Ο Ευαγγέλιος σο Γραφιντάς ο Ιωάννης
1 Κι αρχή ισινέ ο Λάφι, ντα ο Λάφι ισινέ γιεκ ι Ντεβλέσαρ, ντα ο Λάφι ισινέ ντεβέλ.* 2 Βοβ ισινέ κι αρχή γιεκ ι Ντεβλέσαρ. 3 Σαρέ ο πράγματα κερντιλέ αντράλ λέσταρ, ντα μπι λέσκο να κερντιλό ούτε εκ πράγμας.
Οντουβά σο κερντιλό 4 αντράλ λέσταρ ισινέ ζωή, ντα η ζωή ισινέ ο φως ι τζενένγκο. 5 Ντα ο φως λέλα-πες αντρέ κο καρανίκι, αλλά ο καρανίκι να ισινέ πο ζουρανό λέσταρ.
6 Αβιλό εκ τζενό σο μπουτσσάντιλο κατά Ντεβέλ. Λέσκο ναβ ισινέ Ιωάννης. 7 Βοβ αβιλό σαρ μάρτυρας, για τι σικαβέλ κο τζενέ ο φως, ντα αντικάς σαβέ τι μανγκές τζενέ τι πακιάν αντράλ οντουλένταρ σο βακερντάς. 8 Να ισινέ βοβ ο φως, αλλά αβιλό τι σικαβέλ κο τζενέ ο φως.
9 Ο αληθινός φως, σο λέλα-πες οπράλ σαβέ τι μανγκές τζενέντε, ισινέ τι αβέλ ατζεχάνικ κο ντουνιάς. 10 Βοβ ισινέ κο ντουνιάς, ντα ο ντουνιάς κερντιλό αντράλ λέσταρ, αλλά ο ντουνιάς να αγαντάς κον ισί. 11 Αβιλό πι τθεμέστε, αλλά να δεχτιντέ-λες. 12 Όμως, σαρέ οντουλέντε σο δεχτιντέ-λες ντινάς ο δικαίωμας τι αβέν τσσαβέ ι Ντεβλέσκε, σόσκε σικαβένας πίστη λέσκε ναβέστε. 13 Ντα βον να μπιάντιλε τζενένταρ ή επειδή μανγκλάς-λες εκ τζενό ή εκ μουρς, αλλά κατά Ντεβέλ.
14 Ο Λάφι αβιλό τζενό ντα μπεσλό γιεκ αμέντζαρ, ντα ντικχλάμ σαρ ισί λέσκι δόξα, δόξα σαρ οντιά σο τθερέλα εκ μοναδικός τσσαβό πι νταντέσταρ. Ντα βοβ ισινέ πφερντό λατσσιπέ κατά Ντεβέλ* ντα αλήθεια. 15 (Ο Ιωάννης κερντάς λάφι λέσκε κο τζενέ, βα, ντινάς βίκος: «Λέσαρ τθερέλα τι κερέλ ακαβά σο βακερντόμ: “Οντουβά σο αβέλα παλά-μάντε νακχλό ανγκλά-μάντε, σόσκε ισινέ πο τζανγκλέ μάνταρ”».) 16 Σαρέ λιντάμ λέσταρ μπερεκέτι μπαρό λατσσιπέ κατά Ντεβέλ, σόσκε βοβ ισινέ πφερντό ανταλέ λατσσιμάσταρ. 17 Επειδή ο Νόμος ντιντιλό αντράλ κατά Μωυσής, ο μπαρό λατσσιπέ κατά Ντεβέλ ντα η αλήθεια αβιλέ-πες μπαγιά αντράλ κατά Ιησούς Χριστός. 18 Καέκ τζενό να ντικχλάς ποτές ι Ντεβλές. Ο μοναδικός τσσαβό σο ισί σαρ ο Ντεβέλ ντα ισί πασέ κο Ντατ,* ισί οντουβά σο ντινάς-αμέν τι αγαβάς κον ισί.
19 Ανταβά ισί σο βακερντάς ο Ιωάννης κάνα ο Ιουδαίοι μπουτσσαντέ ιερεόν* ντα Λευιτέν κατά Ιερουσαλήμ για τι πουτσέν-λες: «Κον ισινάν τούι;» 20 Ντα βοβ βακερντάς: «Με να ισινόμ ο Χριστός». 21 Ντα βον πουτσλέ-λες: «Άρα; Ο Ηλίας ισινάν;» Βοβ βακερντάς: «Να ισινόμ». «Ο Προφήτης ισινάν;» Ντα βοβ βακερντάς: «Νάα!» 22 Οτθάρ βακερντέ λέσκε: «Κον ισινάν; Βάκερ αμένγκε, για τι τθεράς σο τι βακεράς οντουλένγκε σο μπουτσσαντέ-αμέν. Κον βακερέσα ότι ισινάν;» 23 Βοβ βακερντάς: «Με ισινόμ ο τζενό σο ντέλα βίκος ζουρανές κι έρημος: “Κερέν ίσιος ι Ιεχωβάσκο* ντρομ”, σαρ βακερντάς ο προφήτης Ησαΐας». 24 Όμως, οντουλά σο μπουτσσάντιλε ισινέ κατά Φαρισαίοι. 25 Οτθάρ, πουτσλέ-λες ντα βακερντέ λέσκε: «Ντα σόσκε μπολέσα, άμα να ισινάν τούι ο Χριστός ούτε ο Ηλίας ούτε ο Προφήτης;» 26 Ο Ιωάννης βακερντάς λένγκε: «Με μπολάβα πανίστε. Οτθέ σο ισινέν ισί εκ τζενό σο να τζανένα-λες, 27 οντουβά σο αβέλα σοράν μάνταρ, ντα με να ισινόμ άξιος ούτε τι πουτράβ λέσκι τεράχ».* 28 Ανταλά αβιλέ-πες κι Βηθανία κι γιαβέρ μπάντα κατά Ιορδάνης, οτθέ σο μπολέλας ο Ιωάννης.
29 Ο γιαβέρ ντιβές ντικχλάς ι Ιησούς τι αβέλ κάρινγκ λέστε ντα βακερντάς: «Άκ’ ο Μπρακό ι Ντεβλέσκο σο νασκιαρέλα ι αμαρτία ι ντουνιάσκι! 30 Λέσαρ τθερέλα τι κερέλ ακαβά σο βακερντόμ: “Παλά-μάντε αβέλα εκ μουρς σο νακχλό ανγκλά-μάντε, σόσκε ισινέ πο τζανγκλέ μάνταρ”. 31 Ντα με να τζανάβας-λες, αλλά για τι σικάντιβελ βοβ κο Ισραήλ αβιλόμ ντα μπολάβα πανίστε». 32 Ατζέκ, ο Ιωάννης βακερντάς: «Ντικχλόμ ο πνεύμας ι Ντεβλέσκο τι γουλίλ σαρ περιστέρι κατά ουρανός ντα ατσσιλό οπρά-λέστε. 33 Ντα με να τζανάβας-λες, αλλά Οντουβά σο μπουτσσαντάς-μαν τι μπολάβ πανίστε, Βοβ βακερντάς μάνγκε: “Οπράλ οντουλέστε σο κα ντικχές τι γουλίλ ντα τι ατσσόλ ο πνεύμας ι Ντεβλέσκο, βοβ ισί σο μπολέλα άγιε πνευμάστε”. 34 Ντα με ντικχλόμ-λες ανταβά ντα σικαντόμ κο τζενέ ότι βοβ ισί ο Τσσαβό ι Ντεβλέσκο».
35 Πάλι ο γιαβέρ ντιβές, ο Ιωάννης ισινέ ντουέ τζενέντζαρ σο ισινέ λέσκε μαθητένταρ, 36 ντα κάνα ντικχλάς ι Ιησούς τι πφιρέλ, βακερντάς: «Άκ’ ο Μπρακό ι Ντεβλέσκο!» 37 Κάνα ο ντούι μαθητές ασουντέ-λες τι βακερέλ-λες ανταβά, γκιλέ παλάλ κο Ιησούς. 38 Αζομάν ο Ιησούς μπολντιντάς-πες, ντα κάνα ντικχλάς ότι τζάνας παλά-λέστε, βακερντάς λένγκε: «Σο μανγκένα;» Βον βακερντέ λέσκε: «Ραββί (σο μανγκέλα τι βακερέλ «Δάσκαλε»), κάι μπεσέσα;» 39 Βοβ βακερντάς λένγκε: «Ελάν ντα κα ντικχέν». Οτθάρ, γκιλέ ντα ντικχλέ κάι μπεσέλας, ντα μπεσλέ λέσαρ οντουβά ντιβές. Ισινέ πασέ 4:00 κο μεσημέρι.* 40 Ο εκ κατά ντούι σο ασουντάς σο βακερντάς ο Ιωάννης ντα γκιλό παλάλ κο Ιησούς ισινέ ο Ανδρέας, ο πφραλ σο τθερέλας ο Σίμωνας Πέτρος. 41 Βοβ αρακχλάς πρώτα πι πφραλές ι Σιμωνάς ντα βακερντάς λέσκε: «Αρακχλάμ ι Μεσσιάς» (σο μανγκέλα τι βακερέλ «Χριστός»), 42 ντα γκερντάς-λες κο Ιησούς. Κάνα ο Ιησούς ντικχλάς-λες, βακερντάς: «Τούι ισινάν ο Σίμωνας, ο τσσαβό ι Ιωαννίσκο. Τούι κα βακέρντιβες Κηφάς» (σο μανγκέλα τι βακερέλ «Πέτρος»).
43 Ο γιαβέρ ντιβές, ο Ιησούς μανγκλάς τι τζαλ κι Γαλιλαία. Ντα αρακχλάς ι Φιλιππός ντα βακερντάς λέσκε: «Έλα παλά-μάντε». 44 Ο Φίλιππος ισινέ κατά Βηθσαϊδά, κατά πόλη ι Ανδρεάσκι ντα ι Πετρόσκι. 45 Γκιλό ο Φίλιππος κο Ναθαναήλ ντα βακερντάς λέσκε: «Αρακχλάμ οντουλές σο γραφιντάς λέσκε ο Μωυσής κο Νόμος ντα ο Προφήτες: ι Ιησούς, ι Ιωσηφίσκε τσσαβές, κατά Ναζαρέτ». 46 Ο Ναθαναήλ όμως βακερντάς λέσκε: «Μπορίνελα τι νικιόλ κάτι λατσσό κατά Ναζαρέτ;» Ο Φίλιππος βακερντάς: «Έλα ντα ντικχ». 47 Ο Ιησούς ντικχλάς ότι ο Ναθαναήλ αβέλας κάρινγκ λέστε ντα βακερντάς: «Άκ’ εκ σωστός Ισραηλίτης, σο ναστί χουχαβέλα». 48 Ο Ναθαναήλ βακερντάς λέσκε: «Κατάρ τζανέσα-μαν;» Ο Ιησούς βακερντάς: «Πριν τι ντελ-τουτ βίκος ο Φίλιππος, καζόμ ισινάνας τελάλ κατά χχελινγκίν, με ντικχλόμ-τουτ». 49 Ο Ναθαναήλ βακερντάς: «Ραββί, τούι ισινάν ο Τσσαβό ι Ντεβλέσκο, τούι ισινάν βασιλιάς ι Ισραηλίσκο». 50 Ο Ιησούς βακερντάς λέσκε: «Επειδή βακερντόμ τούκε ότι ντικχλόμ-τουτ τελάλ κατά χχελινγκίν πακιάσα; Κα ντικχές πράγματα πο μπαρέ ανταλένταρ». 51 Σοράν, βακερντάς λέσκε: «Μπαγιά, μπαγιά βακεράβα τουμένγκε: Κα ντικχέν ο ουρανός πουταρντό ντα ι αγγελόν ι Ντεβλέσκε τι νικλίν ντα τι γουλίν κάρινγκ κο Τσσαβό κι τζενέσκο».