Γράμμας σο Μπουτσσάντιλο κο Ρωμαίοι
16 Μπουτσσαβάβα τουμένγκε αμαρέ πφενιά σο βακερένα λάκε Φοίβη ντα υπηρετίνελα κι κχανγκιρί κο Κεγχρεές, 2 για τι δεχτίνεν-λα λατσσιμάσαρ αντικάς σαρ κα κερένας κο άγιοι κι Κυριόσκε. Τι ντεν-λα σο-ντα βοήθεια μανγκέλα, σόσκε βόι-ντα αρακχαντάς* μπουτέν, εμ μαν-ντα.
3 Κερέν σελιάμι* κι Πρίσκα ντα κο Ακύλας, σο γιεκ λέντζαρ κεράβα ο έργος ι Χριστόσκο, ι Ιησούσκο. 4 Βον τσσουντέ σε κίνδυνος πουμαρί ζωή μάνγκε* ντα βακεράβα λένγκε ευχαριστώ όχι σάντε με αλλά σαρέ ο κχανγκιριά-ντα σο ισί γιαβερέ τθεμέντε. 5 Κερέν σελιάμι κι κχανγκιρί-ντα σο ισί λένγκε κχερέστε. Κερέν σελιάμι κο Επαίνετος σο μανγκάβα-λες μπουτ ντα ισί αντρέ κο πρώτα τζενέ* κι Ασία σο αβιλέ μαθητές ι Χριστόσκε. 6 Κερέν σελιάμι κι Μαρία σο μαρντάς-πες μπουτ τουμένγκε. 7 Κερέν σελιάμι κο Ανδρόνικος ντα κο Ιουνίας, σο ισινόμ τζενέ λέντζαρ ντα ισινέ φυλακή γιεκ μάντζαρ. Λεν τζανένα-λεν μπουτ λατσσές ο απόστολοι ντα ισί ενωμέ ι Χριστόσαρ πο μπουτ βακίτι μάνταρ.
8 Κερέν σελιάμι κο Αμπλιάτος σο μανγκάβα-λες μπουτ ντα τζάλα βοβ-ντα παλάλ κο Κύριος. 9 Κερέν σελιάμι κο Ουρβανός σο αμέν γιεκ λέσαρ κεράσα ο έργος ι Χριστόσκο, ντα κο Στάχυς σο μανγκάβα-λες μπουτ. 10 Κερέν σελιάμι κο Απελλής σο κερέλα ο γκι ι Χριστόσκο. Κερέν σελιάμι οντουλένγκε σο ισί κο κχερ σο τθερέλα ο Αριστόβουλος. 11 Κερέν σελιάμι κο Ηρωδίωνας σο ισινόμ τζενέ λέσαρ. Κερέν σελιάμι οντουλένγκε σο ισί κο κχερ σο τθερέλα ο Νάρκισσος ντα σο ισί ενωμέ ι Κυριόσαρ. 12 Κερέν σελιάμι κι Τρύφαινα ντα κι Τρυφώσα σο κερένα μπερεκέτι λατσσέ πράγματα κο έργος κι Κυριόσκο. Κερέν σελιάμι κι Περσίδα σο μανγκάσα-λα μπουτ, σόσκε κερντάς μπερεκέτι λατσσέ πράγματα κο έργος κι Κυριόσκο. 13 Κερέν σελιάμι κο Ρούφος, σο τραμπιντάς-λες ο Κύριος, ντα λέσκε νταγιάκε σο τθεράβα-λα με-ντα σαρ ντάι. 14 Κερέν σελιάμι κο Ασύγκριτος, κο Φλέγοντας, κο Ερμής, κο Πατρόβας, κο Ερμάς ντα κο πφραλά σο ισί λέντζαρ. 15 Κερέν σελιάμι κο Φιλόλογος ντα κι Ιουλία, κο Νηρέας ντα λέσκε πφενιάκε, κο Ολυμπάς ντα σαρέ κο άγιοι σο ισί λέντζαρ. 16 Χαιρετίνεν ο εκ ι γιαβερές αντράλ τουμαρέ γκίσταρ.* Σαρέ ο κχανγκιριά ι Χριστόσκε κερένα τουμένγκε σελιάμι.
17 Βακεράβα τουμένγκε, πφραλάλεν, τι τθερέν τουμαρί γκοντί οντουλένταρ σο ανένα διχόνοια, σο κερένα ι γιαβερέν τι χασαρέν πουμαρί πίστη* ντα τζάνα κόντρα ανταλέντε σο σικλιλέν. Ατσσόν ντουρ λένταρ, 18 σόσκε ασακέ τζενέ νανέ δούλοι αμαρέ Κυριόσκε ι Χριστόσκε αλλά πουμαρέ σωμάσκε.* Βακερένα γκουλντέ λάφια ντα ισαρένα ι γιαβερέν ψεύτικε λαφίντζαρ για τι χουχαβέν ι αθώε τζενέν. 19 Σαρέ τζανένα ότι τουμέν ντένα καν, ντα χαιρίναβα μπουτ ανταλέσκε. Μανγκάβα όμως τι αβέν γκοντιαβέρ ντα τι κερέν ο λατσσιπέ, αλλά εμ τι αβέν αθώοι ντα τι ατσσόν ντουρ κατά γκεραλιπέ.* 20 Ο Ντεβέλ σο ντέλα ειρήνη κα καταστραφίνελ ι Μπενγκές τελάλ τουμαρέ πιντρένταρ ατζεχάνικ. Ο μπαρό λατσσιπέ αμαρέ Κυριόσκο, ι Ιησούσκο, τι αβέλ τουμέντζαρ.
21 Κερέλα τουμένγκε σελιάμι ο Τιμόθεος, σο γιεκ λέσαρ κεράβα ο έργος, εμ-ντα ο Λούκιος, ο Ιάσονας ντα ο Σωσίπατρος, σο ισινόμ τζενέ λέντζαρ.
22 Με, ο Τέρτιος, σο γραφιντόμ ανταβά γράμμας, κεράβα τουμένγκε σελιάμι κο ναβ κι Κυριόσκο.
23 Κερέλα τουμένγκε σελιάμι ο Γάιος, σο πουταρντάς πο κχερ μάνγκε ντα σαρέ ι κχανγκιριάκε. Κερέλα τουμένγκε σελιάμι ο Έραστος, σο ισί υπεύθυνος ι λοβένγκο κι πόλη, ντα ο Κούαρτος, λέσκο πφραλ. 24 ——
25 Ο Ντεβέλ μπορίνελα τι κερέλ-τουμέν ζουρανέ αντράλ κατά λατσσέ αμπέρια σο μουτθαβάβα ντα κατά αμπέρια σο τθερένα τι κερέν ι Ιησού Χριστόσαρ. Ανταλά αμπέρια σικάντιλε αντράλ κατά γκεραντό πράγμας* σο μπουτ βακίτι να μουτθάντιλοας. 26 Αλλά ακανά σικάντιλο αμένγκε ντα τζανάσα-λες αντράλ κατά προφητείες ι Γραφιάκε. Αμαρό Ντεβέλ σο ισί τζουβντό για πάντα ντινάς εντολή τι σικλιόν-λες σαρέ ο τθεμά, ντα αντικάς τι πακιάν Λέστε ντα τι ντεν-λες καν. 27 Κο Ντεβέλ, σο βοβ σάντε ισί γκοντιαβέρ, τι αβέλ η δόξα αντράλ κατά Ιησούς Χριστός για πάντα. Αμήν.