Ο Πρώτος Γράμμας σο Γραφιντάς ο Ιωάννης
3 Ντικχέν καζόμ μπαρί αγάπη σικαντάς αμένγκε ο Ντατ, τι βακέρντιβας τσσαβέ ι Ντεβλέσκε! Ντα ντιπ ανταβά ισινάμ. Άκ’ σόσκε ο ντουνιάς να τζανέλα-αμέν, επειδή να τζανέλα ι Ντεβλές. 2 Πφραλάλεν, ακανά ισινάμ τσσαβέ ι Ντεβλέσκε. Όμως, ατζέ να σικάντιλο σο κα αβάς, αλλά τζανάσα ότι κα αβάς σαρ λέστε κάνα βοβ κα σικάντιβελ, σόσκε κα ντικχάς-λες αντικάς σαρ ισί. 3 Ντα σαρέ οντουλά σο ντένα μπέσα* λέστε καθαρίνενα πουμαρό νεαυτός, σόσκε βοβ-ντα ισί πάκι.
4 Κον συνεχίνελα τι αμαρτίνελ τζάλα κόντρα κο νόμος κι Ντεβλέσκο. Άρα, η αμαρτία τζάλα κόντρα κο νόμος κι Ντεβλέσκο. 5 Τζανένα-ντα ότι βοβ σικάντιλο για τι νασκιαρέλ αμαρέ αμαρτίες, ντα να υπαρχίντιβελα αμαρτία λέστε. 6 Κον ατσσόλα ενωμέ λέσαρ να συνεχίνελα τι αμαρτίνελ. Κον συνεχίνελα τι αμαρτίνελ να ντικχλάς-λες ούτε τζανέλα-λες. 7 Μο τσσαβορέ, καέκ μα τι χουχαβέλ-τουμέν. Οντουβά σο κερέλα δίκαια πράγματα ισί δίκαιος, σαρ ισί δίκαιος βοβ-ντα. 8 Οντουβά σο συνεχίνελα τι αμαρτίνελ αβέλα κατά Μπενγκ, επειδή ο Μπενγκ αμαρτίνελα κατά αρχή.* Οτθάρ-ντα σικάντιλο ο Τσσαβό ι Ντεβλέσκο, για τι καταστραφίνελ οντουλά σο κερντάς ο Μπενγκ.
9 Οντουλά σο μπιάντιλε κατά Ντεβέλ να συνεχίνενα τι αμαρτίνεν, επειδή ο πνεύμας ι Ντεβλέσκο ισί λέντε, ντα βον να αβέλα-πες τι συνεχίνεν τι αμαρτίνεν, επειδή μπιάντιλε κατά Ντεβέλ. 10 Ο τσσαβέ ι Ντεβλέσκε ντα ο τσσαβέ ι Μπενγκέσκε αγαντίντιβενα ακαλέσταρ: Κον να κερέλα δίκαια πράγματα να αβέλα κατά Ντεβέλ, ούτε οντουβά σο να μανγκέλα πι πφραλές. 11 Ακαλά ισί ο λάφια σο ασουντέν κατά αρχή: πρέπει τι μανγκάς ο εκ ι γιαβερές. 12 Μα τι αβάς σαρ ο Κάιν, σο αβέλας κατά Μπενγκ* ντα μουνταρντάς πι πφραλές. Ντα σόσκε μουνταρντάς-λες; Επειδή ο πράγματα σο κερέλας βοβ ισινέ πφιρνικανέ, αλλά ο πράγματα σο κερέλας λέσκο πφραλ ισινέ δίκαια.
13 Μα σαστίνεν, πφραλάλεν, σο μισίνελα-τουμέν ο ντουνιάς. 14 Αμέν τζανάσα ότι νακχλάμ κατά μεριπέ κι ζωή, επειδή μανγκάσα ι πφραλέν. Οντουβά σο να μανγκέλα ι πφραλέν ατσσόλα κο μεριπέ. 15 Κον μισίνελα πι πφραλές ισί τζενό σο μουνταρέλα,* ντα τζανένα ότι καέκ τζενό σο μουνταρέλα να κα τζουβντιόλ για πάντα. 16 Αμέν σικλιλάμ ι αγάπη σόσκε βοβ ντινάς πι ζωή* αμένγκε, ντα αμέν ισινάμ υποχρεωμέ τι ντας αμαρί ζωή* αμαρέ πφραλένγκε. 17 Όμως, άμα εκ τζενό τθερέλα σαρέ οντουλά σο χρειαζίντιβελα για τι τζουβντιόλ ντα ντικχέλα πι πφραλές τι τθερέλ ανάγκη αλλά να τζιτζίνελα λέσκε, σαρ αβέλα-πες τι βακερέλ ότι μανγκέλα ι Ντεβλές; 18 Μο τσσαβορέ, δεν πρέπει τι μανγκάς ο εκ ι γιαβερές σάντε αμαρέ λαφίντζαρ, αλλά τι σικαβάς ότι μανγκάσα μπαγιά ο εκ ι γιαβερές οντουλέντζαρ σο κεράσα.
19 Ανταλέσταρ κα αγαβάς ότι αβάσα κατά αλήθεια, ντα κα αβάς σίγουροι αντρέ αμαρέ γκίστε* ότι ο Ντεβέλ μανγκέλα-αμέν, 20 ατζέ-ντα άμα αμαρό γκι κρίνελα-αμέν διάφορε πραγματένγκε. Τι ντας-αμέν γκοντί ότι ο Ντεβέλ ισί πο μπαρό αμαρέ γκίσταρ ντα τζανέλα-λεν σαρέ. 21 Πφραλάλεν, άμα αμαρό γκι να κρίνελα-αμέν, μπορίνασα τι τζας πασέ κο Ντεβέλ χωρίς νταρ. 22 Ντα σο-ντα τι μανγκάς λέσταρ ντέλα-λες αμέντε, επειδή κεράσα λέσκε εντολές ντα κεράσα οντουβά σο ισί σουκάρ λέσκε γιακχίντε. 23 Ανταγιά ισί λέσκι εντολή: Τι τθεράς πίστη κο ναβ λέσκε Τσσαβέσκο, κι Ιησού Χριστόσκο, ντα τι μανγκάς ο εκ ι γιαβερές, σαρ ντινάς-αμέν εντολή βοβ. 24 Οντουβά σο κερέλα λέσκε εντολές ατσσόλα ενωμέ ι Ντεβλέσαρ, ντα ο Ντεβέλ ατσσόλα ενωμέ λέσαρ. Ντα χάρη κο πνεύμας σο ντινάς-αμέν, τζανάσα ότι βοβ ατσσόλα ενωμέ αμέντζαρ.