Ο Γράμμας σο Μπουτσσάντιλο κο Εβραίοι
6 Οτθάρ, ακανά σο σικλιλάμ ο πρώτα πράγματα ι Χριστόσκε, πρέπει τι συνεχίνας τι τζας ανγκλάλ για τι αβάς πνευματικά ζουρανέ.* Μα τι τσσουβάς πάλι θεμέλιος, δηλαδή μα τι σικλιάς πάλι ο πράγματα σο σικλιλάμας ανγκλέ. Σικλιλάμας ότι πρέπει τι μετανιώνας ι πραγματένγκε σο να τθερένα αξία, ότι πρέπει τι τθεράς πίστη κο Ντεβέλ 2 ντα ότι πρέπει τι μπολντιάς. Επίσης, σικλιλάμας σόσκε ο πφραλά πρέπει τι τσσουβέν πουμαρέ βαστά οπράλ εκχέ τζενέστε, ότι ο μουλέ κα τζουβντιόν πάλι ντα ότι ατσσόνα για πάντα ο αποφάσεις σο λέλα ο Ντεβέλ κάνα κρίνελα. 3 Ντα κα αβάς πνευματικά ζουρανέ* ι Ντεβλέσκε βοηθειάσαρ.
4 Μερικά τζενέ όμως λιντέ ο φως, ο δώρος σο αβέλα κατά ουρανός ντα ο άγιος πνεύμας. 5 Λέντε ντιντιλό ο λατσσό λάφι ι Ντεβλέσκο, ντα ντικχλέ ο ζουρανέ πράγματα σο τθερένα τι κερέν ι ντουνιάσαρ* σο κα αβέλ. 6 Αλλά σοράν ανταλά τζενέ κερντέ πέρα ο αληθινός σικλιαριπέ ντα να μπορίνελα καέκ τι βοηθίνελ-λεν τι μετανιώνεν, σόσκε ισί σαρ τι ιμπλαβένα πάλι κο κας ι Ντεβλέσκε Τσσαβές ντα ανένα λέσκε λατζ ανγκλάλ σαριλέντε. 7 Ο μπουτ μπρισιμά ισί ευλογία ι πφουβιάκε κατά Ντεβέλ, σόσκε ποτίνενα ι τσικ ντα αντικάς ο πράγματα σο σπειρίνενα ο τζενέ μπορίνενα τι μπαριόν. 8 Αλλά άμα η τσικ νικαβέλα καντρέ, να τθερέλα αξία ντα μπουτ σουγκό κα τθερέλ ι αρμάν ι Ντεβλέσκι ντα κο τέλος κα πφαμπόλ.
9 Αλλά κι περίπτωση τουμαρί, πφραλάλεν, παρόλο σο κεράσα λάφι ανταλέ τροπόσαρ, ισινάμ σίγουροι ότι ισινέν πο λατσσέ θεσιάτε οντουλένταρ σο νασλέ κατά πίστη ντα ότι κερένα πράγματα για τι σώνελ-τουμέν ο Ντεβέλ. 10 Ο Ντεβέλ νανέ άδικος για τι μπιστρέλ οντουλά σο κερντέν ντα ι αγάπη σο σικαντέν λέσκε ναβέσκε. Σικαβένα ότι κερένα-λεν ανταλά, αφού υπηρετίνενα ι αγιόν μέχρι ακανά. 11 Μανγκάσα όμως ο κάθε εκ τουμένταρ τι συνεχίνελ τι αβέλ μπουτιαρνό.* Αντικάς, τουμαρί ελπίδα κα αβέλ σίγουρη μέχρι κο τέλος. 12 Να μανγκάσα τι αβέν τεμπέληδες. Αλλά τι μοιάζεν οντουλέντε σο αντράλ κατά πίστη ντα κατά υπομονή λιντέ οντουλά σο ντινάς πο λάφι ο Ντεβέλ.
13 Ο Ντεβέλ βακερντάς κο Αβραάμ ότι σίγουρα κα ευλογίνελ-λες. Αλλά επειδή να υπαρχίντιβελα καέκ πο μπαρό κατά Ντεβέλ, ντινάς βοβ ο ίδιος πο λάφι κο Αβραάμ για τι σικαβέλ ότι μπαγιά κα κερέλας-λες ανταβά. 14 Βακερντάς: «Σίγουρα κα ευλογίναβ-τουτ ντα σίγουρα κα κεράβ-τουτ τι αβγατίντιβες». 15 Ντα αντικάς ο Αβραάμ, αφού πρώτα σικαντάς υπομονή, λιντάς οντουβά σο βακερντάς λέσκε ο Ντεβέλ. 16 Κάνα ο τζενέ βακερένα ότι κα κερέν κάτι, ντένα πουμαρό λάφι ανγκλάλ εκχέ πο μπαρέστε. Ανταβά βοηθίνελα-λεν μα τι χαν-πες, σόσκε κάνα ντένα πουμαρό λάφι σικαβένα ότι οντουβά σο βακερένα ισί μπαγιά. 17 Αντικάς ο Ντεβέλ-ντα ντινάς πο λάφι οντουλέντε σο κα λεν οντουβά σο βακερντάς λένγκε. Κερντάς-λες ανταβά κάνα αποφασιντάς τι σικαβέλ λένγκε ξεκάθαρα ότι λέσκο σκοπός ναστί αλλάνελα. 18 Αντικάς, ανταλέ ντουέ πραγματέντζαρ σο να αλλάνενα ντα σο ναστί βακερέλα ο Ντεβέλ ψέματα ανταλένγκε τι μπορίνας αμέν, σο τθαβντισάλαμ λέστε για τι αρακχαβέλ-αμέν, τι τθεράς ζορ για τι ατσσικιαράς σταθερή αμαρί ελπίδα. 19 Τθεράσα ανταγιά ελπίδα σαρ άγκυρα αμαρέ ζωγιάκε,* σίγουρη ντα σταθερή, ντα τζάλα αντράλ κατά κουρτίνα, 20 οτθέ σο γκιλό ο Ιησούς πο τζανγκλέ αμένταρ για τι πουτρέλ ντα τι ετοιμάνελ ο ντρομ αμένγκε. Βοβ αβιλό αρχιερέας σαρ ο Μελχισεδέκ ντα κα ατσσόλ για πάντα αρχιερέας.