Ο Γράμμας σο Μπουτσσάντιλο κο Φιλιππήσιοι

3 Οντουλέσκε, πφραλάλεν, συνεχίνεν τι χαιρίνεν κι υπηρεσία κι Κυριόσκι. Μάνγκε νανέ πρόβλημας τι γραφίναβ τουμένγκε ο ίδια πράγματα, ντα ισί τουμαρέ αρακχαϊμάσκε.

2 Τι αρακχαβέν-τουμέν κατά τζουνγκαλέ τζενέ.* Τι αρακχαβέν-τουμέν οντουλένταρ σο κερένα ο γκεραλιπέ.* Τι αρακχαβέν-τουμέν οντουλένταρ σο βακερένα τουμένγκε τι κερέν περιτομή. 3 Αμέν τθεράσα ι αληθινή περιτομή, αμέν σο ντάσα άγια υπηρεσία ι Ντεβλέσκε πνευμάσαρ ντα ισαράσα-αμέν ι Χριστόσκε, ι Ιησούσκε, ντα να ντάσα αμαρί μπέσα κο πράγματα σο ντένα μπέσα ο τζενέ. 4 Αλλά σαρέ κατά γιαβερά, με ισινόμ οντουβά σο τθερέλα λόγος τι ντελ μπέσα ανταλέ πραγματέντε.*

Άμα εκ γιαβέρ τζενό πακιάλα ότι τθερέλα λόγος τι ντελ μπέσα ανταλέ πραγματέντε, με τθεράβα ατζέ πο μπουτ λόγους, σόσκε 5 κερντέ μάνγκε περιτομή οπράλ κο οχτώ ντιβεσά. Ισινόμ κατά λαός Ισραήλ, κατά φάρα Βενιαμίν. Ισινόμ Εβραίος, τσσαβό Εβραιόνγκο. Ντάβας καν κο Νόμος σαρ Φαρισαίος. 6 Τζάβας κόντρα κι κχανγκιρί σαρέ μι γκίσαρ. Κεράβας σαρέ οντουλά σο βακερέλα ο Νόμος ότι ισί σωστά. 7 Αλλά οντουλά σο ανγκλέ ισινέ μάνγκε σημαντικά, ακανά σο ισινόμ μαθητής ι Χριστόσκο σαρέ ανταλά πακιάβα ότι να τθερένα ιτς αξία.* 8 Ντα πακιάβα ότι καέκ πράγμας να τθερέλα αξία ανγκλάλ κο σικλιαριπέ σο τθερέλα τι κερέλ ι Ιησού Χριστόσαρ, μι Κυριόσαρ. Ανταβά σικλιαριπέ ισί πο οπρέ σαρέ κατά γιαβερά πράγματα. Ι Χριστόσκε μουκχλόμ-λεν σαρέ ντα πακιάβα ότι ανταλά ισί σκουπίδια, για τι αβάβ λατσσό αμάλ* λέσκο 9 ντα τι αβάβ ενωμέ λέσαρ. Να ισινόμ δίκαιος επειδή κεράβα-λεν σαρέ σωστά σαρ βακερέλα ο Νόμος, αλλά επειδή πακιάβα κο Χριστός. Βα, οντουλά σο πακιάνα κο Χριστός ισί δίκαιοι κι Ντεβλέσκε γιακχά. 10 Οντουβά σο μανγκάβα ισί τι σικλιάβ ι Χριστός ντα ι ζορ οντουλέσκι σο τζουβντιαρντάς-λες ντα τι τσσίνταβ μπουτ σαρ βοβ. Ισινόμ έτοιμος ατζέ-ντα τι μεράβ σαρ βοβ 11 για τι ντικχάβ άμα μπορίναβα τι αβάβ οντουλένταρ σο κα τζουβντιόν πρώτοι κατά μουλέ.

12 Να βακεράβα ότι από ακανά λιντόμ ο βραβείος ή ότι αβιλόμ τέλειος. Αλλά να τσσιναβάβα τι κεράβ ο πο λατσσό για τι λαβ ο βραβείος, σόσκε τζανάβα ότι ο Χριστός Ιησούς τραμπιντάς-μαν ανταλέσκε. 13 Πφραλάλεν, με πακιάβα ότι ατζέ να λιντόμ-λες. Αλλά σίγουρα κεράβα ακαβά: Μπιστράβα οντουλά σο ισί παλάλ ντα τθάβνταβα για τι ερεσάβ κο πράγματα σο ισί ανγκλάλ. 14 Να τσσιναβάβα τι κεράβ ο πο λατσσό για τι λαβ ο βραβείος. Ανταβά βραβείος ισί η ζωή κο ουρανός σο κα ντελ ο Ντεβέλ οντουλέντε σο ντινάς βίκος αντράλ κατά Χριστός Ιησούς. 15 Οτθάρ, σαρέ αμέν σο ισινάμ πνευματικά ζουρανέ* τι τθεράς ανταβά τρόπος σκέψης. Άμα σκεφτίνενα γιαβέρτουλους, ο Ντεβέλ κα σικαβέλ τουμένγκε τι σκεφτίνεν σωστά. 16 Σαρ πφιρντάμ μέχρι ακανά για τι τζας ανγκλάλ, τι συνεχίνας τι πφιράς σωστά κο ίδιος ντρομ.

17 Σαρέ τουμέν, πφραλάλεν, τι μοιάζεν μάντε ντα τι τθερέν τουμαρέ γιακχά οντουλέντε σο τζουβντιόνα αντικάς σαρ σικαντάμ τουμένγκε αμέν. 18 Επειδή ισί μπουτ τζενέ σο τζάνα κόντρα κο Χριστός ντα κο κας λέσκε ντουκχένγκο.* Βακερντόμ τουμένγκε μπουτ φαρ ανταλέ τζενένγκε, αλλά ακανά ροϊμάσαρ κεράβα τουμένγκε λάφι λένγκε. 19 Βον τζάνα κι καταστροφή. Λένγκο ντεβέλ ισί ο πράγματα σο μανγκένα.* Ισαρένα-πες ι μπίλατζανε πραγματένγκε σο κερένα. Λένγκι γκοντί ισί πραγματέντε σο ισί κι πφουβ. 20 Αλλά ο τθεμ αμαρό* ισί κο ουρανός, ντα μπεσάσα οντουλέσκε σο κα σώνελ-αμέν, ι Κυριόσκε, ι Ιησού Χριστόσκε, σο ισί κο ουρανός. 21 Βοβ, ι μπαρέ ζοριάσαρ σο λιντάς για τι κερέλ κουμάντος σαρέ ο πράγματα, κα αλλάνελ αμαρό μπίζουρανο σώμας για τι αβέλ σαρ λέσκο σώμας σο τθερέλα μπαρί δόξα.