Ο Δεύτερος Γράμμας σο Μπουτσσάντιλο κο Κορίνθιοι

8 Πφραλάλεν, μανγκάσα τι βακεράς τουμένγκε ι μπαρέ λατσσιμάσκε σο σικαντάς ο Ντεβέλ κο κχανγκιριά κι Μακεδονία. 2 Καζόμ τσσίντενας μπουτ εκχέ μπαρέ προβλημάσταρ σο τθερένας, ντινέ μπαρέ χαράσαρ παρόλο σο ισινέ μπουτ τσορορέ. Ανταβά σικαντάς ότι βον ισί τζενέ σο ντένα αντράλ πουμαρέ γκίσταρ. 3 Ντινέ οντουλά σο μπορίνενας, αλλά με τζανάβα ότι ντινέ ατζέ πο μπουτ οντουλένταρ σο μπορίνενας. 4 Από κορκορέ μπουτ φαρ μολίνενας-αμέν τι ντεν πράγματα λατσσιμάσαρ για τι βοηθίνεν βον-ντα ι αγιόν. 5 Να κερντέ σάντε οντουλά σο μπεσάας τι κερέν, αλλά πρώτα ντινέ πουμαρό νεαυτός κο Κύριος ντα αμέντε αντικάς σαρ μανγκέλα ο Ντεβέλ. 6 Οντουλέσκε-ντα βακερντάμ κο Τίτος, σο βοβ αρχισάλο τι γκίντελ ο πράγματα σο ντινέν λατσσιμάσαρ τουμέν, τι γκίντελ-λεν σαρέ. 7 Σαρέ ο πράγματα κερένα-λεν μπουτ λατσσές. Τθερένα ζουρανί πίστη, τζανένα σαρ τι κερέν λάφι, τζανένα μπουτ πράγματα, σο-ντα κερένα ισί αντράλ τουμαρέ γκίσταρ ντα μανγκένα μπουτ ι γιαβερέν σαρ μανγκάσα-τουμέν αμέν. Οτθάρ, κάνα ντένα-ντα πράγματα για τι βοηθίνεν, συνεχίνεν τι κερέν-λες λατσσιμάσαρ.

8 Να βακεράβα-λες τουμένγκε ανταβά για τι νταβ-τουμέν εντολή, αλλά για τι τζανέν ότι γιαβερά μανγκλέ τι ντεν σαρέ πουμαρέ γκίσαρ ντα για τι ντικχάβ άμα τουμέν μανγκένα μπαγιά ι τζενέν. 9 Τζανένα ο μπαρό λατσσιπέ αμαρέ Κυριόσκο, ι Ιησού Χριστόσκο, ότι παρόλο σο ισινέ χουλανό, αβιλό τσορορό τουμένγκε για τι αβέν χουλανέ τουμέν αντράλ κατά τσοροριπέ λέσκο.

10 Με πακιάβα ακαβά: Ισί τουμαρέ λατσσιμάσκε τι ντεν ανταλά πράγματα, σόσκε εκ μπρες πο τζανγκλέ να αρχισάλεν σάντε τι γκίντεν-λεν, αλλά σικαντέν ότι μανγκένα-ντα τι ντεν-λεν. 11 Οτθάρ, ακανά τελειώνεν οντουβά σο αρχισάλεν τι κερέν. Αντικάς, κάνα κα ντεν οντουλά σο μπορίνενα, κα σικαβέν ότι μανγκένα τι ντεν αντράλ τουμαρέ γκίσταρ. 12 Κάνα εκ τζενό ντέλα αντράλ πι γκίσταρ, κερέλα μπουτ ι Ντεβλέσκο γκι, σόσκε ο Ντεβέλ να μανγκέλα τι ντας οντουβά σο να τθεράσα, αλλά οντουβά σο τθεράσα. 13 Να μανγκάβα τι κεράβ ι γιαβερένγκι ζωή εύκολη ντα τουμαρί δύσκολη. 14 Αλλά για τι υπαρχίντιβελ ισορροπία, ντεν ο πράγματα σο ατσσόνα-τουμέν ακανά για τι βοηθίνεν-λεν κο ανάγκες σο τθερένα βον. Αντικάς βον-ντα κα ντεν οντουλά σο ατσσόνα-λεν για τι βοηθίνεν κο ανάγκες σο τθερένα τουμέν. Ανταλέ τροπόσαρ, κα υπαρχίντιβελ ισορροπία. 15 Σαρ ισί γραμμέ: «Οντουβά σο τθερέλας μπουτ να τθερέλας αζόμ μπουτ, ντα οντουβά σο τθερέλας χάνικ να τθερέλας αζόμ χάνικ».

16 Βακεράσα ευχαριστώ κο Ντεβέλ σο ο Τίτος πφαμπόλα τουμένγκε αζόμ μπουτ αντικάς σαρ πφαμπάσα τουμένγκε αμέν. 17 Βοβ ασουντάς οντουβά σο βακερντάμ λέσκε, αλλά μανγκέλας-ντα μπουτ τι κερέλ-λες. Οτθάρ αβέλα τουμέντε από κορκορό. 18 Όμως, μπουτσσαβάσα γιεκ λέσαρ ι πφραλές σο ισαρένα-λες σαρέ κο κχανγκιριά οντουλένγκε σο κερέλα ι λατσσέ αμπερίνγκε. 19 Ντα ο κχανγκιριά τραμπιντέ-λες για τι αβέλ αμέντζαρ ντα τι βοηθίνελ-αμέν κάνα κα γκεράς ο πράγματα σο γκιντισάλε λατσσιμάσαρ για τι ντας-λεν κο πφραλά. Αντικάς, κα ντιντιόλ δόξα κο Κύριος ντα κα σικάντιβελ ότι μανγκάσα αντράλ αμαρέ γκίσταρ τι βοηθίνας. 20 Σαρέ ανταλά κεράσα-λεν ανταλέ τροπόσαρ για μα τι κατηγορίνελ-αμέν καέκ κάνα κα γκεράς ντα κα ντας ο πράγματα σο κα μπουτσσάντιβεν λατσσιμάσαρ κο πφραλά. 21 Επειδή “κεράσα σο νακχέλα αμαρέ βαστέσταρ για τι κεράς σαρέ ο πράγματα τίμια, όχι σάντε κο γιακχά κι Ιεχωβάσκε,* αλλά κι τζενένγκε-ντα”.

22 Μπουτσσαβάσα γιεκ λέντζαρ αμαρέ πφραλές σο μπουτ φαρ σικαντάς ότι μπορίνασα τι ντας λέσκε μπέσα μπουτέ πραγματέντε σο μανγκλάμ λέσταρ τι κερέλ. Αλλά ακανά μανγκέλα τι βοηθίνελ-τουμέν ατζέ πο μπουτ επειδή τζανέλα ότι τουμέν κα κερέν ο σωστός. 23 Άμα εκ τζενό νανέ σίγουρος οντουλένγκε σο κερέλα ο Τίτος, βακερέν λέσκε ότι κερέλα γιεκ μάντζαρ ο έργος ι Ντεβλέσκο ντα υπηρετίνελα μάντζαρ τουμαρέ λατσσιμάσκε. Ντα άμα εκ τζενό νανέ σίγουρος ι πφραλένγκε σο κα αβέν γιεκ λέσαρ, βακερέν λέσκε ότι μπουτσσάντιλε* κατά κχανγκιριά ντα ντένα δόξα κο Χριστός. 24 Οτθάρ, σικαβέν ανταλέ πφραλένγκε ότι μανγκένα-λεν μπουτ ντα ότι να ισαρντάμ-τουμέν σινανέ κο κχανγκιριά.