Ο Γράμμας σο Μπουτσσάντιλο κο Εφέσιοι
2 Ο Ντεβέλ τζουβντιαρντάς-τουμέν, παρόλο σο ισινένας σαρ μουλέ ιτιρί κατά λάθη ντα κατά αμαρτίες 2 σο κερένας ανγκλέ, κάνα τζουβντιόνας αντικάς σαρ τζουβντιόλα* ανταβά ντουνιάς. Κερένας ο πράγματα σο μανγκέλα οντουβά σο κερέλα κουμάντος ι μπαρμπάλ. Ανταγιά μπαρμπάλ ισί ο τρόπος σκέψης* σο επηρεάνελα οντουλέν σο να ντένα καν. 3 Βα, σαρέ αμέν ισινάμας σαρ ανταλά τζενέ, σόσκε κεράας ο μπέτι πράγματα σο μανγκέλας αμαρό σώμας ντα ο πράγματα σο σκεφτίναας. Οτθάρ μπερί σο μπιάντιλαμ αξίναας τι σικαβέλ αμένγκε ο Ντεβέλ πι μπαρί χολί, σαρ αξίνενα-λα ο γιαβερά-ντα. 4 Αλλά ο Ντεβέλ τζιτζίνελα* μπουτ σαριλένγκε, ντα επειδή μανγκέλα-αμέν μπουτ, 5 τζουβντιαρντάς-αμέν ντα ενωντάς-αμέν ι Χριστόσαρ, κάνα ισινάμας σαρ μουλέ ιτιρί αμαρέ αμαρτιένταρ. Ντα ι Ντεβλέσκε μπαρέ λατσσιμάσαρ σωσάλεν. 6 Ντα επειδή ισινάμ μαθητές ι Χριστόσκε, ι Ιησούσκε, ο Ντεβέλ τζουβντιαρντάς-αμέν λέσαρ ντα τσσουντάς-αμέν τι μπεσάς γιεκ λέσαρ κο ουρανός, 7 ντα αντικάς κο βακίτι* σο κα αβέλ, κα σικαβέλ μπουτ μπαρό λατσσιπέ κάνα κα κερέλ λατσσέ πράγματα αμένγκε σο ισινάμ μαθητές ι Χριστόσκε, ι Ιησούσκε.
8 Τουμέν σο τθερένα πίστη σωσάλεν ι Ντεβλέσκε μπαρέ λατσσιμάσαρ. Ντα ανταβά νανέ τουμαρέ ζοριάταρ, αλλά ισί δώρος κατά Ντεβέλ. 9 Νανέ οντουλένταρ σο κερένα τουμέν, για μα τι τθερέλ καέκ τζενό λόγος τι ισαρέλ-πες. 10 Ισινάμ κερντέ κατά Ντεβέλ, ντα επειδή ισινάμ μαθητές ι Χριστόσκε, ι Ιησούσκε, λατσσάρντιλαμ για τι κεράς ο λατσσέ πράγματα σο αποφασιντάς ο Ντεβέλ πο τζανγκλέ τι κεράς.
11 Οτθάρ, τι ντεν-τουμέν γκοντί ότι οντουλά σο κερντέ περιτομή τζενένγκε βαστέντζαρ βακερένας τουμένγκε, σο ισινέν γιαβερέ τθεμένταρ, ότι ισινέν τζενέ σο να κερντέ περιτομή. 12 Οντουβά βακίτι να τζανένας ι Χριστός, να τθερένας καέκ σχέση ι λαόσαρ Ισραήλ ντα να ισινένας αντρέ κο συμφωνίες σο ντινάς πο λάφι ο Ντεβέλ. Τζουβντιόνας κο ντουνιάς χωρίς τι τθερέν ελπίδα ντα χωρίς τι τζανέν ι Ντεβλές. 13 Αλλά ακανά σο ισινέν μαθητές ι Χριστόσκε, ι Ιησούσκε, τουμέν σο ισινένας ντουρ κατά Ντεβέλ αβιλέν πασέ κο Ντεβέλ αντράλ κατά ρατ ι Χριστόσκο. 14 Ο Χριστός αντάς αμένγκε ι ειρήνη, κερντάς ο ντούι ομάδες τι αβέν εκ ντα περαντάς ο ντουβάρι σο χωρίνελας-λεν. 15 Αντράλ πι μεριμάσταρ* ακυρωντάς ο νόμους ντα ο εντολές σο ισινέ κο Νόμος κι Μωυσίσκο. Ανταβά Νόμος ισινέ σο κερέλας ι ντουέ ομαδέν τι αβέν ντουσμάνια.* Σοράν, λατσσαρντάς εκ νεβί ομάδα ανταλέ ντουέ ομαδένταρ. Αφού βον ισί μαθητές ι Χριστόσκε, κερντάς-λεν τι τθερέν ειρήνη η εκ ι γιαβεράσαρ 16 ντα βοηθιντάς-λεν μπουτ τι κερέν σαρ εκ σώμας ειρήνη ι Ντεβλέσαρ αντράλ κατά ντουκχένγκο κας,* σόσκε ο Χριστός αντράλ πι μεριμάσταρ κερντάς-λεν μα τι αβέν ντουσμάνια. 17 Ντα αβιλό ντα μουτθαντάς τουμένγκε σο ισινένας ντουρ κατά Ντεβέλ ντα οντουλένγκε σο ισινέ πασέ κο Ντεβέλ ο λατσσέ αμπέρια ότι κα αβέλ ειρήνη, 18 επειδή αντράλ λέσταρ αμέν, ο ντούι-ντα ομάδες, μπορίνασα τι προσευχίντιβας αμαρέ Νταντέστε σο ισί κο ουρανός σόσκε σαρέ λάσα ο ίδιος άγιος πνεύμας.
19 Άρα, ακανά να ισινέν τζενέ γιαβερέ τθεμένταρ, αλλά ο τθεμ ι γιαβερέ αγιόνγκο αβιλό τουμαρό-ντα τθεμ,* ντα ισινέν αντρέ κι φαμιλί κι Ντεβλέσκι. 20 Ντα ισινέν σαρ μπαρά σο χτιντάς ο Ντεβέλ οπράλ κο θεμέλιος κι αποστολόνγκο ντα κι προφητένγκο, αλλά ο πο σημαντικός μπαρ ι γωνιάκο ισί ο Χριστός Ιησούς. 21 Ισί ενωμέ λέσαρ σαρό ανταβά κχερ, ντα σαρέ λέσκε κομμάτια ισί λατσσές ενωμέ ο εκ ι γιαβερέσαρ. Ο κχερ μπαριόλα ντα αβέλα άγιος ναός ι Ιεχωβάσκε.* 22 Επειδή ισινέν ενωμέ ι Χριστόσαρ, ο Ντεβέλ χτίνελα-τουμέν ντα αβένα εκ τθαν για τι μπεσέλ Βοβ αντράλ κατά άγιος πνεύμας.