Ο Γράμμας σο Γραφιντάς ο Ιούδας
1 Με ο Ιούδας σο ισινόμ δούλος ι Ιησού Χριστόσκο ντα πφραλ ι Ιακωβόσκο, γραφίναβα οντουλένγκε σο τραμπιντάς-λεν ντα μανγκλάς-λεν ο Ντεβέλ αμαρό Ντατ ντα αρακχαντάς-λεν για τι αβέν γιεκ ι Ιησού Χριστόσαρ:
2 Προσευχίντιβαβα τι τζιτζίνελ* τουμένγκε ο Ντεβέλ ατζέ πο μπουτ, τι ντελ-τουμέν πο μπουτ ειρήνη ντα τι μανγκέλ-τουμέν ατζέ πο μπουτ.
3 Πφραλάλεν, παρόλο σο κερντόμ σο νακχέλας μι βαστένταρ για τι γραφίναβ τουμένγκε σαρ κα σώνελ-αμέν ο Ντεβέλ, τελικά ντικχλόμ ότι έπρεπε τι γραφίναβ τουμένγκε ντα τι βακεράβ τουμένγκε τι μαρέν-τουμέν για μα τι χασαρέν ι πίστη σο ντιντιλί εκ φαρ για πάντα κο άγιοι. 4 Γραφίναβα τουμένγκε σόσκε τσσουντέ-πες αποτσοράλ αντρέ κι κχανγκιρί μερικά τζενέ σο βακέρντιλο αντρέ κι Γραφή πριν μπουτ μπρεσά ότι κα κρίντιβεν. Βον να σεβάνενα ιτς ι Ντεβλές ντα χρησιμοποιήνενα ο μπαρό λατσσιπέ αμαρέ Ντεβλέσκο* σαρ δικαιολογία για τι κερέν μπίλατζανε πράγματα* ντα σικάντιβελα ότι να πακιάνα μπαγιά κο Ιησούς Χριστός σο σάντε βοβ ισί αμαρό Κύριος ντα κιντάς-αμέν.
5 Μανγκάβα τι ανάβ τουμαρέ γκοντιάτε, παρόλο σο τζανένα-λεν λατσσές σαρέ ανταλά, ότι ο Ιεχωβά,* σωντάς εκχέ λαός κατά Αίγυπτος ντα σοράν καταστραφιντάς οντουλέν σο να σικαντέ πίστη. 6 Ντα ι αγγελόν σο μουκχλέ ι θέση σο τθερένας κι αρχή ντα ο τθαν σο μπεσένας, πφαντάς-λεν κο μπαρό καρανίκι τζαντζιρίντζαρ* σο ναστί πφανγκιόνα μέχρι τι κρίντιβεν κο μπαρό ντιβές. 7 Αντικάς-ντα ο Σόδομα ντα ο Γόμορρα ντα ο πόλεις οτθέ πασέ κερένας μπουτ μπαρό λουμνιπέ.* Κερένας πουμαρέ σωμάσαρ ο μπέτι πράγματα σο μανγκένας ντα ανταλά πράγματα τζάνα κόντρα κο τρόπος σο λατσσαρντάς ο Ντεβέλ ι τζενέν. Οντουλά πόλεις ντένα-αμέν παράδειγμας για τι τθεράς αμαρί γκοντί αμέν, σόσκε λιντέ τιμωρία σο ατσσόλα για πάντα γιακάσαρ.*
8 Όμως, εμ ανταλά τζενέ σο τσσουντέ-πες αντρέ κι κχανγκιρί κερένα φαντασία μπέτι πράγματα, ντα αντικάς σοβένα ι γιαβερέντζαρ για τι μαγαρίνεν ο σώμας, να σεβάνενα οντουλέν σο κερένα κουμάντος ντα βακερένα μπέτι λάφια* οντουλένγκε σο ισί δοξασμέ.* 9 Αλλά κάνα ο Μιχαήλ, ο αρχάγγελος, γκιλό κόντρα κο Μπενγκ ιτιρί κατά Μωυσίσκο σώμας, να νακχαντάς ο όρια. Οτθάρ-ντα να βακερντάς λέσκε μπέτι λαφίντζαρ* ότι κα τιμωρίντιβελ, αλλά βακερντάς: «Ο Ιεχωβά* τι τιμωρίνελ-τουτ». 10 Ανταλά τζενέ όμως βακερένα μπέτι λάφια* σαρέ ι πραγματένγκε σο να αγαβένα. Αλλά σαρέ ο πράγματα σο αγαβένα βον ισί πράγματα σο κερένα-λεν χωρίς τι σκεφτίνεν, σαρ ο ζώα σο να τθερένα λογική. Ανταλέντζαρ καταστραφίνενα πουμαρό νεαυτός.
11 Τιμωρία κα τσσίντεν βον, σόσκε λιντέ ο ντρομ σο λιντάας ο Κάιν ντα μπουτ σουγκό λιντέ ο λάθος ντρομ σο λιντάας ο Βαλαάμ για τι ποκίντιβελ. Ντα μουλέ επειδή γκιλέ κόντρα πουμαρέ λαφίντζαρ σαρ ο Κορέ οντουλέντε σο κερένας κουμάντος! 12 Βον ισί σαρ βράχια γκεραντέ τελάλ κατά ντεριάβ καζόμ ισί τουμέντζαρ κο τραπέζια σο κερένα τουμέν για τι σικαβέν τουμαρί αγάπη κο γιαβερά. Ισί τσομπάνια σο παρβαρένα πουμαρό νεαυτός χωρίς τι λατζάν. Ισί σαρ σουκέ σύννεφα σο γκερέλα-λεν η μπαρμπάλ εκ ακατάρ εκ οκουτάρ ντα σαρ δέντρα σο να νικαβένα καρπός πουμαρέ βακιτίστε, σο ισί ντιπ μουλέ ντα νικαντέ ριζάσαρ. 13 Ισί σαρ ο ζουρανέ κύματα ι ντεριαβάκε. Λένγκι τζουνγκαλί συμπεριφορά ισί σαρ ο αφρός σο νικαβένα ο κύματα ντα ισί σαρ τσεργανιά* σο νασλέ πουμαρέ ντρομέσταρ. Ο Ντεβέλ τσσουντάς-λεν κο μπαρό καρανίκι ντα κα ατσσόν οτθέ για πάντα.
14 Ο Ενώχ-ντα, ο έβδομος κι σειρά κατά Αδάμ βακερντάς ακαγιά προφητεία σο τθερέλας τι κερέλ λέντζαρ: «Ντικχέν! Αβιλό ο Ιεχωβά* πι μπουτέ* άγιε αγγελόντζαρ 15 για τι κρίνελ σαριλέν ντα τι καταδικάνελ σαρέ ι πφιρνέ* τζενέν σαρέ ι πφιρνικανέ πραγματένγκε σο κερντέ πφιρνικανέ τροπόσαρ ντα σαρέ ι μπέτι λαφίνγκε σο βακερντέ λέσκε ο πφιρνέ αμαρτωλοί».
16 Βον ισί τζενέ σο γκρινιάνενα, σο να ερεσένα-λεν οντουλά σο τθερένα, σο κερένα οντουλά σο μανγκέλα λένγκο γκι, σο ισαρένα-πες μπαρέ λαφίντζαρ ντα ισαρένα ι γιαβερέν ψεύτικε λαφίντζαρ πουμαρέ λατσσιμάσκε.
17 Τουμέν όμως, πφραλάλεν, τι ντεν-τουμέν γκοντί ο λάφια σο βακερντέ τουμένγκε ανγκλέ ο απόστολοι αμαρέ Κυριόσκε, ι Ιησού Χριστόσκε. 18 Βον βακερένας τουμένγκε ακαβά: «Κο τελευταία ντιβεσά κα αβέν τζενέ σο κα πρασάν ο λατσσέ πράγματα ντα κα κερέν ο πφιρνικανέ πράγματα σο μανγκέλα λένγκο γκι». 19 Βον ισί σο ανένα διχόνοια, συμπεριφερίντιβενα σαρ ο ζώα* ντα να τθερένα ο πνεύμας ι Ντεβλέσκο. 20 Αλλά τουμέν, πφραλάλεν, λεν ζορ αντράλ κατά άγια πίστη σο τθερένα ντα τι προσευχίντιβεν άγιε πνευμάσαρ 21 για τι ατσσικιαρέν τουμαρό νεαυτός κι αγάπη κι Ντεβλέσκι. Τι κερέν-λες ανταβά καζόμ μπεσένα τι τζιτζίνελ* τουμένγκε αμαρό Κύριος, ο Ιησούς Χριστός, για τι λεν ζωή για πάντα. 22 Ντα τι τζιτζίνεν* οντουλένγκε σο νανέ σίγουροι ι πραγματένγκε σο πακιάνα. 23 Τι λεν-λεν κατά καταστροφή* για τι σώνεν-λεν. Όμως γιαβερέ τζενένγκε τι τζιτζίνεν* νταριάσαρ ντα τι ατσσόν ντουρ ατζέ-ντα λένγκε σεΐνταρ σο μαγαριντέ-λεν επειδή κερντέ οντουλά σο μανγκέλα ο σώμας.
24 Ο Ντεβέλ μπορίνελα τι αρακχαβέλ-τουμέν για μα τι αμαρτίνεν ντα τι κερέλ-τουμέν εμ τι τθερέν μπαρί χαρά εμ τι ατσσόν ντιπ σωστοί ανγκλάλ λέσκε γιακχίντε.* 25 Σάντε βοβ ισί ο Ντεβέλ, σο Σώνελα-αμέν αντράλ κατά Ιησούς Χριστός αμαρέ Κυριόσταρ. Βοβ πάντα ισινέ δοξασμέ ντα μπαρό, τθερέλας ζορ ντα κερέλας κουμάντος. Αντικάς τι ατσσόλ εμ ακανά εμ για πάντα. Αμήν.