ πνευματικός δώρος ντα αντικάς τι αβέλ τουμαρί πίστη πο ζουρανί. 12 Ή γιαβερέ λαφίντζαρ για τι λας σαρέ ζορ κατά πίστη ο εκ ι γιαβερέσκι, εμ τουμαριάταρ εμ μιριάταρ.
13 Μανγκάβα τι τζανέν, πφραλάλεν, ότι μπουτ φαρ μανγκάβας τι αβάβ τουμέντε, αλλά ναστί αβάβας. Μανγκάβας τι ντικχάβ λατσσέ πράγματα αμαρέ εργόσταρ οτθέ, σαρ αβέλα-πες κο γιαβερά-ντα τθεμά. 14 Ισινόμ υποχρεωμέ τι μουτθαβάβ ι Ντεβλέσκε λάφια σαριλένγκε, εμ κο Μπαλαμέ εμ κο ξένοι,* εμ κο γκοντιαβέρ εμ οντουλέντε σο νανέ γκοντιαβέρ. 15 Οτθάρ, μανγκάβα μπουτ τι μουτθαβάβ ο λατσσέ αμπέρια τουμένγκε-ντα οτθέ κι Ρώμη. 16 Να λατζάβα ι λατσσέ αμπερίνγκε. Ανταλά ισί ζορ ι Ντεβλέσκι για τι σώντιβεν σαρέ οντουλά σο πακιάνα, ο Ιουδαίοι πρώτα αλλά ο Μπαλαμέ-ντα. 17 Αντράλ κατά λατσσέ αμπέρια η δικαιοσύνη ι Ντεβλέσκι σικάντιβελα οντουλένγκε σο πακιάνα λέστε ντα ανταβά κερέλα λένγκι πίστη πο ζουρανί, σαρ ισί γραμμέ: «Αλλά ο δίκαιος κα τζουβντιόλ σόσκε τθερέλα πίστη».
18 Η μπαρί χολί ι Ντεβλέσκι σικάντιβελα κατά ουρανός ι τζενένγκε σο να ντένα-λες καν ντα κερένα γκεραλέ* πράγματα. Βον τσσιναβένα ι τζενέν για μα τι σικλιόν ι αλήθεια. 19 Ο Ντεβέλ σικαντάς λένγκε μπουτ λατσσές μπερεκέτι πράγματα σο τθερένα τι κερέν λέσαρ. 20 Λέσκε ιδιότητες σο ναστί ντικχάσα-λεν αγαβάσα-λεν άμα κα σικλιάς σαρ κερντιλό ο ντουνιάς. Μπορίνασα τι σικλιάς σαρ ισί βοβ άμα κα ντικχάς λατσσές ο πράγματα σο λατσσαρντάς. Ανταλά πράγματα σικαβένα λέσκι ζορ σο ατσσόλα για πάντα ντα ότι βοβ ισί ο Ντεβέλ, οτθάρ βον να τθερένα δικαιολογία. 21 Παρόλο σο σικλιλέ ι Ντεβλέσκε, να ντινέ-λες δόξα ντα να βακερντέ λέσκε ευχαριστώ. Αλλά οντουλά σο τθερένας πουμαρέ γκοντιάτε ισινέ ντινιλικανέ ντα λένγκο σουκό γκι πφερντιλό καρανίκι. 22 Ισί μπαγιά ότι οντουλά τζενέ βακερένα ότι ισί γκοντιαβέρ, αλλά αβιλέ ντινιλέ. 23 Αντίς τι ντεν δόξα κο Ντεβέλ σο ναστί μερέλα, βον ντένα δόξα ειδωλόντε σο μοιάζενα κο τζενέ σο μερένα, κο τσιρικλέ, κο ζώα σο τθερένα σταρ πιντρέ ντα κο ζώα σο ταρτίνενα-πες.
24 Οντουλέσκε, επειδή μανγκένας τι κερέν οντουλά σο ντέλας λένγκο γκι, ο Ντεβέλ μουκχλάς-λεν κο μαγαριπέ για τι ανέν λατζ πουμαρέ σωμάστε. 25 Βον τραμπιντέ τι χουχάντιβεν ντα μα τι πακιάν ι αλήθεια ι Ντεβλέσκι ντα ντένα λατρεία ντα υπηρεσία κο πράγματα σο κερντιλέ ντα όχι Οντουλέστε σο κερντάς-λεν, σο ισί δοξασμέ για πάντα. Αμήν. 26 Οτθάρ, ο Ντεβέλ μουκχλάς-λεν κο τζουνγκαλέ λουμνικανέ πράγματα σο μανγκένα μπουτ τι κερέν. Ο τζουβλιά τζάνα τζουβλίντζαρ ντα αντικάς γκιλέ κόντρα κο τρόπος σο λατσσαρντάς-λεν ο Ντεβέλ. 27 Αντικάς ο μουρσά-ντα να τζάνα τζουβλίντζαρ αλλά μανγκλέ μπουτ τι σοβέν ο εκ ι γιαβερέσαρ, μουρσά μουρσέντζαρ. Κερντέ τζουνγκαλέ πράγματα ντα αντέ οπρά-πουμέντε σαρί ι τιμωρία σο αξίνενας πουμαρέ αμαρτιάκε.
28 Βον να μανγκλέ τι τζανέν ι Ντεβλές,* οτθάρ ο Ντεβέλ μουκχλάς-λεν τι τθερέν γκεραλέ πράγματα πουμαρέ γκοντιάτε για τι κερέν πράγματα σο νανέ λατσσέ. 29 Ντα βον σαρέ κο πράγματα αβιλέ άδικοι, πφιρνέ,* μπίτσαλε γιακχάκε ντα γκεραλέ. Ισί πφερντέ ζήλια,* μουνταρένα, χάνα-πες, χουχαβένα ντα μπεϊντίνενα* τι τσσιντικιαρέν μπουτ ι γιαβερέν, κερένα κουτσομπολιός, 30 χαλαβένα ι γιαβερένγκο ναβ, μισίνενα ι Ντεβλές, να σικαβένα ιτς σεβασμός, ισί μπαρικανέ, ισαρένα-πες, ντικχένα* σαρ τι κερέν ο γκεραλιπέ, να ντένα καν πουμαρέ νταντέστε ντα πουμαρέ νταγιάτε, 31 να αγαβένα, να ατσσικιαρένα πουμαρό λάφι, να μανγκένα μπαγιά ι γιαβερέν ντα να τζιτζίνενα.* 32 Παρόλο σο βον τζανένα μπουτ λατσσές ο δίκαια λάφια ι Ντεβλέσκε, ότι οντουλά σο κερένα ασακέ πράγματα αξίνενα τι μερέν, συνεχίνενα τι κερέν-λεν ανταλά αλλά τσσίντενα-ντα οντουλένταρ σο κερένα-λεν.