Ο Ευαγγέλιος σο Γραφιντάς ο Ιωάννης
19 Αζομάν ο Πιλάτος λιντάς ι Ιησούς ντα νταπλάς-λες βουρδαλόσαρ.* 2 Ντα ο στρατιώτες κχουντέ καντρέντζαρ εκ στέμμας ντα τσσουντέ-λες λέσκε σορέστε ντα ιριαντέ-λες εκ μοβ σέι, 3 ντα τζάνας πασέ λέστε ντα βακερένας: «Γεια, βασιλιά ι Ιουδαιόνγκο!» Ατζέ, ντένας-λες σαμάρια. 4 Ο Πιλάτος νικίστιλο πάλι αβρί ντα βακερντάς λένγκε: «Ντικχέν! Ανάβα-λες τουμένγκε αβρί για τι τζανέν ότι να αρακχάβα κάτι λέστε για τι κατηγορίναβ-λες». 5 Οτθάρ, ο Ιησούς νικίστιλο αβρί ντα ιρίλας ο καντραλό στεφάνι ντα ο μοβ σέι. Ντα ο Πιλάτος βακερντάς λένγκε: «Άκ’ ο τζενό!» 6 Όμως, κάνα ντικχλέ-λες ο μπαρέ ιερείς ντα οντουλά σο αρακχαβένας ο ναός, ντινέ βίκος: «Ιμπλάβ-λες κο κας! Ιμπλάβ-λες κο κας!» Ο Πιλάτος βακερντάς λένγκε: «Λεν-λες τουμέν ντα ιμπλαβέν-λες κο κας, σόσκε με να αρακχάβα κάτι λέστε για τι κατηγορίναβ-λες». 7 Ο Ιουδαίοι βακερντέ λέσκε: «Σαρ βακερέλα ο νόμος σο τθεράσα αμέν πρέπει τι μερέλ, σόσκε κερντάς πο νεαυτός τσσαβό ι Ντεβλέσκο».
8 Κάνα ο Πιλάτος ασουντάς λένγκε λάφια, νταρασάλο ατζέ πο μπουτ 9 ντα τσσουντάς-πες πάλι πι κχερέστε ντα βακερντάς κο Ιησούς: «Κατάρ ισινάν;» Αλλά ο Ιησούς να βακερντάς λέσκε. 10 Οτθάρ, ο Πιλάτος βακερντάς λέσκε: «Να κα βακερές μάνγκε; Να τζανέσα ότι τθεράβα ι ζορ τι μουκχάβ-τουτ ή τι ιμπλαβάβ-τουτ κο κας;» 11 Ο Ιησούς βακερντάς λέσκε: «Να κα τθερέας ι ζορ τι κερές μάνγκε τίποτα άμα να ντιντιλόας-τουτ ο δικαίωμας κατά Ντεβέλ. Άκ’ σόσκε οντουβά σο ντινάς-μαν τι βαστέντε τθερέλα πο μπαρί αμαρτία».
12 Οτθάρ, ο Πιλάτος ρόντελας εκ τρόπος τι μουκχέλ-λες, αλλά ο Ιουδαίοι ντινέ βίκος: «Άμα κα μουκχές ανταλέ τζενές, να ισινάν αμάλ* ι Καισαράσκο. Κον κερέλα πο νεαυτός βασιλιάς τζάλα κόντρα κο Καίσαρας». 13 Κάνα ο Πιλάτος ασουντάς ανταλά λάφια, αντάς αβρί ι Ιησούς ντα μπεσλό κι καρέκλα κι δικαστηριόσκι, εκχέ τθανέστε σο βακέρντιβελα Λιθόστρωτος,* ντα κο εβραϊκά Γαββαθά. 14 Αζομάν ισινέ ο ντιβές σο ετοιμάντιβενας* για το Πάσχας. Ισινέ πασέ 12:00 κο μεσημέρι.* Ντα βακερντάς κο Ιουδαίοι: «Άκ’ τουμαρό βασιλιάς!» 15 Αλλά βον ντινέ βίκος: «Λε-λες! Λε-λες! Ιμπλάβ-λες κο κας!» Ο Πιλάτος βακερντάς λένγκε: «Τουμαρέ βασιλιάς τι ιμπλαβάβ κο κας;» Ο μπαρέ ιερείς βακερντέ: «Σάντε εκχέ βασιλιάς τθεράσα, ι Καισαράς». 16 Αζομάν ντινάς-λες λέντε για τι ιμπλαβέν-λες κο κας.
Βον λιντέ ι Ιησούς. 17 Ντα ο Ιησούς, καζόμ ακχαρέλας ο κας ι ντουκχένγκο,* γκιλό κο τθαν σο τθερέλα ο ναβ Μουλικανό Σορό, σο κο εβραϊκά βακέρντιβελα Γολγοθάς. 18 Οτθέ ιμπλαντέ-λες κο κας πασέ ντουέ γιαβερέντε, εκχές ακατάρ ντα ι γιαβερές οκουτάρ, ντα κο μασκάρ ισινέ ο Ιησούς. 19 Ο Πιλάτος γραφιντάς-ντα εκ ταμπέλα ντα τσσουντάς-λα οπράλ κο κας κι ντουκχένγκο.* Ντα η ταμπέλα βακερέλας: «Ιησούς ο Ναζωραίος, ο βασιλιάς ι Ιουδαιόνγκο». 20 Μπουτ Ιουδαίοι διαβαντέ ι ταμπέλα, σόσκε ο τθαν σο ιμπλαντέ κο κας ι Ιησούς ισινέ πασέ κι Ιερουσαλήμ. Ντα η ταμπέλα ισινέ γραμμέ κο εβραϊκά, κο λατινικά ντα κο μπαλαμανές. 21 Αλλά ο μπαρέ ιερείς ι Ιουδαιόνγκε βακερντέ κο Πιλάτος: «Μα γράφινε: “Ο βασιλιάς ι Ιουδαιόνγκο”, αλλά ότι βοβ βακερντάς: “Ισινόμ βασιλιάς ι Ιουδαιόνγκο”». 22 Ο Πιλάτος βακερντάς: «Σο γραφιντόμ γραφιντόμ».
23 Κάνα ο στρατιώτες ιμπλαντέ κο κας ι Ιησούς, λιντέ λέσκε αβραϊνέ σέα ντα κερντέ-λεν σταρ κοτορά, εκ ι κάθε στρατιωτίσκε. Λιντέ ο αντραϊνέ-ντα σέα. Αλλά ανταλά να ισινέ ιτς σουβντέ, σόσκε ισινέ κχουντέ οπράλ μέχρι τελέ. 24 Οτθάρ, βακερντέ ο εκ κο γιαβέρ: «Μα τι πφαραβάς-λεν, αλλά τι τσσουβάς κλήρος για τι ντικχάς κον κα λελ-λεν». Ανταβά αβιλό-πες για τι νικιόν μπαγιά ο λάφια ι Γραφιάκε: «Ιλιαντέ μο σέα ο εκ ι γιαβερέσαρ ντα τσσουντέ κλήρος λένγκε». Ντα μπαγιά ο στρατιώτες κερντέ-λεν ανταλά.
25 Πασέ κο κας κι ντουκχένγκο* κι Ιησούσκο ατσσόνας οπράλ κο πιντρέ λέσκι ντάι ντα η πφεν λέσκε νταγιάκι, αλλά εμ η Μαρία, σο λάκο ρομ ισινέ ο Κλωπάς, εμ η Μαρία η Μαγδαληνή. 26 Οτθάρ, κάνα ο Ιησούς ντικχλάς πι νταγιά ντα πι αγαπημέ μαθητής οτθέ πασέ, βακερντάς πι νταγιάκε: «Τζουβλίε, άκ’ το τσσαβό!» 27 Σοράν βακερντάς κο μαθητής: «Άκ’ τι ντάι!» Ντα οντουλέ σαατίσταρ, ο μαθητής λιντάς-λα πι κχερέστε.
28 Σοράν ανταλέσταρ, κάνα ο Ιησούς τζανέλας ότι σαρέ αβιλέας-πες, για τι νικιόν μπαγιά ο λάφια ι Γραφιάκε βακερντάς: «Μουλόμ πανίσκε». 29 Οτθέ ισινέ εκ κχορό πφερντό σουταλί μολ. Τσσουντέ εκ σφουγγάρι σουσλό σουταλέ μολιάσαρ οπράλ εκχέ καστέστε* ντα αντέ-λες λέσκε μόστε. 30 Τσσουντέ ι σουταλί μολ λέσκε μόστε, ντα σοράν ο Ιησούς βακερντάς: «Αβιλό-πες!» Ντα περαντάς πο σορό ντα μουλό.*
31 Επειδή ισινέ Προετοιμασία, ντα για μα τι ατσσόν ο σώματα οπράλ κο καστά κι ντουκχένγκε κο Σάββατος (σόσκε οντουβά Σάββατος ισινέ μπαρό), ο Ιουδαίοι μανγκλέ κατά Πιλάτος τι τσσουβέλ τζενέν τι πφανγκέν λένγκε τσανγκά ντα τι λεν-λεν οτθάρ. 32 Ντα αβιλέ ο στρατιώτες ντα πφανγκλέ ο τσανγκά ι εκχέ μουρσέσκε, αλλά ι γιαβερέσκε-ντα σο ισινέ κο κας πασέ λέστε. 33 Όμως, κάνα αβιλέ κο Ιησούς, ντικχλέ ότι ισινέ μουλό, οτθάρ να πφανγκλέ λέσκε τσανγκά. 34 Αλλά εκ κατά στρατιώτες πφαραντάς-λες εκχέ κονταρίσαρ κο παΐδια ντα οντιά στιγμή νικίστιλο ρατ ντα πανί. 35 Ντα οντουβά σο ντικχλάς-λεν ανταλά βακερντάς-λεν κο τζενέ ντα λέσκε λάφια ισί μπαγιά, ντα τζανέλα ότι οντουλά σο βακερέλα ισί μπαγιά, για τι πακιάν τουμέν-ντα. 36 Ανταλά αβιλέ-πες για τι νικιόν μπαγιά ο λάφια ι Γραφιάκε: «Καέκ λέσκε κοκαλένταρ να κα πφανγκιόλ». 37 Πάλι, η Γραφή βακερέλα γιαβερτθέ: «Βον κα ντικχέν κάρινγκ οντουλέστε σο πφαραντέ κονταρίσαρ».
38 Σοράν ανταλένταρ, ο Ιωσήφ κατά Αριμαθαία, σο ισινέ μαθητής ι Ιησούσκο αλλά αποτσοράλ σόσκε νταρέλας κατά Ιουδαίοι, μανγκλάς κατά Πιλάτος τι λελ ο σώμας ι Ιησούσκο ντα ο Πιλάτος μουκχλάς-λες τι λελ-λες. Αντικάς, γκιλό ντα λιντάς ο σώμας. 39 Γκιλό ο Νικόδημος-ντα, οντουβά σο ανγκλέ τθερέλας αβιλό κο Ιησούς αντρέ κι ιράτ, ντα αντάς σμύρνα ντα αλόη σο ισινέ πασέ 33 κιλά.* 40 Λιντέ ο σώμας ι Ιησούσκο ντα πακιαρντέ-λες λινέ κοτορέντζαρ ντα τσσουντέ ο πράγματα-ντα σο κχάντενας μίσκι, αντικάς σαρ ισί σικλέ τι κερέν ο Ιουδαίοι κάνα πραχούνενα ι τζενέν. 41 Ισινέ εκ κήπος οντουλέ τθανέστε σο ιμπλάντιλοας ο Ιησούς κο κας, ντα αντρέ κο κήπος ισινέ εκ νεβό μεζάρι* σο να τσσουντέας ατζέ καεκχές οτθέ. 42 Επειδή ισινέ η Προετοιμασία ι Ιουδαιόνγκι ντα ο μεζάρι ισινέ πασέ, τσσουντέ ι Ιησούς οτθέ.