Ο Δεύτερος Γράμμας σο Γραφιντάς ο Πέτρος
2 Όμως, αντρέ κο λαός ισινέ προφήτες σο χουχαβένας, αντικάς σαρ κα αβέν τουμέντε-ντα δάσκαλοι σο χουχαβένα. Βον κα σικλιαρέν αποτσοράλ λάθος πράγματα σο κα καταστραφίνεν τουμαρί πίστη ντα κα βακερέν ότι να τζανένα ατζέ-ντα οντουλές σο κιντάς-λεν. Ανταλέ τροπόσαρ κα καταστραφίντιβεν μπουτ σουγκό. 2 Ντα μπουτ τζενέ κα κερέν βον-ντα ο μπίλατζανε πράγματα* σο κερένα βον, ντα ιτιρί λένταρ κα βακέρντιβεν μπέτι λάφια* ι Ντεβλέσκε ντρομέσκε. 3 Ντα ανταλά τζενέ σο ισί μπίτσαλε γιακχίνγκε κα χουχαβέν-τουμέν ψεύτικε λαφίντζαρ. Αλλά λένγκι τιμωρία σο αποφασιντάς κατά πουρανέ μπρεσά ο Ντεβέλ να αργίνελα ντα λένγκι καταστροφή ισί σίγουρος ότι κα αβέλ.
4 Ο Ντεβέλ τιμωριντάς ι αγγελόν σο αμαρτιντέ, φουρτιντάς-λεν κο Τάρταρος,* ντα πφαντάς-λεν τζαντζιρίντζαρ* κο μπαρό καρανίκι μέχρι τι τιμωρίντιβεν. 5 Ντα τιμωριντάς ι ντουνιάς κο ντιβεσά σο τζουβντιόλας ο Νώε, αλλά λες σο μουτθαβέλας ο σωστός ντρομ ι Ντεβλέσκο αρακχαντάς-λες ντα γιεκ λέσαρ αρακχαντάς γιαβερέ εφτά τζενέν κάνα αντάς κατακλυσμός εκχέ ντουνιάστε σο ισινέ πφερντό τζενέντζαρ σο να σεβάνενας ι Ντεβλές. 6 Ντα κάνα πφαμπαρντάς ο πόλεις Σόδομα ντα Γόμορρα, τιμωριντάς-λεν. Ανταλέ τροπόσαρ σικαντάς σο κα αβέλ-πες κο τζενέ σο να σεβάνενα ι Ντεβλές. 7 Ντα ελευθερωντάς ι δίκαιε τζενές σο βακερένας λέσκε Λωτ. Ο Λωτ στεναχωρίντιβελας μπουτ κατά μπίλατζανε πράγματα* σο κερένας ο πφιρνέ* τζενέ. 8 Βα, ανταβά δίκαιος τζενό, καζόμ τζουβντιόλας αντρέ ανταλέ μπουτ γκεραλέ* τζενέντε, ντικχέλας σαρ τζουβντιόνας ντα ασουνέλας οντουλά σο βακερένας, ντα αντικάς κάθε ντιβές ισινέ μπουτ στεναχωριμέ.* 9 Ο Ιεχωβά* τζανέλα εμ σαρ τι σώνελ κατά δοκιμασίες οντουλέν σο ισί αφοσιωμέ λέστε, αλλά εμ τι ατσσικιαρέλ ι άδικε τζενέν για τι καταστραφίντιβεν κο ντιβές σο κα κρίνελ ι τζενέν, 10 ατζέ πο μπουτ οντουλέν σο σοβένα ι γιαβερέντζαρ για τι μαγαρίνεν λένγκο σώμας ντα να σεβάνενα οντουλέν σο κερένα κουμάντος.
Επειδή να σικαβένα ιτς σεβασμός ντα ισί πφαρέ σορέσκε, να νταρένα τι βακερέν μπέτι λάφια* οντουλένγκε σο ισί δοξασμέ.* 11 Παρόλο σο ο άγγελοι ισί πο ζουρανέ, να κατηγορίνενα μπέτι λαφίντζαρ* ανταλέ δασκαλόν σο χουχαβένα, σόσκε ο άγγελοι σεβάνενα ι Ιεχωβάς.* 12 Όμως ανταλά τζενέ ισί σαρ ο ζώα σο να τθερένα λογική, σο κερένα πράγματα χωρίς τι σκεφτίνεν ντα μπιάντιβενα για τι αστάρντιβεν ντα τι καταστραφίντιβεν. Βακερένα μπέτι λάφια* πραγματένγκε σο να τζανένα. Βον κα καταστραφίντιβεν επειδή λιντέ γκεραλό ντρομ, 13 κα τιμωρίντιβεν ι γκεραλέ πραγματένγκε σο κερντέ.
Λένγκι απόλαυση ισί τι τζουβντιόν αντρέ κο χουλανιπέ, ατζέ-ντα κάνα ισί ντισάρα. Ισί σαρ σημάδια ντα ελαττώματα οπρά-τουμέντε. Κάνα χάνα γιεκ τουμέντζαρ μπεϊντίνενα* μπουτ σο χουχαβένα ι γιαβερέν ι ψεύτικε πραγματέντζαρ σο σικλιαρένα. 14 Λένγκε γιακχίντε ντικχίντιβελα καζόμ μπουτ μανγκένα τι κερέν λουμνιπέ οπράλ κο μπιαβ,* να μπορίνενα τι μουκχέν ι αμαρτία ντα χουχαβένα οντουλέν* σο ισί μπίζουρανε. Λένγκο γκι ισί σικλό τι αβέλ μπίτσαλο. Βον ισί τσσαβέ σο τθερένα αρμάν οπρά-πουμέντε. 15 Μουκχλέ ο ίσιος ντρομ, ντα αντικάς χουχάντιλε. Λιντέ ο ντρομ σο λιντάας ο Βαλαάμ, σο λέσκο ντατ ισινέ ο Βεώρ, ντα σο κερντάς ο γκεραλιπέ επειδή μανγκέλας μπουτ τι ποκίντιβελ, 16 αλλά ο Ντεβέλ σικαντάς λέσκε ότι ανταβά σο κερέλας ισινέ λάθος. Εκ χχερ σο ναστί κερέλας λάφι κερντάς λάφι σαρ τζενό ντα τσσιναντάς ο ντινιλικανό ντρομ σο λιντάας ο προφήτης.
17 Βον ισί σαρ σουκέ χανινγκά ντα σαρ ομίχλη σο γκερέλα-λα η ζουρανί μπαρμπάλ, ντα κα αβέλ οπρά-λέντε ο πο μπαρό καρανίκι. 18 Βακερένα λάφια σο ασούντιβενα σημαντικά αλλά να τθερένα αξία. Κατά πράγματα σο μανγκέλα λένγκο γκι ντα κατά μπίλατζανε πράγματα* σο κερένα, χουχαβένα τζενέν σο μόλις ακανά νασλέ οντουλένταρ σο ισί κο γκεραλό ντρομ. 19 Ανταλά δάσκαλοι σο χουχαβένα ντένα πουμαρό λάφι ότι κον κα τζαλ παλά-λέντε κα αβέλ ελεύθερος. Αλλά βον ισί δούλοι κο γκεραλέ πράγματα, σόσκε άμα εκ τζενό νικίντιβελα εκχέ γιαβερέσταρ, ισί λέσκο δούλος.* 20 Άμα βον σικλιλέ ντιπ λατσσές ι Κυριόσκε, ι Ιησού Χριστόσκε σο Σώνελα-αμέν, ντα αντικάς νασλέ κατά πράγματα ι ντουνιάσκε σο μαγαρίνενα ι τζενέν ντα σοράν βον ανακατούντιβενα πάλι ανταλέ πραγματέντε ντα νικίντιβενα, αβένα-πες λένγκε πο μπέτι πράγματα οντουλένταρ σο αβένας-πες ανγκλέ. 21 Κα αβέλας πο λατσσό μα τι σικλιόνας ντιπ λατσσές ο δίκαιος ντρομ παρά τι νασέν ντουρ κατά άγια εντολή σο λιντέ. 22 Λέντε νικίστιλε μπαγιά ακαλά λάφια: «Ο τζουκέλ βουρτισάλο πι τσσαντιματέντε, ντα ο γουρούνι σο τθοβντιλό γκιλό πάλι αντρέ κο τσικά».