Ο Ευαγγέλιος σο Γραφιντάς ο Ματθαίος

6 »Τθερέν τουμαρί γκοντί μα τι κερέν δίκαια πράγματα ανγκλάλ κο τζενέ για τι ντικχέν-τουμέν, σόσκε αντικάς να κα λεν καέκ ζαμ τουμαρέ Νταντέσταρ σο ισί κο ουρανός. 2 Οτθάρ, κάνα κερέσα λατσσιπέ ι τσορορένγκε, μα κερ-λες νταμντουλίκι. Αντικάς κερένα οντουλά σο ισί ντουέ μουένγκε κο συναγωγές ντα κο ντρομά για τι ισαρέν-λεν ο τζενέ. Μπαγιά βακεράβα τουμένγκε: Σάντε ανταβά κα ατσσόλ λένγκε. 3 Αλλά κάνα τούι κερέσα λατσσιπέ ι τσορορένγκε, μα τι τζανέλ το εκ βας σο κερέλα ο γιαβέρ.* 4 Κερ ο λατσσιπέ γκεραντές. Αζομάν το Ντατ σο ντικχέλα-τουτ γκεραντέ τθανέσταρ, κα ντελ-τουτ ζαμ.

5 »Ντα μα κερέν τουμαρέ προσευχές σαρ κερένα-λεν ο τζενέ σο ισί ντουέ μουένγκε. Βον μπεϊντίνενα* τι ατσσόν οπράλ κο πιντρέ ντα τι προσευχίντιβεν αντρέ κο συναγωγές ντα ανγκλάλ κο μπαρέ ντρομά για τι ντικχέν-λεν ο τζενέ. Μπαγιά βακεράβα τουμένγκε: Σάντε ανταβά κα ατσσόλ λένγκε. 6 Τούι όμως, κάνα προσευχίντιβεσα, τζα αντρέ τι δωματιόστε, πφάντε τι πόρτα ντα σοράν κερ προσευχή τι Νταντέστε σο ισί γκεραντό. Αζομάν το Ντατ σο ντικχέλα-τουτ γκεραντέ τθανέσταρ, κα ντελ-τουτ ζαμ. 7 Τουμαρέ προσευχιέντε, μα βακερέν εμ ο ίδια ντα ο ίδια, σαρ κερένα ο τζενέ κατά γιαβερά τθεμά. Βον αμντίνενα ότι ο Ντεβέλ κα ασουνέλ-λεν ιτιρί κατά μπουτ λάφια σο βακερένα. 8 Μα τι αβέν σαρ λέντε, σόσκε τουμαρό Ντατ τζανέλα σο τθερένα ανάγκη ατζέ-ντα πριν τι μανγκέν-λες λέσταρ.

9 »Αντικάς τι προσευχίντιβεν τουμέν:

»“Ντάντε σο ισινάν κο ουρανός, τι αγιάντιβελ το ναβ.* 10 Τι αβέλ τι Βασιλεία. Τι αβέλ-πες οντουβά σο μανγκέσα, σαρ κο ουρανός, αντικάς οπράλ κι πφουβ-ντα. 11 Ντε-αμέν αντιβές αμαρό μαντρό ανταλέ ντιβεσέσκε. 12 Ντα συγχώρινε αμαρέ αμαρτίες,* σαρ αμέν-ντα συγχωριντάμ οντουλέν σο αμαρτιντέ κόντρα αμέντε.* 13 Ντα μα μουκχ τι περάς* κο πειρασμός, αλλά σώνε-αμέν κατά πφιρνό”.*

14 »Άμα κα συγχωρίνεν ι τζενένγκε λάθη, τουμαρό Ντατ σο ισί κο ουρανός κα συγχωρίνελ τουμέν-ντα, 15 αλλά άμα να κα συγχωρίνεν ι τζενένγκε λάθη, τουμαρό Ντατ-ντα να κα συγχωρίνελ τουμαρέ λάθη.

16 »Κάνα κερένα νηστεία,* μα τι αβέν σαρ ο τζενέ σο ισί ντουέ μουένγκε. Βον περαβένα πουμαρό μούι ντα μουκχένα-λες μελαλό* για τι ντικχέν ο τζενέ ότι κερένα νηστεία. Μπαγιά βακεράβα τουμένγκε: Σάντε ανταβά κα ατσσόλ λένγκε. 17 Αλλά τούι, κάνα κερέσα νηστεία, τσσουβ λάδι τι σορέστε ντα τθοβ το μούι, 18 για μα τι ντικχέν ο τζενέ ότι κερέσα νηστεία, αλλά σάντε το Ντατ σο ισί γκεραντό. Αζομάν το Ντατ σο ντικχέλα-τουτ γκεραντέ τθανέσταρ, κα ντελ-τουτ ζαμ.

19 »Μα γκίντεν τουμένγκε θησαυρούς κι πφουβ. Οτθέ, ο σκόρος ντα η σκουριά καταστραφίνενα ντα ο τσορά* τσορένα. 20 Οκιά μπάνταρ, γκίντεν τουμένγκε θησαυρούς κο ουρανός. Οτθέ, νανέ σκόρος ντα σκουριά για τι καταστραφίνεν ντα νανέ τσορά για τι τσορέν. 21 Σόσκε κάι ισί το θησαυρός, οτθέ κα αβέλ το γκι-ντα.

22 »Ο λυχνάρι ι σωμάσκο ισί η γιακχ. Οτθάρ, άμα τθερέσα τι γιακχ σάντε εκχέ πραγμάστε,* σαρό το σώμας κα αβέλ κο φως.* 23 Αλλά άμα τθερέσα μπίτσαλι* γιακχ, σαρό το σώμας κα αβέλ κο καρανίκι. Άμα ο φως αντρέ τούτε ισί καρανίκι, καζόμ μπαρό καρανίκι ισί ανταβά!

24 »Καέκ ναστί υπηρετίνελα σαρ δούλος ντουέ κυριόν, σόσκε ή κα μισίνελ ι εκχές ντα κα μανγκέλ ι γιαβερές ή κα ατσσόλ πασέ κο εκ ντα να κα σεβάνελ ι γιαβερές. Αντικάς τουμέν-ντα ναστί υπηρετίνενα σαρ δούλοι εμ ι Ντεβλές εμ ο Χουλανιπέ.

25 »Οτθάρ, βακεράβα τουμένγκε: Μα αγχώνεν πραγματένγκε σο τθερένα τι κερέν τουμαρέ ζωγιάσαρ* ντα τουμαρέ σωμάσαρ, σαρ ισί ο χαμπέ, ο πανί ντα ο ιριαϊπέ. Νανέ η ζωή* πο σημαντική κατά χαμπέ ντα ο σώμας πο σημαντικός κατά σέα; 26 Τσσουβέν σημασία κο τσιρικλέ. Να σπειρίνενα ούτε γκίντενα για τι τσσουβέν κο αποθήκες, όμως τουμαρό Ντατ σο ισί κο ουρανός ντέλα-λεν τι χαν. Να ισινέν τουμέν πο σημαντικοί λένταρ; 27 Κον τουμένταρ, άμα αγχώνελα, μπορίνελα τι κερέλ-πες τι τζουβντιόλ εκ στάλα ατζέκ; 28 Ντα σόσκε αγχώνενα ι σεΐνγκε σο κα ιρίν; Σικλιόν κατά λουλούδια σο μπαριόνα κο χωράφια. Να μαρένα-πες ούτε κχουβένα σέα. 29 Αλλά βακεράβα τουμένγκε ότι ατζέ-ντα ο Σολομώντας σαρέ πι χουλανιμάσαρ να ισινέ ζουζιμέ σαρ εκ τανό ανταλένταρ. 30 Άμα αντικάς ιριαβέλα ο Ντεβέλ ανταλά φυτά, σο αντιβές ισί ατθέ ντα γιαβίν φουρτίνενα-λεν κι γιακ,* καζόμ πο μπουτ κα ιριαβέλ τουμέν! Σο χουρντί ισί τουμαρί πίστη! 31 Οτθάρ, ποτές μα αγχώνεν ντα μα βακερέν: “Σο κα χας;” ή “Σο κα πιας;” ή “Σο κα ιριάς;” 32 Σόσκε σαρέ ανταλά πράγματα μανγκένα μπουτ τι τθερέν-λεν ο τζενέ σο ισί γιαβερέ τθεμένταρ. Τουμαρό Ντατ σο ισί κο ουρανός τζανέλα ότι τθερένα-λεν ανάγκη σαρέ ανταλά.

33 »Οτθάρ, συνεχίνεν τι τσσουβέν πο ανγκλάλ σαριλένταρ ι Βασιλεία ντα ι Ντεβλέσκι δικαιοσύνη, ντα σαρέ ανταλά ο γιαβερά πράγματα κα ντιντιόν-τουμέν. 34 Οτθάρ, ποτές μα αγχώνεν ι γιαβερέ ντιβεσέσκε, σόσκε ο γιαβέρ ντιβές κα τθερέλ πιρέ. Ερεσένα ο προβλήματα σο τθερένα αντιβές.