Ο Ευαγγέλιος σο Γραφιντάς ο Ματθαίος

25 »Η Βασιλεία ι ουρανόσκι ισί σαρ ντες τσσαγιά* σο λιντέ πουμαρέ λυχνάρια ντα νικίστιλε τι ντικχέν ι τζαμουτρές. 2 Παντς ανταλένταρ ισινέ ντινιλιά ντα παντς γκοντιαβέρ. 3 Σόσκε ο ντινιλιά λιντέ πουμαρέ λυχνάρια, αλλά να λιντέ λάδι παλά-πουμέντε. 4 Όμως ο γκοντιαβέρ λιντέ πουμαρέ λυχνάρια ντα λάδι παλά-πουμέντε. 5 Επειδή ο τζαμουτρό αργίνελας, σαριλέν λιντάς-λεν λίντρα ντα σοτέ. 6 Αντρέ κι ιράτ ασούντιλε ζουρανές ακαλά λάφια: “Άκ’ ο τζαμουτρό! Νικιόν τι ντικχέν-λες”. 7 Αζομάν σαρέ οντουλά τσσαγιά ιστίντιλε ντα πφαμπαρντέ* πουμαρέ λυχνάρια. 8 Ο ντινιλιά βακερντέ κο γκοντιαβέρ: “Ντεν-αμέν χάνικ τουμαρέ λαδίσταρ, σόσκε αμαρέ λυχνάρια ατζεχάνικ κα μερέν”. 9 Ο γκοντιαβέρ βακερντέ: “Μπέκιμ μα τι ερεσέλ εμ αμένγκε εμ τουμένγκε. Τζαν πο λατσσές οντουλέντε σο μπικινένα ντα κινέν τουμένγκε”. 10 Οτθέ σο νασένας για τι κινέν λάδι, αβιλό ο τζαμουτρό. Ο τσσαγιά σο ισινέ έτοιμες ντινέ λέσαρ αντρέ κο μπιαβ, ντα η πόρτα πφαντιλί. 11 Πο σοράν, αβιλέ ο γιαβερά-ντα τσσαγιά ντα βακερντέ: “Κύριε, κύριε, πούταρ αμένγκε!” 12 Βοβ βακερντάς: “Μπαγιά βακεράβα τουμένγκε, να τζανάβα-τουμέν”.

13 »Οτθάρ, τι αβέν τζανγκαντέ, σόσκε να τζανένα ούτε ο ντιβές ούτε ο σαάτι.

14 »Ατζέκ, η Βασιλεία ισί σαρ εκ τζενό σο κα τζάλας γιαβερέ τθεμέστε. Οτθάρ, ντινάς βίκος πι δουλόν ντα μουκχλάς λένγκε οντουλά σο τθερέλας. 15 Ντινάς κο κάθε εκ ανταβά σο μπορίνελας τι κερέλ κουμάντος, εκχέστε παντς τάλαντα,* γιαβερέστε ντούι ντα εκχέ γιαβερέστε εκ. Ντα γκιλό γιαβερέ τθεμέστε. 16 Οντουβά σο λιντάς ο παντς τάλαντα γκιλό χωρίς τι χασαρέλ σαάτι τι κερέλ μπουτί ανταλέ λοβέντζαρ, ντα νικαντάς ατζέ παντς. 17 Αντικάς οντουβά-ντα σο λιντάς ο ντούι ντανέ νικαντάς ατζέ ντούι. 18 Αλλά ο δούλος σο λιντάς σάντε εκ τανό γκιλό ντα πραχουντάς πι κυριόσκε λοβέ.*

19 »Σοράν μπουτέ βακιτίσταρ, αβιλό ο κύριος οντουλέ δουλόνγκο για τι ντικχέλ σο κερντέ λέσκε λοβέντζαρ. 20 Οτθάρ, γκιλό πασέ οντουβά σο λιντάας ο παντς τάλαντα, αντάς ατζέ παντς τάλαντα ντα βακερντάς: “Κύριε, μουκχλάν μάνγκε παντς τάλαντα. Ντικχ, νικαντόμ ατζέ παντς”. 21 Λέσκο κύριος βακερντάς λέσκε: “Μπουτ λατσσές κερντάν. Ισινάν λατσσό ντα πιστός δούλος! Ισινάνας πιστός κο χάνικ. Κα τσσουβάβ-τουτ υπεύθυνος μπουτέ πραγματέντε. Τσσουβ-τουτ κι χαρά τι κυριόσκι”. 22 Σοράν, γκιλό πασέ οντουβά σο λιντάας ο ντούι τάλαντα ντα βακερντάς: “Κύριε, μουκχλάν μάνγκε ντούι τάλαντα. Ντικχ, νικαντόμ ατζέ ντούι”. 23 Λέσκο κύριος βακερντάς λέσκε: “Μπουτ λατσσές κερντάν. Ισινάν λατσσό ντα πιστός δούλος! Ισινάνας πιστός κο χάνικ. Κα τσσουβάβ-τουτ υπεύθυνος μπουτέ πραγματέντε. Τσσουβ-τουτ κι χαρά τι κυριόσκι”.

24 »Κο τέλος γκιλό πασέ ο δούλος σο λιντάας ο εκ τάλαντος ντα βακερντάς: “Κύριε, τζανάβας ότι ισινάν τζενό σουκέ γκίσκο. Γκίντεσα οτθέ σο να σπειριντάν ντα οτθέ σο να κερντάν μπουτί. 25 Οτθάρ, νταρασάλομ ντα γκιλόμ ντα πραχουντόμ το τάλαντος. Άκ’! Ντάβα-λες τούτε παλάλ”. 26 Ντα λέσκο κύριος βακερντάς: “Ισινάν πφιρνό* ντα σοτό* δούλος! Αφού τζανέας ότι γκίνταβα οτθέ σο να σπειριντόμ ντα οτθέ σο να κερντόμ μπουτί, 27 σόσκε να τσσουντάν μο λοβέ* κι τράπεζα για τι λάβας παλάλ πο μπουτ κάνα κα αβάβας;

28 »”Οτθάρ, λεν ο τάλαντος λέσταρ ντα ντεν-λες οντουλέστε σο τθερέλα ο ντες τάλαντα. 29 Σόσκε κο κάθε εκ σο τθερέλα κα ντιντιόλ πο μπουτ ντα κα τθερέλ μπερεκέτι. Αλλά οντουλέσταρ σο να τθερέλα κα λιντιόλ ατζέ-ντα ανταβά σο τθερέλα. 30 Ντα φουρτίνεν ι άχρηστε δουλός αβρί κο καρανίκι. Οτθέ κα ροβέλ ντα κα σικίνελ πο ντανά”.*

31 »Κάνα κα αβέλ ο Τσσαβό ι τζενέσκο πι ζοριάσαρ* ντα σαρέ ο άγγελοι γιεκ λέσαρ, αζομάν κα μπεσέλ πι μπαρέ θρονόστε. 32 Κα γκιντίντιβεν ανγκλά-λέστε σαρέ ο τθεμά ντα βοβ κα τραμπίνελ ι τζενέν, σαρ ο τσομπάνης τραμπίνελα ι μπρακέν κατά μπουσνιά. 33 Κα τσσουβέλ ι μπρακέν δεξιά πέσταρ ντα ι μπουσνίν αριστερά πέσταρ.

34 »Αζομάν ο Βασιλιάς κα βακερέλ οντουλένγκε σο ισί δεξιά: “Ελάν, τουμέν σο τθερένα μι Νταντέσκι ζαμ, λεν ι Βασιλεία σο λατσσάρντιλι τουμένγκε οτθάρ μπερί σο μπιάντιλε τζενέ κι πφουβ. 35 Σόσκε μποκχάλιλομ ντα ντινέν-μαν τι χαβ. Μουλόμ πανίσκε ντα ντινέν-μαν τι πιαβ. Ισινόμας ξένος ντα πουταρντέν μάνγκε τουμαρό κχερ, 36 νανγκό,* ντα ιριαντέν-μαν. Νασφάλιλομ* ντα ντικχλέν-μαν. Ισινόμας κι φυλακή ντα αβιλέν μάνγκε”. 37 Αζομάν ο δίκαιοι κα βακερέν λέσκε: “Κύριε, κάνα ντικχλάμ-τουτ τι μποκχάλιβες ντα ντινάμ-τουτ τι χας ή τι μερές πανίσκε ντα ντινάμ-τουτ τι πις; 38 Κάνα ντικχλάμ-τουτ ξένος ντα πουταρντάμ τούκε αμαρό κχερ ή νανγκό ντα ιριαντάμ-τουτ; 39 Κάνα ντικχλάμ-τουτ νασφαλό ή κι φυλακή ντα αβιλάμ τούκε;” 40 Ντα ο Βασιλιάς κα βακερέλ λένγκε: “Μπαγιά βακεράβα τουμένγκε: Αφού κερντέν-λεν ανταλά εκχέσκε μι πο χουρντέ πφραλένταρ, κερντέν-λεν μάνγκε-ντα”.

41 »Αζομάν κα βακερέλ οντουλένγκε σο ισί αριστερά: “Νασέν μάνταρ, τουμέν σο τθερένα ι Ντεβλέσκι αρμάν, ντα τζαν κι γιακ* σο να μερέλα ποτές, σο λατσσάρντιλι ι Μπενγκέσκε ντα λέσκε αγγελόνγκε. 42 Σόσκε μποκχάλιλομ αλλά να ντινέν-μαν τι χαβ, ντα μουλόμ πανίσκε αλλά να ντινέν-μαν τι πιαβ. 43 Ισινόμας ξένος αλλά να πουταρντέν μάνγκε τουμαρό κχερ, νανγκό αλλά να ιριαντέν-μαν, νασφαλό ντα κι φυλακή αλλά να ντικχλέν-μαν”. 44 Αζομάν βον κα βακερέν: “Κύριε, κάνα ντικχλάμ-τουτ τι μποκχάλιβες ή τι μερές πανίσκε ή ξένος ή νανγκό ή νασφαλό ή κι φυλακή ντα να υπηρετιντάμ-τουτ;” 45 Αζομάν βοβ κα βακερέλ λένγκε: “Μπαγιά βακεράβα τουμένγκε: Αφού να κερντέν-λεν ανταλά εκχέσκε κατά πο χουρντέ, μάνγκε-ντα να κερντέν-λεν”. 46 Βον κα μερέν για πάντα,* αλλά ο δίκαιοι κα τζουβντιόν για πάντα».